Read Iyojwa'ja Chorote San Mateo 12 Bible Online

San Mateo 12 - Iyojwa'ja Chorote bible

San Mateo 12

¹Jakayi ti yiyi siojokia jloma ti i'nio 'wanjlijyi'n, Jesús jla'yis japo t'eyasajnas ti yikiajli'ni ja jiwomik japo i'nio'. Siojopo t'eyasajnas inil'liajne'n, isiojwits'i jawa jla' jawa ipiatatio' t'ejes 'wanjle'e ti k'iejli ja'no'we, ti itiuwis.

²Je 'esiji ti Fariséojos i'winayi, sekyi'i iyonisi'ne 'ate ja Jesús —'Yene siapo 'eyasajnas, iyoyisi siunie je 'esiji ka tiwoki janak jloma ti i'nio 'wanjlijyi'n.

³Jesús isiujlie japoka ti iyo'ate: —¿Je 'najanayi siupi David iyojonipi? Yit'iyipe japa jloma ti inil'lia'n papo jla'yis.

⁴Ijioyet'ipi kiajwe japa Sinia' ji'wuk, sekyi'i itiujw'ne puwa woyejes siupuwa ti t'otataje k'iye pa Sinia'. Puwaka woyejes ti je 'yu'we ka intojw, ni'ne kapokaye 'neje wek siupapo jla'yis, siu'neje paka ne'yi paka i'nioye ka intojw, kajeyepa ti je 'esiji. Papokata jla'am papo pa'yijis ti 'esiji ti itiujw.

⁵¿Ka nakayet'i 'neje wek inka'neyasajnaye ka 'yena siunie iyo, ti ijwi'il napoka pa'yijis ti 'wanjliyi ka je inajapijyi'n siojona jloma ti i'nio 'wanjlijyi'n, ka kia'iwo ka titiajlataja jlamis?

⁶Jajwi'lase'm ti po' siunie ti ijiateje jla'am ti 'yaka'm ape'e janak Sinia' ji'wet.

⁷Ka insta wat ti je 'najanayi siunie iyoyiyi niwak Sinia' jlamtis ti iyo'ate, “Kap'ijliuskiye, naka awojonk'iye. Je awojonk'iye siunie ti jilianajyin'ni niwa wakiajas, ti jijwela ka sonitie.” Je istieta ka 'najanajyi, ka lajatak'ipa kawonayi siunapo laj jitisa'.

⁸Kajeyepa siojona jloma ti i'nio 'wanjlijyi'n yi' kiajwe ni jijweye iyo ni I'nio' Jlas.

⁹Jesús taj'le siojo yi'i, ti yamat'ipi, ti ijio kiajwe jlaja 'najla'wet.

¹⁰Sekyi'i siojo i'nio' ti jikio' t'isie'n yi'liaja'. 'Yina japo i'nio' ti je iliyi ti iyoyisijyin'ni paka k'iejliyeyi ka intajlatisie, it'imina'ne ti kiak iyonisi ti i'yasisi'n: —¿Ma 'est'iyiji ka tenajaja siujlie'e jloma ti i'nio 'wanjlijyi'n, ka tijwajieta pa i'nio' ka je 'esie?

¹¹Jesús isiujlie japo ti iyo'ate: —¿Tepa yi'i pa ti asa'am ti jiliajwa 'wolepo' japa po', japak 'wolepo' iniuk'isia'm japa wase', ti je yamta'a ka inton kisie'e?

¹²'Yina ni i'nio' ti laja 'yaka'm ape'e ni laja iyo jana 'wolepo'. Ijiate 'esiji siunie tiwonaja ti ti'manitie ni i'nio', janak jloma ti i'nio 'wanjlijyi'n.

¹³Iyone'ne 'ate jak i'nio': —'Akajni ni akio'. Ijiatjliyi iyoyi'ni jak i'nio' ti jikio' 'yakajni, sekyi'i 'es'ne, ijniujlie wita'm jawa jikioye ti isis ja i'nio'.

