Read Iyojwa'ja Chorote San Mateo 13 Bible Online

San Mateo 13 - Iyojwa'ja Chorote bible

San Mateo 13

¹Jlajak siujlieja jloma ti ji'yijnis ijioyi, Jesús tal kiu wat isiji ti tejeye 'niji yi'i jlaja tewuk iliyi, ti yijin'ni jikiuts'i.

²I'ye'en ti 'lojwa japo i'nio' ti inijwoseje, sekyi'i ti tisiomajiam'ne jlaja kasejkana, yiyeje'n, jlam'ne japo i'nio' yiyisk'iji'n jikiuts'i jlaja tewuk iliyi.

³Sekyi'i ti ijyijlitayi ti tamti'yi japo i'nio', je pini' siukiwa ijwi'il, ti yijnapeje wek siupuwa k'iejliyi, iyo'ne 'ate: —Pojompe pa i'nio' kawijnajnata, yam'ne ti takawijna'n.

⁴Ti ijyijlitayi ti itiete ape'e siupa jikawijnana 'wet, po' puwa ijniuj'li pet siupa ajnat 'nayi yelk'a ape'e. Tal 'niji puwa ajwejnas puwaka'ne ti itionk'i kisie'e ti itiujwk'i.

⁵Siu'neje puwa ijia ijniuj'li pet pa ajnat sisajas ji'wet. Ijiate tekil, 'yina sisajas yi'i, jak je iyoyiji ka jwatajayi ti kilie' yiye'e kajeyepa ti puwaka jla'am puwa sisajas ti ilia'an ti yamtak'i pijia'm.

⁶

⁷Po' 'neje puwa ijniuj'li pet pa ajnat k'itienis yi'i, ti wusiet'ik'ipe pijia'm puwa k'itienis. 'Yaka'm ape'e puwa iwomki, puwak ilian'ne pet.

⁸'Yina po' 'neje puwa itijwa'm pet siupa ajnat ti 'ejts'i. Iyo jlaye kajeyepa, iyot'iyipi japa inseliaki ti ijwienjli cien puwa tajla'm ti wakajlat'ipi, iyot'iyipi japa setenta puwa jla', iyot'iyipi japa treinta puwa jla'.

⁹“¡Siunie ti jik'iot tiojwa'l po', k'iuyi!”

¹⁰Siojopo t'eyasajnas jla'am ja Jesús ijioyeyisi ti i'yasis'ni, ti iyonisi 'ate: —¿Yot'iyi'ni ti kiak jiwone ti jlam jlejnapeje'ni jiwek ti jijwejla'm napo i'nio'?

¹¹'Yina isiujlie japo ti iyo'ate: —Ti asa'am, Sinia' i'winki'nase'm ka intant'iejayi siuniwa yiji pet ni jika anechijiayas. Jlampet siunapo 'wenayi, Sinia' je iwijna'm ka 'najane niwaka.

¹²Jak je iyoyiji siunie its'iuye siuniwa ajwe'el, Sinia' janwomeje k'iye pet siunie k'ie ni t'ajankijnieye iyo. Jlampet siunie ti je its'iuye, nak Sinia' jajnale'eje pet siunie ti jwamjla'a ti 'yijentaja pet.

¹³Naka'ne ti it'imina ti kiak awone ti ajwejlase'm, ti jlam ejnapeje wek niwaka, 'yina 'wanjliyi ka kia'iwo kan'yenis'ni, ja ke in'wenis, 'wanjliyi ka kia'iwo ka impe'yayis, 'yina ja ke ink'iuyisie, jla'yi ti ja ke 'najanisi.

¹⁴Je 'wena papo ka injwe'el, niwak ijwi'il siuniwa Sinia' jlamtis, ti Sinia' jijwejlanik jiwo Isaías ijwi'il ti iyo'ate: “'Wanjliyi ka ajwel ka ink'iuyisie, 'yina ja ke 'najanisi, 'wanjliyi kan'yenis'ni, ja ke in'wenis.

¹⁵Siunapo i'nio' t'o'n ni jlosik iyo, t'ojyits'i niwa jik'iote tiojwa'l, je 'alk'i ape'e niwa jitiete. Kajeyepa ti je iyo kank'iuyisie, jla'yi ti je iyo kan'wenis ka 'najanisi, 'nakayeyijna'a ti ja ke iwo jlosikis ink'iejyisa', ka napilisk'i ka ijwiejiete'n.”

¹⁶“Jlampet ti asa'am, siunie ti 'es ti imp'elisienajyi'n yi'ase, kajeyepa ti t'eki ape'e siupa ip'ionk'i ape'e niwa astate, ask'iote tiojwa'l 'alk'iji'n.

