Read Iu Mien Lu^te 1 Bible Online

Lu^te 1 - Iu Mien bible

Lu^te 1

¹Doix domh jien gunv nyei ziangh hoc, wuov norm deic-bung buangh domh huaang domh ngorc. Maaih dauh mienh yiem Yu^ndaa Deic, Mbetc^le^hem Mungv, dorh jienv ninh nyei auv caux i dauh dorn mingh yiem douc Mo^apc Deic-Bung.

²Naaiv dauh mienh nyei mbuox heuc E^li^me^lekv. Ninh nyei auv heuc Naa^o^mi. Ninh nyei i dauh dorn heuc Maalon caux Ki^li^on. Ninh mbuo se E^faa^taa Mienh, yiem Yu^ndaa Deic, Mbetc^le^hem Mungv. Ninh mbuo mingh taux Mo^apc Deic-Bung ziouc yiem wuov.

³Yiem gau wuov, Naa^o^mi nyei nqox, E^li^me^lekv, daic mi'aqv, guangc jienv ninh nyei auv caux i dauh dorn.

⁴Naaiv deix i dauh dorn longc Mo^apc sieqv zoux auv. Maaih dauh heuc Ofaa, maaih dauh heuc Lu^te. Ninh mbuo yiem naaic leih maiv go ziepc hnyangx nyei dorngx,

⁵Maalon caux Ki^li^on mbuo i muoz daic mi'aqv, guangc jienv Naa^o^mi maiv maaih nqox yaac maiv maaih ninh nyei i dauh dorn aqv.

⁶Naa^o^mi yiem Mo^apc Deic haiz gorngv ZIOUV ceix fuqv bun ninh nyei mienh maaih nyanc hopv. Ninh ziouc caux ninh nyei i dauh mbuangz yiem Mo^apc liuc leiz cuotv jauv nzuonx.

⁷Ninh mbuo buo mbuangz-maac ziouc leih nqoi ninh mbuo yiem nyei dorngx cuotv jauv nzuonx Yu^ndaa Deic.

⁸Mv baac yiem jauv zaangc Naa^o^mi gorngv mbuox ninh nyei i dauh mbuangz, “Meih mbuo nzuonx aqv oc. Gorqv-mienh nzuonx gorqv-mienh nyei maa nyei biauv. Tov ZIOUV zoux longx bun meih mbuo hnangv meih mbuo zoux longx bun daic mingh wuov deix caux maa.

⁹Tov ZIOUV bun meih mbuo i dauh aengx duqv dorng siang-jaa, duqv kuh yiem kuh nyanc.” Naa^o^mi ziouc zom ninh mbuo i dauh. Ninh mbuo yaac nyiemv mbui nyei,

¹⁰gorngv mbuox Naa^o^mi, “Maiv zeiz! Yie mbuo zungv oix caux maa nzuonx maa nyei mienh wuov.”

¹¹Mv baac Naa^o^mi gorngv, “Yie nyei nyaam aah! Gunv nzuonx aqv. Meih mbuo fungc oix caux maa mingh? Maa aengx haih yungz duqv dorn bun meih mbuo longc zoux nqox fai?

¹²Yie nyei nyaam aah! Gunv nzuonx mingh maah! Maa gox haic, maiv haih aengx dorng jaa. Se gorngv yie corc haih maaih lamh hnamv dorngx, ih muonz yaac haih duqv longc nqox, aengx yungz duqv dorn,

¹³meih mbuo corc oix zuov ninh mbuo hlo daaih fai? Meih mbuo oix zuov jienv maiv mingh dorng jaa fai? Yie nyei nyaam aah! Hnangv naaic maiv duqv. Maa korv-lienh meih mbuo camv haic[1] weic zuqc ZIOUV nyei buoz bun yie zuqc ndongc naaiv kouv.”

¹⁴Ninh mbuo ziouc aengx nyiemv nzunc. Ofaa zom liuz ninh nyei maa-buoc, ziang naaic mingh mi'aqv. Mv baac Lu^te qam jienv, siev maiv duqv ninh nyei maa-buoc mingh.

¹⁵Naa^o^mi gorngv, “Mangc gaax, meih nyei juoh nzuonx mingh lorz ninh ganh nyei mienh muoz, ninh ganh nyei zienh. Meih gan jienv meih nyei juoh nzuonx aqv maah!”

¹⁶Mv baac Lu^te dau, “Maa maiv dungx aapv yie nzuonx, maiv gan maa. Maa mingh haaix yie yaac oix gan maa mingh. Maa yiem haaix yie yaac oix caux maa yiem wuov. Maa nyei cien-ceqv ziouc benx yie nyei cien-ceqv. Maa nyei Tin-Hungh yaac benx yie nyei Tin-Hungh.

¹⁷Maa yiem haaix daic, yie yaac oix yiem wuov daic, yaac biopv wuov. Se gorngv maaih haaix nyungc bun yie leih nqoi maa cuotv liuz daic, tov ZIOUV hniev-hniev nyei dingc yie nyei zuiz.”

¹⁸Naa^o^mi buatc Lu^te liepc dingc hnyouv caux ninh mingh, ninh ziouc dingh njiec, maiv kuinx ninh nzuonx.

¹⁹Ninh mbuo i dauh gan jauv mingh taux Mbetc^le^hem Mungv. Taux Mbetc^le^hem wuov zanc, mungv nyei zuangx mienh ndutc ndutc nyei daaih. M'sieqv dorn gorngv, “Naaiv za'gengh Naa^o^mi nyei fai?”

²⁰Naa^o^mi gorngv, “Maiv dungx heuc yie zoux Naa^o^mi.[2] Oix zuqc heuc yie zoux Maalaa,[3] weic zuqc Nernh Jiex Wuov Dauh[4] bun yie nyei maengc kouv haic.

²¹Yie cuotv nyei ziangh hoc, yie maaih nyungc-nyungc, mv baac ZIOUV dorh yie kungx-buoz baeqc zaux nyei nzuonx daaih. Meih mbuo weic haaix diuc heuc yie zoux Naa^o^mi? Weic zuqc ZIOUV bun yie zuqc siouc kouv. Nernh Jiex Wuov Dauh bun yie zuqc zeqc naanc.

²²Hnangv naaic Naa^o^mi caux ninh nyei Mo^apc Mienh mbuangz, Lu^te, yiem Mo^apc Deic-Bung nzuonx taux Mbetc^le^hem doix zuqc mienh jiez gorn gaatv mbiauh mbaali nyei ziangh hoc.