Read Iyojwa'ja Chorote San Mateo 16 Bible Online

San Mateo 16 - Iyojwa'ja Chorote bible

San Mateo 16

¹Siojopo Fariséojos siu'neje japo Saducéojos ijioyeyisi ja Jesús ti iyo ka ijnejlitis. Iyonayisi 'ate: —Awoktajank'iye ka 'wenkints'e'm paka k'iejliyeyi, 'nakayi ti ja'wina ti ja ijiatayi ka pak atajleje pa Sinia' pi ajweye.

²Jesús isiujlie ti iyo'ate: —Ti no'ot jiwoye'ate ti ji'wena' na poli ti isiatajajam'n, jiwoyeye'eje 'ate, “Jloma ja 'esie.”

³Jlampet ti k'iejlimot ti ji'wena' na poli ti isiatajajam'n, jiwoyeye'eje 'ate, “Jloma ja ke 'esie.” Jlam'ne 'najanayi ti ji'wena' ni poli, ti k'iejliyi'ijyi ni ja'wena' je int'ayeyiji'n, ¿yot'iyi'ni ti je 'najanayi paka wonayi siu'niwa 'yakaj 'nakayi?

⁴¡Siu'napo i'nio' siu'niwa jlomas ijiatayi'ne ti je isis, jla'yi ti kakiujnietas! Ti iyojonk'iye kan'wenis paka k'iejliyeyi ka ti'wenkinaja, ja ke 'wenayeyi siunie ja ti'wenakinaja naka ni siunie iyot'iyipi pa Jonás. Itime ti kia'iyo, ti yama ti tajla japo.

⁵Jlampa yama'ni ti jantomis i'niat ji'wechaja, japo t'eyasajnas ja Jesús jiwekie'aja ti jitiej wujwisie ti iyotaja ka intonis puwa woyejes.

⁶Jesús kiak iyone'ni japo t'eyasajnas ti ijwijla'm: —'Yejne'n, joskiyeyi ni jika woye ijliasat pijia'm napo Fariséojos siu'neje napo Saducéojos.

⁷Iyo'ne 'ate japo t'eyasajnas ti ipi'yayeyis: —Lajk'i puwa woyejes ka tiuniejen'ni, nakt'e it'imina ti kia'iyo.

⁸'Yina ti Jesús 'yijene pi iyone siunie jitienkiujnieye iyonisi, sekyi'i iyo'ne 'ate: —¿Yot'iyi'ni ti jiwo asjlak'aliye ti lajk'i puwa woyejes ka atonie'? ¡Jet'i ijiat ka atankiunie!

⁹¿Mamt'i wat ka 'najanayi? Astaj p'an je wujwak'i, ti awenk'i japo i'nio' cinco mil siukiwa ijwienjli sikio' itij'we woyejes. ¿Tepa nojwaja'm kiwa tenajats'i jijwa'al ti 'wanjle'e tipoyijk'i kiwa jijwa'al ti jikinieyik'i'ni?

¹⁰Siukia jloma ti akojniene japo i'nio' cuatro mil, jlam'ne ijwienjli sikio' itij'we times tom'niji wek kiwa woyejes. ¿Tepa nojwaja'm 'neje kiwa tipoyijk'i jakayik'i siukiwa jijwa'al jikiniek'i'ni?

¹¹¿Yot'iyi'ni ti je 'najanayi ti je niwak woyejes ti ajwe'el? Ti awo'ate, ¡Joskiyeyi siunapo Fariséojos siu'neje napo Saducéojos ni jika woye ijliasat pijia'm!

¹²Sekyi'i ti jiwekie'aja ti itinisisk'i ti je nak woye ijliasat pijia'm ti tiwomaja'ni na inwakiwa mak ka injwel'ni ka Jesús ijnoskijiete, 'wenajliyi jla'am siupa ijwi'il siupa t'eyasajnaye iyo napo Fariséojos, siu'neje napo Saducéojos.

¹³Ti Jesús yiyeyisi siujlieja ajnat jle' iyo'ate Cesarea de Filipo, Jesús i'yasen'ne japo t'eyasajnas ti iyo'ate: —Ya'am ti I'nio' Jlask'i'm, ¿tepat'e iyo napo i'nio' ti sijwelis ka yama?

¹⁴Iyoyis'ne 'ate ti isiujlisie: —Po' napo ijwi'il ka Juan inajiejnawoye'a'm, ijia napo ijwil ka Elíasa'a'm, ijia napo ijwil ka Jeremíasa'a'm, po'neje napo ijwil ka injwejlanik jiwo'wa'm siupapo pajt'ik'ipe.

