Read Iyojwa'ja Chorote San Mateo 17 Bible Online

San Mateo 17 - Iyojwa'ja Chorote bible

San Mateo 17

¹Ijwienjli sikio' itij'we ijwienjli tom'niji kiwa jlomas tomk'i, Jesús ijio'wape'e siujlieja tikijnaki toj pijia'm. Japokata jla'am japo Pedro, siu'neje japo Santiago jla'yi ja ji'yini Juan, ti ya'asi.

²Sekt'i yi'ipe ti iyoyeyi siupi iyo ti iyo jloniye jikiechaye jitieyi'i japo jla'yis, siupi jitiokio' iyo'ate jla'a kates.

³Pakayi ti kawojliyi japo t'eyasajnas, ti i'winayisi papo Moisés jla'yi pa Elías t'ipi ti takamtijnienisi ja Jesús.

⁴Sekyi'i ja Pedro iyone'ne 'ate ja Jesús: —'Yaka'niona, 'esp'an ka 'nak iwiek'i. Ka woyi, jalisanejna'a puwa 'wukil jilisa janajapeja. Janjwanjli japa jajna'ya'm, janjwanjli 'neje japa jajna'yi 'ni Moisés, siojopa kiecha jajna'yi pet 'ni Elías.

⁵Jet'i ilitiejepe ti tamti'ni ja Pedro, jlam nesi'liet'iyijpe siojopa poli ti wuj ti 'es, japak ip'ionayi siupi yiyits'i. Sek toma'a pak ina'lap ti iyo'ate: —'Nak yas ti wuj ti emi'n, wuj ti ts'ajka'a. K'iuyeyi.

⁶Siojopo t'eyasajnas ipi'yayis jiwek pak ina'lap, sek t'opiyet'its'ijimpe wek ti jnots'ijnits'i.

⁷Jesús yamat'iyipi ti isiets'ik'i, ti kiak t'ipa iyonayipi 'ate: —Neyets'i pijia'm, jweyitiejyi'n.

⁸Ti i'yenat'ik'ipe pijia'm, jakataja jla'am ja Jesús ti i'winis. Je i'winayi papo ka ijiaja.

⁹Jesús kiak t'ipa iyonayipi ti yapiliet'iyispe ajnat'e, ti ijliuye: —Siukia iyo ki ji'wena ká ajwelajiamna'a paka ne'yi pa, ijiatjliyijna'a ka inotie kisie'e ni I'nio' Jlas ti jantajli ni a'no'.

¹⁰Sekyi'i i'yasisin'ne ti iyonisi 'ate: —¿Yot'iyi'ni siunapo jiwos ni Moisés jika'neyasajnaye ti ijwilis pa Elías pak jana'an ti ja'nes?

¹¹Iyo'ne 'ate ja Jesús ti isiujlieyi: —Ijiate ti Elías ti jla'am ti 'nes, jla'yi ti ja jlama ti jalesank'i wikie'eyi niwa wask'i'nelaja.

¹²Ya'am awo'ate, Elías pajk'i ti 'nesata, 'yina i'nio' je itiant'iejesi, 'wenajliyi jla'am ni iyonisi ti itiliajasi ka iwonisi. 'Yina kiak janwonisi'ijyi ni I'nio' Jlas ka inetie jikiojyi.

¹³Sekyi'i ti jiwekie'aja t'ipi japo t'eyasajnas ti itijnisisie ti je pak Elías ka injwel'ni, jlam'ne kiak Juan inajiejnawo ijwil'ni.

¹⁴Ti yiyeyisi japo i'nio', tajla 'niji ja i'nio' ijioyi takosjlete'l itiyeyijin kiajwe, ti iyo'ate:

¹⁵—¡'Yaka'niona, p'elisi'n wat 'ni yas! Wuj ti je 'es ni jiliaye iyo. Siuti yiyetaja ni iyoyi, ni'ne ti iniuye'eje wata'm, ni'ne nakaye'eje ni i'niat ti iniujwa'm.

