Read Iu Mien Yo^su^waa 3 Bible Online

Yo^su^waa 3 - Iu Mien bible

Yo^su^waa 3

¹Da'nyeic ndorm nziouv nyei, Yo^su^waa caux I^saa^laa^en nyei yietc zungv mienh yiem Sitv^tim cuotv jauv mingh Jor^ndaen Ndaaih hlen. Taux wuov, ninh mbuo corng ndopv-liuh zuov jienv jiex ndaaih.

²Jiex liuz buo hnoi, zoux bieiv nyei mienh mingh gormx ndopv-liuh ciangv,

³gorngv mbuox baeqc fingx, “Meih mbuo haaix zanc buatc Lewi sai mienh gaeng jienv ZIOUV, meih mbuo nyei Tin-Hungh, nyei Laengz Ngaengc Waac Faang mingh nor, oix zuqc cuotv meih mbuo yiem nyei dorngx gan jienv faang mingh aqv.

⁴Meih mbuo ziouc hiuv duqv oix zuqc yangh haaix diuh jauv mingh, weic zuqc meih mbuo maiv gaengh yangh jiex naaiv diuh jauv. Meih mbuo oix zuqc leih Laengz Ngaengc Waac Faang i cin ndorqc nyei dorngx. Maiv dungx mingh fatv.”

⁵Yo^su^waa gorngv mbuox zuangx baeqc fingx, “Meih mbuo oix zuqc saax ganh cing-nzengc daaih, weic zuqc njang hnoi ZIOUV oix yiem meih mbuo mbu'ndongx zoux mbuoqc horngh nyei sic.”

⁶Yo^su^waa gorngv mbuox sai mienh, “Oix zuqc gaeng jienv laengz ngaengc waac faang jiex baeqc fingx wuov ndaangc maengx.” Ninh mbuo ziouc gaeng jienv Laengz Ngaengc Waac Faang mingh ndaangc baeqc fingx.

⁷ZIOUV gorngv mbuox Yo^su^waa, “Ih hnoi yie oix dorng jienv I^saa^laa^en Mienh taaih meih zoux hlo, weic bun ninh mbuo hiuv duqv yie hnangv haaix nor caux Mose yiem, yie yaac hnangv wuov nor caux meih yiem.

⁸Meih oix zuqc mbuox gaeng Laengz Ngaengc Waac Faang wuov deix sai mienh, ‘Meih mbuo mingh taux Jor^ndaen Ndaaih hlen oix zuqc bieqc mingh souv jienv ndaaih gu'nyuoz.’+”

⁹Yo^su^waa gorngv mbuox I^saa^laa^en Mienh, “Daaih fatv deix maah! Daaih muangx ZIOUV, meih mbuo nyei Tin-Hungh, nyei waac.”

¹⁰Yo^su^waa gorngv, “Meih mbuo hnangv naaiv nor haih hiuv duqv ziangh jienv nyei Tin-Hungh yiem meih mbuo mbu'ndongx. Meih mbuo yaac haih hiuv duqv ninh ndongc haaix zungv oix yiem meih mbuo nyei wuov ndaangc maengx zunc cuotv Kaa^naa^an Mienh, Hitv^tai Mienh, Hiwai Mienh, Be^litv^si Mienh, Ge^gaa^si Mienh, Aa^mo^lai Mienh caux Ye^mbutc Mienh.

¹¹Mangc maah! Lungh ndiev nyei Ziouv nyei Laengz Ngaengc Waac Faang oix bieqc Jor^ndaen Ndaaih ndaangc meih mbuo.

¹²Weic naaiv, ih zanc oix zuqc yiem I^saa^laa^en Mienh nyei fingx mbu'ndongx ginv ziepc nyeic laanh mienh, yietc fingx yietc laanh.

¹³Sai mienh gaeng jienv ZIOUV nyei Laengz Ngaengc Waac Faang, se lungh ndiev nyei Ziouv nyei faang, mingh wuov zanc, ninh mbuo nyei zaux[6] yietv caaiv njiec Jor^ndaen Ndaaih, Jor^ndaen Ndaaih nyei wuom ziouc dingh, maiv liouc njiec aqv. Wuov jiex nyei wuom ziouc ndui jienv wuov.”

¹⁴Hnangv naaic zuangx baeqc fingx caeqv ninh mbuo nyei ndopv-liuh oix jiex Jor^ndaen Ndaaih wuov zanc, gaeng Laengz Ngaengc Waac Faang nyei sai mienh ziouc mingh ndaangc baeqc fingx.

¹⁵Doix siou cun-gaeng nyei ziangh hoc, Jor^ndaen Ndaaih nyei wuom zanc-zanc yiemx buangv kamx mienz cuotv. Mv baac gaeng Laengz Ngaengc Waac Faang nyei sai mienh taux Jor^ndaen Ndaaih ninh mbuo nyei zaux yietv caaiv njiec wuom hnangv,

¹⁶wuov jiex liouc njiec nyei wuom ziouc dingh mingh ndui jienv benx yietc ndui yiem go nyei dorngx, nitv Saax^le^taan, Aa^ndam Zingh wuov. Liouc njiec Aa^laa^mbaa Koiv nyei wuom yaac dangx nzengc, maiv liouc njiec. Aa^laa^mbaa Koiv, se Koiv-Nzauv.[7] I^saa^laa^en baeqc fingx ziouc jiex Ye^li^ko Zingh nyei doix-ngaanc.

¹⁷I^saa^laa^en nyei zuangx mienh jiex ndau-nqaai wuov zanc, gaeng ZIOUV nyei Laengz Ngaengc Waac Faang nyei sai mienh souv jienv wuov Jor^ndaen Ndaaih mbu'ndongx nyei ndau-nqaai zuov taux zuangx baeqc fingx jiex nzengc Jor^ndaen Ndaaih.