Read Iu Mien Hipv^lu 1 Bible Online

Hipv^lu 1 - Iu Mien bible

Hipv^lu 1

¹Loz-hnoi Tin-Hungh longc ninh nyei zuangx douc waac mienh yaac longc camv-nyungc za'eix caux mbuo nyei ong-taaix mbuo gorngv camv-nzunc.

²Mv baac yiem naaiv deix setv mueiz nyei hnoi Tin-Hungh longc ninh nyei Dorn caux mbuo gorngv. Naaiv dauh Dorn Tin-Hungh longc zeix maanc muotc yaac paaiv ninh nzipc maanc muotc benx ninh nyei jaa-dingh.

³Ninh aengv Tin-Hungh nyei njang-laangc, yaac zuangv nzengc Tin-Hungh, aengx longc ninh maaih lingc nyei waac bouh jienv maanc muotc. Ninh nzaaux liuz baamh mienh nyei zuiz, nqa'haav yiem tin-dorngh zueiz jienv maaih haangh daauh nyei Tin-Hungh nyei mbiaauc maengx.

⁴Naaiv dauh Dorn duqv zoux gauh hlo jiex fin-mienh ndongc Tin-Hungh cuotv bun ninh wuov norm mbuox[1] gauh hlo jiex zuangx fin-mienh nyei mbuox.

⁵Weic zuqc Tin-Hungh maiv mbuox jiex haaix dauh fin-mienh, “Meih zoux yie nyei Dorn. Ih hnoi yie benx meih nyei Die.” Ninh yaac maiv nuqv jiex haaix dauh fin-mienh gorngv, “Yie oix zoux ninh nyei Die. Ninh oix benx yie nyei Dorn aqv.”

⁶Aengx maaih nzunc, dongh Tin-Hungh oix paaiv ninh nyei dorn-la'gauv bieqc baamh gen wuov zanc, ninh gorngv, “Tin-Hungh nyei zuangx fin-mienh oix zuqc baaix ninh.”

⁷Gorngv taux fin-mienh wuov zanc Tin-Hungh gorngv, “Tin-Hungh bun ninh nyei fin-mienh benx nziaaux, yaac bun ninh nyei bou benx douz-mbietc.”

⁸Mv baac gorngv taux ninh nyei Dorn wuov zanc, Tin-Hungh gorngv, “Tin-Hungh aac, meih nyei weic oix yietc liuz yiem taux maanc gouv maanc doic. Meih yaac oix baengh fim nyei[2] gunv meih nyei guoqv.

⁹Zoux horpc nyei jauv meih hnamv, zoux orqv nyei meih nzorng. Weic naaiv, Tin-Hungh, dongh meih nyei Tin-Hungh, longc orn mienh nyei youh[3] hietv meih, orn meih zoux gauh hlo jiex meih nyei yietc zungv doic.”

¹⁰Tin-Hungh yaac gorngv, “Ziouv aac, yiem gorn wuov zanc meih zeix cuotv ndau nyei gorn-ndoqv daaih, yaac longc ganh nyei buoz zeix cuotv lungh.

¹¹Lungh ndau zungv oix zuqc mietc, mv baac meih yietc liuz yiem. Lungh ndau oix hnangv lui-houx nor, loz nzengc.

¹²Meih oix zorqv lungh ndau njunc jienv hnangv njunc domh lui. Lungh ndau ziouc goiv yienc hnangv yienc lui mv baac meih yietc liuz hnangv loz wuov nor. Meih nyei hnyangx-jeiv yietc liuz yaac maiv jomc.”

¹³Tin-Hungh maiv mbuox jiex haaix dauh fin-mienh, “Zueiz jienv yie nyei mbiaauc maengx, zuov yie bun meih nyei win-wangv njiec meih nyei zaux-ndiev zoux lorngx zaux nyei dorngx.”

¹⁴Wuov nyungc, fin-mienh hnangv haaix nor? Fin-mienh maiv maaih sin, mienh yaac mangc maiv buatc. Ninh mbuo yaac fu-sux Tin-Hungh. Tin-Hungh paaiv ninh mbuo mingh tengx oix duqv njoux nyei mienh.