Read Iu Mien Hipv^lu 11 Bible Online

Hipv^lu 11 - Iu Mien bible

Hipv^lu 11

¹Sienx fim se sienx dingc mbuo maaih lamh hnamv oix duqv nyei za'gengh oix duqv, yaac sienx dingc mbuo mangc maiv buatc nyei za'gengh maaih.

²Loz-hnoi mienh weic maaih sienx fim duqv Tin-Hungh a'hneiv ninh mbuo.

³Weic mbuo maaih sienx fim mbuo cingx daaih mengh baeqc Tin-Hungh kungx gorngv cuotv waac hnangv ziouc zeix cuotv maanc muotc daaih. Hnangv naaic, mangc duqv buatc nyei se yiem mangc maiv buatc nyei zeix cuotv daaih.

⁴Weic Aa^mbaen maaih sienx fim, ninh longc ziec bun Tin-Hungh nyei ga'naaiv gauh longx Kaa^in nyei. Tin-Hungh yaac zipv Aa^mbaen ziec nyei ga'naaiv ziouc bun cing Aa^mbaen zoux duqv horpc Tin-Hungh nyei hnyouv. Weic ninh maaih sienx fim, maiv gunv ninh daic mi'aqv, se hnangv ninh corc gorngv jienv waac nor.

⁵Weic Enokv maaih sienx fim, Tin-Hungh zipv ninh faaux mi'aqv, ninh maiv zuqc daic. Maiv maaih haaix dauh haih lorz duqv buatc ninh, weic zuqc Tin-Hungh zipv ninh faaux mi'aqv. Ging-Sou gorngv, Tin-Hungh maiv gaengh zipv Enokv faaux wuov zanc, Enokv zoux duqv horpc Tin-Hungh nyei hnyouv.

⁶Se gorngv mienh maiv maaih sienx fim, maiv haih zoux bun Tin-Hungh a'hneiv. Weic zuqc haaix dauh daaih lorz Tin-Hungh oix zuqc sienx za'gengh maaih Tin-Hungh nyei, yaac sienx Tin-Hungh ceix zingh nyeic bun longc hnyouv lorz ninh wuov deix mienh.

⁷Weic Noyaa maaih sienx fim, Tin-Hungh cingx mbuox ninh mbungh nqa'haav hingv maiv gaengh buatc nyei sic. Noyaa taaih Tin-Hungh ziouc ei jienv Tin-Hungh mbuox nyei waac zoux. Ninh gapv poux nzangv daaih weic njoux ninh nyei hmuangv doic. Hnangv naaic, weic Noyaa maaih sienx fim, ninh dingc baamh gen nyei zuiz, yaac duqv siouc caux Tin-Hungh horpc hnyouv nyei mienh duqv nyei buonc.

⁸Weic Apc^laa^ham maaih sienx fim, Tin-Hungh heuc ninh cuotv mingh taux laengz ceix bun ninh nzipc nyei deic-bung, ninh muangx Tin-Hungh nyei waac. Ninh cuotv mingh, zungv maiv hiuv duqv ninh mingh haaix.

⁹Weic Apc^laa^ham maaih sienx fim, ninh ziouc yiem Tin-Hungh laengz bun wuov norm deic-bung hnangv zoux kaeqv mienh yiem ganh fingx mienh nyei deic-bung nor. Ninh yiem ndopv-liuh hnangv I^sakc caux Yaakopv, dongh caux ninh siouc Tin-Hungh laengz nyei waac wuov deix.

¹⁰Apc^laa^ham zuov jienv maaih gorn-ndoqv wuov norm zingh, dongh Tin-Hungh ganh daav za'eix ceix yaac zoux zaangc mienh ceix jiez nyei zingh.

¹¹Weic maaih sienx fim, maiv gunv Apc^laa^ham gox haic, Saalaa yaac maiv haih maaih saeng-yungz, Apc^laa^ham duqv zoux die, weic zuqc ninh[19] sienx Tin-Hungh oix ziepc zuoqv nyei ei ninh laengz nyei waac zoux.

