Read Iu Mien Domh Jien 10 Bible Online

Domh Jien 10 - Iu Mien bible

Domh Jien 10

¹Aa^mbi^me^lekv guei seix liuz, nqa'haav maaih Itc^saax^kaa Fingx, Ndo^ndo nyei fun, Pu^aa nyei dorn, Tolaa, jiez daaih njoux I^saa^laa^en Mienh. Ninh yiem E^faa^im mbong-aiv dorngx nyei Saami Zingh.

²Ninh zoux domh jien dorh[35] I^saa^laa^en Mienh nyic ziepc faam hnyangx liuz, ziouc guei seix mi'aqv, zangx jienv Saami Zingh.

³Jiex daaih maaih Gi^le^aatc Mienh, Jaa^i, zoux domh jien dorh I^saa^laa^en Mienh nyic ziepc nyeic hnyangx.

⁴Ninh maaih faah ziepc dauh dorn geh faah ziepc dauh lorh, yaac maaih faah ziepc norm zingh yiem Gi^le^aatc Deic. Zingh nyei mbuox heuc Haau^wotv Jaa^i[36] taux ih jaax hnoi.

⁵Jaa^i guei seix mingh, zangx jienv yiem Kaamon Zingh.

⁶Ziux ZIOUV mangc, I^saa^laa^en Mienh aengx zoux waaic sic. Ninh mbuo fu-sux Mbaa^an zienh caux Atc^taa^lotv zienh. Ninh mbuo yaac fu-sux Silie Mienh, Sai^ndorn Mienh, Mo^apc Mienh, Ammon Mienh caux Fi^li^saa^die Mienh nyei yietc zungv zienh. Ninh mbuo guangc ZIOUV, maiv fu-sux ninh.

⁷ZIOUV ziouc qiex jiez, nouz haic I^saa^laa^en Mienh, zorqv ninh mbuo jiu bun yiem Fi^li^saa^die Mienh caux Ammon Mienh nyei buoz-ndiev.

⁸Wuov hnyangx ninh mbuo zeix yaac hoic I^saa^laa^en Mienh kouv haic. Ziepc betv hnyangx gu'nyuoz ninh mbuo zeix yiem Jor^ndaen Ndaaih dong bung maengx, Aa^mo^lai Mienh nyei deic-bung, Gi^le^aatc Deic nyei I^saa^laa^en Mienh.

⁹Ammon Mienh yaac jiex wuov ngaanc ziqc Jor^ndaen Ndaaih mingh mborqv Yu^ndaa Mienh, Mben^yaa^min Mienh, caux E^faa^im Fingx nyei zeiv-fun. Hnangv naaic I^saa^laa^en Mienh za'gengh zuqc kouv haic aqv.

¹⁰I^saa^laa^en Mienh ziouc heuc jienv jouh ZIOUV. Ninh mbuo gorngv, “Yie mbuo baamz zuiz dorngc meih, weic zuqc yie mbuo guangc yie mbuo nyei Tin-Hungh, mingh fu-sux Mbaa^an zienh.”

¹¹ZIOUV gorngv mbuox I^saa^laa^en Mienh, “Yie maiv zeiz njoux meih mbuo biaux ndutv I^yipv Mienh, Aa^mo^lai Mienh, Ammon Mienh caux Fi^li^saa^die Mienh nyei buoz-ndiev fai?

¹²Sai^ndorn Mienh, Aa^maa^lekv Mienh caux Maa^on Mienh, zeix meih mbuo wuov zanc, meih mbuo heuc jienv tov yie tengx, yie yaac tengx meih mbuo biaux ndutv ninh mbuo nyei buoz-ndiev maiv zeiz?

¹³Mv baac meih mbuo corc guangc yie mingh fu-sux nyiec nyei zienh. Weic naaiv, yiem naaiv mingh yie ziouc maiv njoux meih mbuo aqv.

¹⁴Meih mbuo gunv mingh heuc dongh meih mbuo ganh ginv daaih wuov deix zienh aqv. Meih mbuo zuqc kouv nyei ziangh hoc, heuc ninh mbuo njoux meih mbuo maah!”

¹⁵I^saa^laa^en Mienh dau ZIOUV, “Yie mbuo yietc zungv baamz zuiz. Ziux meih buatc horpc hnangv haaix nor zoux, gunv zoux bun yie mbuo aqv. Mv baac tov meih ih hnoi njoux yie mbuo.”

¹⁶I^saa^laa^en Mienh ziouc guangc yiem ninh mbuo mbu'ndongx ganh fingx mienh nyei zienh aengx fu-sux ZIOUV. ZIOUV buatc I^saa^laa^en Mienh ndongc naaiv kouv, Tin-Hungh haiz hnyouv mun, diev maiv duqv aqv.

¹⁷Zoux hlo nyei Ammon Mienh heuc ninh mbuo nyei baeng zorqv ninh mbuo mborqv jaax nyei wuoqc ginc, ninh mbuo ziouc mingh liepc ciangv yiem Gi^le^aatc Deic. I^saa^laa^en Mienh yaac gapv zunv mingh liepc ciangv yiem Mitv^baa.

¹⁸Gi^le^aatc Mienh nyei zuangx bieiv zeiv, laanh caux laanh caangh laangh gorngv, “Haaix dauh mingh mborqv Ammon Mienh ndaangc, wuov dauh duqv zoux yiem Gi^le^aatc Deic yietc zungv baeqc fingx nyei bieiv zeiv aqv.”