Read Iu Mien Hipv^lu 7 Bible Online

Hipv^lu 7 - Iu Mien bible

Hipv^lu 7

¹Naaiv dauh Men^ki^se^ndekc zoux Saalem Zingh nyei hungh yaac zoux Yiem Hlang Jiex nyei Tin-Hungh nyei sai mienh. Apc^laa^ham mingh mborqv hingh wuov deix biei dauh hungh diex liuz, nzuonx wuov zanc, Men^ki^se^ndekc mingh buangh ninh yaac buang waac bun ninh.

²Apc^laa^ham yaac zorqv ninh mborqv hingh caangv duqv daaih nyei yietc zungv ga'naaiv, ziepc gouv nyei bun yietc gouv Men^ki^se^ndekc. Men^ki^se^ndekc nyei mbuox da'yietv nyungc eix leiz se “baengh fim nyei hungh.” Ninh zoux Saalem Zingh nyei hungh ziouc aengx maaih norm mbuox heuc “baengh orn nyei hungh diex,” weic zuqc Saalem wuov joux waac nyei eix leiz se “baengh orn.”

³Maiv maaih sou gorngv haaix dauh zoux Men^ki^se^ndekc nyei die fai maa, fai ninh nyei douh zong, yaac maiv gorngv ninh cuotv seix caux guei seix nyei hnoi. Ninh se hnangv Tin-Hungh nyei Dorn nor, yietc liuz zoux sai mienh.

⁴Hnamv mangc gaax, Men^ki^se^ndekc ndongc haaix hlo! Mbuo nyei ong-taaix-ngaeqv Apc^laa^ham zungv zorqv ninh mborqv jaax hingh caangv duqv daaih nyei ga'naaiv ziepc gouv bun yietc gouv Men^ki^se^ndekc.

⁵Ziux leiz-latc dingc, Lewi nyei fun-faqv, dongh zoux sai mienh wuov deix, oix zuqc siou I^saa^laa^en Mienh nyei ga'naaiv ziepc gouv nyei yietc gouv, maiv gunv ninh mbuo lomh nzoih zoux I^saa^laa^en Fingx yaac zoux Apc^laa^ham nyei zeiv-fun.

⁶Men^ki^se^ndekc maiv zeiz Lewi nyei douh zong, mv baac ninh duqv siou Apc^laa^ham nyei ga'naaiv ziepc gouv nyei yietc gouv, yaac buang waac bun Apc^laa^ham, dongh duqv zipv ei Tin-Hungh laengz nyei waac.

⁷Buang waac wuov dauh ndongc haaix zungv zoux gauh hlo dongh duqv ninh buang waac wuov dauh.

⁸Gorngv taux sai mienh nor, ninh mbuo siou ziepc gouv nyei yietc gouv mv baac ninh mbuo se haih daic nyei mienh. Men^ki^se^ndekc yaac siou ziepc gouv nyei yietc gouv mv baac ninh corc ziangh jienv nyei hnangv Ging-Sou gorngv nor.

⁹Se gorngv aengx gorngv nyungc, maiv gunv Lewi nyei zeiv-fun siou ziepc gouv nyei yietc gouv mv baac Apc^laa^ham cuotv ziepc gouv nyei yietc gouv bun Men^ki^se^ndekc wuov zanc, Lewi yaac caux jienv cuotv.

¹⁰Weic zuqc Men^ki^se^ndekc buangh Apc^laa^ham wuov zanc, Lewi maiv gaengh cuotv seix, mv baac corc yiem ninh nyei ong-taaix-ngaeqv, Apc^laa^ham, nyei sin.

¹¹Zinh ndaangc Tin-Hungh bun leiz-latc I^saa^laa^en Mienh wuov zanc, maaih Lewi wuov nyungc sai mienh zoux leiz-latc nyei gorn-ndoqv. Se gorngv Lewi wuov nyungc sai mienh zoux nyei gong haih bun mienh dunh yunh nor, weic haaix diuc oix zuqc aengx ganh maaih nyungc sai mienh cuotv daaih hnangv Men^ki^se^ndekc wuov nyungc sai mienh, maiv hnangv Aalon?

