Read Iu Mien 1 Saa^mu^en 24 Bible Online

1 Saa^mu^en 24 - Iu Mien bible

1 Saa^mu^en 24

¹Saulo mingh zunc Fi^li^saa^die Mienh nzuonx daaih, maaih mienh mbuox ninh, “Ndaawitv yiem En Ge^ndi nyei Deic-Bung-Huaang.”

²Saulo ziouc dorh ninh yiem I^saa^laa^en nyei zuangx mienh mbu'ndongx ginv daaih nyei buo cin dauh henv nyei baeng mingh taux Hieh Yungh Mbaengx lorz Ndaawitv caux gan Ndaawitv nyei mienh.

³Saulo daaih taux yiem jauv-hlen wuov deix ba'gi yungh laanh. Yiem wuov norm dorngx maaih norm mbaengx-kuotv. Saulo ziouc bieqc mbaengx-kuotv mingh jaiv buoz. Ndaawitv caux ninh nyei mienh yaac zueiz jienv mbaengx-kuotv gu'nyuoz ndo jiex nyei dorngx.

⁴Ndaawitv nyei mienh gorngv mbuox Ndaawitv, “Ih hnoi se dongh ZIOUV gorngv mbuox meih, ‘Yie oix zorqv meih nyei win-wangv jiu bun yiem meih nyei buoz-ndiev. Meih gunv sueih eix zoux bun ninh aqv.’+” Ndaawitv ziouc jiez sin daaih heng-heng nyei mingh taux Saulo nyei nqa'haav nqaang ziouc gaatv norm Saulo nyei lui-siaam-jieqv nyei gorqv ndutv mingh. Saulo yaac maiv hiuv duqv.

⁵Nqa'haav Ndaawitv haiz hnyouv maiv longx, weic zuqc ninh gaatv Saulo nyei lui-siaam-jieqv nyei gorqv.

⁶Ninh gorngv mbuox caux ninh yiem wuov deix mienh, “Tov ZIOUV baav jienv maiv dungx bun yie aengx hnangv naaiv nor zoux bun yie nyei ziouv, dongh ZIOUV longc youh orn daaih nyei mienh. Maiv dungx bun yie zoux haaix nyungc hoic ninh, weic zuqc ninh se ZIOUV orn daaih nyei mienh.”

⁷Ndaawitv yaac longc naaiv deix waac laanh jienv gan ninh nyei mienh, yaac maiv bun haaix dauh mienh zoux haaix nyungc hoic Saulo. Saulo ziouc jiez sin cuotv mbaengx-kuotv gan ninh nyei jauv mingh mi'aqv.

⁸Nqa'haav Ndaawitv cuotv mbaengx-kuotv mingh heuc Saulo, “Yie nyei ziouv, hungh diex aah!” Saulo huin-nzuonx mangc. Ndaawitv ziouc puoqv njiec ndau baaix Saulo.

⁹Ndaawitv gorngv mbuox Saulo, “Hungh diex weic haaix diuc muangx mienh gorngv, Ndaawitv oix hoic hungh diex nyei maengc?

¹⁰Ih hnoi hungh diex ganh nyei m'zing duqv buatc liuz yiem mbaengx-kuotv ZIOUV zungv zorqv hungh diex jiu bun yiem yie nyei buoz-ndiev mi'aqv. Maaih mienh heuc yie daix hungh diex, mv baac yie corc liouh meih nyei maengc. Yie gorngv, ‘Yie maiv sung buoz hoic yie nyei hungh diex weic zuqc hungh diex se ZIOUV orn daaih nyei mienh.’

¹¹Yie nyei die aah! Mangc maah! Meih nyei lui-siaam-jieqv nyei gorqv yiem yie nyei buoz, weic zuqc yie gaatv meih nyei lui-siaam-jieqv mv baac maiv daix meih. Ih zanc meih mengh baeqc yaac hiuv duqv. Yie maiv zoux dorngc, yaac maiv ngaengc hungh diex. Yie maiv zoux haaix nyungc dorngc hungh diex, mv baac meih zunc yie oix zorqv yie nyei maengc.

¹²Tov ZIOUV yiem hungh diex caux yie mbu'ndongx dunx sic. Tov ZIOUV weic yie winh bun meih, mv baac yie ganh nyei buoz maiv zoux haaix nyungc hoic hungh diex.

¹³Hnangv loz-hnoi mienh maaih waac-puix gorngv, ‘Orqv sic m'daaih yiem orqv mienh cuotv daaih.’ Mv baac yie nyei buoz maiv zoux haaix nyungc bun hungh diex.

¹⁴“I^saa^laa^en Mienh nyei hungh diex cuotv daaih lorz haaix dauh? Zunc haaix dauh? Kungx zunc dauh juv-daic, zunc norm juv-muo saah?

¹⁵Weic naaiv tov ZIOUV yiem yie caux hungh diex mbu'ndongx zoux siemv zuiz jien tengx yie mbuo dunx sic. Tov ninh zaah yaac tengx yie ziouc njoux yie biaux ndutv meih nyei buoz-ndiev.”

¹⁶Ndaawitv gorngv naaiv deix waac bun Saulo muangx liuz, Saulo gorngv, “Yie nyei dorn, Ndaawitv aac, naaiv se meih nyei qiex fai?” Saulo ziouc nyiemv duqv mbui haic.

¹⁷Ninh gorngv mbuox Ndaawitv, “Meih gauh longx yie, weic zuqc meih zoux longx bun yie, mv baac yie zoux orqv bun meih.

¹⁸Ih hnoi meih bun cing meih hnangv haaix nor zoux longx bun yie, weic zuqc ZIOUV zorqv yie jiu bun yiem meih nyei buoz-ndiev mv baac meih maiv hoic yie.

¹⁹Weic zuqc maiv maaih haaix dauh buangh ninh nyei win-wangv corc aengx bungx ninh baengh orn nyei mingh. Hnangv naaic tov ZIOUV zoux longx winh bun meih hnangv meih ih hnoi zoux longx bun yie.

²⁰Ih zanc yie hiuv duqv, meih ndongc haaix zungv duqv zoux hungh. I^saa^laa^en Guoqv oix zuqc yiem meih nyei buoz-ndiev liepc jiez.

²¹Weic naaiv tov meih ziangv jienv ZIOUV laengz waac mbuox yie, meih maiv pai guangc yie nyei zeiv-fun yaac maiv yiem yie nyei die nyei douh zong sortv yie nyei mbuox guangc.”

²²Ndaawitv ziouc houv jienv laengz waac bun Saulo. Saulo ziouc nzuonx biauv mi'aqv. Ndaawitv caux ninh nyei mienh faaux mingh yiem norm weih wuonv nyei dorngx.