Read Iu Mien Hipv^lu 10 Bible Online

Hipv^lu 10 - Iu Mien bible

Hipv^lu 10

¹Leiz-latc se maiv zeiz nqa'haav oix daaih wuov deix zien sic. Leiz-latc kungx zoux wuov deix longx nyei sic nyei nyungc zeiv caux dongh linh hnangv. Weic naaiv mienh hnyangx-hnyangx zanc-zanc dongh wuov nyungc ga'naaiv dorh mingh ziec, mv baac naaiv deix ziec nyei ga'naaiv maiv haih bun daaih lorz Tin-Hungh wuov deix dunh yunh.

²Se gorngv haih bun ninh mbuo yietc liuz cing-nzengc ninh mbuo ziouc haiz maiv maaih zuiz, maiv zuqc aengx dorh ga'naaiv mingh ziec bun Tin-Hungh aqv.

³Mv baac mienh ziec nyei ga'naaiv tengx ninh mbuo hnyangx-hnyangx jangx zuqc ganh nyei zuiz,

⁴weic zuqc ngongh gouv nziaamv caux yungh nyei nziaamv zungv maiv haih nzaaux maiv ndutv zuiz.

⁵Weic naaiv, Giduc bieqc baamh gen wuov zanc ninh gorngv mbuox Tin-Hungh, “Meih maiv oix mienh longc saeng-kuv ziec fai fongc horc zingh nyeic, mv baac meih liuc leiz ziangx sin weic yie,

⁶meih maiv horpc hnyouv ziangh dauh buov ziec nyei saeng-kuv, yaac maiv horpc hnyouv ziec fiqv zuiz nyei ga'naaiv.

⁷Yie ziouc gorngv, ‘O Tin-Hungh aac, yie yiem naaiv, yie daaih weic ei jienv meih nyei za'eix zoux, hnangv wuov njunc Leiz-Latc Sou fiev jienv gorngv taux yie.’+”

⁸Daauh dangh Giduc gorngv, “Mienh longc saeng-kuv ziec yaac fongc horc ga'naaiv, fai dorh saeng-kuv ziangh dauh buov ziec, fai longc saeng-kuv ziec weic fiqv zuiz meih maiv oix, yaac maiv a'hneiv” (naaiv deix se ziux leiz-latc fongc horc ziec nyei).

⁹Nqa'haav ninh aengx gorngv, “O Tin-Hungh aac, yie yiem naaiv. Yie daaih weic ei jienv meih nyei za'eix zoux.” Tin-Hungh ziouc bun loz-za'eix jiex nzengc, aengx longc Giduc liepc jiez siang nyei daaih.

¹⁰Weic zuqc Yesu Giduc ei Tin Hungh nyei za'eix zoux, longc ninh ganh nyei sin zoux ziec nyei ga'naaiv, ziec yietc nzunc dorngx yietc liuz, ziouc bun mbuo cing-nzengc daaih.

¹¹Dauh dauh sai mienh hnoi-hnoi zoux ninh sai mienh nyei gong, nzunc-nzunc dongh wuov nyungc ga'naaiv ziec. Wuov deix ga'naaiv yietc liuz yaac maiv haih nzaaux maiv ndutv zuiz.

¹²Mv baac Giduc weic zuiz siev ninh ganh zoux ziec nyei ga'naaiv, ziec yietc nzunc dorngx yietc liuz aqv. Nqa'haav ninh zueiz jienv Tin-Hungh nyei mbiaauc maengx.

¹³Yiem naaic daaih, Giduc zuov jienv ninh nyei win-wangv zuqc yiem ninh nyei zaux-ndiev zoux lorngx zaux nyei dorngx.

¹⁴Weic zuqc Giduc longc ninh ganh ziec yietc nzunc, ninh ziouc bun nzaaux cing-nzengc daaih nyei mienh yietc liuz dunh yunh.

¹⁵Singx Lingh yaac zoux zorng-zengx gorngv naaiv deix sic. Daauh dangh ninh gorngv,

¹⁶“Ziouv gorngv, nyutc zeiv oix taux, yie oix caux ninh mbuo liepc jiez ngaengc waac. Yie oix zorqv yie nyei leiz-latc fapv jienv ninh mbuo nyei mba'nziu-gorn, yaac fiev jienv ninh mbuo nyei hnyouv gu'nyuoz.”

¹⁷Nqa'haav ninh aengx gorngv, “Yiem naaiv mingh yie maiv jangx ninh mbuo nyei zuiz, caux ninh mbuo zoux nyei waaic sic.”

¹⁸Hnangv naaic duqv naaiv deix zuiz guangc liuz, ziouc maiv zuqc aengx longc ga'naaiv ziec weic fiqv zuiz.

¹⁹Zuangx gorx-youz aac, hnangv naaic mbuo weic Yesu nyei nziaamv haih bungx laangc nyei bieqc Gauh Cing-Nzengc Jiex Wuov Qongx.

