Read Iu Mien Domh Jien 19 Bible Online

Domh Jien 19 - Iu Mien bible

Domh Jien 19

¹Wuov jaax lungh ndiev I^saa^laa^en Mienh corc maiv maaih hungh diex wuov zanc, maaih dauh Lewi Mienh yiem E^faa^im mbong-aiv, yiem norm go nyei dorngx. Ninh longc dauh Yu^ndaa Deic, Mbetc^le^hem Mungv nyei sieqv zoux jaav-zeih auv.

²Mv baac naaiv dauh jaav-zeih auv hienx nqox,[54] ninh ziouc guangc jienv ninh nyei nqox biaux nzuonx Yu^ndie Saengv, Mbetc^le^hem Mungv, ninh nyei die nyei biauv wuov, yiem biei hlaax nyieqc nyei dorngx.

³Ninh nyei nqox ziouc jiez daaih dorh yietc dauh bou caux i dauh lorh mingh lorz ninh, oix longc waac longx nyei kuinx ninh nzuonx daaih. Wuov dauh m'sieqv dorn dorh ninh bieqc ninh nyei die nyei biauv. Ninh nyei die buatc naaiv dauh mienh ziouc a'hneiv zipv.

⁴Naaiv dauh mienh nyei ong-daa, se naaiv dauh sieqv nyei die, liouh ninh yiem, ninh ziouc yiem wuov buo hnoi. Ninh mbuo nyanc yaac hopv aengx hitv jienv wuov.

⁵Taux da'feix hnoi naaiv dauh Lewi Mienh jiez sin nziouv nyei, oix nzuonx biauv aqv. Mv baac wuov dauh sieqv nyei die gorngv mbuox ninh nyei sieqv-laangh, “Nyanc dangh hnaangx bun hnyouv kuh yiem deix manc daaih mingh.”

⁶Ninh mbuo i ong-daa laangh ziouc zueiz njiec nyanc yaac hopv. Sieqv nyei die gorngv mbuox ninh nyei laangh, “Tov aengx bueix muonz bun hnyouv kuh yiem deix.”

⁷Naaiv dauh mienh jiez sin oix cuotv jauv wuov zanc, ninh nyei ong-daa aengx qaqv liouh njiec. Ninh ziouc aengx dingh njiec naaic.

⁸Taux da'hmz hnoi ninh jiez sin nziouv nyei oix cuotv jauv mingh aqv. Sieqv nyei die gorngv, “Tov nyanc dangh hnaangx bun hnyouv kuh yiem, da'nyeic aanx manc daaih nzuonx.” Ninh mbuo i ong-daa laangh ziouc nyanc yaac hopv.

⁹Lewi Mienh caux ninh nyei jaav-zeih auv caux jienv ninh nyei bou jiez sin oix cuotv jauv mingh aqv. Ninh nyei ong-daa, se naaiv dauh sieqv nyei die, gorngv mbuox ninh nyei laangh, “Ih zanc lungh maanz, aav lamh hmuangx aqv. Aengx bueix muonz naaiv njien-youh nyei yiem maah! Naaiv norm hnoi aav lamh deix jiex aqv. Njang hnoi nziouv-nziouv nyei jiez sin daaih cuotv jauv nzuonx biauv aqv.”

¹⁰Mv baac wuov dauh mienh maiv kangv aengx hitv muonz. Ninh ziouc jiez sin cuotv jauv mingh taux Ye^mbutc Zingh, se Ye^lu^saa^lem, nyei doix-ngaanc. Ninh dorh jienv i dauh buic jienv orn nyei lorh. Ninh nyei jaav-zeih auv yaac caux jienv mingh.

¹¹Ninh mbuo taux fatv deix Ye^mbutc Zingh wuov zanc aav lamh deix hmuangx aqv. Wuov dauh bou ziouc gorngv mbuox ninh nyei ziouv, “Mbuo bieqc Ye^mbutc Mienh nyei zingh hitv muonz orqc?”

¹²Ninh nyei ziouv dau, “Mbuo maiv bieqc ganh fingx mienh nyei zingh weic zuqc ninh mbuo maiv zeiz I^saa^laa^en Mienh. Mbuo oix zuqc aengx jiex mingh taux Gi^mbe^aa Zingh.”

¹³Ninh aengx gorngv mbuox ninh nyei bou, “Daaih maah! Mbuo mangc gaax haih mingh duqv taux Gi^mbe^aa Zingh fai Laamaa hitv naaiv deix nyei yietc norm dorngx.”

¹⁴Ninh mbuo ziouc jiex mingh taux fatv deix Mben^yaa^min nyei Gi^mbe^aa Zingh wuov zanc mba'hnoi muotv mi'aqv.

¹⁵Ninh mbuo bieqc Gi^mbe^aa Zingh mingh oix yiem wuov hitv muonz. Ninh ziouc zueiz jienv wuov domh zuangx zaamc weic zuqc maiv maaih haaix dauh zipv ninh mbuo bieqc biauv bueix.

¹⁶Zoux gau aav lamh hmuangx aqv, maaih dauh mienh gox mienh mingh ndeic zoux gong nzuonx. Ninh se E^faa^im mbong-aiv dorngx nyei mienh daaih yiem Mben^yaa^min Mienh nyei Gi^mbe^aa Zingh. Wuov norm mungv nyei mienh se Mben^yaa^min Fingx nyei mienh.

