Read Iu Mien Yo^su^waa 19 Bible Online

Yo^su^waa 19 - Iu Mien bible

Yo^su^waa 19

¹Dingc da'nyeic nzunc weic bun nqoi ndau, ndortv zuqc Si^me^on Fingx ziux ninh mbuo nyei bungh buonc. Ninh mbuo nzipc nyei buonc yiem Yu^ndaa Fingx nyei deic gu'nyuoz.

²Ninh mbuo duqv nzipc nyei zingh maaih, Mbe^e^qe^mbaa, (se Qe^mbaa) caux Mo^laa^ndaa,

³Haasaan Su^aan, Mbaalaa, Esem,

⁴En^to^latv, Mbe^tu^en, Homaa,

⁵Sikc^laakv, Mbetc Maan^kaa^mbotc, Haasaan Sux^saax,

⁶Mbetc Le^mbaa^otc caux Saa^lu^hen. Yietc zungv maaih ziepc faam norm zingh caux wuov deix zingh nyei fiuv-laangz.

⁷Maaih Aayin, Limmon, E^te caux Aaqan. Yietc zungv maaih biei norm zingh caux wuov deix zingh nyei fiuv-laangz.

⁸Liemh maaih weih gormx wuov deix zingh nyei yietc zungv fiuv-laangz cuotv mingh taux Mbaa^aa^latv Mbe^e Zingh, se yiem Negepc Deic nyei Laamaa Zingh. Naaiv se Si^me^on Fingx ziux ninh mbuo nyei bungh buonc duqv nzipc nyei buonc.

⁹Si^me^on Fingx nzipc nyei buonc yiem Yu^ndaa Mienh nyei buonc paaiv daaih, weic zuqc Yu^ndaa Fingx duqv nyei buonc gauh jangv ninh mbuo qiemx zuqc longc. Weic naaiv Si^me^on Fingx nzipc nyei buonc cingx daaih yiem Yu^ndaa nyei deic gu'nyuoz.

¹⁰Dingc da'faam nzunc weic bun nqoi ndau, ndortv zuqc Se^mbu^lun Fingx nyei buonc ziux ninh mbuo nyei bungh buonc. Ninh mbuo nzipc nyei buonc ndau nyei gapv-jaaix nzuiz mingh taux Saax^litv Zingh.

¹¹Gapv-jaaix aengx mingh fai bung maengx, jiex taux Maa^le^an Zingh,[64] aengx mingh daaux jienv Ndapc^mbe^setv Laangz, ziouc mingh taux Yokv^ne^am Zingh dong bung nyei ndoqv.

¹²Yiem Saax^litv Zingh, gapv-jaaix aengx mingh ganh bung, se dong bung, huin mingh mba'hnoi cuotv maengx taux Kitv^lotv Taa^mbo Zingh nyei gapv-jaaix. Yiem naaic, gapv-jaaix aengx jiex taux Ndaa^mbe^latv Zingh caengx faaux taux Yaafie Mungv.

¹³Gapv-jaaix yiem naaic aengx jiex dong bung huin mba'hnoi cuotv maengx mingh taux Gatc Hefe Laangz, jiex taux Etc Kaasin Zingh, mingh taux Limmon Mungv ziouc ngau hungx jienv Ne^aa Zingh mingh.

¹⁴Baqv bung maengx nyei gapv-jaaix ngau daaih taux Han^naa^ton Zingh ziouc setv wuov Ipc^taa En Horngz.

¹⁵Aengx maaih Katc^daatc Zingh, Naa^haa^laan Zingh, Simlon Zingh, I^ndaa^laa Zingh caux Mbetc^le^hem Zingh. Yietc zungv maaih ziepc nyeic norm zingh caux wuov deix zingh nyei fiuv-laangz.

¹⁶Naaiv deix zingh caux naaiv deix zingh nyei fiuv-laangz benx Se^mbu^lun Fingx ziux ninh mbuo nyei bungh buonc nzipc nyei buonc ndau.

¹⁷Dingc da'feix nzunc weic bun nqoi ndau, ndortv zuqc Itc^saax^kaa Fingx nyei buonc ziux ninh mbuo nyei bungh buonc.

¹⁸Ninh mbuo nyei gapv-jaaix maaih Yitv^le^en, Ke^sunx^lotv, Sunem,

¹⁹Haa^faa^laa^im, Siyon, Aa^naa^haa^laatv,

²⁰Lapv^mbitc, Ki^si^on, E^mbetc,

²¹Lemetv, En Gannim, En Hatc^ndaa caux Mbetc Batc^setv.

²²Gapv-jaaix mingh daaux jienv Taa^mbo, Saa^haa^su^maa caux Mbetc Semetv, aengx camx jienv Jor^ndaen Ndaaih. Yietc zungv maaih ziepc luoqc norm zingh caux wuov deix zingh nyei fiuv-laangz.

²³Naaiv deix zingh caux zingh nyei fiuv-laangz se Itc^saax^kaa Fingx ziux ninh mbuo nyei bungh buonc nzipc nyei buonc.

²⁴Dingc da'hmz nzunc weic bun nqoi ndau, ndortv zuqc Aa^se Fingx nyei buonc ziux ninh mbuo nyei bungh buonc.

²⁵Ninh mbuo nyei gapv-jaaix maaih Henkatc, Haali, Mbeten, Akc^saapv,

²⁶Aa^lam^me^lekv, Aamaatv, caux Misaan. Fai bung maengx nyei gapv-jaaix daaux jienv Kaanmen Mbong caux Si^hox Lipv^naatv.

