Read Iu Mien Domh Jien 20 Bible Online

Domh Jien 20 - Iu Mien bible

Domh Jien 20

¹I^saa^laa^en nyei zuangx mienh ziouc yiem Ndaan mingh taux Mbe^e^qe^mbaa, liemh yiem Gi^le^aatc Deic nyei zuangx mienh, cuotv daaih dongh diuc hnyouv gapv zunv[57] yiem Mitv^baa dorng jienv ZIOUV.

²I^saa^laa^en Fingx nyei zuangx bieiv zeiv, se fingx-fingx nyei bieiv-zeiv, daaih yiem jienv Tin-Hungh nyei baeqc fingx gapv zunv nyei wuic. Longc nzuqc ndaauv mborqv jaax nyei yangh jauv baeng maaih biei sinx dauh.

³(Wuov zanc Mben^yaa^min Mienh haiz gorngv I^saa^laa^en Mienh mingh taux Mitv^baa.) I^saa^laa^en Mienh gorngv, “Tov mbuox yie mbuo, naaiv nyungc waaic haic nyei sic hnangv haaix nor haih cuotv daaih?”

⁴Wuov dauh Lewi Mienh, se zuqc hoic daic wuov dauh m'sieqv dorn nyei nqox, dau, “Yie caux yie nyei jaav-zeih auv daaih taux Mben^yaa^min Mienh nyei Gi^mbe^aa Zingh, oix bueix muonz.

⁵Wuov muonz Gi^mbe^aa Zingh nyei mienh daaih weih jienv yie hitv wuov norm biauv, hnamv oix daix yie. Ninh mbuo ziouc caa yie nyei jaav-zeih auv. Caa gau, taux ninh daic mi'aqv.

⁶Yie ziouc zorqv yie nyei jaav-zeih auv nyei sei nqen zoux ziex deix, fungx mingh gormx I^saa^laa^en Mienh nzipc nyei deic-bung weic zuqc yiem I^saa^laa^en gu'nyuoz maaih naaiv deix waaic haic, laih hlopv haic nyei sic cuotv daaih.

⁷Meih mbuo I^saa^laa^en Mienh aah! Oix zuqc tengx jienv caangh laangh mangc gaax, hnangv haaix nor zoux.”

⁸Zuangx mienh ziouc souv jiez sin daaih dongh diuc hnyouv gorngv, “Yie mbuo yietc dauh maiv nzuonx ganh nyei ndopv-liuh, fai ganh nyei biauv.

⁹Yie mbuo oix hnangv naaiv nor zoux bun Gi^mbe^aa Mienh. Yie mbuo oix dingc maengc mangc haaix fingx oix zuqc mingh ndaangc caux ninh mbuo mborqv jaax.

¹⁰Yie mbuo oix zuqc yiem I^saa^laa^en nyei fingx-fingx gu'nyuoz, yietc baeqv dauh ginv ziepc dauh, yietc cin ginv yietc baeqv dauh, yietc waanc ginv yietc cin dauh mienh, paaiv ninh mbuo mingh lorz bienh fuix bun zuangx jun-baeng. Taux Mben^yaa^min Deic nyei zingh wuov zanc, ziux Gi^mbe^aa Mienh yiem I^saa^laa^en Mienh gu'nyuoz zoux waaic, zoux laih hlopv nyei sic winh bun ninh mbuo.”

¹¹I^saa^laa^en nyei zuangx mienh ziouc gapv zunv daaih dongh diuc hnyouv mingh mborqv wuov norm zingh.

¹²I^saa^laa^en nyei fingx-fingx mienh ziouc paaiv mienh mingh naaic gormx Mben^yaa^min Fingx nyei mienh, “Naaiv deix waaic haic nyei sic hnangv haaix nor haih yiem meih mbuo mbu'ndongx cuotv daaih?

¹³Ih zanc zorqv yiem Gi^mbe^aa Zingh naaiv deix mienh waaic mienh jiu bun yie mbuo daix guangc, fioux nzengc yiem I^saa^laa^en Mienh mbu'ndongx nyei orqv sic.” Mv baac Mben^yaa^min Mienh maiv kangv muangx ninh mbuo nyei gorx-youz, I^saa^laa^en Mienh, nyei waac.

¹⁴Mben^yaa^min Mienh yiem ninh mbuo nyei norm-norm zingh gapv zunv daaih yiem Gi^mbe^aa, weic caux I^saa^laa^en Mienh mborqv jaax.

¹⁵Wuov zanc Mben^yaa^min Mienh yiem ninh mbuo nyei norm-norm zingh diuc cuotv longc nzuqc ndaauv nyei baeng i waanc juqv cin dauh, aengx yiem Gi^mbe^aa Zingh ganh ca'lengc ginv cuotv cietv baeqv dauh.

¹⁶Yiem zuangx jun-baeng mbu'ndongx maaih cietv baeqv dauh ginv daaih nyei baeng longc buoz-kuang liouc nyei. Ninh mbuo longc ndopv-hlaang[58] fengx la'bieiv-dorn bungx mingh mborqv duqv zuqc yietc diuh mba'biei yaac maiv pienx yietc deix.

