Read Iu Mien Yo^su^waa 7 Bible Online

Yo^su^waa 7 - Iu Mien bible

Yo^su^waa 7

¹I^saa^laa^en Mienh maiv ziepc zuoqv nyei zoux. Ninh mbuo nzepv cuotv horpc zuqc mietc weic fungx dangx bun ZIOUV nyei ga'naaiv,[20] weic zuqc Aakaan nzepv cuotv horpc zuqc fungx dangx bun ZIOUV nyei ga'naaiv. Aakaan zoux Kaanmi nyei dorn. Kaanmi zoux Sapc^ndi[21] nyei dorn. Sapc^ndi zoux Zelaa nyei dorn, Yu^ndaa Fingx. Laaix Aakaan zoux nyei sic, ZIOUV qiex jiez! haic I^saa^laa^en Mienh.

²Yo^su^waa paaiv mienh yiem Ye^li^ko Zingh faaux taux Ai Zingh. Ai Zingh yiem nitv Mbetc Aawen, Mbetc^en Zingh nyei dong bung maengx. Yo^su^waa mbuox ninh mbuo, “Faaux mingh caaiv juoqv zaah mangc wuov norm deic-bung.” Ninh mbuo ziouc faaux mingh zaah Ai Zingh.

³Ninh mbuo nzuonx daaih gorngv mbuox Yo^su^waa, “Maiv zuqc bun yietc zungv baeqc fingx faaux mingh mborqv Ai Zingh. Bun i buo cin dauh mienh mingh mborqv gaux aqv. Maiv zuqc bun zuangx baeqc fingx mingh kouv weic zuqc wuov norm zingh nyei mienh maiv camv.”

⁴Hnangv naaic maaih leih maiv go buo cin dauh faaux mingh. Ninh mbuo yaac yiem Ai Zingh mienh nyei wuov ndaangc biaux.

⁵Ai Zingh nyei mienh daix ninh mbuo faah ziepc luoqc dauh nyei dorngx. Ai Zingh nyei mienh yiem zingh gaengh zunc ninh mbuo taux Qe^mbaa^lim,[22] yiem njiec jiex nyei dorngx daix ninh mbuo. I^saa^laa^en baeqc fingx gamh nziex gau, mba'nziu zungv yuqc nzengc hnangv wuom nor.

⁶Yo^su^waa caux I^saa^laa^en Mienh nyei zuangx mienh gox nzauh haic, ziouc betv ninh mbuo nyei lui, puoqv njiec ZIOUV nyei Laengz Ngaengc Waac Faang nza'hmien maengx yiem taux lungh maanz-hmuangx. Ninh mbuo aengx zorqv nie-mbung hiaamx jienv ganh nyei m'nqorngv.

⁷Yo^su^waa naaic ZIOUV, “O Ziouv TIN-HUNGH aah! Weic haaix diuc dorh naaiv deix baeqc fingx jiex naaiv bung Jor^ndaen Ndaaih daaih? Weic zorqv yie mbuo jiu bun yiem Aa^mo^lai Mienh nyei buoz-ndiev zuqc mietc fai? Feix duqv yie mbuo buangv eix yiem wuov bung Jor^ndaen Ndaaih.

⁸Ziouv aah! Yie oix zuqc hnangv haaix nor gorngv weic zuqc I^saa^laa^en Mienh ih zanc zuqc ninh mbuo nyei win-wangv zunc biaux.

⁹Kaa^naa^an Mienh caux naaiv norm deic-bung yietc zungv nyei baeqc fingx duqv haiz naaiv deix fienx, ninh mbuo oix daaih weih jienv daix nzengc yie mbuo. Wuov zanc meih oix hnangv haaix nor zoux weic beu jienv meih hlo haic nyei mengh?”

¹⁰ZIOUV gorngv mbuox Yo^su^waa, “Souv jiez sin daaih maah! Meih weic haaix diuc puoqv njiec taux ndau mingh?

¹¹I^saa^laa^en Mienh baamz zuiz mi'aqv. Ninh mbuo ngaengc yie caux ninh mbuo laengz jiex nyei ngaengc waac, dongh yie hatc ninh mbuo ei jienv zoux. Ninh mbuo nzepv cuotv oix zuqc fungx dangx bun yie nyei ga'naaiv.[23] Ninh mbuo nimc, ninh mbuo gorngv-baeqc yaac zorqv wuov deix ga'naaiv dorh mingh caux ninh mbuo ganh nyei ga'naaiv siou.

¹²Weic naaiv I^saa^laa^en Mienh cingx daaih maiv haih mborqv maiv hingh ninh mbuo nyei win-wangv. Ninh mbuo oix zuqc daaux nqaang biaux weic ninh mbuo benx zuqc mietc nyei ga'naaiv mi'aqv.[24] Yiem naaiv mingh yie maiv caux meih mbuo yiem aqv, cuotv liuz meih mbuo mietc nzengc dongh fungx dangx bun yie wuov deix ga'naaiv.

¹³“Mingh aqv! Mingh tengx baeqc fingx saax nzengc uix. Oix zuqc mbuox ninh mbuo, ‘Oix zuqc saax ganh nyei uix, liuc leiz ziangx weic njang hnoi. Weic zuqc ZIOUV, I^saa^laa^en Mienh nyei Tin-Hungh gorngv, “O I^saa^laa^en Mienh aah! Yiem meih mbuo nyei mbu'ndongx maaih fungx dangx bun ZIOUV nyei ga'naaiv.[25] Se gorngv meih mbuo maiv zorqv naaiv deix ga'naaiv cuotv mingh, meih mbuo maiv haih mborqv maiv hingh meih mbuo nyei win-wangv aqv.”