¹⁴Siojopo Fariséojos ti iniuyek'i kisie'e, inijlok'ijin'ni'ne ti iyoyisijyi'n siupa ka wonisi, ti iyo ka ilanis ja Jesús.

¹⁵Jesús, ti 'yijenayi pi iyone ti tinijlokiap'ni, yam'ne ti tajla'm jlajak isi'. Je pini' japo i'nio' yamk'i. Siojopo je isis ti tikiniejeje, wikie'eyi ti i'mieniti'n.

¹⁶'Yina iyone'ne 'ate japo i'nio': —¡Astaj ká ajotiejk'imna'a!

¹⁷'Naka'ne siunie ti yiyi ti jiwekie'eja siunie iyo niwa Sinia' jlamtis ti iyo'ate, ti Sinia' jijwejlanik jiwo Isaías iyoyi jlamtikie':

¹⁸“'Nak siu'nie 'yakawo ti yam ti aki'me, wuj ti emi'n jla'yi ti ts'aka'a. Siojona isimet ja yi'n ape'e, jawo jika'niyejayi wikie'eyi siunapo i'nio' yi' ape'e 'ni ajnat ti janjwe'el ni siunie ti ijiate ti 'es.

¹⁹Ja ke ineyiji'ni paka ne'yi paka i'nioye, ni'ne ka intane'ni siupa janwoyi, siuti yikiajli'ni ni isi'. Ja ke ti'wena ka woyi puwa ka jlamtisie', ka intane'ni siuniwa ijwi'il.

²⁰Ja ke i'najaneje'n siunie sisej ti pajk'i ti isiaja ka inkiajati, jla'yi ti ja ke ineki siojona kates ti ja'no'me ka 'najaneje'n ka 'nojmat'e. Jajnotk'i'ni ti ja ke inleyi siunie 'es, janeyi ts'ijiye jantate isia'm naka ni siunie je 'es.

²¹Wikie'eyi siunapo i'nio' yi' ape'e 'ni ajnat jinijijwiye jane'ne.”

²²Jesús titiunieje siojo i'nio' jitiej je 'es, ti talok jla'yi ti 'ne'lia. 'Yina Jesús ijwiejiet jaka sekyi'i 'esiji ti i'wijne'n jla'yi ti tamti.

²³Yisi'liet japo i'nio', sekyi'i ti kiak iyoyeyisi 'ate: —Je 'yu'we ka je 'nakaye 'ni Injwajieti ti Sinia' jijliujwanik, ni David jlas.

²⁴Siojopo Fariséojos ti ipi'yaye japo i'nio' ti kia'iyo, sekyi'i iyoyis'ne pet 'ate: —Beelzebú, siupa jika anechiyas pet napo imose'l, pak iyo jijweyeja' ti iniujwank'i kisie'e.

²⁵Jesús ti itiant'iejataja siupa jitienkiujnieye iyonisi, it'imina'ne ti kiak iyo: —Ka ine'yi japa ka ajnata ka inik'isa siunapo anechiyasas yiji, tepa jawo ka je inetiajne'n. Siojona isi' ni'ne ka napokaye siunapo ji'wet jlele po', siuti tejets'i wita'm, kia'iyojliyi jijwelt'e ka 'wanjliyeyi ki iyo ti je t'eki wita'm.

²⁶Ka nakaye ni sitiejiejwa imosik ka injwel ka ijnot kisie'e ni sitiejiejwa imosik, ijiate je istieyi ti ini'wenakit, jlam'ne je 'wena, netia'n ki iyo ti anechiyas.

²⁷Siuti jijwela ti pak ijwiye atajleje pa imose'l jika anechiyas siupa Beelzebú jakajliete, ¿ten siupa jijweye iwijna'm siunapo yamk'i siunie jiwoyeyi, kanojwank'i kisie'e niwa imose'l? Napok 'yakajanit siunie jiwoyeyi ti jikamats'iji'n, je ijiatk'i siunie jiwoyeyi.

