Read Iu Mien Domh Jien 4 Bible Online

Domh Jien 4 - Iu Mien bible

Domh Jien 4

¹E^hutv guei seix liuz, nqa'haav ziux ZIOUV mangc, I^saa^laa^en Mienh aengx zoux waaic sic.

²Weic naaiv ZIOUV zorqv I^saa^laa^en Mienh jiu bun yiem Kaa^naa^an nyei hungh, Yaa^mbin nyei buoz-ndiev. Yaa^mbin yiem Haaso Zingh gunv. Ninh nyei domh baeng-bieiv nyei mbuox heuc Si^se^laa. Si^se^laa yiem Haa^lo^setv Haa^go^yim.

³Weic zuqc Yaa^mbin Hungh maaih juov baeqv jaax mborqv jaax nyei hlieqv-maaz-cie yaac qaqv zeix I^saa^laa^en Mienh nyic ziepc hnyangx, I^saa^laa^en Mienh ziouc heuc jienv tov ZIOUV tengx.

⁴Wuov zanc Lapv^bi^ndotc nyei auv, mbuox heuc Nde^mbo^laa, zoux douc waac mienh, dorh I^saa^laa^en Mienh.

⁵Ninh yiem E^faa^im mbong-aiv dorngx, Laamaa caux Mbetc^en Zingh mbu'ndongx, zueiz jienv Nde^mbo^laa nyei daau-ndiangx ga'ndiev. I^saa^laa^en Mienh mingh wuov lorz ninh weic bun ninh dunx sic.

⁶Nde^mbo^laa paaiv mienh mingh Napv^taa^li Deic, Ke^ndetc Zingh, heuc Aa^mbi^no^am nyei dorn, Mbaalaakv, daaih ziouc gorngv mbuox ninh, “ZIOUV, I^saa^laa^en nyei Tin-Hungh, paaiv meih, ‘Mingh aqv. Dorh yietc waanc dauh Napv^taa^li Fingx caux Se^mbu^lun Fingx nyei mienh mingh Taa^mbo Mbong.

⁷Yie zungv oix bun Yaa^mbin Hungh nyei baeng-bieiv, Si^se^laa, liemh ninh mborqv jaax nyei maaz-cie caux ninh nyei jun-baeng, mingh taux Kison Ndaaih, yaac zorqv ninh jiu bun yiem meih nyei buoz-ndiev.’+”

⁸Mbaalaakv gorngv mbuox Nde^mbo^laa, “Se gorngv meih caux yie mingh, yie mingh nyei. Meih maiv caux yie mingh nor, yie maiv mingh aqv.”

⁹Nde^mbo^laa gorngv, “Duqv nyei. Yie caux meih mingh. Mv baac meih mingh nyei jauv, meih maiv duqv mengh dauh, weic zuqc ZIOUV oix zorqv Si^se^laa jiu bun yiem dauh m'sieqv dorn nyei buoz-ndiev.” Nde^mbo^laa ziouc jiez sin caux jienv Mbaalaakv mingh taux Ke^ndetc Zingh.

¹⁰Mbaalaakv ziouc heuc Se^mbu^lun caux Napv^taa^li Mienh mingh Ke^ndetc. Maaih yietc waanc dauh mienh gan ninh mingh. Nde^mbo^laa yaac caux jienv mingh.

¹¹Kenai Mienh, He^mbe, leih nqoi Mose nyei nauz,[14] Ho^mbapc, nyei zeiv-fun, Kenai Mienh, aengx corng ninh nyei ndopv-liuh yiem Saax^nan^nim Deic, nitv Ke^ndetc Zingh, yietc diuh domh mba'ong zuei ndiangx ga'hlen.

¹²Maaih mienh mingh mbuox Si^se^laa, “Aa^mbi^no^am nyei dorn, Mbaalaakv, taux Taa^mbo Mbong mi'aqv.”

¹³Si^se^laa ziouc heuc nzoih ninh nyei juov baeqv jaax mborqv jaax nyei hlieqv-maaz-cie, caux gan ninh nyei yietc zungv jun-baeng daaih zunv, ziouc yiem Haa^lo^setv Haa^go^yim mingh taux Kison Ndaaih.

