Read Iu Mien Laauc Yaangh 7 Bible Online

Laauc Yaangh 7 - Iu Mien bible

Laauc Yaangh 7

¹Nqa'haav yie buatc biei dauh fin-mienh souv jienv ndau-beih nyei biei bung gorqv, hatc jienv biei bung nyei nziaaux, weic maiv bun nziaaux buonc ndau-beih fai koiv fai haaix diuh ndiangx.

²Yie aengx buatc ganh maaih dauh fin-mienh yiem dong bung cuotv daaih yaac dorh jienv ziangh jienv nyei Tin-Hungh nyei yienx. Ninh longc qiex hlo nyei heuc dongh Tin-Hungh bun lingc zoux waaic ndau-beih caux koiv wuov deix biei dauh fin-mienh.

³Ninh gorngv, “Maiv dungx gaengh zoux waaic ndau-beih caux koiv caux ndiangx. Zuov yie mbuo nqaapv jienv yienx yie mbuo nyei Tin-Hungh nyei bou nyei biorngh.”

⁴Yie yaac haiz gorngv duqv nqaapv jienv yienx wuov deix mienh nyei soux mouc. Fingx-fingx I^saa^laa^en Mienh yietc zungv maaih yietc sinx biei waanc biei cin dauh duqv nqaapv yienx. [Fingx] — [Mbu'ziex dauh]

⁵Yu^ndaa Fingx — maaih 12,000 dauh duqv nqaapv yienx Lu^mben Fingx — maaih 12,000 dauh duqv nqaapv yienx Gaatc Fingx — maaih 12,000 dauh duqv nqaapv yienx

⁶Aa^se Fingx — maaih 12,000 dauh duqv nqaapv yienx Napv^taa^li Fingx — maaih 12,000 dauh duqv nqaapv yienx Maa^natv^se Fingx — maaih 12,000 dauh duqv nqaapv yienx

⁷Si^me^on Fingx — maaih 12,000 dauh duqv nqaapv yienx Lewi Fingx — maaih 12,000 dauh duqv nqaapv yienx Itc^saax^kaa Fingx — maaih 12,000 dauh duqv nqaapv yienx

⁸Se^mbu^lun Fingx — maaih 12,000 dauh duqv nqaapv yienx Yosepv Fingx — maaih 12,000 dauh duqv nqaapv yienx Mben^yaa^min Fingx — maaih 12,000 dauh duqv nqaapv yienx

⁹Naaiv deix sic jiex liuz, yie mangc ziouc buatc mienh camv! haic, maiv maaih haaix dauh haih saauv duqv zienz. Ninh mbuo yiem maanc guoqv, maanc fingx, maanc nyungc mienh, maanc nyungc waac daaih souv jienv hungh weic caux Ba'gi Yungh Dorn nyei nza'hmien. Ninh mbuo zuqv jienv lui-ndaauv-baeqc, buoz nanv jienv daau-normh,

¹⁰yaac heuc qiex mbui nyei gorngv, “Njoux en yiem yie mbuo nyei Tin-Hungh, dongh zueiz jienv hungh weic wuov dauh, caux naaiv dauh Ba'gi Yungh Dorn daaih.”

¹¹Yietc zuangx fin-mienh souv weih gormx hungh weic caux mienh gox caux wuov deix biei dauh nangh nyei ga'naaiv, yaac puoqv njiec ndau baaix Tin-Hungh.

¹²Ninh mbuo gorngv, “Aamen. Ceng Tin-Hungh, laengz zingh Tin-Hungh. Yie mbuo nyei Tin-Hungh yietc liuz maaih njang-laangc, maaih cong-mengh, maaih mengh hoc, maaih lingc, maaih qaqv taux maanc gouv maanc doic. Aamen.”

¹³Wuov deix mienh gox maaih dauh naaic yie, “Zuqv jienv lui-ndaauv-baeqc nyei naaiv deix mienh se haaix dauh? Ninh mbuo yiem haaix daaih?”

¹⁴Yie dau, “Domh Gorx aah! Meih hiuv nyei.” Ninh ziouc mbuox yie, “Naaiv deix mienh se yiem wuov nzunc nyei domh naanc zingh cuotv daaih. Ninh mbuo longc wuov dauh Ba'gi Yungh Dorn nyei nziaamv nzox ninh mbuo nyei domh lui-ndaauv baeqc daaih.

¹⁵Weic naaiv, ninh mbuo yiem Tin-Hungh nyei hungh weic nza'hmien, ziangh hnoi ziangh muonz yiem zaangc Tin-Hungh nyei biauv fu-sux ninh. Zueiz jienv hungh weic wuov dauh oix caux ninh mbuo yiem, beu jienv ninh mbuo.[15]

¹⁶Yiem naaiv mingh ninh mbuo yietc liuz maiv ngorc, yietc liuz yaac maiv nqaatv aqv. Mba'hnoi fai nyutc douz yaac pui maiv zuqc ninh mbuo.

¹⁷Weic zuqc yiem hungh weic mbu'ndongx wuov dauh Ba'gi Yungh Dorn oix goux ninh mbuo, hnangv goux ba'gi yungh nyei ziouv goux ninh nyei ba'gi yungh nor. Ninh yaac oix dorh ninh mbuo mingh taux yungz maengc nyei wuom-zingv. Tin-Hungh yaac oix sortv nqaai ninh mbuo nyei diemv-diemv wuom-mueic.”