Read Iu Mien 1 Saa^mu^en 21 Bible Online

1 Saa^mu^en 21 - Iu Mien bible

1 Saa^mu^en 21

¹Ndaawitv ziouc mingh taux Nopv Mungv, Aa^hi^me^lekv sai mienh wuov. Aa^hi^me^lekv sin zinx jienv cuotv daaih zipv Ndaawitv. Ninh gorngv, “Weic haaix diuc meih ganh daaih hnangv, maiv maaih haaix dauh caux meih daaih fai?”

²Ndaawitv gorngv mbuox Aa^hi^me^lekv sai mienh, “Hungh diex paaiv yie zoux yietc nyungc jauv yaac gorngv mbuox yie, ‘Yie paaiv nyei waac yaac jiu bun meih zoux nyei maiv dungx mbuox haaix dauh.’ Yie caux guanh mienh lunx mienh dunx ziangx doic oix buangh yietc norm dorngx.

³Meih maaih deix haaix nyungc nyanc yiem meih naaiv fai? Tov bun biaa norm njuov yie fai yiem meih naaiv maaih haaix nyungc nyanc hopv yaac duqv.”

⁴Sai mienh dau Ndaawitv, “Yie maiv maaih pou-tong nyei njuov. Kungx maaih deix cing-nzengc nyei njuov hnangv. Da'faanh tov bun wuov deix mienh lunx mienh maiv duqv bueix m'sieqv dorn, ninh mbuo nyanc duqv nyei.”

⁵Ndaawitv dau sai mienh, “Za'gengh nor, yie mbuo haaix zanc cuotv jauv, yie mbuo gec jienv m'sieqv dorn, maiv bun daaih nitv fatv yie mbuo. Cuotv mingh weic pou-tong nyei jauv naaiv deix mienh lunx mienh nyei sin m'daaih cing-nzengc nyei. Hnangv naaic, cuotv mingh weic lengc jeiv nyei jauv, ninh mbuo nyei sin gauh fatv cing-nzengc.”

⁶Hnangv naaic sai mienh ziouc zorqv cing-nzengc njuov bun Ndaawitv, weic zuqc yiem wuov maiv maaih ganh nyungc njuov. Kungx maaih gengx liuz Tin-Hungh zorqv njiec daaih nyei njuov. Se yiem ZIOUV nyei nza'hmien gengx liuz zorqv njiec daaih wuov hnoi tiuv siang-njuov-jorm wuov deix loz-njuov.

⁷Wuov hnoi maaih dauh mienh yiem wuov. Ninh zoux Saulo nyei bou, se E^ndom Mienh, mbuox heuc Ndo^ekc. Ninh corc yiem jienv ZIOUV nyei nza'hmien wuov. Ninh zoux goux Saulo nyei saeng-kuv bou nyei bieiv zeiv.

⁸Ndaawitv naaic Aa^hi^me^lekv, “Yiem naaiv meih maiv maaih yietc diuh cang fai yietc zung nzuqc ndaauv fai? Yie maiv duqv dorh nzuqc ndaauv fai wuoqc ginc daaih, weic zuqc hungh diex paaiv nyei jauv oix zuqc gaanv jienv daaih.”

⁹Sai mienh gorngv, “Dongh meih yiem Elaa Horngz daix wuov dauh Fi^li^saa^die Mienh, Go^li^atc, nyei nzuqc ndaauv corc beu jienv ndie an jienv efotv nyei nqa'haav maengx. Se gorngv meih oix longc nor, gunv zorqv dorh mingh aqv. Cuotv liuz wuov zung maiv maaih ganh zung aqv.” Ndaawitv gorngv, “Maiv maaih haaix zung nzuqc ndaauv ndongc wuov zung yaauc. Tov bun yie oc,”

¹⁰Wuov hnoi Ndaawitv biaux Saulo yaac mingh lorz Gatc Zingh nyei hungh, Aakitv.

¹¹Aakitv nyei bou gorngv mbuox Aakitv, “Naaiv dauh Ndaawitv benx ninh nyei deic-bung nyei hungh maiv zeiz? Se naaiv dauh yiem wuov nyei m'sieqv dorn cangx heix baaux nzung gorngv, “+‘Saulo daix mienh benx cin-cin. Ndaawitv daix mienh benx waanc-waanc’ maiv zeiz?”

¹²Ndaawitv ziouc yiem hnyouv jangx jienv naaiv deix waac, yaac haiz gamh nziex haic Gatc Zingh nyei hungh, Aakitv.

¹³Ndaawitv ziouc tiuv ninh nyei eix leiz daaih duqv-eix zoux benx butv-ndin mienh, la'guaih guetv zingh gaengh, wuom-nzuih yaac liouc njiec guoqv jienv ninh nyei siaam.

¹⁴Aakitv ziouc gorngv mbuox ninh nyei bou, “Mangc gaax, meih mbuo buatc naaiv dauh butv-ndin mienh. Meih mbuo dorh ninh daaih lorz yie zoux haaix nyungc?

¹⁵Yie qiemx zuqc butv-ndin mienh meih mbuo cingx daaih dorh naaiv dauh lov daaih yiem yie nyei nza'hmien zoux butv-ndin sic bun yie mangc fai? Naaiv nyungc mienh puix duqv bieqc yie nyei biauv fai?”