Read Iu Mien Tidatc 2 Bible Online

Tidatc 2 - Iu Mien bible

Tidatc 2

¹Meih njaaux mienh, meih oix zuqc njaaux doix maaih gorn-buonv nyei doz.

²Oix zuqc njaaux hnyangx-jeiv gox nyei m'jangc dorn zanv duqv ganh, zoux sic puix duqv mienh taaih, yaac gunv duqv ganh. Oix zuqc njaaux ninh mbuo sienx longx Yesu, hnamv mienh, yaac maaih noic diev.

³Fih hnangv nyei, oix zuqc njaaux hnyangx-jeiv gox nyei m'sieqv dorn zoux sic puix sienx Tin-Hungh nyei mienh, maiv dungx gorngv waac-huv, maiv dungx hengx hopv diuv. Ninh mbuo kungx oix zuqc njaaux longx nyei sic hnangv.

⁴Hnangv naaic, ninh mbuo haih njaaux auv-jaanx hnamv nqox caux fu'jueiv,

⁵haih gunv duqv ganh, maaih hnyouv cing-nzengc, zaangv longx jaa-dingh, zoux longx bun mienh yaac mbuoqc ganh nyei nqox weic maiv bun mienh maaih dorngx gorngv doqc Tin-Hungh nyei doz.

⁶Fih hnangv nyei, meih yaac oix zuqc kuinx hnyangx-jeiv lunx nyei m'jangc dorn gunv duqv ganh.

⁷Yiem maanc sic meih yaac oix zuqc zoux longx nyei nyungc zeiv bun ninh mbuo zuotc. Njaaux doz nyei ziangh hoc oix zuqc ziepc zuoqv nyei longc hnyouv njaaux.

⁸Oix zuqc longc maaih gorn-ndoqv nyei waac, dongh maiv maaih dorngx daanh nyei waac. Hnangv naaiv, caux meih doix-dekc wuov deix ziouc zuqc nyaiv, weic zuqc lorz maiv duqv dorngx daanh mbuo.

⁹Oix zuqc njaaux zoux nouh wuov deix yiem nyungc-nyungc sic mbuoqc ganh nyei ziouv gunv, yaac zoux nyungc-nyungc weic bun ziouv a'hneiv. Maiv dungx daux nzuih,

¹⁰yaac maiv dungx nimc ziouv nyei nyaanh. Ninh mbuo oix zuqc yiem maanc sic bun cing ninh mbuo zanc-zanc ziepc zuoqv nyei zoux weic bun ninh mbuo zoux nyei nyungc-nyungc duqv mienh taaih mbuo nyei Njoux Ziouv Tin-Hungh nyei doz.

¹¹Tin-Hungh nyei en zungv biux mengh cuotv daaih weic bun maanc mienh duqv njoux.

¹²Naaiv nyungc en njaaux mbuo guangc nqoi dongh maiv taaih Tin-Hungh nyei caux baamh mienh hnyouv hanc zoux nyei yietc zungv, ziouc yiem naaiv jaax lungh ndiev gunv duqv ganh, zoux baengh fim nyei, yaac gan longx Tin-Hungh.

¹³Oix zuqc hnangv naaiv nor zoux zuov jienv mbuo maaih lamh hnamv oix duqv nyei orn-lorqc, dongh hlo jiex nyei Tin-Hungh, mbuo nyei Njoux Ziouv Yesu Giduc, yiem ninh nyei njang-laangc aengx daaih.

¹⁴Ninh weic mbuo siev ninh ganh nyei maengc zuoqc mbuo nzuonx, leih ndutv yietc zungv waaic nyei, orqv nyei sic. Ninh yaac nzaaux mbuo cing-nzengc daaih, benx ninh ganh nyei mienh, mbuo ziouc jorm hnyouv nyei zoux nyungc-nyungc kuv sic.

¹⁵Meih oix zuqc longc naaiv deix waac njaaux mienh. Oix zuqc longc nzengc meih nyei hatc maaz kuinx mienh, gorngv-hemx mienh. Yaac maiv dungx bun haaix dauh mangc piex meih.