²⁷Gapv-jaaix aengx ngau, hungx jienv dong bung mingh taux Mbetc Ndaagon Mungv, daaux jienv Se^mbu^lun caux Ipc^taa En Horngz, ziouc mingh baqv bung taux Mbetc Emekv Mungv caux Ne^i^en Mungv, aengx mingh baqv bung jiex taux Kaa^mbun Mungv.

²⁸Gapv-jaaix aengx jiex taux E^mbon Zingh,[65] Le^hopc Zingh, Hammon Zingh caux Kaanaa Zingh, aengx jiex mingh taux Sai^ndorn Domh Zingh.

²⁹Gapv-jaaix aengx ngau nzuonx hungx jienv Laamaa Zingh, aengx mingh taux weih wuonv nyei zingh, Tailaqv. Gapv-jaaix aengx ngau mingh hungx jienv Hosaax Zingh, mingh donx wuov koiv. Aengx maaih Maa^haa^laapv,[66] Akc^sipv,

³⁰Ummaa, Aafekv caux Le^hopc. Yietc zungv maaih nyic ziepc nyeic norm zingh caux wuov deix zingh nyei fiuv-laangz.

³¹Naaiv deix zingh caux naaiv deix zingh nyei fiuv-laangz benx Aa^se Mienh ziux ninh mbuo nyei bungh buonc nzipc nyei buonc.

³²Dingc da'luoqc nzunc weic bun nqoi ndau, ndortv zuqc Napv^taa^li Fingx nyei buonc ziux ninh mbuo nyei bungh buonc.

³³Ninh mbuo nyei gapv-jaaix yiem He^lepv^pe Mungv, yaac yiem Saax^nan^nim Mungv nyei mba'ong zuei ndiangx, jiex Aa^ndaa^mi^ne^gepc Mungv caux Yapv^ne^en Mungv mingh taux Lakv^kum Mungv, mingh setv wuov Jor^ndaen Ndaaih.

³⁴Gapv-jaaix ngau mingh fai bung taux Atc^notv Taa^mbo, yiem naaic jiex mingh taux Hukc^gorkc Mungv. Naamh bung nyei gapv-jaaix caux Se^mbu^lun nyei gapv-jaaix gapv jienv. Fai bung nyei gapv-jaaix caux Aa^se nyei gapv-jaaix gapv jienv. Jor^ndaen Ndaaih yiem dong bung.[67]

³⁵Maaih zingh laatc weih wuonv nyei zingh se Sitc^ndim, Ze^aa, Hammatv, Lakv^katv, Kin^ne^letv,

³⁶Aa^ndaa^maa, Laamaa, Haaso,

³⁷Ke^ndetc, E^nden^i, En Haaso,

³⁸Yilon, Mikv^ndan En, Holem, Mbetc Aanaatv caux Mbetc Semetv. Yietc zungv maaih ziepc juov norm zingh caux naaiv deix zingh nyei fiuv-laangz.

³⁹Naaiv deix zingh caux naaiv deix zingh nyei fiuv-laangz se Napv^taa^li Fingx ziux ninh mbuo nyei bungh buonc nzipc nyei buonc.

⁴⁰Dingc da'cietv nzunc weic bun nqoi ndau, ndortv zuqc Ndaan Fingx ziux ninh mbuo nyei bungh buonc.

⁴¹Ninh mbuo nzipc nyei buonc ndau maaih, Solaa, Etc^taa^on, In Semetv,

⁴²Saa^an^mbin, Ai^yaa^lon, Itc^laa,

⁴³Elon, Tim^naa^haa, E^ko^lon,

⁴⁴En^te^ke, Gipc^mbe^ton, Mbaa^aa^latv,

⁴⁵Ye^hutv, Mbe^ne Mbelaakv, Gatc Limmon,

⁴⁶Me Yaankon, Lakv^kon caux yiem Yapv^faa Zingh doix-ngaanc wuov deix ndau.

⁴⁷Mv baac Ndaan nyei deic-bung zuqc mienh nzaeng mi'aqv. Ndaan Mienh ziouc mingh mborqv Lesem Mungv, caangv duqv daaih, aengx longc nzuqc ndaauv daix nzengc wuov norm zingh nyei mienh yaac bieqc mingh yiem jienv. Ninh mbuo ziouc liepc nguaaz-gorn yiem wuov norm zingh, yaac gan ninh mbuo nyei ong-taaix nyei mbuox heuc Ndaan.

⁴⁸Naaiv deix zingh caux naaiv deix zingh nyei fiuv-laangz se Ndaan Fingx ziux ninh mbuo nyei bungh buonc nzipc nyei buonc.

⁴⁹I^saa^laa^en Mienh zorqv ndau paaiv bun nqoi liuz, nqa'haav ninh mbuo ziouc paaiv deix ndau bun Nun nyei dorn, Yo^su^waa, yiem ninh mbuo nyei buonc gu'nyuoz.

⁵⁰Ziux ZIOUV paaiv nyei waac, ninh mbuo zorqv Yo^su^waa tov yiem E^faa^im Mienh nyei mbong-aiv dorngx wuov norm zingh, Timnaatv Selaa Zingh[68] jiu bun ninh. Yo^su^waa aengx siang-ceix jiez wuov norm zingh ziouc bieqc mingh yiem jienv.

⁵¹E^le^aa^saa sai mienh caux Nun nyei dorn, Yo^su^waa, caux fingx-fingx I^saa^laa^en Mienh nyei bieiv zeiv yiem Silo Mungv, Wuic Buangh Ndopv-Liuh nyei gaengh ndaangc, yaac yiem ZIOUV nyei nza'hmien dingc maengc mangc weic paaiv ndau bun nqoi. Hnangv naaic ninh mbuo ziouc paaiv ndau bun nqoi nzengc mi'aqv.