¹⁵'Yina Jesús iyo'ne 'ate: —¿Tepi jiwoyeyi pet ti asa'am siupa jijwela' ka yama?

¹⁶Simón Pedro isiujlie'ne ti iyo'ate: —A'am siunie Sinia' jijliujwanik ti Injwajieti, Sinia' ti je netia'n ka paja Jlajts'a'm.

¹⁷Jesús sekyi'i ti kiak iyoyeyi: —¡Sinia' jikap'ijliuskiye ti 'es siunie yi'a, a'am Simón, Jonás jlas! Kajeyepa ti lajk'ipa ka jikiechaye i'nioye ka in'wenki'na'm naka, ijwienjli jla'am ni Inia' ti yi' poliyi ti i'winki'na'm.

¹⁸Awo'naja 'ate ti a'am ti Pedro'a'm. A'm siojona sisaj ti jayi'na ape'e napo ika kia'lis Inia' jilis. Siunie jijweye iyo pit ni inlaye ja ke inkajli.

¹⁹Jayikiaj'la siuniwa 'wuk kiwet p'ot jikie'el ni jika anechijiayas ni Inia'. Ja k'iejliyeyi pa jawone ti jawone 'ate napo ika kia'lis, “Wuj ti je 'es ka woyi”, Inia' kiak jawo'ojyi jlajma ijiatayi ti ja ke iwo. Ja k'iejliyeyi pa jawone ti jawone 'ate napo ika kia'lis, “Nak ijiate jla'am ka woyeyi”, 'yina Inia' kiak jawo'ijyi pet jawoyi, ti jankiujlie.

²⁰Sekyi'i Jesús kiak iyonayiji japo t'eyasajnas: —Ke sijwelanie'e siuti 'yaka itipe'e, ti ya'am ti Injwajietik'i'm ti Inia' jijliujwanik.

²¹Sektaj'le ti Jesús inijwelaja'm japo t'eyasajnas ti iyo'ate: —'Yejne'n, je 'esiji ka je ijio Jerusalenne kajeyepa ti sek ja senaja'a siunie ja tiwonak'i ti ja wujwa ti janilayiti, ni janwonk'i napo kijilas, siu'neje napo pa'yijis jika anechiyasas, siu'neje napo jiwos pet ni Moisés jika'neyasajnaye. Napok ja silia'an, 'yina jlomas janajapeja janiu kisie'e ti jatiajla'm ni a'no'.

²²Ti Pedro ipi'yaye ja Jesús ti kia'iyo, sekyi'i ti itiajlanaja'm kiu' japo sek yinayi'i ti kiak iyone: —¡Ya'am ajwel'ni jeyi, 'ni 'Yaka'niona! ¡Sinia' je itiliaja naka kiak iyoyi! ¡'Wanjliyi ja lajak'ipa ka awet'iaye!

²³Sekyi'i Jesús tejeye ilia'm, ti iyone 'ate: —¡Talk'i'm sitiejiejwa imosik, ká atomi'ni ijyik'i! A'm, ti atankiujnieye je wone 'ate siunie Inia' jitienkiujnieye iyo, najata jla'am ni jitienkiujnieye ni i'nio'.

²⁴Sekyi'i Jesús kiak iyonayi japo t'eyasajnas: —I'nio' ni jawo ka iwo 'yiyasanikie', 'esiji kanleyi siunie iyo ti jla'am siunie iyo'neje ni jikijmaye, jantejlia jana jika cruz, sekjane'yi ka inamana'a ijyik'i.

²⁵Kajeyepa siunie i'nio' je iyo ka jiwet'ia poye, nak janetia'n. Jlampet siunie ja ijiatayi ja ke inleyi ti janajmin'ni ijyik'i, nak jan'we'n pet jana ji'wasankiye.

²⁶¿Jot'e ka 'esieyi ni i'nio' siuti jankajli siuniwa wask'i'nelaja yi' ape'e 'ni ajnat, 'yina ti ja netia'n ni i'nio'? ¿Tent'itie japa kanitejwe'e na i'nio' ka tekiajlaja jana ji'wasankiye?

²⁷Kajeyepa ti ja'nes ni I'nio' Jlas ti janejyi ni jijweye iyo ni Jinia', siu'neje napo jijliujwajnas poli jlele janamik'i, kantesiet'ik'ina'a wikie'eyi napo i'nio', siunapo jikijmaye 'es siu'neje napo jikijmaye je 'es.

²⁸Ijiatk'i siu'nie jayo ti jajwi'lase'm, ti asa'am ti nak jleye'yi 'nakayi, japoye siunapo 'wasajne'n, ka je 'naltajana'a jan'we'en na I'nio' Jlas ti jana'am kanwo anechiyasa'.