¹⁷Ijiatk'i siunie awo ti po' papo Sinia' jijwejlanawos t'ipi, siu'neje papo i'nio' isis t'ipi, ti ijialasista kan'wenis siuniwa ji'wena, 'yina je i'winis: ijialasista ka impe'ya ki iyo ni jipe'yaye, 'yina ka pakayet'iyijpe ka impe'yayis.

¹⁸“K'iuyeyi'ne siu'nie ijio'weyi ni siunie kawijnajnata ti jla'am a'yejnap jiwek.

¹⁹Napoka siunapo ti ipi'yayisieta niwak Sinia' jlamtis, ti ijwi'il ni Sinia' jika anechijiayas, 'yina ti je 'yijene siunie iyoyiyi, 'nes ni imosik sekyi'i ti ijialayi siunie ipi'yata. Napoka'ne siunapo ti a'yejnap, puwak inseliaki ijniuj'li pa ajnat 'nayi yelk'a ape'e.

²⁰Jlampet siupuwa inseliaki ijniuj'li pa ajnat ti sisajas ji'wet, napoka pet siunapo i'nio' ipi'ya niwa Sinia' jlamtis, 'yina 'yaka ti wuj ti ikanitisi, 'es ti isimits'i.

²¹'Yinit'iyi niwak ti a'yejnap ti jijwetisi'l je yamk'i isia'm, napokaye'eje ti je t'onk'i pijia'm. Jak je iyoyiji ti yi'i jana jloma ti a'tiek'i siunie tiwonaja ti titieye ilia'm, 'yina ti Sinia' jlamtis it'imina napokaye'eje ti jla'm iyo wek'iate ti iliyi ti iyoyi nak 'es.

²²Siuniwa inseliaki ti ijniuj'li ni ajnat ti k'itienis yi'i, napoka pet siunapo ti its'iuye niwa jlamtis, 'yina ti iyoyi jijliak'ali niwak wask'i'nelaja yi' ape'e 'ni ajnat, jlamayis jla'am ti inikajyinis, ti iyoyisink'iye kan'wenis jana wikiniet'aj. Niwaka'ne ti ip'io'n ape'e niwa Sinia' jlamtis, niwaka'ne ti it'imina ti je ya'am ka neyi ts'ijiye, ka poye puwa jla' niwa Sinia' jlamtis.

²³Jlampet niwak inseliaki ti ijniuj'li nak ajnat ti 'ejts'iyi, napoka pet siunapo ti its'iuye niwa Sinia' jlamtis, 'es ti iyoyi. Jak je iyoyiji yiyi ts'iji jla' poye, yi'i japa cien puwa jla' ti tajla'm, ni'ne ti setenta puwa tajla'm, ni'ne ti treinta puwa tajla'm.”

²⁴Jesús yamtiyi k'iye papo siu'nie ti jla'm i'yejnap jiwek. Iyo'ne 'ate: —Siunie Sinia' jika anechijiayas iyo'ate siunie ti takawijna'n, ti 'yut isia'm puwa jisiliaki ti isis yi'i pa jiwasok.

²⁵I'ye'en ti imiayet'ik'ijimpe papo ijia, yamat'ipi pet paka jitiejiejwa, ti 'yut isia'm puwa cizaña jlo', ti 'yutk'i siupa tena'a pa ipiatatiok t'ejes 'wanjle'e. Itimeje ti yamat'ipi ti tajla.

²⁶'Yina tekil'ne pa ipiatatiok t'ejes 'wanjle'e, yina'ak'i, sekyi'i ti 'yakaja pet puwak cizaña ti ijlink'i pa ipiatatiok t'ejes 'wanjle'e.

²⁷Yamat'i'nijpe papo jikawos ti ijwile pa jika anechiyasis. Yiyisi ti iyonasi 'ate, “Lajiek'iji puwa ka ajlejnate ti k'iejli jit'iut isia'm niwa aseliaki, ¿yot'iyi'ni jiat'eje? ¿Tepa taj'le siuniwa cizaña ti ijlink'i ni ipiatatiok t'ejes 'wanjle'e?”

²⁸Siupa anechiyas isiujlie papo jikawos ti iyo'ate, “Ejlowek, po' siupa iyo jitiejiejwayek'i'm, paka'ne ti itiujmat ape'e kiwa isiliaki.” Siupapo jikawos iyo'ne 'ate, ti i'yasisi'n, “¿Ma jiwotajank'iye kasiojok'i niwak cizaña?”

²⁹Isiujlie'ne papo jikawos ti iyo'ate, “Je'e, ejlowekie'e, 'lojwinie'e ka ajwanayija'm ni ipiatatiok t'ejes 'wanjle'e, ka etats'i pijia'm.

