Read Iu Mien Yo^su^waa 21 Bible Online

Yo^su^waa 21 - Iu Mien bible

Yo^su^waa 21

¹Wuov zanc Lewi Mienh nyei bungh buonc bieiv zeiv daaih lorz E^le^aa^saa sai mienh caux Nun nyei dorn, Yo^su^waa, caux mouz fingx I^saa^laa^en Mienh nyei bungh buonc bieiv zeiv.

²Ninh mbuo yiem Kaa^naa^an Deic-Bung, Silo Mungv, gorngv mbuox naaiv deix mienh, “ZIOUV longc Mose heuc meih mbuo paaiv deix zingh bun yie mbuo yiem, liemh wuov deix zingh nyei miev-ciangv bun yie mbuo yungz saeng-kuv.”

³Hnangv naaic, ziux ZIOUV paaiv nyei waac, I^saa^laa^en Mienh zorqv ninh mbuo ganh nzipc nyei buonc zingh caux miev-ciangv jiu bun Lewi Mienh. Maaih hnangv naaiv.

⁴Dingc daauh nzunc ndortv zuqc Lewi Mienh nyei bungh buonc, Ko^haatv Mienh. Aalon sai mienh nyei zeiv-fun ziouc duqv Yu^ndaa Fingx, Si^me^on Fingx caux Mben^yaa^min Fingx nyei ziepc faam norm zingh.

⁵Dingc bun zengc njiec nyei Ko^haatv Mienh nyei zeiv-fun duqv E^faa^im Fingx, Ndaan Fingx caux Maa^natv^se ndaamv-fingx mienh nyei bungh buonc nyei ziepc norm zingh.

⁶Dingc bun Geson Mienh nyei zeiv-fun duqv Itc^saax^kaa Fingx, Aa^se Fingx, Napv^taa^li Fingx caux yiem Mbaasaan Deic nyei Maa^natv^se ndaamv-fingx mienh ziux ninh mbuo nyei bungh buonc nyei ziepc faam norm zingh.

⁷Me^laa^li Mienh ziux ninh mbuo nyei bungh buonc duqv Lu^mben Fingx, Gaatc Fingx caux Se^mbu^lun Fingx nyei ziepc nyeic norm zingh.

⁸Naaiv deix zingh caux zingh nyei miev-ciangv, I^saa^laa^en Mienh ziux dingc maengc mangc, zorqv bun Lewi Mienh, hnangv ZIOUV longc Mose paaiv nyei waac.

⁹Yiem Yu^ndaa caux Si^me^on Fingx zorqv cuotv nyei zingh ziux zingh nyei mbuox maaih hnangv naaiv.

¹⁰Naaiv deix zingh zorqv bun Lewi Fingx, Ko^haatv Mienh, Aalon nyei zeiv-fun, ziux ninh mbuo nyei bungh buonc, weic zuqc dingc maengc mangc ndortv zuqc ninh mbuo nyei buonc ndaangc.

¹¹Ninh mbuo zorqv yiem Yu^ndaa mbong-aiv dorngx, Ki^li^yaatv Aan^mbaa, se He^mbo^lon Zingh, liemh weih gormx naaiv norm zingh nyei miev-ciangv bun Lewi Mienh. (Aan^mbaa zoux Aanaakv nyei die.)

¹²Mv baac naaiv norm zingh nyei lingh deic caux weih gormx nyei laangz jiu bun Ye^fun^ne nyei dorn, Kaalepv, zoux ninh nyei buonc mi'aqv.

¹³Ninh mbuo zorqv He^mbo^lon Zingh caux naaiv norm zingh nyei miev-ciangv bun Aalon sai mienh nyei zeiv-fun, se caqv-bouc daix mienh nyei yietc norm siex maengc zingh. Ninh mbuo aengx bun Lipv^naa Zingh caux naaiv norm zingh nyei miev-ciangv,

¹⁴Yaatv^ti caux Etc^te^mo^aa caux naaiv deix zingh nyei miev-ciangv,

¹⁵Holon caux Nde^mbi caux naaiv deix zingh nyei miev-ciangv,

¹⁶Aayin, Yutv^taa caux Mbetc Semetv caux jienv naaiv deix zingh nyei miev-ciangv. Yiem naaiv deix i fingx paaiv cuotv daaih nyei maaih nduoh norm zingh.

¹⁷Yiem Mben^yaa^min Fingx bun daaih nyei zingh maaih Gi^mbe^on caux Ge^mbaa caux naaiv deix zingh nyei miev-ciangv,

¹⁸Aa^naa^totv caux Anmon caux naaiv deix zingh nyei miev-ciangv. Yietc zungv maaih biei norm zingh.

¹⁹Aalon nyei zeiv-fun, zoux sai mienh wuov deix, duqv nyei zingh yietc zungv maaih ziepc faam norm, liemh wuov deix zingh nyei miev-ciangv.

²⁰Paaiv bun Lewi Fingx, zengc njiec wuov deix Ko^haatv Mienh nyei zeiv-fun ziux ninh mbuo nyei bungh buonc duqv nyei zingh yiem E^faa^im Fingx nyei zingh bun daaih.

²¹Ninh mbuo paaiv yiem E^faa^im mbong-aiv dorngx, Sekem Zingh, se weic caqv-bouc daix mienh nyei mienh caux zingh nyei miev-ciangv nyei siex maengc zingh, caux Gese Zingh, liemh zingh nyei miev-ciangv,

²²Kipc^saa^im caux Mbetc Holon caux naaiv deix zingh nyei miev-ciangv. Yietc zungv maaih biei norm zingh.

