Read Iu Mien Domh Jien 14 Bible Online

Domh Jien 14 - Iu Mien bible

Domh Jien 14

¹Saem^sanx mingh Tim^naa^haa Zingh nyei ziangh hoc ninh buatc dauh Fi^li^saa^die Mienh nyei sieqv.

²Ninh nzuonx biauv gorngv mbuox ninh nyei die maa, “Yiem Tim^naa^haa yie buatc dauh Fi^li^saa^die Mienh nyei sieqv. Tov mingh tengx gorngv daaih zoux yie nyei auv.”

³Ninh nyei die maa gorngv mbuox ninh, “Yiem mbuo ganh nyei cien-ceqv fai mbuo ganh nyei mienh mbu'ndongx lorz maiv duqv auv longc cingx daaih oix zuqc mingh lorz maiv jiex gaatv nyei leiz nyei Fi^li^saa^die Mienh nyei sieqv daaih zoux meih nyei auv?” Mv baac Saem^sanx gorngv mbuox ninh nyei die, “Tov mingh gorngv wuov dauh sieqv maah! Weic zuqc ninh horpc yie nyei hnyouv haic.”

⁴Ninh nyei die maa maiv hiuv duqv naaiv deix sic yiem ZIOUV daaih, weic zuqc ZIOUV lorz qangx mborqv Fi^li^saa^die Mienh. Wuov zanc Fi^li^saa^die Mienh gunv jienv I^saa^laa^en Mienh.

⁵Saem^sanx ziouc caux jienv ninh nyei die maa njiec Tim^naa^haa Zingh. Taux Tim^naa^haa nyei a'ngunc huingx, maaih dauh sienh lunx njunh ninh.

⁶ZIOUV nyei Singx Lingh liemh zeih bun Saem^sanx henv haic. Ninh ziouc zorqv wuov dauh sienh daaih maeqv hnangv mienh maeqv yungh dorn nor, maiv gunv ninh nyei buoz maiv maaih yietc nyungc jaa-sic. Mv baac ninh maiv mbuox ninh nyei die maa, ninh zoux haaix nyungc.

⁷Saem^sanx ziouc njiec mingh caux wuov dauh sieqv gorngv waac. Saem^sanx yaac buangv hnyouv haic ninh.

⁸Jiex daaih, nqa'haav Saem^sanx aengx mingh weic dorh wuov dauh sieqv daaih. Ninh wingc mingh mangc ninh mborqv daic wuov dauh sienh, buatc maaih mueiz yiem sienh daic nyei mbungv-qorng zoux bungh yaac maaih dorngh nyei.

⁹Saem^sanx ziouc sung buoz daaih zorqv wuov deix mueiz-dorngh daaih nyanc jienv gan jauv mingh taux ninh nyei die maa wuov. Ninh ziouc bun deix ninh nyei die maa nyanc. Mv baac ninh maiv mbuox ninh mbuo wuov deix mueiz-dorngh yiem sienh daic nyei qorng zorqv daaih.

¹⁰Ninh nyei die mingh taux wuov dauh sieqv nyei biauv. Saem^sanx yiem wuov mbenc hnaangx hlo nyei ziux mienh lunx mienh nyei leiz-fingx.

¹¹Baeqc fingx buatc Saem^sanx taux, ninh mbuo ziouc dorh faah ziepc dauh doic daaih mbienz ninh yiem wuov.

¹²Saem^sanx gorngv mbuox ninh mbuo, “Yie gorngv diuh waac-ormv bun meih mbuo muangx. Naaiv deix siec hnoi nyei yinh gu'nyuoz, se gorngv meih mbuo cai duqv cuotv nor, yie laengz bun faah ziepc deix la'maah ndie nyei lui-houx caux faah ziepc deix mingh yinh nyei lui-houx meih mbuo.

¹³Se gorngv meih mbuo cai maiv zuqc nor, meih mbuo oix zuqc bun faah ziepc deix la'maah ndie nyei lui-houx caux faah ziepc deix mingh yinh nyei lui-houx yie.” Wuov deix mienh dau Saem^sanx, “Gunv ormv daaih maah! Yie mbuo oix muangx.”

¹⁴Saem^sanx ziouc gorngv mbuox ninh mbuo, “Nyanc nyei ga'naaiv yiem nyanc ga'naaiv wuov dauh cuotv. Maaih gaam nyei ga'naaiv yiem henv wuov dauh cuotv daaih.” Buo hnoi gu'nyuoz ninh mbuo cai naaiv deix waac-ormv maiv cuotv.

¹⁵Taux da'feix hnoi[41] ninh mbuo ziouc mingh lorz Saem^sanx nyei auv mbuox ninh, “Meih oix zuqc nduov meih nyei nqox jaiv naaiv deix waac-ormv bun yie mbuo muangx. Maiv zei nor, yie mbuo oix dorh douz daaih buov nzengc meih nyei biauv caux jienv meih nyei domh mienh hmuangv doic. Meih cingv yie mbuo daaih hnamv oix zoux bun yie mbuo jomc fai?”

¹⁶Saem^sanx nyei auv ziouc mingh nyiemv jienv gorngv mbuox Saem^sanx, “Meih nzorng yie, meih maiv zeiz hnamv yie. Meih gorngv waac-ormv bun yie nyei buonv-guoqv mienh. Meih yaac maiv porv wuov deix waac-ormv mbuox yie.” Saem^sanx gorngv, “Yie zungv maiv mbuox yie nyei die fai yie nyei maa, yie fungc mbuox meih?”

¹⁷Wuov norm yinh nyei siec hnoi gu'nyuoz wuov dauh auv nyiemv bun Saem^sanx muangx. Taux da'cietv hnoi Saem^sanx ziouc porv wuov diuh waac-ormv bun ninh nyei auv muangx, weic zuqc ninh nyei auv la'nyauv ninh camv haic. Saem^sanx nyei auv ziouc mingh mbuox ninh nyei buonv-guoqv mienh muangx.

¹⁸Taux da'cietv hnoi, mba'hnoi maiv gaengh muotv nyei ziangh hoc, wuov norm zingh nyei mienh daaih gorngv mbuox Saem^sanx, “Maaih haaix nyungc gauh gaam jiex mueiz-dorngh? Maaih haaix nyungc gauh henv jiex sienh?” Saem^sanx ziouc gorngv ninh mbuo, “Se gorngv meih mbuo maiv dorh yie nyei yangh ngongh nyeiz laih ndau nor,[42] meih mbuo zungv maiv haih cai maiv cuotv yie nyei waac-ormv aqv.”

¹⁹ZIOUV nyei Singx Lingh aengx bun Saem^sanx maaih qaqv camv haic. Ninh ziouc njiec Atc^ke^lon Mungv daix faah ziepc dauh mienh aengx luv ninh mbuo nyei ga'naaiv yaac zorqv ninh mbuo nyei lui-houx mingh bun cai waac-ormv nyei mienh. Ninh qiex jiez! haic ziouc nzuonx ninh nyei die nyei biauv mi'aqv.

²⁰Nqa'haav Saem^sanx nyei ong-daa zorqv Saem^sanx nyei auv jiu bun Saem^sanx nyei loz-gaeng doic, dongh zoux kaeqv lorngh wuov dauh, longc zoux auv mi'aqv.