³⁰Ejlowek jayina'ate ka injlas'ni pijia'm. Paj ka wakajlana'a ni ipiatatiok t'ejes 'wanjle'e, sekjane'yi ka ijliuyenie'e napo 'yakawos ka inajnat niwa cizaña ka ijnot wita'm, kants'ejwanamk'i, sekjane'yi ka jwat t'otiejajamna'a. Jantemisiji ka inekieyisinie'e ni ipiatatiok t'ejes 'wanjle'e ti janlanits'i, ka injwosayisiamna'a jana 'yakapiski ti ja'yotat.”

³¹Jesús yamtiyi k'iye 'neje siunie ti i'yejnap jiwek, iyo'ne 'ate: —Siunie Sinia' jika anechijiayas 'yiniye 'neje jana mostaza jlo', ti 'yut isia'm ni i'nio' yi'i pa jiwasok.

³²Siojona jlo', janak ijiateje ti je 'esijiyi, 'yaka'm ape'e niwa ijia ti tijwela ka je wusie'. Jlam'ne pet ti itioyeta jla'm ijiatayi jla'am ti 'yakamk'i ape'e niwa ijia a'la' ti yiyetak'i pa jlaj yi'i, ti itio'o. Ajwejnas i'wi'in ti 'lap'ijia'm jla'yi ti wujk'i, iyoye jlopisieje, ti yi'nik'i niwa jik'asi'l.

³³'Naka 'ne'eje ti Jesús yamtiyi, ti i'yejnap jiwek, ti iyo'ate: —Siunie Sinia' jika anechijiayas nak 'yiniye 'neje ni woye ijliasat pijia'm, siojona i'nioki ti itieteje ni inwakiwa mak ti najape na kilo ti 'yotati', ti iyo ka injlasatk'i pijia'm puwa ilisane.

³⁴'Niwak Jesús yamtiyi k'iye japo i'nio', ti ijwilata niwa Sinia' jlamtis, je ijlien pet niwaka ti jla'm iyejnap jiwekie'e, ti kia'iyo ti tamtiyeta k'iye japo i'nio'.

³⁵'Yina kia'iyo, kajeyepa ti yiyi jakiak jloma siupi iyot'iyipi pak Sinia' jijwejlanik jiwo, ti iyo'ate: “Siuti jajwijla'm napo i'nio' niwaka siuniwa tijwekiaja'm ti 'nelanjie'e Sinia' 'yotatayi 'ni ajnat, ja'yejnap jiwek k'iye niwa wask'i'nelaja.”

³⁶Jesús isiejak'i kiojia'm japo i'nio' ti iyoyeyi ka nek, sekyi'i ti yapilieyis 'wuk kiajwe. Jakayi'ne ti t'eyasajnas i'yas'ni, ti iyonisi 'ate: —Kajanitk'iyi sik'ioye siunie iyo ni jijwelts'e'm, ti ji'yejnap jiwek jana cizaña ti yi' inwasoki'.

³⁷Jesús isiujlie'ne japo ti iyo'ate: —Paka siupa i'nio' ti 'yut isia'm japa inseliaki ti 'es, naka I'nio' Jlas,

³⁸siunie inwasok naka pet 'ni ajnat. Jlampet siupuwa inseliaki ti isis, napoka pet siunapo yiji pet ni jika anechijiayas pa Sinia'. Jlampet siuniwa cizaña napoka pet siunapo jilis ni imosik.

³⁹Jlampet siupi i'nio' ti 'yut isia'm puwa cizaña, naka imosik. Jlampet siunie ti tiliena'a pi inwomik, naka pet siunie ti ajnat jano'we. Siunapo ilie'ne pak inwomik, napoka pet Sinia' jijliujwajnas poli jlele.

⁴⁰Siupuwa cizaña ti siupapo jiwos ijiut wita'm ti jwat 'yutia'm, janakaye pet siunie jawoyi ti ajnat jano'we.

⁴¹Siunie I'nio' Jlas janjlo' napo jijliujwajnas poli jlele, ti janekk'i'ni siunapo i'nio' ijlijni'ni siunapo yiji pet ni Sinia' jika anechijiayas, siunapo isima ni je 'es, siu'neje napo it'imina'ni napo ijia ti iyoyi naka je 'es.

⁴²Sek jane'yi ti jantateje jana inka'we ti tak'ayi'ni, jawujwa ni jlajlas jawo, kajeyepa ti ja a'tieja.

⁴³Ts'ijiye jlampa inekiena'a 'nijiye naka, siunapo i'nio' jawoyi siunie I'nio' Jlas iyo kawoyi, napoka napo jawo'ate ni kilie' jla'al, ti janses ts'ijiye yi'i ti iyo anechiyasa'. “¡Siunie ka jik'iot tiojwa'l po', k'iuyi!”

