Read Iu Mien Domh Jien 1 Bible Online

Domh Jien 1 - Iu Mien bible

Domh Jien 1

¹Yo^su^waa guei seix mi'aqv, nqa'haav I^saa^laa^en Mienh naaic ZIOUV, “Yie mbuo nyei haaix fingx mienh oix zuqc mingh ndaangc caux Kaa^naa^an Mienh mborqv jaax?”

²ZIOUV gorngv, “Yu^ndaa Fingx oix zuqc mingh ndaangc. Mangc maah! Yie zungv zorqv wuov norm deic-bung jiu bun yiem ninh mbuo nyei buoz-ndiev.”

³Yu^ndaa Fingx nyei mienh ziouc gorngv mbuox ninh mbuo nyei gorx-youz, Si^me^on Fingx nyei mienh, “Tov caux yie mbuo mingh bieqc dingc ziangx bun yie mbuo nyei deic-bung, tengx yie mbuo caux Kaa^naa^an Mienh mborqv jaax. Nqa'haav yie mbuo caux meih mbuo mingh dingc ziangx bun meih mbuo nyei deic-bung.” Si^me^on Mienh ziouc caux jienv ninh mbuo mingh aqv.

⁴Yu^ndaa Mienh ziouc mingh mborqv jaax. ZIOUV zorqv Kaa^naa^an Mienh caux Be^litv^si Mienh jiu bun yiem ninh mbuo nyei buoz-ndiev. Ninh mbuo ziouc yiem Mbesekv Mungv daix yietc waanc dauh mienh.

⁵Yiem wuov ninh mbuo buangh Aa^ndo^ni Mbesekv ziouc caux ninh mborqv jaax yaac mborqv hingh Kaa^naa^an caux Be^litv^si Mienh.

⁶Aa^ndo^ni Mbesekv biaux mv baac ninh mbuo zunc zaaic, zorqv daaih hngaqv ninh nyei zaux-ndoqv-nyeiz caux buoz-ndoqv-nyeiz ndutv mingh.

⁷Aa^ndo^ni Mbesekv gorngv, “Maaih jiex cietv ziepc dauh hungh diex zuqc yie hngaqv ninh mbuo nyei buoz-ndoqv-nyeiz caux zaux-ndoqv-nyeiz ndutv yaac yiem yie nyei dieh ndiev nzauz hnaangx-hmeiv-ndortv nyanc. Mv baac ih zanc ziux yie zoux nyei sic, Tin-Hungh winh bun yie.” Ninh mbuo ziouc dorh Aa^ndo^ni Mbesekv taux Ye^lu^saa^lem Zingh. Ninh ziouc yiem naaic daic mi'aqv.

⁸Yu^ndaa Mienh yaac mborqv Ye^lu^saa^lem, caangv duqv wuov norm zingh mi'aqv. Ninh mbuo longc nzuqc ndaauv daix zingh gu'nyuoz nyei mienh yaac bungx douz buov zingh.

⁹Nqa'haav Yu^ndaa Mienh mingh mborqv yiem mbong-aiv dorngx, yiem Negepc, caux yiem mbong-juoqv nyei Kaa^naa^an Mienh.

¹⁰Yu^ndaa Mienh aengx mingh mborqv yiem He^mbo^lon Zingh nyei Kaa^naa^an Mienh. Zinh ndaangc He^mbo^lon Zingh nyei mbuox heuc Ki^li^yaatv Aan^mbaa. Ninh mbuo mborqv hingh Sesai, Aa^hi^maan caux Tanmai.

¹¹Yu^ndaa Mienh yiem naaic cuotv mingh mborqv Nde^mbi Zingh nyei mienh. Nde^mbi Zingh zinh ndaangc heuc Ki^li^yaatv Sefe.

¹²Kaalepv gorngv, “Haaix dauh mborqv duqv Ki^li^yaatv Sefe Zingh yaac caangv duqv wuov norm zingh nor, yie laengz bun yie nyei sieqv, Akc^saax, ninh longc zoux auv.”

¹³Kaalepv nyei youz, Kenatv nyei dorn, Otc^ni^en, mborqv duqv wuov norm zingh. Kaalepv ziouc zorqv ninh nyei sieqv, Akc^saax, bun Otc^ni^en longc zoux auv.

¹⁴Cuotv gaengh wuov zanc Akc^saax heuc ninh nyei nqox, Otc^ni^en, tengx ninh nyei die tov lingh deic. Akc^saax yietv njiec lorh, Kaalepv naaic ninh nyei sieqv, “Meih oix longc haaix nyungc?”

¹⁵Ninh nyei sieqv dau, “Tov aa die bun zingh nyeic yie. Tov bun wuom-zingv yie, weic zuqc meih bun yie yiem Negepc. Wuov deix ndau nqaai haic.” Kaalepv ziouc paaiv wuov jiex nyei wuom-zingv caux wuov ndiev nyei wuom-zingv bun ninh.

¹⁶Mose nyei ong-daa, Kenai Mienh nyei zeiv-fun, caux Yu^ndaa Mienh cuotv Daau-Lomc Zingh,[1] mingh yiem Yu^ndaa nyei deic-bung-huaang, se yiem Negepc, nitv Aalaatv. Ninh mbuo ziouc yiem wuov deix mienh mbu'ndongx.

¹⁷Yu^ndaa Mienh caux ninh mbuo nyei gorx-youz, Si^me^on Mienh, mingh mborqv yiem Sefatv nyei Kaa^naa^an Mienh, yaac mietc nzengc[2] wuov norm zingh. Weic naaiv wuov norm zingh nyei mbuox heuc Homaa.[3]

¹⁸Yu^ndaa Mienh yaac caangv duqv Gaasaa Zingh, Atc^ke^lon Zingh caux E^ko^lon Zingh, liemh wuov deix norm-norm zingh weih gormx nyei deic.

