Read Iu Mien Laauc Yaangh 12 Bible Online

Laauc Yaangh 12 - Iu Mien bible

Laauc Yaangh 12

¹Aengx maaih nyungc mbuoqc horngh nyei domh jangx-hoc yiem wuov lungh hinc cuotv daaih. Maaih dauh m'sieqv dorn, ninh nyei zorng-zuqv se mba'hnoi, hlaax yiem ninh nyei zaux-ndiev, m'nqorngv yaac ndongx jienv ziepc nyeic norm hleix zoux ningv.

²Wuov dauh m'sieqv dorn maaih jienv sin. Ndutv sin nyei ziangh hoc taux, ninh mun duqv kouv haic ziouc heuc.

³Yiem wuov lungh aengx maaih nyungc jangx-hoc cuotv. Maaih diuh domh jung-hungh siqv, maaih siec norm m'nqorngv, ziepc norm jorng. Norm-norm m'nqorngv ndongx jienv ningv.

⁴Jung-hungh nyei dueiv puotv yiem lungh nyei hleix buo gouv nyei yietc gouv ndortv njiec ndau. Ninh souv jienv wuov dauh m'sieqv dorn nyei nza'hmien zuov gu'nguaaz yietv ndortv ndau ziouc oix nyanc gu'nguaaz.

⁵Wuov dauh m'sieqv dorn ziouc yungz duqv dauh dorn, dongh oix longc hlieqv-biaav gunv maanc guoqv wuov dauh. Mv baac maaih dauh daaih caangv naaiv dauh dorn dorh mingh taux Tin-Hungh yaac taux Tin-Hungh nyei weic mi'aqv.

⁶Wuov dauh m'sieqv dorn ziouc biaux mingh wuov deic-bung-huaang, taux Tin-Hungh liuc leiz ziangx bun ninh yiem nyei dorngx. Tin-Hungh ziouc goux ninh yietc cin nyic baeqv luoqc ziepc hnoi.

⁷Wuov zanc yiem wuov tin-dorngh maaih mborqv jaax nyei sic cuotv. Mi^kaa^en caux ninh nyei fin-mienh caux wuov diuh jung-hungh mborqv jaax. Jung-hungh caux ninh nyei fin-mienh mborqv jaax

⁸mv baac zuqc suei mi'aqv. Tin-dorngh ziouc maiv maaih ninh mbuo yiem nyei dorngx aqv.

⁹Naaiv diuh domh jung-hungh zuqc zoi njiec. Ninh se dongh loz-hnoi wuov diuh naang, mbuox heuc mienv nyei hungh yaac heuc Saadaan, dongh nduov lungh ndiev maanc mienh wuov diuh naang. Ninh caux ninh nyei zuangx fin-mienh zuqc zoi njiec taux ndau.

¹⁰Yie aengx haiz qiex mbui yiem wuov tin-dorngh gorngv, “Ih zanc Tin-Hungh njoux ninh nyei mienh mi'aqv. Ih zanc Tin-Hungh longc ninh nyei lingc zoux hungh gunv baamh gen. Ninh nyei Giduc yaac duqv longc ninh nyei lingc gunv lungh ndiev. Weic zuqc yiem Tin-Hungh nyei nza'hmien ziangh hnoi ziangh muonz gox mbuo nyei gorx-youz wuov dauh, zuqc zoi njiec mi'aqv.

¹¹Mbuo nyei gorx-youz longc wuov dauh Ba'gi Yungh Dorn nyei nziaamv yaac longc ninh mbuo zoux zorng-zengx nyei waac hingh jiex gox ninh mbuo wuov dauh. Ninh mbuo maiv korv-fiqv ninh mbuo nyei maengc, zungv nyunc siev ninh mbuo nyei maengc daic.

¹²Lungh caux meih mbuo yiem lungh nyei yietc zungv oix zuqc njien-youh orn-lorqc. Mv baac ndau caux koiv oix zuqc kouv aqv, weic zuqc mienv nyei hungh njiec taux meih mbuo naaic. Ninh gengh! qiex jiez jienv weic zuqc hiuv duqv ninh nyei ziangh hoc maiv ndaauv aqv.”

¹³Jung-hungh buatc ninh zuqc zoi njiec taux baamh gen mi'aqv. Ninh ziouc zunc yungz gu'nguaaz-dorn wuov dauh m'sieqv dorn.

¹⁴Mv baac wuov dauh m'sieqv dorn duqv zipv i kuaaiv hlo haic nyei domh jaangv nyei ndaatv weic ndaix mingh deic-bung-huaang, taux ninh nyei dorngx.[24] Yiem wuov Tin-Hungh oix goux jienv buo hnyangx-bienx,[25] maiv bun wuov diuh naang hoic ninh.

¹⁵Naang ziouc piuv wuom cuotv ninh nyei nzuih baengx, hnangv diuh ndaaih nor, zunc jienv wuov dauh m'sieqv dorn, oix guaatv ninh mingh mi'aqv.

¹⁶Mv baac ndau tengx wuov dauh m'sieqv dorn. Ndau ziouc morngx nqoi nzuih naqv nzengc yiem jung-hungh nyei nzuih baengx cuotv nyei wuom.

¹⁷Jung-hungh qiex jiez! haic wuov dauh m'sieqv dorn, ziouc mingh caux m'sieqv dorn zengc njiec nyei zeiv-fun mborqv jaax. Naaiv deix zeiv-fun se ei jienv Tin-Hungh nyei lingc zoux, yaac sienx wuonv Yesu zoux nyei zorng-zengx.

¹⁸Naaiv diuh jung-hungh[26] ziouc souv jienv koiv-hlen nyei saa-ziou ndau.[27]