¹⁷Cuotv liuz Mben^yaa^min Mienh, I^saa^laa^en Mienh diuc cuotv biei sinx dauh longc nzuqc ndaauv nyei mienh, yietc zungv se mborqv jaax nyei baeng.

¹⁸I^saa^laa^en Mienh ziouc mingh Mbetc^en naaic Tin-Hungh. Ninh mbuo gorngv, “Yie mbuo haaix dauh oix zuqc mingh ndaangc caux Mben^yaa^min Mienh mborqv jaax?” ZIOUV gorngv, “Yu^ndaa oix zuqc mingh ndaangc.”

¹⁹Da'nyeic ndorm I^saa^laa^en Mienh jiez sin daaih mingh liepc ciangv nitv Gi^mbe^aa Zingh.

²⁰I^saa^ laa^en Mienh ziouc cuotv mingh caux Mben^yaa^min Mienh mborqv jaax aengx ziux mborqv jaax nyei yietc nyeic mbaih jienv nitv Gi^mbe^aa oix mborqv.

²¹Wuov hnoi Mben^yaa^min Mienh yiem Gi^mbe^aa cuotv daaih daix daic i waanc i cin dauh I^saa^laa^en Mienh.

²²Mv baac I^saa^laa^en Mienh laanh orn laanh nyei hnyouv, aengx hnangv daauh hnoi nor, ninh mbuo mbaih jienv yiem wuov norm dorngx.

²³I^saa^laa^en Mienh yaac mingh dorng jienv ZIOUV nyiemv taux lungh maanz-hmuangx. Ninh mbuo naaic ZIOUV, “Yie mbuo oix zuqc aengx mingh mborqv yie mbuo nyei gorx-youz, Mben^yaa^min Mienh, horpc fai maiv horpc?” ZIOUV gorngv, “Gunv mingh mborqv ninh mbuo maah!”

²⁴Da'nyeic hnoi I^saa^laa^en Mienh aengx mingh caux Mben^yaa^min Mienh mborqv jaax.

²⁵Dongh naaic hnoi Mben^yaa^min Mienh aengx yiem Gi^mbe^aa cuotv daaih daix daic yietc waanc hietc cin dauh I^saa^laa^en Mienh. Yietc zungv se longc nzuqc ndaauv nyei baeng.

²⁶I^saa^laa^en nyei zuangx mienh, ziouc mingh Mbetc^en zueiz jienv ZIOUV nyei nza'hmien nyiemv yaac zei maiv nyanc haaix nyungc taux hmuangx. Ninh mbuo dorng jienv ZIOUV fongc horc buov ziec nyei ga'naaiv caux ziec weic jiu tong nyei ga'naaiv.

²⁷I^saa^laa^en Mienh ziouc naaic ZIOUV. (Wuov zanc Tin-Hungh nyei Laengz Ngaengc Waac Faang yiem wuov.

²⁸Wuov deix ziangh hoc Aalon nyei fun, E^le^aa^saa nyei dorn, Fi^ne^hatc, yaac yiem Laengz Ngaengc Waac Faang nyei nza'hmien maengx fu-sux.) I^saa^laa^en Mienh naaic, “Yie mbuo horpc zuqc aengx mingh caux yie mbuo nyei gorx-youz, Mben^yaa^min Mienh, mborqv jaax fai horpc zuqc dingh njiec?” ZIOUV gorngv, “Gunv mingh aqv. Njang hnoi yie oix zorqv ninh mbuo jiu bun yiem meih mbuo nyei buoz-ndiev aqv.”

²⁹I^saa^laa^en Mienh ziouc bun baeng bingx jienv weih gormx Gi^mbe^aa.

³⁰Da'faam hnoi I^saa^laa^en Mienh aengx mingh caux Mben^yaa^min Mienh mborqv jaax, yaac hnangv zinh ndaangc wuov deix i nzunc ninh mbuo mbaih jienv mborqv Gi^mbe^aa.

³¹Mben^yaa^min Mienh ziouc cuotv daaih caux I^saa^laa^en Mienh mborqv jaax, yaac zuqc nduov leih zingh go deix. Ninh mbuo yiem domh jauv jiez gorn daix I^saa^laa^en Mienh hnangv zinh ndaangc wuov deix i nzunc nor. Se ninh mbuo yiem mingh Mbetc^en wuov diuh jauv caux mingh Gi^mbe^aa wuov diuh jauv yaac yiem lomc-huaang daix daic leih maiv go faah ziepc dauh I^saa^laa^en Mienh.

³²Mben^yaa^min Mienh gorngv, “Ninh mbuo suei mbuo hnangv zinh ndaangc nor.” Mv baac I^saa^laa^en Mienh gorngv, “Mbuo tuix ziouc nduov ninh mbuo leih zingh go, mingh taux domh jauv.”

