Read Iu Mien Hipv^lu 6 Bible Online

Hipv^lu 6 - Iu Mien bible

Hipv^lu 6

¹Hnangv naaic, mbuo oix zuqc jiex da'yietv kang Giduc nyei doz-leiz aengx hungx jienv wuov ndaangc mingh taux ei sienx nyei jauv benx domh mienh. Maiv dungx aengx paan-pei liepc nzunc gorn-ndoqv, dongh oix zuqc goiv hnyouv guangc maiv lamh longc nyei sic[11] sienx Tin-Hungh.

²Maiv dungx paan-pei njaaux jiex wuom nyei leiz,[12] caux longc buoz maan mienh nyei leiz, caux mienh daic mingh aengx nangh daaih nyei jauv, caux zuqc Tin-Hungh siemv dingc zuiz weic yietc liuz wuov nyungc jauv.

³Se gorngv Tin-Hungh bun nor, mbuo za'gengh hnangv naaiv nor zoux aqv.

⁴Zinh ndaangc sienx liuz Yesu aengx cuotv mingh wuov deix mienh, hnangv haaix nor haih dorh ninh mbuo goiv hnyouv nzuonx? Ninh mbuo zipv jiex Tin-Hungh nyei njang, yaac seix jiex yiem tin-dorngh daaih nyei zingh nyeic nyei mueix, yaac duqv buonc Singx Lingh,

⁵yaac duqv seix jiex ziouc hiuv duqv Tin-Hungh nyei waac maaih mueix doc longx nyei, yaac duqv seix jiex nqa'haav wuov gitv lungh ndiev nyei qaqv.

⁶Se gorngv seix liuz mv baac nqa'haav cuotv Yesu, maiv sienx, za'gengh maiv maaih za'eix dorh naaiv nyungc mienh goiv hnyouv nzuonx, weic zuqc ninh mbuo zorqv Tin-Hungh nyei Dorn aengx ding jienv ziepc nzaangc jaax bun ninh dorng zuangx zuqc nyaiv.

⁷Haaix nzong ndeic zanc-zanc duqv mbiungc-wuom longx, gaeng-zuangx ziouc cuotv longx weic tengx zoux ndeic nyei mienh, wuov nzong ndeic duqv Tin-Hungh ceix fuqv.

⁸Mv baac haaix nzong ndeic kungx cuotv njimv cuotv miev se maiv lamh longc, aav lamh deix zuqc zioux aqv. Nqa'haav ziouc zuqc douz buov qui nzengc.

⁹Hnamv haic nyei gorx-youz aac, maiv gunv yie mbuo hnangv naaiv nor gorngv, yie mbuo sienx dingc weic meih mbuo duqv njoux meih mbuo oix duqv gauh longx nyei sic.

¹⁰Tin-Hungh se baengh fim nyei. Ninh maiv haih la'kuqv meih mbuo zoux nyei gong, yaac maiv la'kuqv meih mbuo bun cing meih mbuo hnamv ninh, dongh meih mbuo tengx ninh nyei mienh yaac zanc-zanc tengx jienv mingh.

¹¹Yie mbuo oix meih mbuo mouz laanh fih hnangv nyei jorm hnyouv taux setv mueiz weic bun meih mbuo za'gengh duqv dongh meih mbuo maaih lamh hnamv oix duqv nyei.

¹²Yie mbuo maiv oix meih mbuo lueic, mv baac oix meih mbuo zuotc dongh maaih sienx fim yaac longc noic zuov wuov deix nyei nyungc zeiv ziouc duqv siouc Tin-Hungh laengz bun nyei buonc.

¹³Tin-Hungh laengz waac bun Apc^laa^ham wuov zanc ninh maiv lamh ziangv dorngx weic zuqc maiv maaih haaix dauh gauh hlo jiex Tin-Hungh ganh. Ninh ziouc ziangv jienv ninh ganh laengz waac.

¹⁴Ninh gorngv mbuox Apc^laa^ham, “Yie zungv oix ceix fuqv bun meih yaac oix bun meih maaih zeiv-fun camv.”

¹⁵Apc^laa^ham longc noic zuov ziouc duqv zipv Tin-Hungh laengz ceix bun nyei.

¹⁶Baamh mienh laengz waac ninh mbuo ziangv jienv yietc dauh gauh hlo ninh mbuo ganh laengz. Hnangv naaic laengz liuz, naaiv deix waac se liepc dingc mi'aqv, maiv lamh nzaeng dorngx.

¹⁷Tin-Hungh oix bun, dongh oix zipv ninh laengz bun nyei wuov deix, mengh mengh nyei hiuv duqv ninh nyei za'eix yietc liuz maiv haih goiv yienc. Weic naaiv, ninh cingx daaih ziangv ninh ganh laengz waac.

¹⁸Hnangv naaic, maaih naaiv deix i nyungc yietc liuz maiv haih goiv yienc, Tin-Hungh yaac maiv haih gorngv-baeqc. Weic naaiv mbuo biaux daaih lorz ninh bun mbuo maaih lamh kaux dorngx ziouc bun mbuo gauh jorm hnyouv sienx wuonv maaih lamh hnamv nqa'haav hingv oix duqv nyei.

¹⁹Mbuo hnangv naaiv maaih lamh hnamv se hnangv maaih ga'naaiv zuic jienv mbuo nyei hnyouv dingc nyei, wuonv nyei. Naaiv nyungc maaih lamh hnamv bieqc tin-dorngh nyei singx dinc, yiem mbaeqc gaengh ndie gu'nyuoz wuov qongx.

²⁰Yesu weic mbuo zungv bieqc gu'nyuoz ndaangc mi'aqv, yaac yietc liuz zoux domh sai mienh, hnangv Men^ki^se^ndekc wuov nyungc sai mienh.