²⁰Yesu weic mbuo koi siang-jauv, dongh ziangh jienv nyei jauv, weic zuqc ninh koi tong mbaeqc gaengh ndie bun mbuo gan naaic mingh. Naaiv mbaeqc gaengh ndie se ninh ganh nyei sin.

²¹Mbuo maaih dauh domh sai mienh gunv Tin-Hungh nyei biauv zong mienh.

²²Oix zuqc longc ziepc zuoqv nyei hnyouv, sienx wuonv, mbuo nyei hnyouv yaac nzaaux cing-nzengc, maiv maaih dorngx nqemh nyei laangh fim, mbuo nyei sin yaac longc cing-nzengc nyei wuom nzaaux liuz, daaih nitv fatv Tin-Hungh.

²³Mbuo oix zuqc sienx wuonv mbuo nyiemc maaih lamh hnamv oix duqv nyei, weic zuqc laengz waac wuov dauh se kaux duqv wuonv nyei.

²⁴Mbuo yaac oix zuqc hnamv mangc gaax, hnangv haaix nor haih tengx laanh yietc zei hnamv laanh, yietc zei zoux kuv sic.

²⁵Oix zuqc gapv zunv zoux leiz-baaix, maiv dungx guangc hnangv maaih deix mienh guangc guenx nor. Daaux nzuonx laanh oix zuqc yietc zei kuinx laanh weic zuqc meih mbuo hiuv duqv Ziouv Siemv Zuiz nyei Hnoi taux fatv aqv.

²⁶Se gorngv mbuo hiuv liuz zien leiz mv baac duqv-eix zanc-zanc baamz zuiz, maiv maaih haaix nyungc ziec nyei ga'naaiv haih fiqv duqv zuiz aqv.

²⁷Kungx gamh nziex jienv zuov zuqc siemv zuiz yaac zuqc hiaangx haic nyei douz, dongh longc buov Tin-Hungh nyei win-jaa wuov nyungc douz.

²⁸Haaix dauh baamz Mose nyei Leiz, yaac maaih i buo laanh mienh zoux zorng-zengx nor, wuov dauh zungv zuqc daic yaac maiv maaih haaix dauh korv-lienh.

²⁹Wuov nyungc, hnamv mangc gaax, haaix dauh caaiv jienv Tin-Hungh nyei Dorn, wuov dauh ziouc mangc piex longc liepc ngaengc waac nyei nziaamv, dongh nzaaux ninh cing-nzengc wuov nyungc nziaamv. Ninh yaac gorngv doqc ceix en nyei Singx Lingh, ziouc zic duqv dingc zuiz ndongc haaix hniev?

³⁰Mbuo hiuv duqv gorngv naaiv joux waac wuov dauh. Ninh gorngv, “Jaauv win se yiem yie. Yie za'gengh jaauv aqv.” Ninh aengx gorngv, “Ziouv oix siemv ninh nyei baeqc fingx.”

³¹Hnangv naaic, zuqc ndortv yiem ziangh jienv nyei Tin-Hungh nyei buoz-ndiev nor, se gamh nziex haic nyei sic.

³²Oix zuqc jangx jienv zinh ndaangc meih mbuo hnangv haaix nor. Meih mbuo coqv hoqc duqv Tin-Hungh nyei njang ziux jienv meih mbuo wuov zanc, meih mbuo diev duqv camv-nyungc kouv naanc mv baac meih mbuo diev duqv hingh.

³³Maaih ziangh hoc meih mbuo dorng zuangx zuqc mienh gorngv doqc, zoux doqc. Maaih ziangh hoc maaih deix zuqc mienh hnangv naaiv nor zoux. Meih mbuo yaac mingh caux ninh mbuo juangc jienv diev.

³⁴Meih mbuo yaac maaih hnyouv korv-lienh zuqc wuonx nyei mienh. Meih mbuo nyei ga'naaiv zuqc caangv nzengc, meih mbuo a'hneiv diev weic zuqc meih mbuo hiuv duqv meih mbuo corc maaih nyungc gauh longx jiex, yaac yietc liuz yiem.

³⁵Hnangv naaic, oix zuqc bungx laangc nyei sienx, maiv dungx guangc. Meih mbuo ziouc duqv zipv domh zingh nyeic.

³⁶Oix zuqc longc noic diev weic zoux ei Tin-Hungh nyei eix ziouc duqv zipv ninh laengz bun nyei buonc.

³⁷Hnangv Ging-Sou gorngv nor, “Maiv lauh oix daaih wuov dauh za'gengh daaih, ninh zungv maiv ngaih.

³⁸Haaix dauh caux yie horpc hnyouv, wuov dauh weic sienx yie duqv ziangh jienv. Mv baac se gorngv haaix dauh hluotv nqaang, yie ziouc maiv a'hneiv wuov dauh aqv.”

³⁹Mv baac mbuo maiv zeiz hluotv nqaang zuqc mietc nyei mienh. Mbuo sienx Tin-Hungh yaac zoux duqv njoux nyei mienh.