¹⁶Atontieje'ejyi napo 'eyasajnas, 'yina je 'yijene paka iwonesi ka injwajiet.

¹⁷Jesús ipi'ya wek ti kia'iyo, sekyi'i ti kia'iyoyeyi: —¡I'nio' jiniliaja, ti laj jitienkiujnieyeja'! ¿Tepat'e ja nojwaja'm puwa jlomas ti jayi'asap? ¿Tepat'e ja nojwaja'm puwa jlomas ti janilayit'iase? ¡Namayi'ne pa jwemik!

¹⁸Sekyi'i Jesús ijliu'ne kisie'e siupi iliaki, ti iyone'ate: —¡No kisie'e! 'Yina jakayik'i'ne ti 'esie jak jwemik.

¹⁹Siojopo i'nio' ti tajlayi ja Jesús, jakayi'ne japo t'eyasajnas ti kiak iyonayisi ti i'yasis'ni: —¿Yot'iyi'ni pet ti je akajlaje ka kiak iyonaja ka iyokiosa ta'a kisie'e?

²⁰Jesús iyo'ne 'ate ti isiujlie: —'Nakayi pet ti je ijiate ka astankiujnieye poye. Ijiatk'i siunie jayo'nase ti 'wanjliyi ka kia'iwo ka jwamjla'aja ni atankiujnieye ka poye, ka wo'ate siojona mostaza jlo' jlase', 'wanjlit'itieje ka janakaye tikijnaki ka awone 'ate, “¡Taj'le ni jle'yi, 'ye'n paka jlasi!”, ijiate jank'iu'wa'm. Jalajk'i paka k'iejliyeyi ka into'm aselia'm.[7]

²²Ti je t'eki wita'm japo t'eyasajnas yi'i jlaja Galilea, Jesús iyone'ne 'ate japoka: —Siunie I'nio' Jlas ja tekiajla kiojia'm napo i'nio',

²³ti janlanis. 'Yina jlomas janajapeja ka inoyena'a kisie'e ti janapi pijia'm. Jaka'ne ti je 'yakanitk'i wita'm ti ipi'yayeyis.

²⁴Ti Jesús yiyeyi isia'm jlaja Capernaum, ti jla'yis japo t'eyasajnas, siojopo i'nio' isi'm ilia'm niwa inkat'ijnieyejes ti ijioyi'ni japa 'najla'wet, ijioyi ja Pedro ti i'yase'n, ti iyone 'ate: —¿Ma takat'i'n ape'e niwa inkat'ijnieyejes ni aka'niona siojona ijioyi'ni jana 'najla'wet?

²⁵Pedro iyo'ne 'ate: —Ji'yu, pajk'i. Ti 'yuyeyis 'wuk kiajwe, Jesús inianayi jla'am ti iyo'ate: —¿Tepi jiwone pet pa atankiujnieye, Simón? Siunapo anechiyasas wus yi' ape'e 'ni ajnat, ¿tempa siupapo jant'ajla, napoka napo jika kia'lis, ni'ne ka napokaye siunapo 'wenayi jana ajnat tajle?

²⁶Pedro isiujlie ti iyo'ate: —Siunapo ajnat 'wenayi jana tajla'm. 'Yina Jesús yine'ne ape'e ti iyo'ate: —Kiak iyoyetajayi, siunapo jikawos ¿yot'iyi'ni kant'ajla?

²⁷'Yina je 'esiji ka ijwisina napok isi'm ilia'm niwa inkat'ijnieyejes, maj, jloni jase i'niat ka atataja'm ni akajnat. Siupi ja anajnat ti ja atate pijia'm, ka akiesana'a jikiwitk'i. Ja'we'en jana wikiniet'aj ti jatajle jikiwitk'i, janakayena'a ti jakat'i'n sitipe'e jajnojli. Mayijinie'e ka kat'i'n.