Read Iyojwa'ja Chorote San Mateo 19 Bible Online

San Mateo 19 - Iyojwa'ja Chorote bible

San Mateo 19

¹Ti Jesús yiyeyik'i siukiwa iyo kiwa jlamtis, sekyi'i iyo'ni ka nek ti jantajla'm jlaja Galilea, ti teje 'niji yi'i jlaja Judea siojowa isi'il jilis yiji pet, ji'wecha ja tewuk jle' iyo'ate Jordán.

²'Yina je pini' japo i'nio' yamk'i, jakayi ti ijwiejiete'n japo je isis.

³Siojopo Fariséojos po' japo ijioyi, i'yasisi'n ti iyo ka ijnejlitis, ti iyonisi 'ate: —¿Ma 'est'iyiji ni i'nio' ka leyi jana jik'iemjla, ka poye paka k'iejliyeyi paka int'emina?

⁴Jesús isiujlie'ne ti iyo'ate: —¿Je jlamtijiena niwak inamtis t'ipi siunie iyot'iyipi siupa ipiujunit ni i'nio' siu'neje jana asejnia?

⁵ti iyo'ate, “Jant'emina ni i'nio' ti jantajla napo jiniewot, ti janejiap jana iyo k'iemjlaye, ja 'yiniyeyi ka injwanjli ni i'nio' ti janitoti wita'm.”

⁶Ijiatjliyi je pa timesie napo i'nio', tijnayek'i ti ijwienjli. Nak it'imina ti siunie i'nio' je 'esiji ka ilan wita'm siunie Sinia' pajk'i ti ijiut wita'm.

⁷Iyo'ne 'ate japok Fariséojos: —¿Yot'iyi'ni jiat'eje siupi Moisés ti kiak iyo, ti iyo'ate ti yi'i ni ji'wet, “I'nio' na jawo ka inile', ka iwenajamna'a ni imp'esinik siunie tejeye ti tijwa'yits'iji'n jana asejnia, 'yaka inile'”?

⁸Jesús isiujlie ti iyo'ate: —'Nakayi pet ti int'onie', it'imina ti iwi'nase'm ka anileye. Jlam'ne ti 'nelanjie'e t'ipi kiak je iyo.

⁹Siunie jayo ijiatk'i, ti po' siunie ti iliyi jana jik'iemjla, jlam'ne je janaka siojona asejnia ka ijnoski'lan'ni k'iye, nak kia'iyo yija'm nak ti iliaki ti inilesantaje ti tijwa'yi, 'yina jla'm ijiate ka 'nakaja'a ka'no'ni pet nak 'esiji ka ileyi.

¹⁰Iyo'ne 'ate papo t'eyasajnas ti ipi'yayeyis ti kia'iyo: —Siuti kia'iyo, jla'm 'esiji ka je injwa'yi ni i'nio'.

¹¹Jesús iyo'ate ti isiujlie japo t'eyasajnas: —Je wikie'eyi napo ka 'najane kiaka, napokata jla'am siunapo jla'am pa Sinia' ti iyo ka intant'iejeniti.

¹²Po' napo je iyojonk'iye jana asejnia. Po' napo ijia jlam kia'iyo ta'a ti tajla'm jana jlet ti je iyojonk'iye jana asejnia; ijia napo je iyo jwa'yisa' kajeyepa ti tilinkinaja na asejnia t'ajka; ijia 'neje napo je iyo jwa'yisa' lapakawo ti ijiateje ti janlesaniji ni Sinia' jika anechijiayas, nak'ne pet ti it'imina. Jane'yi pa jankajli pit naka, 'esiji ka inki'me.

¹³Japo i'nio' ijioyisiji japo jilis ja Jesús ka jikio' inenk'i ape'e ti t'alk'i ape'e. 'Yina siojopo t'eyasajnas 'yakawonayisi japok i'nio' ti itiuntieje'ni japo jilis.

¹⁴Jakayi'ne ti Jesús iyone 'ate: —Ena'yate napo kia'lis. Ká atoma'ni k'iye ti iyo ka ijnoyisk'i. 'Yina napok 'yiniye siunapo i'nio' yiji pet nak Sinia' jika anechijiayas, siu'napo kia'lis.

¹⁵Jikio' yinak'i ape'e japok kia'lis. Itimeje sekyi'i ti yama.

¹⁶Po' siojo i'nio' jwemik ijioyi ja Jesús, i'yasen'ne ti iyo'ne 'ate: —Inka'neyasajnawo, ¿tent'e siupi 'es paka niwone pet ka poye japa i'wiesankiyeja' ka laj jlaja?