²⁸Siuti janak akiene ti anojwatk'i kisie'e niwa imose'l jana Sinia' jikimet ti 'es, janak 'yakajanit pet siunie jika anechijiayas pa Inia' pajk'i ti yi' aska kiowe'e.

²⁹“'Yejne'n, ¿tepa janwone siunie i'nio' iyo ka 'noyi jana jikiecha 'wuk, ti je k'as'ni ka ijnale siuniwa jikijmatis? Atejnistieje ti janajnat ti janla'nit ni jikiecha, ka jiwekiejana'a ka i'yaka'n ka ijnale puwa jikijmatis pi jikiecha.

³⁰“I'nio' ni je 'yu ijyik'i, nak teje ijyilia'm. I'nio' ni je iniuyijk'i'm ti akk'i'ni napo i'nio' ti ajotk'i'ni wita'm, ijiate naka ni initiajnate'n ape'e 'ni ajnat napo i'nio'.

³¹“It'imina ti kiak awo ti ajwe'lase'm ti Sinia' janetiajnat jiwek k'iye wikie'eyi napoka naka siunie je 'es, jike' ti iyoyisi, siu'neje niwa jlamtis ti yi'ne ni Sinia' ti wuj ti je isis. Jlampet siunapo ti yi'ne ni ji'lij ti je 'es janaka Sinia' jikimet ti 'es, napok ja ke imp'elisijne'n.

³²Kia'iyojliyi siunapo ji'lij ja ke 'esieyi ni I'nio' Jlas, Sinia' jamp'elisijne'n jiwek, jlajma ijiatayi siunapo ji'lij jane'ne ti ja ke 'esie janak siojona Sinia' jikimet ti 'es, je pajna'a ka inkiwaliyi'i ni jitis iyo.

³³“Siojona a'la' ti 'es isis pet niwa jla', jlampet siojona ti je 'es je isis pet niwa jla'. Jla' niwak 'yakajanit jana a'la' ti je 'es, ni'ne ti 'es jana a'la'.

³⁴¡Injlajasts'ase'm! ¿Tepa jawo ka ajwela paka 'esie, ti je insisie pet? Kajeyepa siuniwa tipoyiji ni i'nio' jlosik, niwakaye'eje siuniwa tal jikiwitk'i ti takamtijnienata.

³⁵Je istie' pet siunie i'nio' ti 'es siuniwa jlamtis je niliaja pet, 'yaka siunie 'es yiji ni i'nio'. Jlampet siunie ti je 'es, ji'lij je 'es, 'yaka siunie je 'es yiji ni i'nio'.

³⁶Kajeyepa niwak ja ti'yenaja siuniwa jlamtis ti je isis ti iyoyi, ti ja titiajlataja ka inetiejenie'e janak jloma ka ti'yenatajna'a wikie'eyi napo i'nio'.

³⁷Kajeyepa siuniwa amtis niwak jant'emi'na jitieyi'i ni Sinia' ka ti'yejnata, ti jamp'elisi'n ni'ne ka insa'a'm.”

³⁸'Nak nojwaja'm siojopo Fariséojos, siu'neje japo jiwos pet ni Moisés jika'neyasajnaye, ti iyonisi 'ate ja Jesús: —Inka'neyasajnawo, awoktajank'iye pet ka 'wina ka lesane paka k'iejliyeyi ka'wenkints'e'm.

³⁹Jesús isiujlie ti iyo'ate: —¡Siu'nie jloma 'napo i'nio' ijiatayi'neje ti je 'esijiyi, siunie iniwonisi ti wuj ti je 'es, je pi iyoye 'ate ni iniwone napo ijia i'nio'! 'Yina ja ke 'wena janwoyi siunie iyoyisink'iye kan'wenis naka na iyot'iyipi ti ti'wenkinaja papo i'nio' siupa jloma yiji pa Sinia' jijwejlanik jiwo Jonás t'ipi.

