Read Iyojwa'ja Chorote San Mateo 15 Bible Online

San Mateo 15 - Iyojwa'ja Chorote bible

San Mateo 15

¹Nak nojwaja'm japo Fariséojos, siu'neje japo jiwos pet pa Moisés jika'neyasajnaye, ijioyisi ja Jesús, ti tal Jerusalenne iyonayisi 'ate:

²—¿Yot'iyi'ni siunapo 'eyasajnas ti je ilisanisiji siunie jike' pet kiapo saka kijilas mases? Siuti ti'yekiunieje'n jikioye je ilij.

³Ti Jesús isiujlieyi, sekyi'i iyo'ne 'ate: —Siupet ti asa'am, ¿yot'iyi'ni ti jiliakiye niwa Sinia' jlamtis, kajeyepa ti nakata jla'am ti jikinieyi, siunie aske' jiwonayi?

⁴Siuti Sinia' iyo'ate, “Emi'n ni ana' siu'neje jana et”, 'yina iyo'neje 'ate, “Siunie i'nio' ti iyo kieye ni jinia', ni'ne ti jlet japa, ti iyo wet'iaye, nak je 'wanjle'e ja tiliana pet.”

⁵'Yina 'wena jiwonayi'iji pet ti asa'am. Jiwonayi'iji 'ate siunie jwemik ka kia'iwone napo jiniewot, “Je awe'na'm paka k'iejliyeyi ka 'nesi pet, kajeyepa siu'niwa isijmatis ekiajle jla'am pa Sinia'.”

⁶Nak it'iminayi ti je ijliene ni i'nio' siunie jota wo ka noyeje napo jiniewot, siuniwa askeyis ti jit'iyasanayi niwak iniuk'iye niwa Sinia' jlamtis.

⁷¡Ijnoski'lanajyin wata'a! Jlamt'i je iyopi pa Sinia' jijwejlanik jiwo Isaías, siuniwa jlamtis ti injwela ti iyo'ate:

⁸“Siunapo i'nio' jlamtis 'nejie'e wek ti ijwil ka siwunitis, jlam'ne niwa jlosikis je jnanjliyi'n ijiap.

⁹Tepa jawo ka injwelis ka 'esie ka siwunitis, kajeyepa ti taka'neyasane siuniwa iyo ni i'nio' ti ijwil ka ijiatayi jla'am ka 'esie.”

¹⁰Sekyi'i tanayi japo i'nio', ti iyone 'ate: —K'iuyeyi siu'nie, tejnisiets'i:

¹¹Je nak ka inkajyi'n ni i'nio' jitieyi'i pa Sinia' siunie tal kisie'e, jla'm ijiate jla'am ni tal jikiwetk'i ti ikajyi'n ni i'nio' jitieyi'i pa Sinia'.

¹²Siojopo t'eyasajnas ijioyisi, ti i'yasisi'n ti iyonisi 'ate: —¿'Najane pi jiwone ti iliatisiji napo Fariséojos, ti impe'ya siunie jiwo ti jlamti?

¹³Jesús isiujlie japo t'eyasajnas ti iyo'ate: —Siojopa inwomki ti je jla'am ni Inia' ka inekiaj'l isia'm, janak jijwetis ja tiniayeje'e ti ja tisiok pijia'm.

¹⁴Ká ak'iuyeyi: napok talojo ti ijwil ka inton'ni pet napo ijia ti kia'iyo talojo pet. Siunie talok ti itio'on ni jikiecha ti talok 'neje, yiyi jana wase', jiliaye iniuyeyi wita'm ti iniuk isia'm.

¹⁵Sekyi'i ja Pedro iyo'ne 'ate: —Ke kiam astajanitk'i kiu' sik'ioye siojo jiwoyi ti jlamti.

¹⁶Jesús iyo'ne 'ate: —¡Kiak p'an jiwoyeyi 'niji pet ti je 'najanayi!

¹⁷¿Nak je 'najanayi siunie ti titiuwa ti ijiojwa'm jana ints'e', ts'iji ti ijliamayi ni i'nio'?

¹⁸Siunie tal jikiwitk'i ni i'nio', nak tajlaja'ajme ni jlosik, naka'ne ti 'yakajyi'n jitieyi'i ni Sinia'.

¹⁹Kajeyepa siunie tajlame siunie i'nio' jlosik, naka ni jitienkiujnieye ti je 'es, jikalankijieye, siunie ti 'yuyeta'ni, siunie ti 'yakamajataja ape'e ti ijiuski'la'n, jikajlajnaye, jika sintijieyis siu'neje ni ji'yikisajnaye.

²⁰Niwaka ti jla'm ijiate ti 'yakajyi'n ni jlosik ni i'nio' jitieyi'i pa Sinia', jlampet naka ti inkioye je tilijik ti ti'yekiunieta, je'e. Lajk'ipa jiwet'iaye ni i'nio'.

²¹Jesús tal seka'a, ijioye 'niji siujlieja ajnat jle' iyo'ate Tiro, siu'neje jlaja Sidón.

²²Po'ne siujlieja i'nioki ti yiyeyi jlajak ajnat Canaán jleliki ti iyo 'weta'. Ijioyi ja Jesús ti iyo'ate ti 'yakets'ijiap: —¡'Yaka'niona, David jlas, sip'elisin wata'a! ¡Yase' jlaja jitiej je 'es! ¡Wuj ti je 'es!

