Read Iu Mien Domh Jien 3 Bible Online

Domh Jien 3 - Iu Mien bible

Domh Jien 3

¹Naaiv se ZIOUV liouh njiec nyei fingx weic kauv dongh maiv caux Kaa^naa^an Mienh mborqv jiex jaax nyei I^saa^laa^en Mienh.

²Ninh kungx oix njaaux I^saa^laa^en Mienh nyei hoz doic, dongh maiv mborqv jiex jaax nyei zeiv-fun, hiuv duqv mborqv jaax nyei jauv.

³Zengc njiec nyei fingx maaih Fi^li^saa^die Mienh nyei biaa dauh bieiv zeiv, caux Kaa^naa^an nyei yietc zungv mienh, caux Sai^ndorn Mienh. Aengx maaih yiem Le^mbaa^norn Geh nyei Hiwai Mienh, yiem Mbaa^an Hemon Mbong mingh taux bieqc Haamatv Zingh nyei jauv-kuv.

⁴Liouh njiec naaiv deix ziex fingx se weic seix I^saa^laa^en Mienh, mangc gaax ninh mbuo muangx ZIOUV hatc ninh mbuo nyei waac, se ninh longc Mose jiu bun ninh mbuo nyei ong-taaix nyei leiz-latc.

⁵Weic naaiv I^saa^laa^en Mienh cingx daaih yiem Kaa^naa^an Mienh, Hitv^tai Mienh, Aa^mo^lai Mienh, Be^litv^si Mienh, Hiwai Mienh caux Ye^mbutc Mienh mbu'ndongx.

⁶I^saa^laa^en Mienh mingh gorngv wuov deix mienh nyei sieqv daaih zoux auv, yaac bungx ninh mbuo ganh nyei sieqv bun wuov deix mienh nyei dorn, aengx fu-sux ninh mbuo nyei zienh.

⁷Ziux ZIOUV mangc, I^saa^laa^en Mienh zoux waaic sic. Ninh mbuo la'kuqv ZIOUV, ninh mbuo nyei Tin-Hungh, ziouc mingh fu-sux wuov deix Mbaa^an caux Atc^taa^lotv zienh.

⁸Weic naaiv ZIOUV za'gengh qiex jiez, nouz haic I^saa^laa^en Mienh. Ninh ziouc zorqv ninh mbuo jiu bun yiem Me^so^bo^de^mie nyei hungh, Kuqan Li^taa^im, nyei buoz-ndiev. I^saa^laa^en Mienh fu-sux Kuqan Li^taa^im hietc hnyangx.

⁹Mv baac I^saa^laa^en Mienh heuc jienv tov ZIOUV. ZIOUV ziouc liepc dauh mienh daaih njoux ninh mbuo. Se Kaalepv nyei youz, Kenatv nyei dorn, Otc^ni^en, njoux ninh mbuo.

¹⁰ZIOUV nyei Singx Lingh njiec daaih yiem Otc^ni^en. Ninh ziouc zoux I^saa^laa^en Mienh nyei domh jien, cuotv mingh mborqv jaax. ZIOUV zorqv Me^so^bo^de^mie nyei hungh diex, Kuqan Li^taa^im, jiu bun yiem Otc^ni^en nyei buoz-ndiev. Otc^ni^en ziouc hingh ninh mi'aqv.

¹¹Deic-bung ziouc taaix-baengh feix ziepc hnyangx. Kenatv nyei dorn, Otc^ni^en, yaac guei seix mi'aqv.

¹²Ziux ZIOUV mangc, I^saa^laa^en Mienh aengx zoux waaic sic. ZIOUV buatc ninh mbuo zoux waaic sic, ninh ziouc bun Mo^apc Deic-Bung nyei hungh diex, Ekc^lon, maaih qaqv mborqv hingh I^saa^laa^en Mienh.

¹³Ekc^lon heuc Ammon Mienh caux Aa^maa^lekv Mienh daaih gapv zunv doic mingh mborqv I^saa^laa^en Mienh yaac caangv duqv Daau-Lomc Zingh.[11]

¹⁴I^saa^laa^en Mienh ziouc fu-sux Mo^apc nyei hungh diex, Ekc^lon, ziepc betv hnyangx.

¹⁵Yiem gau, I^saa^laa^en Mienh aengx heuc ZIOUV tengx. ZIOUV ziouc liepc dauh mienh daaih njoux ninh mbuo, se Mben^yaa^min Fingx, Gelaa nyei dorn, E^hutv. E^hutv mbienc buoz-kuang. I^saa^laa^en Mienh heuc ninh fungx nzou-zinh mingh bun Mo^apc nyei Ekc^lon Hungh.

