Read Iu Mien Laauc Yaangh 14 Bible Online

Laauc Yaangh 14 - Iu Mien bible

Laauc Yaangh 14

¹Yie aengx mangc, ziouc buatc wuov dauh Ba'gi Yungh Dorn souv jienv Si^on Mbong. Caux ninh yiem wuov maaih yietc sinx biei waanc biei cin dauh mienh, dongh maaih ninh nyei mbuox caux ninh nyei Die nyei mbuox fiev wuov biorngh nyei mienh.

²Yie yaac haiz maaih qiex mbui yiem wuov lungh daaih hnangv wuom buangv mouh mbui, yaac hnangv borngz mba'ong mbui nor. Yie yaac haiz wuov nyungc qiex mbui hnangv patv daanh baah nyei mienh patv ninh mbuo nyei daanh baah mbui nor.

³Ninh mbuo yiem hungh weic nyei nza'hmien, yiem wuov deix biei dauh nangh nyei ga'naaiv caux wuov deix zuangx mienh gox nyei nza'hmien, baaux diuh siang-nzung. Cuotv liuz yiem baamh gen duqv zuoqc nzuonx wuov deix yietc sinx biei waanc biei cin dauh, maiv maaih haaix dauh haih hoqc duqv naaiv diuh nzung.

⁴Naaiv deix m'jangc dorn maiv nitv jiex m'sieqv dorn, ninh mbuo cing-nzengc nyei. Ba'gi Yungh Dorn mingh haaix, ninh mbuo yaac gan jienv ninh mingh. Ninh mbuo yiem maanc mienh mbu'ndongx zuoqc cuotv daaih weic zoux fungx bun Tin-Hungh caux Ba'gi Yungh Dorn nyei daauh baan mienh.[29]

⁵Ninh mbuo nyei nzuih maiv gorngv-baeqc. Ninh mbuo yaac maiv maaih dorngc nyei dorngx.

⁶Yie aengx buatc ganh maaih dauh fin-mienh yiem ndaamv-lungh ndaix jienv mingh. Ninh yaac maaih yietc liuz yiem nyei kuv fienx zunh bun lungh ndiev maanc mienh, zunh bun maanc guoqv, maanc fingx, maanc nyungc waac caux maanc nyungc mienh.

⁷Naaiv dauh fin-mienh qiex hlo nyei zunh jienv gorngv, “Oix zuqc gamh nziex Tin-Hungh yaac ceng ninh weic zuqc ninh siemv maanc mienh nyei ziangh hoc taux aqv. Oix zuqc zaangc zeix lungh zeix ndau zeix koiv zeix wuom-zingv wuov dauh.”

⁸Aengx ganh maaih da'nyeic dauh fin-mienh gan jienv da'yietv dauh mingh yaac gorngv, “Mbaang mi'aqv. Mbaa^mbi^lon Domh Zingh mbaang mi'aqv. Naaiv norm domh zingh aapv maanc guoqv nyei mienh hopv ninh nyei diuv. Naaiv diuv se saeng hienx nqox nyei diuv-kuv.”

⁹Aengx ganh maaih da'faam dauh fin-mienh gan jienv wuov deix i dauh fin-mienh mingh, qiex hlo nyei gorngv, “Haaix dauh zaangc wuov dauh hieh ga'naaiv caux hieh ga'naaiv nyei fangx yaac nqaapv jienv hieh ga'naaiv nyei yienx ninh nyei biorngh fai buoz nor,

¹⁰wuov dauh zungv oix zuqc hopv Tin-Hungh nouz zuiz nyei diuv. Naaiv diuv Tin-Hungh dox njiec nouz zuiz nyei zaanv yaac maiv peux haaix nyungc. Haaix dauh hnangv naaiv nor zoux zungv oix zuqc yiem cing-nzengc nyei fin-mienh caux wuov dauh Ba'gi Yungh Dorn nyei nza'hmien zuqc hungh[30] nyei douz zeix.

¹¹Zeix ninh mbuo wuov guaax douz nyei sioux yietc liuz cutv-cutv nyei faaux taux maanc gouv maanc doic. Zaangc wuov dauh hieh ga'naaiv caux hieh ga'naaiv nyei fangx, caux nqaapv jienv hieh ga'naaiv nyei mbuox nyei yienx nyei mienh ziangh hnoi ziangh muonz maiv duqv kuh yiem yietc dangh.”

¹²Hnangv naaic, Tin-Hungh nyei mienh, dongh ei jienv Tin-Hungh nyei lingc yaac longx-longx nyei sienx Yesu wuov deix, oix zuqc maaih noic diev.

¹³Yie aengx haiz qiex yiem wuov lungh gorngv, “Oix zuqc fiev jienv, ‘Yangh naaiv jiex weic Ziouv daic[31] nyei mienh duqv orn-lorqc.’+” Singx Lingh dau, “Za'gengh hnangv naaic. Ninh mbuo duqv dingh ninh mbuo zoux nyei gong hitv kuonx weic zuqc ninh mbuo zoux nyei sic gan jienv ninh mbuo mingh.”

¹⁴Yie aengx mangc ziouc buatc dorv mbuonx baeqc nyei. Zueiz jienv mbuonx wuov dauh buatc hnangv dauh baamh mienh.[32] Ninh ndongx jienv jiem-ningv, buoz nanv jienv laic haic nyei limh ngau.

¹⁵Aengx ganh maaih dauh fin-mienh yiem zaangc Tin-Hungh nyei biauv cuotv daaih heuc qiex hlo nyei gorngv mbuox zueiz jienv mbuonx wuov dauh, “Longc meih nyei limh ngau gaatv aqv, weic zuqc yiem baamh gen nyei ga'naaiv zuoqc longx aqv. Gaatv nyei ziangh hoc taux aqv.”

¹⁶Zueiz jienv mbuonx wuov dauh ziouc longc ninh nyei limh ngau gaatv. Yiem baamh gen oix zuqc siou nyei ga'naaiv ziouc gaatv nzengc mi'aqv.

¹⁷Yie aengx buatc ganh maaih dauh fin-mienh yiem tin-dorngh, zaangc Tin-Hungh nyei biauv, cuotv daaih. Ninh yaac maaih laic haic nyei limh ngau.

¹⁸Aengx maaih dauh fin-mienh yiem ziec-dorngh daaih, dongh gunv douz wuov dauh fin-mienh. Ninh heuc qiex hlo nyei mbuox nanv laic haic nyei limh ngau wuov dauh, “Longc meih laic haic nyei limh ngau gaatv baamh gen nyei a'ngunc biouv-joih, weic zuqc a'ngunc biouv zuoqc nzengc aqv.”

¹⁹Wuov dauh fin-mienh ziouc longc ninh nyei limh ngau gaatv baamh gen nyei a'ngunc biouv zoi bieqc nyueih a'ngunc biouv nyei domh zorngh, dongh biux mengh Tin-Hungh nouz haic zuiz wuov norm zorngh.

²⁰A'ngunc biouv yiem zingh ga'nyiec nyei zorngh zuqc nyueih, aengx maaih nziaamv yiem zorngh liouc cuotv mingh faam-baeqv gilo ndaauv, buo ndorqc ndo.[33]