¹⁷Naaiv dauh mienh gox mienh buatc jiex jauv nyei mienh zueiz jienv zingh nyei domh zuangx zaamc ziouc naaic ninh, “Meih yiem haaix daaih? Meih oix mingh haaix?”

¹⁸Wuov dauh Lewi Mienh dau, “Yie mbuo yiem Yu^ndaa Deic, Mbetc^le^hem Mungv daaih, oix nzuonx E^faa^im mbong-aiv go nyei dorngx. Yie m'daaih yiem wuov nyei mienh, mingh Yu^ndaa Deic, Mbetc^le^hem Mungv nzuonx, oix nzuonx ganh nyei biauv.[55] Daaih taux naaiv maiv maaih haaix dauh zipv yie mbuo bieqc ninh mbuo nyei biauv.

¹⁹Yie mbuo maaih mbiauh nqaauv caux uix lorh nyei ga'naaiv, yaac maaih njuov caux a'ngunc diuv, se weic yie caux naaiv dauh sieqv yaac caux gan yie naaiv dauh mienh lunx mienh. Yie mbuo maiv caa yietc nyungc.”

²⁰Wuov dauh mienh gox mienh gorngv, “Tov bun meih baengh orn aqv. Meih mbuo qiemx longc nyei haaix nyungc tov bun yie liuc leiz bun. Mv baac tov maiv dungx bueix naaiv domh zuangx zaamc.”

²¹Ninh ziouc dorh wuov dauh m'jangc dorn bieqc biauv mingh, yaac uix ninh nyei lorh. Ninh mbuo nzaaux liuz zaux ziouc nyanc yaac hopv.

²²Ninh mbuo a'hneiv nyei nziaauc wuov zanc, maaih deix wuov norm mungv nyei mienh waaic mienh daaih weih jienv wuov norm biauv, qaqv ngaengv gaengh heuc biauv-ziouv, wuov dauh mienh gox mienh, “Dorh dongh bieqc meih nyei biauv wuov dauh mienh cuotv daaih bun yie mbuo caa ninh maah!”

²³Wuov dauh biauv-ziouv cuotv daaih gorngv mbuox ninh mbuo, “Yie nyei gorx-youz aah! Maiv dungx zoux naaiv deix waaic haic nyei orqv sic. Naaiv dauh mienh daaih yiem yie nyei biauv zoux kaeqv mienh. Maiv dungx zoux naaiv deix waaic haic nyei sic bun ninh.

²⁴Mangc maah! Yie maaih dauh maiv gaengh bueix jiex dorn nyei sieqv caux naaiv dauh mienh nyei jaav-zeih auv. Yie ih zanc oix dorh ninh mbuo cuotv daaih bun meih mbuo. Meih mbuo gunv longc yaac sueih eix zoux bun ninh mbuo. Mv baac tov meih mbuo maiv dungx zoux laih hlopv nyei orqv sic bun naaiv dauh mienh.”

²⁵Mv baac wuov deix mienh maiv muangx biauv-ziouv nyei waac. Wuov dauh Lewi Mienh[56] ziouc zorqv ninh nyei jaav-zeih auv fongv cuotv mingh bun ninh mbuo. Ninh mbuo ziouc ziangh muonz caa nyei caa, hoic nyei hoic, taux lungh aav lamh njang cingx daaih bungx ninh.

²⁶Lungh mbiouz-mbiouz njang nyei ziangh hoc, wuov dauh m'sieqv dorn nzuonx daaih taux ninh nyei ziouv yiem wuov norm biauv, ziouc king njiec wuov gaengh ndaangc, yaac yiem naaic taux lungh njang longx.

²⁷Lungh ndorm-nziouv wuov dauh m'sieqv dorn nyei ziouv jiez sin daaih koi gaengh, oix cuotv jauv mingh ziouc buatc ninh nyei jaav-zeih auv bueix jienv wuov gaengh ndaangc, buoz lorngx jienv gaengh mbaeqv.

²⁸Ninh gorngv mbuox wuov dauh m'sieqv dorn, “Jiez sin daaih maah! Mbuo mingh aqv.” Mv baac maiv haiz naaiv dauh m'sieqv dorn dau. Ninh ziouc hlorpv ninh nyei jaav-zeih auv daapv jienv lorh diqc daanz, ziouc cuotv jauv nzuonx ninh ganh nyei biauv aqv.

²⁹Nzuonx taux biauv wuov zanc ninh zorqv nzuqc daaih nqen ninh nyei auv-dorn nyei sei benx ziepc nyeic deix, fungx mingh gormx I^saa^laa^en Deic-Bung nyei norm-norm dorngx.

³⁰Da'faanh duqv buatc nyei mienh gorngv, “Yiem I^saa^laa^en Mienh cuotv I^yipv Deic-Bung wuov hnoi taux ih zanc, maiv maaih jiex yaac maiv maaih haaix dauh buatc jiex naaiv nyungc sic. Oix zuqc longx-longx hnamv, yaac caangh laangh mangc gaax, mbuo oix zuqc hnangv haaix nor zoux.”