¹²Weic naaiv, maiv gunv Apc^laa^ham zungv hnangv daic mi'aqv nor, yiem naaiv nduqc laanh mienh cuotv daaih nyei zeiv-fun ndongc gu'nguaaic lungh nyei hleix camv yaac ndongc koiv-hlen nyei saa-ziou camv.

¹³Naaiv deix zuangx mienh daic nyei ziangh hoc ninh mbuo corc maaih sienx fim. Ninh mbuo maiv gaengh duqv zipv Tin-Hungh laengz bun nyei buonc, mv baac yiem go nyei mangc duqv buatc ziouc a'hneiv. Ninh mbuo nyiemc ninh mbuo yiem naaiv baamh gen zoux ganh norm deic-bung daaih nyei kaeqv mienh hnangv.

¹⁴Gorngv naaiv deix waac nyei mienh bun cing ninh mbuo lorz norm deic-bung benx ninh mbuo ganh nyei.

¹⁵Se gorngv ninh mbuo jangx taux ninh mbuo leih wuov norm deic-bung, ninh mbuo zungv maaih qangx nzuonx nyei.

¹⁶Mv baac ninh mbuo za'gengh oix duqv norm gauh longx nyei deic-bung, se yiem wuov tin-dorngh. Weic naaiv Tin-Hungh maiv nyaiv ninh mbuo heuc ninh zoux ninh mbuo nyei Tin-Hungh, weic zuqc Tin-Hungh zungv liuc leiz ziangx norm zingh bun ninh mbuo.

¹⁷Weic Apc^laa^ham maaih sienx fim, Tin-Hungh seix ninh wuov zanc, Apc^laa^ham zorqv ninh nyei dorn, I^sakc, oix ziec bun Tin-Hungh. Apc^laa^ham zipv Tin-Hungh laengz nyei waac mv baac corc nyunc zorqv ninh nyei ndoqc dorn oix ziec bun Tin-Hungh,

¹⁸maiv gunv zinh ndaangc Tin-Hungh mbuox jiex ninh, “Meih nyei hoz doic zeiv-fun oix yiem I^sakc daaih.”

¹⁹Apc^laa^ham funx Tin-Hungh haih bun daic mingh nyei mienh nangh daaih. Ninh yaac duqv ninh nyei dorn nzuonx daaih, beiv hnangv I^sakc daic mingh aengx nangh daaih nor.

²⁰Weic I^sakc maaih sienx fim, ninh cingx daaih buang waac bun Yaakopv caux Esaau nqa'haav hingv duqv Tin-Hungh nyei fuqv.

²¹Weic Yaakopv maaih sienx fim, ninh aav lamh guei seix nyei ziangh hoc ninh buang waac bun Yosepv nyei i dauh dorn, yaac longc ninh nyei biaav-mbiaac caengx jienv sin baaix Tin-Hungh.

²²Weic Yosepv maaih sienx fim, ninh aav lamh guei seix nyei ziangh hoc ninh jaa-ndaangc gorngv ziangx I^saa^laa^en Mienh oix cuotv I^yipv Deic-Bung nyei jauv-louc, yaac paaiv ziangx waac, cuotv wuov zanc oix zuqc dorh jienv ninh nyei mbungv mingh.[20]

²³Weic Mose nyei diex maac maaih sienx fim, Mose cuotv seix wuov zanc, ninh mbuo buatc ninh ziangh duqv nzueic haic, ziouc zorqv ninh bingx buo hlaax nyieqc. Ninh mbuo yaac maiv gamh nziex hungh diex njiec nyei lingc.

²⁴Weic Mose maaih sienx fim, ninh hlo daaih wuov zanc ninh maiv oix ndaam mengh zoux Faalo Hungh nyei sieqv nyei dorn.

²⁵Ninh nyunc caux Tin-Hungh nyei baeqc fingx zuqc siouc kouv yaac funx se gauh longx duqv caamx baav zuiz nyei njien-youh.

²⁶Ninh funx weic Giduc diev nyaiv gauh zic I^yipv Deic-Bung jaaix jiex nyei zinh zoih, weic zuqc ninh hnamv taux nqa'haav hingv oix duqv nyei zingh nyeic.