⁴⁴“Siunie Sinia' jika anechijiayas nak iyo 'neje 'ate siojona wikiniet'aj ti tijwekiet'ijyimpe ti yiji pa inwasok ajnat kiajwe. 'Yina po' ni i'nio' ti ijyiwit'e, siunie i'nio' wuj ti inkaj'ni ti i'wi'in, ti iyoyeyi ka nek yikiajla'aja siupi yi'i. Yama ti yapili puwa jikijmatis ti janwen'ni, sekyi'i ti yamayi siupa ajnat yi'i japaka.

⁴⁵“Sinia' jika anechijiayas 'nak 'yiniye 'neje siu'nie. Siunie i'nio' yame'ni niwa pérlajas.[5]

⁴⁶Ti i'wi'in ti laja po', sekyi'i ti yapilieyi puwa jikijmatis ti iwin'ni, ti iyo ka ineki japak 'niyiki ti 'es.

⁴⁷“Sinia' jika anechijiayas kiak iyoyi 'neje jana 'najak jit'io ti titietajataja'm ni i'niat, 'yina ti titionajata kisie'e, inijle'en niwa si'yus niwa yiji.

⁴⁸I'winis ti po' puwa yiji, siupapo jiwos ijyijlitayisi ti itionis kisie'e. Yiyeyisk'iji'n ti i'yenisi'ni, yinayisi puwa jijwa'al ti isimisie, jlampet siupuwa ti je itiliajasi, puwak iyonayisi pi iyone, kajeyepa ti je isimisie.

⁴⁹'Yina kiak jawoyi ka inojtak'i 'ni ajnat, janekie'nina'a napo injlojwajnas poli jlele, ti jan'wenakit siunapo je isis ti ijlijni'ni siunapo isis.

⁵⁰Sekjane'yi ka intatayijinie'e janak inka'we ti tak'ayi'ni, jawujwa ni jlajlas jawo, kajeyepa ti ja a'tieja.”

⁵¹Jesús i'yasaja'm japo t'eyasajnas ti iyo'ate: —¿Mi jitijwa'yi ti 'najanayi kiwaka? Iyo'ne 'ate japo t'eyasajnas ti isiujlie: —Ji'yu.

⁵²Jak je iyoyiji'ni ti Jesús kiak iyone: —Ka ne'yi pa siunapo jiwos pet ni Moisés jika'neyasajnaye, ti ini'neyasane ni Sinia' jika anechijiayas, iyoye'ate siunie jika'niona jana 'wuk, ti janak tajlajam'ni siuniwa 'yotat. Po' niwa ink'iejyis, ijia niwa ji'yusis niwa wask'i'nelaja.

⁵³Ti Jesús iliyeyi ti yamtiyi k'iye japo i'nio' siukiwa ti jla'm i'yejnap jiwek, sekyi'i yam'ne,

⁵⁴ijioyi siujlieja ajnat ji'wet jla'am. Ijioyits'i jawa t'ajla'wetis jla'am japo i'nio', yijits'i jawa isi'il jilis, ti taka'neyasane ni Sinia' jika anechijiayas. Ka wojlijinipi japo i'nio' ti ipi'yajanisiepe, sekyi'i ti kiak iyoyeyisi: —¿Tepit'i iyo 'ni i'nio'? ¿Tepit'i iniwone siuti 'yijene, jla'yi ki iyo ti i'winki'n siuniwa ti ikaniti'n napo i'nio' ti i'winatajas?

⁵⁵¿Mi je 'nak 'ni in'wetis jiwo jlas? ¿Je 'naka siujlieja María jlas? ¿Mi je 'naka 'na japo Santiago siu'neje ja José, siu'neje ja Simón, siu'neje ja Judas jikiliayis?

⁵⁶Siojopo ji'yijniawot 'nak ji'wet yi'i, siu'nie awak'i. ¿Tepit'i tajle'e siuniwa yiyi?

⁵⁷Naka ni jijweye iyoyi, 'yina ijwisi'n japo i'nio', sekyi'i ti kiak iyoyeyi ja Jesús: —Lajk'i japa ajnat ka je ijnoniti jla'am ni i'nio' injwejlanik jiwo, ijwienjliye jla'am siojopa ajnat ti ijiate ti ji'wete ti je tiwokink'iye.

⁵⁸Siuti sek yi'i, yi'i jawak isi'il, Jesús je wuj ka 'wenkina siukiwa wask'i'nelaja japo i'nio' siuki iyo'ni ti yisilietk'i'ni, lapakawo ti 'yakakiuyis.