¹⁹ZIOUV caux Yu^ndaa Mienh yiem. Ninh mbuo ziouc zunc yiem mbong-aiv dorngx nyei mienh cuotv mv baac yiem ndau-baengh nyei mienh ninh mbuo zunc maiv cuotv, weic zuqc wuov deix mienh maaih mborqv jaax nyei hlieqv-maaz-cie.

²⁰Yu^ndaa Mienh ziux Mose paaiv nyei waac zorqv He^mbo^lon Zingh jiu bun Kaalepv. Kaalepv ziouc zunc cuotv Aanaakv nyei buo dauh zeiv-fun.[4]

²¹Mv baac Mben^yaa^min Mienh maiv zunc yiem Ye^lu^saa^lem nyei Ye^mbutc Mienh cuotv. Weic naaiv Ye^mbutc Mienh cingx daaih caux Mben^yaa^min Mienh yiem Ye^lu^saa^lem Zingh taux ih jaax hnoi.

²²Yosepv nyei zeiv-fun yaac mingh mborqv Mbetc^en Zingh. ZIOUV yaac caux ninh mbuo yiem.

²³Yosepv nyei zeiv-fun paaiv mienh mingh Mbetc^en Zingh caaiv juoqv. Zinh ndaangc naaiv norm zingh nyei mbuox heuc Lutv.

²⁴Caaiv juoqv mienh buatc dauh m'jangc dorn yiem wuov norm zingh cuotv daaih ziouc caux ninh gorngv, “Tov mbuox yie mbuo bieqc naaiv norm zingh nyei jauv, yie mbuo ziouc korv-lienh meih.”

²⁵Wuov dauh mienh ziouc mbuox bieqc zingh nyei jauv ninh mbuo. Ninh mbuo ziouc longc nzuqc ndaauv daix nzengc zingh gu'nyuoz nyei mienh, mv baac ninh mbuo siex cuotv wuov dauh m'jangc dorn caux jienv ninh nyei yietc biauv mienh nyei maengc.

²⁶Wuov dauh mienh ziouc mingh Hitv^tai Mienh nyei deic-bung, yiem wuov ceix norm zingh yaac cuotv mbuox heuc Lutv. Naaiv norm zingh corc hnangv wuov nor heuc taux ih jaax hnoi.

²⁷Maa^natv^se Mienh maiv duqv zunc cuotv Mbetc Saan[5] caux wuov norm zingh nyei fiuv-laangz nyei mienh, Taa^aa^naakv caux wuov norm zingh nyei fiuv-laangz nyei mienh, Ndo^aa, Ipc^le^am, Me^gitc^ndo caux wuov norm zingh nyei fiuv-laangz nyei mienh, weic zuqc Kaa^naa^an Mienh ngaengc jienv yiem wuov norm deic-bung.

²⁸Nqa'haav I^saa^laa^ en Mienh henv jiez daaih, ninh mbuo aapv Kaa^naa^an Mienh zoux gong hniev nyei mv baac maiv zunc ninh mbuo cuotv nzengc.

²⁹E^faa^im Mienh maiv zunc yiem Gese Mungv nyei Kaa^naa^an Mienh cuotv. Hnangv naaic Kaa^naa^an Mienh corc yiem jienv ninh mbuo mbu'ndongx.

³⁰Se^mbu^lun Mienh yaac maiv zunc Kitv^lon caux Naa^haa^lon Zingh nyei Kaa^naa^an Mienh cuotv. Kaa^naa^an Mienh corc yiem ninh mbuo mbu'ndongx mv baac Se^mbu^lun Mienh aapv Kaa^naa^an Mienh zoux gong kouv nyei.

³¹Aa^se Mienh yaac maiv zunc Akc^ko Zingh nyei mienh fai Sai^ndorn Zingh fai Akc^laapv Zingh fai Akc^sipv Zingh fai Hen^mbaa Zingh fai Aafekv Zingh fai Le^hopc Zingh nyei mienh cuotv.

³²Mv baac Aa^se Fingx yiem buonv-deic nyei Kaa^naa^an Mienh mbu'ndongx, weic zuqc ninh mbuo maiv zunc Kaa^naa^an Mienh cuotv.

³³Napv^taa^li Mienh yaac maiv zunc Mbetc Semetv caux Mbetc Aanaatv Zingh nyei mienh cuotv, mv baac Napv^taa^li Mienh yiem wuov norm deic-bung nyei buonv-deic, Kaa^naa^an Mienh mbu'ndongx. Yiem Mbetc Semetv caux Mbetc Aanaatv Zingh nyei mienh yaac zuqc Napv^taa^li Mienh aapv ninh mbuo zoux gong kouv.

³⁴Aa^mo^lai Mienh aapv Ndaan Mienh yiem mbong, maiv bun ninh mbuo njiec ndau-baengh.

³⁵Yiem Heletv Mbong, Ai^yaa^lon caux Saa^an^mbin Zingh nyei Aa^mo^lai Mienh dingc hnyouv yiem naaic, mv baac Yosepv nyei zeiv-fun henv jiez daaih ziouc aapv ninh mbuo zoux gong hniev.

³⁶Aa^mo^lai Mienh nyei gapv-jaaix se yangh Aakc^lapv^mbim Zorng[6] jiex nyei dorngx, yiem Se^e^laa faaux wuov jiex bung.