Read Iu Mien Hipv^lu 5 Bible Online

Hipv^lu 5 - Iu Mien bible

Hipv^lu 5

¹Dauh dauh domh sai mienh se yiem zuangx mienh mbu'ndongx ginv cuotv daaih yaac orn ninh div zuangx mienh fu-sux Tin-Hungh. Ninh oix zuqc weic zuangx mienh nyei zuiz dorh zingh nyeic caux ziec nyei ga'naaiv fungx bun Tin-Hungh.

²Weic zuqc domh sai mienh ganh maaih ziex diuc mau nyei, ninh haih suonc hnyouv nyei tengx maiv hiuv caux caqv-bouc zoux dorngc nyei mienh.

³Weic zuqc ninh ganh yaac mau, ninh oix zuqc dorh ga'naaiv mingh ziec weic ninh ganh nyei zuiz caux zuangx mienh nyei zuiz.

⁴Maiv maaih haaix dauh haih taaih ganh zoux gauh hlo jiex nyei domh sai mienh. Se Tin-Hungh paaiv ninh zoux hnangv paaiv Aalon nor.

⁵Fih hnangv nyei, Giduc yaac maiv zeiz taaih ganh zoux domh sai mienh, se Tin-Hungh paaiv ninh zoux. Tin-Hungh mbuox ninh, “Meih zoux yie nyei Dorn. Ih hnoi yie benx meih nyei Die.”

⁶Aengx maaih norm dorngx ninh gorngv, “Meih yietc liuz zoux sai mienh, hnangv Men^ki^se^ndekc wuov nyungc sai mienh nor.”

⁷Yesu corc yiem naaiv baamh gen wuov zanc, ninh heuc jienv mbui, maaih wuom-mueic liouc cuotv nyei tov Tin-Hungh, dongh haih njoux ninh, bun ninh maiv zuqc daic wuov dauh. Weic zuqc ninh longc hnyouv muangx Tin-Hungh, Tin-Hungh ziouc haiz ninh daux gaux tov nyei waac.

⁸Maiv gunv Yesu zoux Tin-Hungh nyei Dorn, ninh zuqc siouc nyei kouv naanc bun ninh hoqc linc muangx waac.

⁹Tin-Hungh bun ninh dunh yunh liuz, Yesu ziouc zoux gorn bun yietc zungv muangx Tin-Hungh nyei waac nyei mienh yietc liuz duqv njoux.

¹⁰Tin-Hungh yaac paaiv ninh zoux domh sai mienh hnangv Men^ki^se^ndekc wuov nyungc sai mienh nor.

¹¹Yie mbuo corc maaih waac camv nyei gorngv zoux sai mienh nyei jauv mv baac aqc duqv gorngv mengh weic zuqc meih mbuo nyei m'normh maiv zaangh waac.

¹²Taux ih zanc meih mbuo zungv horpc zuqc zoux fin-saeng, mv baac meih mbuo corc qiemx zuqc mienh aengx njaaux da'yietv kang Tin-Hungh nyei doz. Meih mbuo corc qiemx zuqc hopv nyorx nyei, maiv haih nyanc hnaangx.

¹³Haaix dauh oix zuqc hopv nyorx, wuov dauh corc zoux gu'nguaaz, maiv mengh baeqc zoux horpc nyei jauv.

¹⁴Hnaangx se weic domh mienh nyanc, dongh hoqc linc liuz ziouc hiuv duqv haaix nyungc se longx nyei, haaix nyungc se waaic nyei, wuov deix mienh.