¹⁷Iyo'ne 'ate ja Jesús ti isiujlie: —¿Yot'iyi'ni ti si'yaseje'n siunie 'es? Ijwienjli jla'am ti 'es, naka Inia'. Siuti jiwojonk'iye ka ajia'm janak in'wasankiye ti laj jlaja, woyi niwak Inia' jlamtis yi'i ni ji'wet.

¹⁸Jak jwemik iyo'ne 'ate: —¿Tepa yi'i puwa? Jesús iyo'ne 'ate: —“Ká akalanki; ká 'oyi'ni ni jana akiecha k'iemjla, siuti asejnia ká 'oyi'ni ni akiecha k'iemjla; ká akajla'n; ká awo sintiyeja'm ni akiecha;

¹⁹emi'n ni ana', siu'neje jana et; siu'neje ti ja emi'n ni akiecha, niwone 'ate ti jininemi'n.”

²⁰'Yina iyo'ne 'ate jak jwemik: —Siuniwa jijwelk'i'm atej'weje'n. ¿Tepa yi'i siupa netia'n kayoyi?

²¹Jesús isiujlie ti iyo'ate: —Siuti jiwojonk'iye ka i'nes, maj wen'ni wikie'eyi siuniwa wask'i'nelaja ji'we'en, wejnamk'i napo p'ijliusis, kajeyepa jane ts'iji poliyi niwa akijmatisie'. Sekyi'i jiwekie'ajana'a ka ana'm ijyik'i.

²²Jak jwemik, ti ipi'yaye ti kia'iyo ja Jesús, sekyi'i ti wuj ti je inkaj'ni ti yama, lapakawo ti jwajla i'wi'in jak jwemik.

²³Sekyi'i Jesús kiak iyonayiji japok t'eyasajnas: —Ijiate siu'nie jajwi'lase'm, ti siunie i'nio' jwajla i'wi'in ka wo ka'noyi pet ni Sinia' jika anechijiayas, wuj ti ti'nita.

²⁴'Yejne'n, jayikiajle'eje siojona jikiayi kosoki po' ka'noyi jana jitiete ni k'itie'en, ja ke 'noyi je kast'ayiji'n ti kia'iyo; 'yina ataj enayijpe 'ate siunie jayo siunie i'nio' jwajla i'wi'in jla'm ijiatayi ti ti'nita ka'noyi nak jika anechijiayas ni Sinia'.

²⁵Japok t'eyasajnas, ti ipi'yaye ti kia'iyo, kat'ajayi pi iyoyisi, kajeyepa ti 'yakelitk'i, sekyi'i iyoyis'ne 'ate: —Siuti kia'iyo, ¿tempa janjwa'?

²⁶Jesús jitiej yikiajlayi, sekyi'i iyo'ne 'ate ti isiujlieyi: —Naka siunie napo i'nio' je 'yijene paka wone, jlam pet ni Sinia' je kia'iyo, 'yina je k'istieja'm jla'am paka k'iejliyeyi.

²⁷'Yina Pedro tamti'ne ti iyo'ate: —Sa'am ti anamaja ajak'i, aleki wek seka'a jawa sikijmatis wikie'eyi jawa a'wena. 'Yina ¿tent'ipa ja'wina ti kia'iyo?

²⁸Jesús isiujlie japo ti iyo'ate: —Ijiatk'i siu'nie jayo'nase, ka inetiejenie'e siojona jloma ti Sinia' janekiajle'e ti jawo ink'iejyisa' wikie'eyi niwa wask'i'nelaja, siojona jloma ti ni I'nio' Jlas jane'yiji'n siojona ji'wet ti 'es ti jawo anechiyasa', asa'am kiak jawoyeyi'iji pet. Jawaye'yiji'n niwak in'wetis itijwa'm sikioye times tom'niji ti jawoye anechiyasisa' pet, asa'am ti je liyejyin'ni ijyik'i. Japakayeyi ti siunapo i'nio' ti je pini', siunapo tajla'm napo itijwa'm sikioye times tom'niji Israel jilis, ti jane' askiajwe ti jawoye pet anechiyasisa'.

²⁹Siunie na'm ijyik'i, ti sek iliyik'i'ni japa ji'wuk, siunapo ji'niayi ijwienjliyi, ni'ne ka jiniaye pa, ni'ne ka jleta japa, ni'ne ka jilisa', ni'ne ka jika ajnata pa, jajwi'lase'm ti je ijiat ka je inkama ape'e niwak siuniwa initiajnatayi, janamek'i siojona ji'wasankiye ti laj jlaja, ti jan'we'en ni i'nio'.

³⁰Awo'ate, ja 'lojwa siunapo iniant'i'nijpe ja 'wanjliyek'i isia'm. Ja 'lojwa 'neje siunapo 'wanjlik'i isia'm, ti janan'ni.