²⁷Weic Mose maaih sienx fim, ninh biaux cuotv I^yipv yaac maiv gamh nziex hungh diex nouz. Ninh yaac maiv daaux nqaang weic zuqc ninh hnangv mangc duqv buatc dongh mienh nyei m'zing mangc maiv buatc nyei Tin-Hungh.

²⁸Weic Mose maaih sienx fim, ninh ziouc liepc jiez Siex Maengc Zipv yaac hatc mienh longc nziaamv fuqv wuov gaengh ndaangc, weic maiv bun daix mienh wuov dauh fin-mienh daix I^saa^laa^en Mienh nyei mouz dauh dorn-la'gauv.

²⁹Weic I^saa^laa^en Mienh maaih sienx fim, ninh mbuo jiex Koiv-Siqv hnangv yangh jauv-nqaai nor. Mv baac I^yipv Mienh seix jiex gaax, ziouc zuqc wuom yiemx daic nzengc mi'aqv.

³⁰Weic I^saa^laa^en Mienh maaih sienx fim, ninh mbuo huing Ye^li^ko Zingh siec hnoi, zingh laatc ziouc mbaang mi'aqv.

³¹Weic maaic buonv-sin wuov dauh m'sieqv dorn, Laa^hapc, maaih sienx fim, ninh a'hneiv zipv caaiv juoqv wuov deix I^saa^laa^en Mienh ziouc maiv caux maiv muangx Tin-Hungh nyei waac wuov deix mienh zuqc daix.

³²Yie oix zuqc aengx gorngv jienv mingh fai? Yie maiv maaih ziangh hoc gorngv Gi^nde^on, Mbaalaakv, Saem^sanx, Yepv^taa, Ndaawitv, Saa^mu^en[21] caux Tin-Hungh nyei zuangx douc waac mienh.

³³Weic ninh mbuo maaih sienx fim, ziouc mborqv hingh camv-norm guoqv, liepc jiez baengh fim nyei leiz, yaac duqv zipv Tin-Hungh laengz bun nyei buonc. Ninh mbuo buang jienv sienh nyei nzuih baengx,

³⁴mborqv daic domh douz, biaux ndutv maiv zuqc nzuqc ndaauv daix. Ninh mbuo mau mv baac henv jiez daaih. Ninh mbuo zoux henv haic nyei mborqv jaax baeng mborqv mbaaix ganh guoqv nyei jun-baeng.

³⁵Maaih deix m'sieqv dorn weic maaih sienx fim duqv ninh mbuo daic mingh nyei mienh aengx nangh daaih. Aengx maaih deix mienh zuqc mienh zeix taux daic, maiv nyiemc mau weic duqv bungx cuotv. Ninh mbuo hnangv naaiv nor zoux weic haih nangh daaih duqv gauh longx nyei maengc.

³⁶Maaih deix zuqc mienh guatc doqc jatv, zuqc biaav-bin mborqv. Aengx maaih deix zuqc limc ndoh jienv yaac zuqc wuonx loh.

³⁷Maaih deix zuqc mienh longc la'bieiv zong, maaih deix zuqc mienh njoux zoux i nqanx, maaih deix zuqc mienh longc nzuqc ndaauv daix daic. Ninh mbuo buix ba'gi yungh ndopv caux yungh ndopv dorngx lui-houx yaac youh jienv mingh, jomc duqv kouv haic, zuqc mienh zoux doqc, zuqc mienh hoic.

³⁸Naaiv norm baamh gen zungv maiv puix ninh mbuo yiem. Ninh mbuo youh jienv deic-bung-huaang, youh jienv mbong mingh, yiem mbaengx-kuotv caux ndau-kuotv.

³⁹Naaiv deix mienh duqv mengh dauh longx weic zuqc ninh mbuo maaih sienx fim, mv baac Tin-Hungh laengz bun nyei buonc ninh mbuo maiv gaengh duqv zipv.

⁴⁰Tin-Hungh weic mbuo dingc ziangx gauh longx nyei za'eix. Se wuov deix mienh oix zuqc caux mbuo yietc jauv cingx daaih haih duqv dunh yunh nzoih.