¹⁴“+‘Njang ndorm meih mbuo oix zuqc yietc fingx yietc fingx nyei cuotv daaih. ZIOUV ginv haaix fingx mienh, wuov fingx oix zuqc yietc bungh yietc bungh cuotv daaih. ZIOUV ginv haaix bungh mienh, wuov bungh oix zuqc yietc buonc yietc buonc cuotv daaih. ZIOUV ginv haaix buonc mienh, wuov buonc oix zuqc yietc dauh yietc dauh cuotv daaih.

¹⁵Zorqv zuqc haaix dauh maaih naaiv deix oix zuqc zorqv benx fungx dangx bun ZIOUV nyei ga'naaiv,[26] oix zuqc longc douz buov guangc, liemh ninh ganh caux ninh maaih nyei nyungc-nyungc ga'naaiv weic zuqc ninh ngaengc ZIOUV caux meih mbuo laengz jiex nyei ngaengc waac. Ninh yaac yiem I^saa^laa^en Mienh mbu'ndongx zoux nyaiv haic nyei sic.’+”

¹⁶Da'nyeic ndorm nziouv nyei Yo^su^waa dorh I^saa^laa^en Mienh yietc fingx yietc fingx nyei cuotv daaih, ziouc ndortv zuqc Yu^ndaa Fingx.

¹⁷Yu^ndaa Fingx nyei bungh bungh mienh cuotv daaih ziouc ndortv zuqc Zelaa Mienh. Zelaa Mienh yietc buonc yietc buonc cuotv daaih ziouc ndortv zuqc Sapc^ndi.

¹⁸Yo^su^waa ziouc bun Sapc^ndi wuov buonc mienh yietc dauh yietc dauh cuotv daaih ziouc ndortv zuqc Aakaan. Aakaan zoux Kaanmi nyei dorn. Kaanmi zoux Sapc^ndi nyei dorn. Sapc^ndi zoux Zelaa nyei dorn, Yu^ndaa Fingx.

¹⁹Yo^su^waa gorngv mbuox Aakaan, “Yie nyei dorn aah! Oix zuqc taaih ZIOUV, I^saa^laa^en Mienh nyei Tin-Hungh, yaac oix zuqc ceng ninh.[27] Meih hnangv haaix nor zoux oix zuqc gorngv zaqc mbuox yie, maiv dungx bingx yie.”

²⁰Aakaan dau Yo^su^waa, “Zeiz nyei. Yie za'gengh baamz zuiz, zoux dorngc ZIOUV, I^saa^laa^en Mienh nyei Tin-Hungh. Yie hnangv naaiv nor zoux.

²¹Yiem caangv duqv daaih nyei ga'naaiv yie buatc yietc deix Mbaa^mbi^lon Deic-Bung[28] nyei domh lui nzueic haic caux yietc joih ziepc betv lungz nyaanh,[29] aengx caux yietc diuh jiem, hniev-daauh ziepc hmz lungz.[30] Yie ziouc mueic jieqv naaiv deix ga'naaiv aengx zorqv daaih. Naaiv deix ga'naaiv biopv jienv yie nyei ndopv-liuh gu'nyuoz nyei ndau-ndiev. Nyaanh yiem kuotv-ndoqv.”

²²Yo^su^waa ziouc paaiv deix mienh mingh. Ninh mbuo ziouc tiux jienv mingh Aakaan nyei ndopv-liuh, lorz buatc wuov deix ga'naaiv biopv jienv ndopv-liuh gu'nyuoz. Nyaanh yiem kuotv-ndoqv.

²³Ninh mbuo ziouc yiem ndopv-liuh gu'nyuoz zorqv cuotv daaih dorh mingh taux Yo^su^waa caux I^saa^laa^en Mienh wuov, an jienv ZIOUV nyei nza'hmien.

²⁴Yo^su^waa caux I^saa^laa^en nyei zuangx mienh ziouc dorh Zelaa nyei fun, Aakaan, caux domh lui, nyaanh, jiem-diuh, liemh Aakaan nyei dorn, sieqv, ngongh, lorh, yungh, ba'gi yungh, liemh ndopv-liuh caux ninh maaih nyei nyungc-nyungc ga'naaiv, faaux wuov jiex Aako Horngz[31] mingh.

²⁵Yo^su^waa gorngv, “Meih weic haaix diuc dorh zeqc naanc daaih bun yie mbuo? Ih hnoi ZIOUV oix bun meih zuqc zeqc naanc aqv.” I^saa^laa^en nyei zuangx mienh ziouc longc la'bieiv zong ninh daic. Liemh ninh nyei biauv zong mienh caux ninh nyei jaa-dingh ga'naaiv yietc zungv ninh mbuo longc la'bieiv zong yaac longc douz buov nzengc.

²⁶Zuangx mienh aengx zorqv la'bieiv ndui jienv Aakaan nyei sei, benx yietc domh ndui la'bieiv taux ih jaax hnoi. Nqa'haav ZIOUV nyei ga'qiex fiu. Weic naaiv deix sic, taux ih jaax hnoi mienh heuc wuov norm dorngx zoux Aako Horngz.