⁴⁰Jawo'ate pa Jonás ti yiji japa askiuniet'io t'ipi ti jika jlomas 'najape, 'najape 'neje puwa ajnajas yamk'i. I'nio' Jlas kiak jawoyi, jlomas janajapeja ti jane ajnati, jika ajnajas janajapeja'aja pet.

⁴¹Ka inetiejenie'e siojona jloma ti ja ti'yena napo i'nio' ni jitis iyo, siunapo i'nio' t'ipi ji'wet japa Nínive janama'nina'a, ti jan'ye'en pi jitis 'napo i'nio' yiji pet siu'nie jloma awaki. Kajeyepa siupapo Nínive jlelet'ipi iyojonispe jlosikis ink'iejyisa' pakayi, ti ipi'yayet'iyispe pa Jonás ti iyo jlamtikie'. ¡'Yejne'n, siu'nie yi'ne jlajma ijiatayiji, kajeyepa ti 'yaka'm ape'e siupa iyot'iyipi pak jloma ti yiji pak i'nio' Sinia' jikawo Jonás!

⁴²Janaka siojona jloma ka inetiejenie'e ti ja ti'yena wikie'eyi napo i'nio' jitis iyoyi, siojona i'nioki anechiyaski tal 'niji iniwuki jana'am ti jan'ye'en ni jitis iyo 'napo i'nio' yiji siu'nie jloma. 'Wanjliyi, tojwataja ni siunie ajnat ni tajle, ti ijioyi pa anechiyas Salomón ti its'iuyi siupi iyo ti 'yije'en. ¡'Yejne'n, 'nakyi'i 'ni ti ijiateje ti 'yaka'm ape'e siupi iyot'iyipi pet pak anechiyas Salomón!

⁴³“Siunie imosik ti tajlataje ni i'nio', yama ti yikiajlin'ni ape'e ni ajnat siunie laj i'nioye' ti iyojon ji'weta'. 'Yina siuti je i'winata, kiak iyoyeyi 'ate,

⁴⁴“Jayapilinie'e siojo ataj'le”. 'Yina siuti yapilietaja, sekyi'i i'wi'in siupi i'nio' tajla'm ti 'nelanjie'e iyo'ate siojona 'wuk ti pajk'i ti tiliejlajan kiajwe, wakal ta'a, jla'yi ti lajk'ipa ka ine' kiajwe.

⁴⁵Ijiatjliyi, iniajnata kiu' ti iyojyin'ni siupapo jla'yis, siupapo ijwienjli sikio' itij'we times tom'niji, ti ijiateje ti je 'esijiyi ti je isis. Sekyi'i ti pajlatayisia'm pi i'nio'. Ijiatayiji siupi jiwet'ia 'yakamayi ape'e siupa ti 'nelanjie'e. Kiak jawoyiyi siunie ja jiwet'iaye 'napo siu'niwa jlomas.”

⁴⁶Jesús jet'i ilitieje'eje ti takamtijniene japo i'nio', ti nesat'i'nijpe japok ji'yijnis ti jla'yikiyis jlaja jlet María. Sek takasitk'ijin'ni kisie'e, ti iyotaja ka inkamtijnienisi.

⁴⁷'Yina poye siojo takajwejlane ja Jesús ti iyo'ate: —Et siojose yits'i kisie'e jla'yis siapo a'yijnis, iyotaja ka akamtijniene kiu'.

⁴⁸Isiujlie'ne siojo takajwejlantaja ti iyo'ate: —¿Tejnapa tete siu'neje papo 'yijnis?

⁴⁹Sekyi'i ti tipayeyi japo t'eyasajnas, ti iyo'ate: —'Yenajyi'n siu'napo napok jla'm ijiate ti its'ijnis, jla'yi ti napok awoyi teteja'.

⁵⁰Kajeyepa siunapo iyoyi siunie iyo ni Inia' ti yi' poliyi, nak 'yini, janak 'yijnia, janak tete.