¹⁶E^hutv daav duqv zung nzuqc ndaauv, i maengx laic nyei, ndaauv yietc ndorqc, yaac nyatv jienv mbiaauc bung camh zuih, lui-ndaauv gu'nyuoz maengx.

¹⁷E^hutv ziouc dorh nzou-zinh mingh bun Mo^apc nyei hungh, Ekc^lon. Ekc^lon ziangh duqv junc haic.

¹⁸E^hutv zorqv nzou-zinh bun liuz, ninh ziouc heuc dorh nzou-zinh nyei mienh nzuonx.

¹⁹Taux nitv fatv Gin^gaan nyei miuc-fangx[12] ninh aengx daaux sin nzuonx daaih gorngv mbuox hungh diex, “Hungh diex aac, yie maaih deix bingx jienv nyei sic oix gorngv mbuox meih.” Hungh diex gorngv, “Sekv maah!” Ninh nyei sin-hlen mienh yietc zungv ziouc yiem ninh nyei nza'hmien cuotv nzengc mi'aqv.

²⁰E^hutv mingh lorz hungh diex. Hungh diex ganh zueiz jienv gu'nguaaic wuov nzangh biauv, laangh nyei wuov qongx. E^hutv gorngv, “Yie maaih yiem Tin-Hungh daaih nyei fienx oix mbuox meih.” Hungh diex yiem ninh nyei weic souv jiez daaih wuov zanc,

²¹E^hutv sung zaaix jieqv buoz, yiem ninh nyei mbiaauc bung camh zuih baeng cuotv nzuqc ndaauv daaih nzopv bieqc hungh diex nyei ga'sie.

²²Liemh nzuqc jouv yaac bieqc muotv nzengc, zungv nzopv tong nqa'haav nqaang mingh. Orv-junc beu jienv nzuqc ndaauv, E^hutv yaac maiv baeng nzuqc cuotv.[13]

²³E^hutv cuotv ga'nyiec daaih guon gu'nguaaic wuov nzangh biauv nyei gaengh aengx forv jienv.

²⁴E^hutv ziouc mingh mi'aqv. Nqa'haav hungh diex nyei sin-hlen mienh daaih mangc buatc gu'nguaaic wuov nzangh biauv nyei gaengh forv jienv. Ninh mbuo gorngv, “Nziex hungh diex yiem gu'nyuoz wuov qongx biauv jaiv buoz mv bei.”

²⁵Zuov lauh haic, haiz hnyouv maiv henh aqv, mv baac maiv buatc hungh diex koi gaengh. Ninh mbuo ziouc zorqv forv-zeih daaih koi mangc ziouc buatc ninh mbuo nyei ziouv bueix wuov ndau daic mi'aqv.

²⁶Ninh mbuo yiem wuov zuov nyei ziangh hoc, E^hutv biaux ndutv mi'aqv. Ninh zungv jiex ndaangc wuov deix miuc-fangx nyei dorngx mingh taux Se^i^laa.

²⁷Mingh taux, ninh ziouc yiem E^faa^im mbong-aiv dorngx biomv jorng. I^saa^laa^en Mienh ziouc yiem mbong-aiv dorngx njiec daaih. E^hutv ziouc dorh jauv ninh mbuo mingh.

²⁸Ninh gorngv mbuox ninh mbuo, “Gan jienv yie mingh aqv, weic zuqc ZIOUV zorqv meih mbuo nyei win-wangv, Mo^apc Mienh, jiu bun yiem meih mbuo nyei buoz-ndiev mi'aqv.” Ninh mbuo ziouc gan jienv E^hutv njiec mingh caangv duqv jiex Jor^ndaen Ndaaih nyei jauv-bouc, yaac dangv jienv maiv bun yietc dauh Mo^apc Mienh jiex.

²⁹Dongh wuov zanc ninh mbuo daix Mo^apc Mienh leih maiv go yietc waanc dauh. Yietc zungv ziangh duqv longx, maaih qaqv henv nyei mienh. Maiv maaih yietc dauh duqv cuotv singx maengc.

³⁰Wuov hnoi Mo^apc Mienh suei, zuqc yiem I^saa^laa^en Mienh nyei buoz-ndiev. I^saa^laa^en Deic-Bung ziouc taaix-baengh buangv betv ziepc hnyangx.

³¹Yiem E^hutv jiex mingh maaih Aanaatv nyei dorn, Samgaa. Ninh longc zunc ngongh biaav mborqv daic luoqc baeqv dauh Fi^li^saa^die Mienh. Ninh yaac fih hnangv nyei njoux I^saa^laa^en Mienh.