¹⁴Nde^mbo^laa ziouc gorngv mbuox Mbaalaakv, “Mingh aqv, weic zuqc ih hnoi ZIOUV zorqv Si^se^laa jiu bun yiem meih nyei buoz-ndiev. ZIOUV mingh ndaangc meih.” Mbaalaakv ziouc njiec Taa^mbo Mbong yaac dorh jienv yietc waanc dauh mienh gan jienv ninh mingh.

¹⁵ZIOUV zoux bun Si^se^laa caux ninh nyei yietc zungv mborqv jaax nyei maaz-cie caux jun-baeng lunc nzengc ziouc zuqc Mbaalaakv nyei nzuqc ndaauv daix. Si^se^laa ziouc njiec mborqv jaax nyei maaz-cie tiux biaux mi'aqv.

¹⁶Mv baac Mbaalaakv zunc jienv mborqv jaax nyei maaz-cie caux jun-baeng mingh taux Haa^lo^setv Haa^go^yim. Si^se^laa nyei jun-baeng zuqc nzuqc ndaauv daic nzengc, maiv zengc yietc dauh aqv.

¹⁷Kungx maaih Si^se^laa tiux biaux jienv mingh taux Kenai Mienh, He^mbe nyei auv, Yaa^en, nyei ndopv-liuh weic zuqc Haaso Zingh nyei hungh, Yaa^mbin, caux Kenai Mienh nyei zeiv-fun, He^mbe, zoux doic horpc nyei.

¹⁸Yaa^en ziouc cuotv daaih zipv Si^se^laa. Ninh gorngv, “Yie nyei ziouv aac, bieqc maah! Gunv bieqc daaih maah! Maiv dungx gamh nziex oc.” Si^se^laa ziouc bieqc Yaa^en nyei ndopv-liuh mingh. Yaa^en yaac zorqv suangx daaih tengx ninh homc jienv.

¹⁹Si^se^laa gorngv mbuox Yaa^en, “Yie jaang nqaatv haic. Tov bun deix wuom yie hopv.” Yaa^en ziouc koi nyorx-mbuoqc bun nyorx Si^se^laa hopv liuz, ziouc zorqv suangx homc jienv ninh.

²⁰Si^se^laa gorngv mbuox Yaa^en, “Tov meih souv jienv ndopv-liuh nyei gaengh ndaangc. Se gorngv maaih mienh daaih naaic meih, ‘Maaih haaix dauh daaih naaiv fai?’ Meih oix zuqc gorngv, ‘Maiv maaih.’+”

²¹Mv baac Si^se^laa m'njormh duqv ndo haic, weic zuqc ninh kouv haic. He^mbe nyei auv, Yaa^en, zorqv norm corng ndopv-liuh nyei dongc caux zueih daaih heng-heng mingh taux Si^se^laa bueix nyei dorngx, mborng dongc bieqc Si^se^laa nyei mungh maih ga'hlen, mborng tong taux ga'ndiev ndau. Si^se^laa ziang naaic daic mi'aqv.

²²Mbaalaakv zunc jienv Si^se^laa daaih taux wuov, Yaa^en ziouc cuotv mingh zipv ninh yaac gorngv, “Bieqc maah! Yie nuqv dongh meih lorz wuov dauh mienh bun meih mangc.” Mbaalaakv ziouc bieqc ndopv-liuh, buatc Si^se^laa daic mi'aqv, bueix jienv wuov ndopv-liuh gu'nyuoz. Maaih corng ndopv-liuh nyei dongc mborng tong ninh nyei mungh maih ga'hlen.

²³Wuov hnoi, Tin-Hungh, bun Kaa^naa^an nyei hungh, Yaa^mbin, yiem I^saa^laa^en Mienh nyei nza'hmien suei.

²⁴I^saa^laa^en Mienh gunv zoux gunv henv, zoux bun Kaa^naa^an nyei hungh, Yaa^mbin, zungv zoux taux bun ninh zuqc mietc nzengc mi'aqv.