Read Iu Mien Fi^le^mon 1 Bible Online

Fi^le^mon 1 - Iu Mien bible

Fi^le^mon 1

¹Yie, Baulo, weic Giduc Yesu zuqc wuonx jienv loh. Yie caux mbuo nyei youz, Ti^mo^tai, fiev fienx bun yie mbuo hnamv nyei doic, dongh caux yie mbuo juangc gong zoux nyei mienh, Fi^le^mon,

²yaac fiev bun yie mbuo nyei muoc, Apc^fie, aengx caux yie mbuo lomh nzoih zoux baeng wuov dauh Aan^kipv^batc, caux yiem Fi^le^mon nyei biauv gapv zunv zoux leiz-baaix nyei jiu-baang.

³Tov mbuo nyei Zaangc Diex Tin-Hungh caux Ziouv Yesu Giduc ceix en ceix baengh orn bun meih mbuo.

⁴Fi^le^mon youz aac, yie daux gaux nyei ziangh hoc yie jangx zuqc meih yaac zanc-zanc weic meih laengz zingh yie nyei Tin-Hungh,

⁵weic zuqc yie haiz gorngv meih sienx longx Ziouv Yesu yaac hnamv haic Tin-Hungh nyei zuangx mienh.

⁶Yie tov Tin-Hungh bun mbuo weic mbuo dongh nyungc sienx maaih nyei jiu tong, tengx mbuo jaa hiuv duqv mbuo caux Giduc juangc maengc ziangh duqv daaih longx nyei yietc zungv.

⁷Youz aac, meih ndongc naaic hnamv mienh bun yie gengh njien-youh orn-lorqc haic, weic zuqc meih tengx Tin-Hungh nyei zuangx mienh nyei hnyouv henv jiez daaih.

⁸Weic zuqc mbuo se lomh nzoih sienx Giduc nyei gorx-youz, yie haih bungx laangc nyei paaiv meih zoux meih horpc zuqc zoux nyei sic.

⁹Mv baac weic zuqc yie hnamv meih, yie cingx daaih tov meih hnangv. Yie, Baulo, mienh gox mienh,[1] ih zanc yaac weic Giduc Yesu zuqc wuonx jienv loh.

¹⁰Yie tengx yie nyei dorn, O^ne^si^matv,[2] tov. Yie zuqc wuonx jienv loh nyei ziangh hoc yie duqv O^ne^si^matv daaih zoux yie nyei dorn.

¹¹Zinh ndaangc meih buatc ninh maiv lamh longc. Mv baac ih zanc ninh weic meih yaac weic yie maaih lamh longc haic aqv.

¹²Ih zanc yie fungx ninh nzuonx meih naaic, se hnangv maeqv yietc buonc yie nyei mba'nziu gan jienv mingh mi'aqv nor.

¹³Yie weic kuv fienx zuqc wuonx jienv loh yaac haiz oix liouh ninh yiem naaiv div meih tengx yie.

¹⁴Mv baac yie maiv gaengh zoux haaix nyungc taux meih nqoi nzuih, weic bun meih zoux haaix nyungc longx se yiem meih ganh maaih hnyouv zoux, maiv zeiz aapv zoux.

¹⁵Nziex O^ne^si^matv leih caamx baav meih se weic bun meih duqv ninh nzuonx daaih yietc liuz yiem.

¹⁶Mv baac ih zanc ninh maiv zeiz kungx zoux nouh, ninh zoux gauh longx jiex nouh, se zoux hnamv nyei gorx-youz. Yie za'gengh hnamv ninh, mv baac meih zungv oix hnamv ninh gauh camv weic zuqc ninh se meih nyei mienh yaac caux meih zoux sienx Ziouv nyei gorx-youz.

¹⁷Hnangv naaiv, se gorngv meih funx yie caux meih juangc gong zoux nyei mienh, oix zuqc zipv O^ne^si^matv hnangv zipv yie nor.

¹⁸Se gorngv ninh zoux haaix nyungc dorngc meih fai qiemx meih nyei haaix nyungc zaeqv, oix zuqc funx benx yie nyei.

¹⁹Yie longc yie ganh nyei buoz fiev naaiv. “Yie, Baulo, laengz jaauv sung meih.” Yie maiv gorngv meih qiemx yie nyei zaeqv, se meih zungv qiemx meih ganh yie.

²⁰Youz aac, tov meih weic Ziouv hnangv naaiv nor tengx yie, bun yie nyei hnyouv orn-lorqc, weic zuqc mbuo lomh nzoih sienx Giduc.

²¹Yie fiev naaiv zeiv fienx, yie hiuv dingc meih oix ei jienv yie tov nyei zoux. Yaac hiuv duqv meih zungv oix zoux camv jiex ndaangc yie tov nyei.

²²Aengx maaih diuc. Tov meih mbuo liuc leiz dorngx bun yie hitv. Yie hnamv daaih Tin-Hungh oix dau meih mbuo daux gaux nyei waac bun yie maiv lauh aengx duqv nzuonx meih mbuo naaic.

²³E^baa^faa, dongh weic Giduc Yesu zuqc caux yie wuonx jienv naaiv loh wuov dauh, jangx taux meih mbuo.

²⁴Caux yie juangc gong zoux nyei mienh, Maako, Aa^litv^taa^katv, Ndemaatv caux Lugaa yaac jangx taux meih mbuo.

²⁵Tov Ziouv Yesu Giduc ceix en bun meih mbuo.[3]