¹²Ganh yienc nyungc sai mienh nor, leiz-latc yaac oix zuqc ganh yienc jiex.

¹³Mbuo nyei Ziouv, dongh yie mbuo gorngv taux wuov dauh, benx ganh fingx mienh. Wuov fingx yaac maiv maaih yietc dauh duqv zoux jiex sai mienh yiem ziec-dorngh fu-sux.

¹⁴Mienh mengh mengh nyei hiuv duqv mbuo nyei Ziouv cuotv seix benx Yu^ndaa Fingx. Mose gorngv sai mienh nyei jauv wuov zanc, ninh liemh maiv tih yietc joux Yu^ndaa Fingx.

¹⁵Aengx maaih diuc bun mbuo zungv gauh mengh baeqc, se maaih ganh dauh sai mienh cuotv daaih, ninh yaac hnangv Men^ki^se^ndekc nor.

¹⁶Ninh duqv zoux sai mienh se maiv zeiz ei douh zong zoux sai nyei leiz, se ei maiv haih mietc nyei maengc nyei qaqv zoux.

¹⁷Weic zuqc Ging-Sou gorngv, “Meih yietc liuz zoux sai mienh hnangv Men^ki^se^ndekc wuov nyungc sai mienh nor.”

¹⁸Hnangv naaic loz-leiz-latc zuqc tuix cuotv mi'aqv weic zuqc mau haic, maiv lamh longc.

¹⁹Mose nyei leiz-latc maiv haih bun haaix nyungc dunh yunh. Mv baac ih zanc maaih nyungc gauh longx, gauh maaih lamh hnamv haih dorh mbuo nitv fatv Tin-Hungh.

²⁰Aengx maaih Tin-Hungh laengz nyei waac. Ninh paaiv Lewi Fingx zoux sai mienh wuov zanc, ninh maiv ziangv haaix nyungc laengz waac.

²¹Mv baac paaiv nqa'haav daaih wuov dauh zoux sai mienh, Tin-Hungh ziangv jienv ninh ganh laengz waac. Wuov zanc ninh gorngv, “Ziouv laengz ngaengc waac gorngv, nqa'haav zungv maiv tiuv hnyouv, ‘Meih yietc liuz duqv zoux sai mienh.’+”

²²Tin-Hungh hnangv naaic laengz waac, Yesu ziouc duqv zoux Tin-Hungh liepc jiex gauh longx wuov deix ngaengc waac nyei ndaam-daauh.

²³Wuov deix sai mienh maaih camv nyei, weic zuqc ninh mbuo daic mi'aqv, ziouc nqaeqv jienv, maiv haih yietc liuz zoux sai mienh nyei gong mingh.

²⁴Mv baac Yesu yietc liuz ziangh jienv ziouc yietc liuz duqv zoux sai mienh.

²⁵Weic naaiv Yesu haih yietc liuz njoux kaux ninh daaih lorz Tin-Hungh wuov deix weic zuqc ninh yietc liuz ziangh jienv tengx ninh mbuo tov Tin-Hungh.

²⁶Hnangv naaic, Yesu se zoux mbuo qiemx longc nyei domh sai mienh. Ninh cing-nzengc, maiv lamh nqemh dorngx yaac maiv maaih zuiz. Ninh leih nqoi zuiz-mienh yaac yiem gauh hlang jiex lungh.

²⁷Yesu maiv hnangv wuov deix domh sai mienh. Ninh maiv qiemx zuqc hnoi-hnoi dorh ga'naaiv mingh ziec weic ninh ganh nyei zuiz ndaangc, nqa'haav weic zuangx baeqc fingx nyei zuiz. Yesu longc ninh ganh ziec nduqc nzunc hnangv se dorngx yietc liuz.

²⁸Ei Mose nyei leiz-latc paaiv zoux domh sai mienh wuov deix se baamh mienh, m'daaih mau haic. Mv baac yiem leiz-latc nqa'haav, Tin-Hungh laengz ngaengc waac liepc ninh nyei Dorn zoux yietc liuz dunh yunh nyei domh sai mienh.