Read Iu Mien 1 Bide 5 Bible Online

1 Bide 5 - Iu Mien bible

1 Bide 5

¹Yie kuinx yiem meih mbuo naaic jiu-baang nyei zuangx mienh gox. yie yaac zoux mienh gox, yaac zoux Giduc siouc kouv nyei zorng-zengx. Yie yaac oix juangc jienv zipv nqa'haav oix hinc cuotv nyei njang-laangc.

²Yie kuinx meih mbuo goux longx Tin-Hungh bun meih mbuo goux wuov guanh mienh hnangv goux ba'gi yungh mienh goux ninh mbuo nyei ba'gi yungh nor. Oix zuqc buangv hnyouv goux, hnangv Tin-Hungh oix meih mbuo zoux nor, maiv zeiz hnangv zuqc aapv jienv zoux. Yaac maiv dungx zoux weic douh duqv nyaanh. Oix zuqc buangv hnyouv zoux.

³Yaac maiv dungx gunv ba'laqc hniev Tin-Hungh bun meih mbuo goux wuov deix. Oix zuqc zoux longx nyei nyungc zeiv bun ninh mbuo zuotc.

⁴Taux Giduc, dongh Goux Ba'gi Yungh nyei Domh Ziouv, daaih wuov zanc, meih mbuo ziouc duqv maiv haih mitc nyei njang-laangc ningv.

⁵Meih mbuo lunx wuov deix m'jangc dorn fih hnangv nyei oix zuqc mbuoqc gox wuov deix gunv. Oix zuqc nyiemc ganh zoux faix, laanh fu-sux laanh, weic zuqc Ging-Sou gorngv, “Tin-Hungh ngaengc jienv zoux maux nyei mienh, mv baac ninh ceix en bun nyiemc ganh zoux faix wuov deix.”

⁶Hnangv naaic oix zuqc nyiemc ganh zoux faix yiem Tin-Hungh maaih qaqv nyei buoz-ndiev. Taux ninh dingc nyei ziangh hoc ninh ziouc taaih meih mbuo faaux.

⁷Oix zuqc zorqv yietc zungv you-nzauh guangc bun ninh weic zuqc ninh goux jienv meih mbuo.

⁸Oix zuqc ging hnyouv mbungh jienv. Meih mbuo nyei win-wangv, mienv nyei hungh, hnangv sienh nor njunh jienv mingh mingh daaih daaih lorz mienh ngaatc nyanc.

⁹Oix zuqc sienx wuonv, ngaengc jienv mienv nyei hungh, weic zuqc meih mbuo hiuv duqv yiem naaiv lungh ndiev sienx Yesu nyei gorx-youz yaac hnangv meih mbuo nor, zuqc buangh naaiv nyungc kouv.

¹⁰Mv baac zuov meih mbuo zuqc siouc kouv caamx baav liuz, ceix nyungc-nyungc en nyei Tin-Hungh, dongh heuc meih mbuo caux Giduc juangc maengc ziangh, yietc liuz juangc ninh nyei njang-laangc wuov dauh, oix bun meih mbuo dunh yunh, sienx henv yaac sienx wuonv.

¹¹Tin-Hungh nyei qaqv yietc liuz yiem taux maanc gouv maanc doic. Aamen.

¹²Silaa tengx yie fiev naaiv zeiv fienx se nangv nyei. Yie yaac funx ninh zoux ziepc zuoqv nyei gorx-youz. Yie fiev kuinx meih mbuo yaac zoux zorng-zengx gorngv naaiv se Tin-Hungh nyei zien en. Meih mbuo oix zuqc kaux wuonv ninh nyei en aqv.

¹³Mbaa^mbi^lon Zingh nyei jiu-baang yaac jangx taux meih mbuo. Tin-Hungh yaac ginv ninh mbuo hnangv ginv meih mbuo nor. Yie nyei dorn, Maako, yaac jangx taux meih mbuo.

¹⁴Meih mbuo wuic buangh oix zuqc zoux hnyouv cing-nzengc zom hmien bun cing laanh hnamv laanh. Tov Tin-Hungh bun meih mbuo yietc zungv caux Giduc juangc maengc ziangh nyei mienh duqv baengh orn.