²³Yiem Ndaan Fingx bun daaih nyei zingh maaih En^te^ke, Gipc^mbe^ton caux naaiv deix zingh nyei miev-ciangv,

²⁴Ai^yaa^lon caux Gatc Limmon caux naaiv deix zingh nyei miev-ciangv. Yietc zungv maaih biei norm zingh.

²⁵Yiem Maa^natv^se ndaamv-fingx mienh bun daaih nyei zingh maaih Taa^aa^naakv caux Gatc Limmon caux naaiv deix zingh nyei miev-ciangv. Yietc zungv maaih i norm zingh.

²⁶Zengc njiec nyei Ko^haatv Mienh nyei zingh yietc zungv maaih ziepc norm caux naaiv deix zingh nyei miev-ciangv.

²⁷Paaiv bun Lewi Fingx, Geson Mienh nyei zeiv-fun duqv nyei zingh yiem Maa^natv^se ndaamv-fingx mienh nyei zingh bun daaih. Ninh mbuo bun nyei se yiem Mbaasaan Deic nyei Golaan, se weic caqv-bouc daix mienh nyei mienh nyei siex maengc zingh, caux Mbe Etc^te^laa caux naaiv deix zingh nyei miev-ciangv. Yietc zungv maaih i norm zingh.

²⁸Yiem Itc^saax^kaa Fingx bun daaih nyei zingh maaih Ki^si^on, Ndaa^mbe^latv caux naaiv deix zingh nyei miev-ciangv,

²⁹Yaanmutv caux En Gannim caux naaiv deix zingh nyei miev-ciangv. Yietc zungv maaih biei norm zingh.

³⁰Yiem Aa^se Fingx bun daaih nyei zingh maaih Misaan, Apc^ndon caux naaiv deix zingh nyei miev-ciangv,

³¹Henkatc, Le^hopc caux naaiv deix zingh nyei miev-ciangv. Yietc zungv maaih biei norm zingh.

³²Yiem Napv^taa^li Fingx bun nyei zingh maaih yiem Gaa^li^li nyei Kaa^ndetc Zingh, se weic caqv-bouc daix mienh nyei mienh nyei siex maengc zingh, caux Hammotv Ndo^aa caux naaiv deix zingh nyei miev-ciangv yaac maaih Kaantaan caux zingh nyei miev-ciangv. Yietc zungv maaih buo norm zingh.

³³Geson Mienh nyei bungh buonc duqv nyei zingh yietc zungv maaih ziepc faam norm caux jienv naaiv deix zingh nyei miev-ciangv.

³⁴Paaiv bun zengc njiec nyei Lewi Fingx, Me^laa^li Mienh nyei zeiv-fun, duqv nyei zingh maaih yiem Se^mbu^lun Fingx bun daaih, Yokv^ne^am, Kaantaa,

³⁵Ndimnaa, Naa^haa^laan caux naaiv deix zingh nyei miev-ciangv. Yietc zungv maaih biei norm zingh.

³⁶Yiem Lu^mben Fingx bun daaih maaih Mbese, Yaa^haatv caux naaiv deix zingh nyei miev-ciangv,

³⁷Ke^nde^motv caux Me^faa^aatc caux naaiv deix zingh nyei miev-ciangv. Yietc zungv maaih biei norm zingh.

³⁸Yiem Gaatc Fingx bun daaih maaih yiem Gi^le^aatc Deic nyei Laamotv Zingh, se weic caqv-bouc daix mienh nyei mienh nyei siex maengc zingh, aengx maaih Maa^haa^naa^im,

³⁹Hetv^mbon caux Yaase caux naaiv deix zingh nyei miev-ciangv. Yietc zungv maaih biei norm zingh.

⁴⁰Paaiv bun zengc njiec nyei Lewi Fingx, Me^laa^li Mienh nyei zeiv-fun ziux nyei bungh buonc, yietc zungv maaih ziepc nyeic norm zingh.

⁴¹Yiem I^saa^laa^en Mienh nzipc nyei deic-bung, Lewi Mienh duqv nyei zingh yietc zungv maaih feix ziepc betv norm, liemh zingh nyei miev-ciangv.

⁴²Naaiv deix norm-norm zingh maaih miev-ciangv weih gormx. Mouz norm zingh yaac fih hnangv nyei.

⁴³Hnangv naaic, ZIOUV ceix naaiv norm deic-bung yietc zungv jiu bun I^saa^laa^en Mienh, ziux ZIOUV caux ninh mbuo nyei ong-taaix-ngaeqv houv jienv laengz nyei waac. Ninh mbuo nzaeng duqv daaih ziouc bieqc mingh liepc nguaaz-gorn yiem wuov.

⁴⁴ZIOUV bun ninh mbuo nyei yietc zungv deic-bung taaix-baengh nyei yiem, hnangv ZIOUV caux ninh mbuo nyei ong-taaix houv jienv laengz jiex nyei waac. Ninh mbuo nyei win-wangv maiv maaih yietc dauh haih mborqv duqv hingh ninh mbuo. ZIOUV zorqv ninh mbuo nyei yietc zungv win-wangv jiu bun yiem ninh mbuo nyei buoz-ndiev mi'aqv.

⁴⁵ZIOUV laengz bun I^saa^laa^en Mienh yietc zungv longx nyei waac ninh zoux ziangx nzengc, maiv bungx ndortv yietc joux.