²³'Yina Jesús je isiujlie. Sekyi'i japo t'eyasajnas ijioyi'ni, ti iyonisi 'ate: —Jlo' siojona i'nioki. Je pa k'iejeye'e ti i'yasta'ni sek'i.

²⁴Sekyi'i Jesús iyo'ne 'ate ti isiujlie japo t'eyasajnas: —Niwakata jla'am siuniwa sontas ji'wole po', siunapo Israel jlele, ti Sinia' sijliuyi.

²⁵Je takajla jlajak i'nioki, t'akosjlete'l itiyeyijin kiajwe ja Jesús ti iyo'ate: —¡'Yaka'niona, noyijk'i'm!

²⁶Jesús isiujlie ti iyo'ate: —Je 'esiji ka talaja napo kia'lis siuti inles ni jlak, ka tiwenaja'm niwa alenas.

²⁷Siujlieja i'nioki isiujlie ti iyo'ate: —Ijiate 'ni 'Yaka'niona, kia'iyoyetaja 'yina je iyojliyi wek ti itiujwk'i'ni siuniwa jikas jijwa'al ni jika'niona, ti iniuk'ijin'ni ti taj'l ape'e jana jlak yinisi'n ape'e.

²⁸Jesús ti ipi'ya jlajak i'nioki, sekyi'i iyo'ne 'ate: —¡I'nioki, ijiate ti atankiujnieye poyi! 'Esiji ka ne'ya siunie jiwojonk'iye ka 'we'en. Ta'a 'ne ti 'es jlaja jlase' jakayi ti kia'iyo.

²⁹Sek tajla'aja ti ya'am ja Jesús, jikiusk'i jlaja tewuk iliyi yiji jlaja Galilea, sek iniuye'e. Sekyi'i ti ijioye ape'e jlaja tikijnaki, sekyi'i yiye'eje'n.

³⁰Je pini' japo i'nio' ijioyi ti yamisiji'ni japo i'nio' je isis, siojopo je t'ojni'n siu'neje japo talojo'. Japo jikio' ijwienjlik'i, jisiet p'o'oko, siu'neje japo 'ne'lias japo ijioyi. Je pini' japo je isis, ti totie kiajwe ja Jesús, 'yina ijiate ijwiejieten'ne japoka.

³¹Kanwojlit'iyipi japo i'nio' ti i'wina japo 'ne'lias ti 'esiji ti tamti, siojopo jisiet p'o'oko siu'neje japo jikio' ijwienjlik'i kia'iyojliyi ti isis, siojopo je t'ojni'n 'esieyiji ti t'ask'i isia'm, siojopo talojo kia'iyojliyi jitiej jlal po'. Jak je iyoyiji'ni ti iyunitis jak Israel Jinia' jakayi.

³²Jesús tani'ni japo t'eyasajnas, sekyi'i iyone'ne 'ate: —Ap'elisijni'n napo i'nio', 'yina ti jlomas najapeja ti yiyis'ni ijiap 'nakayi, ti itijwayits'i ki jlak. Je awojonk'iye ka ijliu'ni ti kia'iyo ti inil'liajne'n 'lojwinie'e ka je injlanis ji'wete ka nekta'ni.

³³T'eyasajnas iyonisi'ne 'ate: —¿Tepat'e ka itiajlaja'a paka iwinaja'm, ti jwajla'a je ijniujli ti 'loj napo i'nio', jla'yi ti je jnanjliyi ni isi'?

³⁴Jesús i'yasam'ne japo t'eyasajnas ti iyo'ate: —¿Tepa nojwaja'm puwa woyejes jilis yi'ase? Kiak iyoyeyisi 'ate ti ijwilisia'm: —Ijwienjli sikio' itij'we times tom'niji, 'nak nojwaja'm 'neje niwa si'yus jilis.

³⁵Sekyi'i ti takajlunieyi ka inek'iji'n japo i'nio'.

³⁶Isimayi jawak woyejes siu'neje jawa si'yus jilis. Yina jikiojyi ti jinikanitieyi iwinayi pa Jinia'. Itime ti its'isajamk'i, sekyi'i ti yikiajlayi japo t'eyasajnas ti iwink'i japo i'nio'.

³⁷Yijapk'i wikie'eyi japo i'nio', paj ti yip'isieje'n. Siojopo t'eyasajnas, yamisk'i'ni'ne jawa jikas jijwa'al japo i'nio' ti itimayisi, paj ti ijwienjli sikio' itij'we times tom'niji jawa tenajats'i jijwa'al ti 'wanjle'e tipoyijk'i siojowa ijiosisia'm.

³⁸Cuatro mil japoka i'nio' ti'yekiujni'n, ti ayijnies 'najli ti tetitina. Je tijwanaja japo asejnia siu'neje japo kia'lis.

³⁹Jlampa itimayi ja Jesús jakayi, sekyi'i ti inijwelayi japo i'nio', isiejak'i jikiojia'm. Yam'ne ti yi' kasejkanaja, ti teje 'niji yi'i siujlieja ajnat jle' iyo'ate Magadán.