Read Iu Mien Hipv^lu 2 Bible Online

Hipv^lu 2 - Iu Mien bible

Hipv^lu 2

¹Weic naaiv, mbuo gauh oix zuqc muangx longx mbuo haiz jiex nyei zien leiz. Maiv zei aeqv, nziex mbuo haih leih zien leiz go.

²Fin-mienh douc wuov deix waac se zien nyei. Haaix dauh baamz, maiv ei jienv naaiv deix waac zoux, wuov dauh ziouc puix ninh zoux nyei zuqc winh bun ninh.

³Wuov nyungc, se gorngv mbuo maiv muangx Tin-Hungh hlo haic nyei za'eix njoux mbuo, mbuo hnangv haaix nor haih biaux duqv ndutv maiv zuqc dingc zuiz? Tin-Hungh nyei za'eix njoux mienh, Ziouv ganh gorngv ndaangc. Muangx haiz nyei mienh yaac biux mengh se za'gengh zien nyei.

⁴Tin-Hungh ganh yaac zoux zorng-zengx. Ninh zoux jangx-hoc caux mbuoqc horngh, hnamv maiv mengh baeqc nyei sic camv nyei, yaac zorqv yiem Singx Lingh daaih nyei zingh nyeic, ei ninh ganh nyei za'eix ceix bun mienh.

⁵Tin-Hungh maiv zeiz paaiv fin-mienh gunv oix daaih wuov norm siang-lungh ndiev, dongh yie mbuo gorngv wuov norm lungh ndiev.

⁶Mv baac, yiem Ging-Sou maaih norm dorngx maaih dauh gorngv, “Meih funx baamh mienh benx haaix nyungc cingx jangx taux ninh? Funx seix zaangc mienh[4] benx haaix nyungc cingx daaih goux ninh?

⁷Meih bun ninh maaih douc zoux gauh aiv deix fin-mienh, aengx taaih ninh, bun ninh maaih njang-laangc weic zoux hungh ningv,

⁸zungv orn ninh gunv maanc muotc.”[5] Tin-Hungh orn ninh gunv maanc muotc bun cing maiv maaih haaix nyungc Tin-Hungh maiv bun ninh gunv. Mv baac ih zanc mbuo maiv gaengh buatc ninh gunv maanc muotc.

⁹Daaux nzuonx mbuo buatc Yesu, dongh maaih douc zuqc zoux gauh aiv deix fin-mienh, duqv Tin-Hungh nyei en weic maanc mienh daic. Weic zuqc ninh siouc kouv taux daic, mbuo ih zanc buatc Tin-Hungh taaih ninh, bun ninh maaih njang-laangc dorngx hungh ningv.

¹⁰Tin-Hungh zeix maanc muotc yaac zeix daaih weic ninh ganh. Hnangv naaic Tin-Hungh bun Yesu siouc kouv weic bun ninh dunh yunh nzoih se zoux duqv horpc nyei. Tin-Hungh hnangv naaiv zoux weic dorh mienh[6] camv daaih zipv ninh nyei njang-laangc weic zuqc Yesu zoux bieiv dorh ninh mbuo duqv njoux.

¹¹Ninh nzaaux nzengc mienh nyei zuiz, bun ninh mbuo cing-nzengc daaih. Liemh ninh ganh caux duqv ninh nzaaux cing-nzengc wuov deix yietc zungv juangc dauh Die. Weic naaiv Yesu maiv nyaiv heuc ninh mbuo zoux gorx-youz.

¹²Ninh gorngv mbuox Tin-Hungh, “Yie oix zunh meih nyei mengh mbuox yie nyei gorx-youz. Ninh mbuo gapv zunv nyei ziangh hoc yie oix yiem ninh mbuo gapv zunv nyei wuic mbu'ndongx ceng meih.”

¹³Yesu yaac gorngv, “Yie oix sienx kaux Tin-Hungh.” Aengx gorngv, “Mangc maah! Yie caux Tin-Hungh ceix bun yie naaiv deix naamh nyouz yiem naaiv.”

¹⁴Ninh heuc naamh nyouz wuov deix, se maaih orv maaih nziaamv nyei mienh. Yesu ganh yaac benx baamh mienh, maaih orv maaih nziaamv fih hnangv nyei. Hnangv naaic, weic ninh daic mingh ninh haih mietc nzengc maaih lingc bun mienh zuqc daic wuov dauh, se mienv nyei hungh,

¹⁵yaac bungx nqoi ziangh seix zuqc zoux nouh weic gamh nziex haih daic nyei mienh.

¹⁶Hnangv naaic, buatc duqv mengh nyei. Ninh tengx nyei se maiv zeiz fin-mienh. Ninh tengx nyei se Apc^laa^ham nyei zeiv-fun.

¹⁷Weic naaiv ninh oix zuqc yiem maanc sic hnangv nzengc ninh nyei gorx-youz, weic duqv zoux ninh mbuo nyei domh sai mienh, maaih hnyouv korv-lienh mienh yaac ziepc zuoqv nyei fu-sux Tin-Hungh, ziouc duqv tengx baeqc fingx fiqv zuiz.

¹⁸Weic ninh ganh zuqc seix jiex yaac zuqc siouc kouv, ninh cingx daaih haih tengx zuqc seix nyei mienh.