³³I^saa^laa^en nyei zuangx mienh cuotv ninh mbuo yiem nyei dorngx mingh mbaih jienv yiem Mbaa^an Taamaa. Bingx jienv Gi^mbe^aa nyei fai bung maengx.[59] Wuov deix I^saa^laa^en Mienh ziouc tiux cuotv daaih.

³⁴Yiem I^saa^laa^en Mienh mbu'ndongx ginv daaih nyei yietc waanc dauh baeng daaih mborqv Gi^mbe^aa. Mborqv jaax hniev nyei ziangh hoc, Mben^yaa^min Mienh maiv hiuv duqv domh zeqc naanc taux ninh mbuo fatv aqv.

³⁵ZIOUV bun Mben^yaa^min Mienh suei I^saa^laa^en Mienh. Wuov hnoi I^saa^laa^en Mienh daix daic i waanc biaa cin yietc baeqv dauh Mben^yaa^min Mienh. Yietc zungv se longc nzuqc ndaauv nyei baeng.

³⁶Hnangv naaic, Mben^yaa^min Mienh buatc ninh mbuo zuqc suei aqv. I^saa^laa^en Mienh duqv-eix zoux hnangv suei Mben^yaa^min Mienh, weic zuqc ninh mbuo bungx hnyouv dongh ninh mbuo bun mingh bingx jienv yiem nitv Gi^mbe^aa wuov deix mienh.

³⁷Dongh bingx jienv wuov deix mienh liemh zeih tiux bieqc Gi^mbe^aa Zingh mingh, ziouc nzaanx mingh longc nzuqc ndaauv daix nzengc wuov norm zingh nyei mienh.

³⁸I^saa^laa^en Mienh caux bingx jienv zingh ga'hlen wuov deix baeng jaa-ndaangc dingc ziangx norm jangx-hoc. Ninh mbuo gorngv, “Se gorngv buatc douz-sioux yiem zingh cutv-cutv nyei faaux gu'nguaaic lungh nor,

³⁹I^saa^laa^en Mienh oix zuqc daaux nqaang daaih mborqv jaax. Mben^yaa^min Mienh dongz buoz daix faah ziepc dauh I^saa^laa^en Mienh ninh mbuo ziouc gorngv, “Ninh mbuo ndongc haaix suei yie mbuo hnangv zinh ndaangc wuov nzunc nor.”

⁴⁰Mv baac douz-sioux-don yiem zingh cutv-cutv nyei faaux wuov zanc, Mben^yaa^min Mienh huin nzuonx daaih mangc buatc ziangh norm zingh kungx douz-sioux cutv-cutv nyei faaux lungh hnangv.

⁴¹I^saa^laa^en Mienh aengx daaux sin daaih, Mben^yaa^min Mienh ziouc gamh nziex haic, weic zuqc hiuv duqv ninh mbuo zuqc domh zeqc naanc mi'aqv.

⁴²Ninh mbuo yiem I^saa^laa^en Mienh nyei wuov ndaangc maengx daaux sin biaux, hungx jienv deic-bung-huaang mingh, mv baac ninh mbuo biaux maiv ndutv mborqv jaax nyei jauv. Yiem norm-norm mungv nyei I^saa^laa^en Mienh cuotv daaih daix nzengc ninh mbuo.

⁴³I^saa^laa^en Mienh weih jienv Mben^yaa^min Mienh yaac maiv dingh liouh nyei zunc jienv mingh taux Gi^mbe^aa dong bung maengx ziouc zunc zaaic ninh mbuo.

⁴⁴Mben^yaa^min Mienh zuqc daix daic nyei maaih yietc waanc hietc cin dauh. Yietc zungv se mborqv jaax henv nyei baeng.

⁴⁵Zengc njiec wuov deix daaux sin biaux, hungx jienv deic-bung-huaang, Limmon nyei la'bieiv-mbaengx wuov. I^saa^laa^en Mienh zueih jauv daix jienv Mben^yaa^min Mienh mingh, daix daic biaa cin dauh. Ninh mbuo zunc jienv mingh taux Gi^ndom zunc zaaic aengx daix daic i cin dauh.

⁴⁶Dongh wuov hnoi Mben^yaa^min Mienh zuqc daix daic nyei maaih i waanc biaa cin dauh. Yietc zungv se nanv nzuqc ndaauv, mborqv jaax henv nyei baeng.

⁴⁷Mv baac maaih luoqc baeqv dauh daaux sin biaux mingh taux deic-bung-huaang, Limmon nyei la'bieiv-mbaengx, ziouc yiem jienv naaiv norm dorngx biei hlaax nyieqc.

⁴⁸I^saa^laa^en Mienh aengx daaux sin nzuonx mingh mborqv Mben^yaa^min Mienh. Ninh mbuo longc nzuqc ndaauv daix daic zingh nyei zuangx mienh, liemh saeng-kuv caux ninh mbuo buatc nyei yietc zungv ga'naaiv. Ninh mbuo lorz buatc haaix norm mungv, ninh mbuo ziouc longc douz buov nzengc aqv.