Read Iu Mien Laauc Yaangh 13 Bible Online

Laauc Yaangh 13 - Iu Mien bible

Laauc Yaangh 13

¹Yie ziouc buatc dauh hieh ga'naaiv yiem wuov koiv cuotv daaih. Wuov dauh hieh ga'naaiv maaih siec norm m'nqorngv, ziepc norm jorng. Norm-norm jorng ndongx jienv ningv. Norm-norm m'nqorngv fiev jienv ki Tin-Hungh nyei mbuox.

²Yie buatc nyei hieh ga'naaiv fangx zeiv hnangv nda'maauh mbeux, zaux hnangv jiepv nyei zaux nor, nzuih baengx hnangv sienh nyei nzuih baengx. Wuov diuh jung-hungh ziouc jiu ninh ganh nyei lingc caux ninh nyei weic caux domh hatc maaz bun wuov dauh hieh ga'naaiv.

³Hieh ga'naaiv nyei siec norm m'nqorngv maaih norm buatc hnangv zuqc jiex siang, haih daic nyei, mv baac zuqc mun nyei dorngx longx mi'aqv. Lungh ndiev mienh mbuoqc horngh haic ziouc gan naaic dauh hieh ga'naaiv.

⁴Zuangx mienh baaix wuov diuh jung-hungh weic zuqc jung-hungh jiu ninh nyei lingc bun naaic dauh hieh ga'naaiv. Ninh mbuo yaac baaix hieh ga'naaiv ziouc gorngv, “Haaix dauh haih hnangv naaiv dauh hieh ga'naaiv? Haaix dauh haih caux ninh mborqv jaax?”

⁵Wuov dauh hieh ga'naaiv duqv zipv nzuih bungx waac-maux yaac gorngv ki Tin-Hungh. Ninh yaac duqv lingc sueih eix zoux feix ziepc nyeic hlaax nyieqc.

⁶Hieh ga'naaiv ziouc nqoi nzuih gorngv doqc ki Tin-Hungh, ki Tin-Hungh nyei mbuox, ki Tin-Hungh yiem nyei dorngx, yaac ki yietc zungv yiem tin-dorngh wuov deix.

⁷Hieh ga'naaiv yaac duqv sueih eix caux Tin-Hungh nyei baeqc fingx mborqv jaax yaac hingh jiex ninh mbuo. [28] Ninh yaac duqv lingc gunv maanc guoqv, maanc fingx, maanc nyungc waac caux maanc nyungc mienh.

⁸Lungh ndiev maanc mienh ziouc zaangc wuov dauh hieh ga'naaiv, cuotv liuz maaih mbuox fiev jienv ziangh maengc daan wuov deix, dongh yiem zeix lungh zeix ndau wuov zanc zuqc daix daic wuov dauh Ba'gi Yungh Dorn nyei daan.

⁹“Haaix dauh maaih m'normh oix zuqc baeng m'normh muangx longx.

¹⁰Haaix dauh maengc daaix zuqc zorqv wuonx loh, wuov dauh za'gengh zuqc zorqv wuonx loh. Haaix dauh maengc daaix zuqc nzuqc ndaauv daix daic, wuov dauh za'gengh zuqc nzuqc ndaauv daix daic. Weic naaiv Tin-Hungh nyei mienh oix zuqc maaih noic diev yaac longx-longx nyei sienx Tin-Hungh.”

¹¹Yie aengx buatc dauh hieh ga'naaiv yiem ndau-ndiev cuotv daaih. Maaih i norm jorng hnangv ba'gi yungh dorn nyei jorng yaac gorngv waac hnangv jung-hungh nor.

¹²Naaiv dauh hieh ga'naaiv duqv dorng jienv da'yietv dauh hieh ga'naaiv nyei nza'hmien longc nzengc da'yietv dauh nyei lingc. Ninh aapv baamh gen caux yiem baamh gen nyei mienh baaix da'yietv dauh hieh ga'naaiv, dongh zuqc jiex siang mv baac longx daaih wuov dauh.

¹³Da'nyeic dauh hieh ga'naaiv zoux domh jangx-hoc, zungv zoux bun douz yiem lungh ndortv njiec ndau bun maanc mienh buatc.

¹⁴Ninh duqv yiem da'yietv dauh hieh ga'naaiv nyei nza'hmien zoux mbuoqc horngh nyei jangx-hoc ziouc longc naaiv deix jangx-hoc nduov lungh ndiev mienh. Ninh yaac hatc zuangx mienh zeix norm fangx weic taaih zuqc nzuqc ndaauv hngaqv jiex siang nyei mv baac maiv daic wuov dauh hieh ga'naaiv.

¹⁵Da'nyeic dauh hieh ga'naaiv yaac duqv lingc haih biomv qiex bieqc da'yietv dauh hieh ga'naaiv nyei fangx. Fangx ziouc haih gorngv waac yaac haih bun yietc zungv maiv baaix ninh wuov deix mienh zuqc daix daic.

¹⁶Ninh yaac aapv mienh, maiv gunv hlo fai faix, butv zoih fai jomc, zoux nouh fai maiv zoux nouh nyei, yietc zungv oix zuqc nqaapv jienv yienx yiem mbiaauc jieqv buoz fai biorngh.

¹⁷Hnangv naaic, haaix dauh maiv duqv nqaapv jienv hieh ga'naaiv nyei mbuox nyei yienx fai div hieh ga'naaiv nyei mbuox wuov deix nzaangc, wuov dauh ziouc maiv haih maaiz maaic.

¹⁸Naaiv deix sic oix zuqc longc cong-mengh. Haaix dauh guai, wuov dauh haih funx duqv cuotv hieh ga'naaiv nyei mbuox nyei nzaangc, weic zuqc benx yietc dauh mienh nyei mbuox nyei nzaangc. Naaiv dauh mienh nyei mbuox nyei nzaangc se luoqc baeqv luoqc ziepc luoqc.