Read Iu Mien 2 Ti^mo^tai 4 Bible Online

2 Ti^mo^tai 4 - Iu Mien bible

2 Ti^mo^tai 4

¹Yie dorng jienv Tin-Hungh yaac dorng jienv Giduc Yesu, dongh oix siemv ziangh jienv nyei mienh caux daic mingh nyei mienh, aengx oix daaih zoux Ziouv gunv mienh wuov dauh, longx-longx kuinx meih.

²Oix zuqc zunh Tin-Hungh nyei doz. Maiv gunv maaih qangx fai maiv maaih qangx, zungv oix zuqc zunh aqv. Oix zuqc za'gengh longc noic longx-longx nyei njaaux, porv bun mienh mengh baeqc, gorngv-hemx, kuinx mienh.

³Ziangh hoc oix taux, mienh oix ngaengc maiv muangx maaih gorn-buonv nyei doz. Kungx oix ei ganh nyei hnyouv nyunc lorz fin-saeng camv nyei daaih njaaux puix ninh mbuo nyei m'normh oix muangx nyei.

⁴Ninh mbuo maiv oix muangx zien leiz ziouc hlioux m'normh mingh muangx maiv maaih gorn-buonv nyei gouv-laic.

⁵Mv baac meih ganh yiem maanc sic oix zuqc gunv jienv ganh, oix zuqc diev kouv naanc, oix zuqc zoux zunh doz mienh nyei gong. Tin-Hungh paaiv meih zoux nyei gong, nyungc-nyungc oix zuqc zoux taux nzengc.

⁶Yie ih zanc zuqc ciev ziec. Yie leih seix nyei ziangh hoc yaac taux aqv.

⁷Yie longc nzengc qaqv mborqv liuz longx nyei jaax aqv. Yie saaix tiux yaac tiux taux dorngx mi'aqv. Yie sienx nyei doz yie goux longx aqv.

⁸Ih zanc maaih norm ningv liouh jienv bun yie, dongh bun cing yie zoux duqv horpc wuov nyungc ningv. Taux wuov norm hnoi, baengh fim nyei Siemv Zuiz Jien, se Ziouv, oix zorqv wuov norm ningv zoux zingh nyeic bun yie. Maiv daan bun yie hnangv, yaac bun yietc zungv hnamv ninh ziouc zuov ninh aengx daaih wuov deix mienh.

⁹Tov meih siepv-siepv nyei daaih yie naaiv oc,

¹⁰weic zuqc Ndemaatv hnamv naaiv baamh gen nyei jauv ziouc guangc yie mingh Te^saa^lo^ni^gaa Zingh mi'aqv. Ke^le^sen mingh Gaa^laa^tie Saengv, Tidatc yaac mingh Ndaan^maa^tie.

¹¹Kungx Lugaa caux yie yiem naaiv hnangv. Tov meih mingh lorz Maako, dorh ninh caux meih yietc jauv daaih, weic zuqc ninh haih borng yie zoux nyei gong.

¹²Yie paaiv Ti^ki^gatc mingh E^fe^so Zingh mi'aqv.

¹³Meih daaih nyei ziangh hoc, tov tengx dorh yie nyei domh lui daaih. Domh lui yie juix Do^atc Zingh, Kaan^batc wuov, aengx dorh yie nyei sou-njunc daaih oc. Longc jienv jiex se dongh longc ndopv zoux daaih wuov deix.

¹⁴Wuov dauh dongh zaangc, Aa^lekv^saan^nde, zoux hoic yie camv haic. Ei ninh zoux nyei sic, Ziouv oix winh bun ninh.

¹⁵Meih ganh oix zuqc mbungh jienv ninh, weic zuqc ninh njiec qaqv laanh jienv mbuo nyei doz.

¹⁶Yie jaiv da'yietv nzunc sin wuov zanc, maiv maaih haaix dauh yiem ga'hlen tengx yie. Yietc zungv guangc yie. Tov Tin-Hungh maiv dungx longc ninh mbuo nyei zuiz.

¹⁷Mv baac Ziouv caux yie yiem, bun yie maaih qaqv zunh nzengc ninh nyei doz bun zuangx Janx muangx. Yie yaac duqv yiem sienh nyei nzuih baengx njoux cuotv daaih aqv.

¹⁸Ziouv yaac oix njoux yie leih ndutv nyungc-nyungc orqv sic, yaac dorh yie baengh orn nyei mingh taux ninh nyei tin-dorngh guoqv. Oix zuqc yietc liuz ceng ninh taux maanc gouv maanc doic. Aamen.

¹⁹Yie jangx taux Bitc^sinx^laa[4] caux Aa^kuin^laa yaac jangx taux O^ne^si^fo^latv wuov biauv mienh.

²⁰E^latv^tatv corc yiem Ko^lin^to Zingh. Do^fi^matv butv baengc, yie ziouc liouh ninh yiem Mi^le^tatv Mungv.

²¹Tov meih jienv sic daaih yie naaiv ndaangc dong-gen hnoi oc. Yu^mbu^latv, Bu^nden, Linatv, Kaa^laau^ndie caux sienx Yesu nyei zuangx gorx-youz jangx taux meih.

²²Tov Ziouv caux meih yiem[5] yaac tov ninh ceix en bun meih mbuo.