Read Iu Mien 2 Ti^mo^tai 2 Bible Online

2 Ti^mo^tai 2 - Iu Mien bible

2 Ti^mo^tai 2

¹Yie nyei dorn aac, meih oix zuqc kaux Giduc Yesu ceix bun nyei en henv jiez daaih.

²Meih haiz yie dorng jienv zorng-zengx mienh camv nyei nza'hmien njaaux wuov deix waac, meih oix zuqc jiu bun ziepc zuoqv nyei mienh, dongh maaih banh zeic njaaux mienh wuov deix.

³Meih oix zuqc caux yie mbuo maaih buonc siouc kouv naanc hnangv Giduc Yesu nyei kuv baeng.

⁴Dorng baeng nyei mienh maiv maaih haaix dauh zanc-zanc la'nyauv ga'nyiec nyei sic. Ninh kungx oix zoux bun gunv ninh wuov dauh baeng-bieiv buangv hnyouv hnangv.

⁵Ndouv saaix nyei mienh saaix nyei ziangh hoc, maiv ei jienv leiz zoux nor, maiv haih duqv ningv.

⁶cuotv qaqv zoux ndeic nyei mienh maaih leiz duqv ninh nyei buonc laangh ziqc ndaangc.

⁷Meih oix zuqc longx-longx nyei hnamv taux yie gorngv nyei waac, weic zuqc Ziouv zungv oix tengx meih mengh baeqc naaiv deix yietc zungv.

⁸Oix zuqc jangx jienv Yesu Giduc, Ndaawitv Hungh nyei Zeiv-Fun, dongh daic mingh Tin-Hungh bun nangh daaih wuov dauh. Naaiv se yie zunh nyei kuv fienx.

⁹Weic naaiv kuv fienx yie zuqc siouc kouv, zungv zuqc limc ndoh jienv hnangv zoux zuiz-mienh nor. Mv baac Tin-Hungh nyei doz maiv zuqc limc ndoh.

¹⁰Hnangv naaic yie weic Tin-Hungh ginv daaih nyei mienh diev nyungc-nyungc, weic bun ninh mbuo kaux Giduc Yesu duqv njoux yaac duqv yietc liuz nyei njang-laangc.

¹¹Naaiv joux waac za'gengh zien nyei. “Se gorngv mbuo caux ninh daic, mbuo ziouc duqv caux ninh ziangh.

¹²Se gorngv mbuo diev taux daauh, mbuo ziouc duqv caux ninh gunv. Se gorngv mbuo maiv nyiemc ninh, ninh ziouc maiv nyiemc mbuo.

¹³Maiv gunv mbuo hnyouv maiv zingx, ninh hnyouv zingx nyei, weic zuqc ninh maiv haih nduov ninh ganh.”

¹⁴Oix zuqc mbuox zuangx mienh jangx jienv naaiv deix sic. Yaac oix zuqc yiem Tin-Hungh[3] nyei nza'hmien hatc ninh mbuo maiv dungx nzaeng nyinh nzaeng nyouz. Nzaeng nyinh nyouz se maiv lamh longc, kungx zoux waaic muangx nyei mienh hnangv.

¹⁵Meih oix zuqc njiec qaqv zoux nyungc-nyungc weic bun Tin-Hungh horpc hnyouv, ziouc zoux maiv zuqc nyaiv nyei gong-mienh, yaac longc duqv horpc Tin-Hungh zien leiz nyei doz.

¹⁶Oix zuqc simv nqoi maiv sienx Tin-Hungh nyei mienh nyei henh mbienx waac, weic zuqc naaiv nyungc waac kungx bun mienh gunv zoux gunv leih Tin-Hungh go hnangv.

¹⁷Naaiv nyungc waac oix faanv jienv mingh hnangv butv doqc haic nyei faang huv jienv orv mingh nor. Njaaux naaiv nyungc waac nyei mienh maaih i dauh heuc Hi^me^ne^atc caux Fi^le^tatv.

¹⁸Ninh mbuo guangc zien leiz nyei jauv yaac gorngv mienh nangh daaih nyei hnoi jiex liuz aqv, ziouc maaih deix mienh nyei sienx fim lunc nzengc.

¹⁹Mv baac Tin-Hungh liepc daaih nyei gorn-ndoqv se wuonv haic yaac maaih yienx nqaapv jienv gorngv, “Ziouv hiuv duqv haaix dauh zoux ninh ganh nyei mienh,” yaac gorngv, “Haaix dauh nyiemc Ziouv nyei mbuox, wuov dauh oix zuqc guangc nzengc yietc zungv waaic sic.”

²⁰Yietc norm domh biauv nyei jaa-dorngx, maiv daan longc jiem longc nyaanh zoux daaih hnangv, yaac maaih longc ndiangx longc nie zoux nyei. Maaih deix longc duqv jaaix nyei. Maaih deix pou-tong nyei longc.

²¹Se gorngv haaix dauh fioux ganh cing-nzengc, guangc nzengc hiuang orqv nyei sic, wuov dauh ziouc hnangv longc duqv jaaix nyei jaa-dorngx, cing-nzengc nyei, puix duqv ninh nyei Ziouv longc, yaac duqv liuc leiz ziangx zoux nyungc-nyungc kuv sic.

²²Hnangv naaic, oix zuqc simv nqoi, maiv dungx zoux hnangv mienh lunx mienh nyei hnyouv hanc zoux nyei sic. Oix zuqc caux yietc zungv longc cing-nzengc hnyouv heuc Ziouv tengx nyei mienh jienh zoux horpc nyei jauv, sienx longx, hnamv mienh yaac maaih baengh orn.

²³Oix zuqc simv jienv mienh nzaeng hngongx haic, maiv maaih eix leiz nyei sic, weic zuqc meih hiuv duqv naaiv deix sic kungx zoux gorn bun mienh nzaeng jaax hnangv.

²⁴Ziouv nyei bou maiv horpc zuqc nzaeng jaax. Daaux nzuonx oix zuqc zoux longx bun zuangx mienh, oix zuqc njaaux longx yaac maaih noic.

²⁵Oix zuqc longc suonc hnyouv kuinx caux ninh doix-dekc wuov deix mienh. Nziex Tin-Hungh oix bun ninh mbuo maaih qangx goiv hnyouv, hiuv duqv zien leiz mv bei.

²⁶Hnangv naaic ninh mbuo haih nzang daaih ziouc biaux ndutv mienv nyei hungh nyei koux, dongh hlopv ninh mbuo, aapv ninh mbuo ei ninh nyei za'eix zoux.