Read Iyojwa'ja Chorote San Mateo 21 Bible Online

San Mateo 21 - Iyojwa'ja Chorote bible

San Mateo 21

¹Ti majleyeyisi jlaja Jerusalén, japo Jesús ti jla'yis japo t'eyasajnas yiyeyisi siujlieja isi' tomi ilia'm jle' iyo'ate Betfagé, je wuj jlajak isi', yi'i jlaja tikijnaki siujlieja jle' iyo'ate Olivokiet. Jesús sekyi'i ti ijliuye japo t'eyasajnas times,

²ti iyone 'ate: —Maye'ni, joyeyi siojona isi' atayeje. Siuti jawayeyi, sek ja'wena'yi jana malekiat'io tilie'nitie, jlas po'. Lanajinie'e, sek jane'yi ka anamayeyik'inie'e.

³Siuti ja poye pa jan'yasajyi'n ti jawo'ate, “¿Yot'iyi'ni ti jilienajyi?”, ka woyenie'e 'ate, “Saka'niona isitia'n. Jon ka jlajma nekiaj'lanie'e ka pajata.”

⁴'Naka'ne siu'nie siuti iyoyi ka ineyi janak jloma, siupi Sinia' injwejlanik jiwo iyoyi ti ijwi'il ti iyo'ate:

⁵“Jwelajia'm napo i'nio' yiji jana Sión. Wonayi 'ate: 'Yena'yi ilia'm ni aska anechiyas ti ijio'wase, je initonit, yi' ape'e ni malekiat'io jlas, jlet jana inlajwa ti titilki'ni.”

⁶Ijiatjliyi yam'ni'ne japok t'eyasajnas, iyo siupi ja Jesús iyone.

⁷Namisi'ne jlaja malekiat'io ti ijwienisi'i ja jlas. Iyoyisi jika apekiaye jawa ji'wuye, sekyi'i ti yinisie ape'e ja Jesús.

⁸Siojopo i'nio' ti je pini' its'inayisi k'iye ajnat'e jawa ji'wuye siojo iniu'we. Ijia japo isimisie jawa a'la' k'ase'l ti yinis k'iye.

⁹Siojopo inian'ni, siojopo 'wanjlik'i isia'm kia'iyojliyi, ti tanisi ape'e ti iyoyits'i 'ate: —¡Tonitie 'ni David jlas! ¡Saka'niona 'esiji kanwe'en nak 'es, ti jla'am ti 'nes ti name ni iyo ni Saka'niona! ¡Tiwunitie pi Sinia' ti yi' poliyi!

¹⁰Jakayi ti Jesús ijiojwa'm jlaja Jerusalén, pesiejak'i'ni japo jitiej ijiutie ti'yasanisi'ni, ti iyoyits'i 'ate: —¿Ten 'ni i'nio'?

¹¹Ijia isiujlie ti iyo'ate: —Siu'nie injwejlanik jiwo Jesús, ti Nazaret jlele ti yiji jana Galilea.

¹²Ti Jesús 'yu kiajwe jlaja Sinia' ji'wuk, ijiut kisie'e wikie'eyi siojopo tik'iajwajyi'n, siu'neje japo takawejnajne'n. Yajmatk'i isia'm jawa tejeyisi ape'e siojopo jilis its'iuyetits'i'ni jawa wikijniest'ejes, siu'neje jawa ji'wetis pet jawa ojwos ti tiwena'ni kia'iyojliyi.

¹³Sekyi'i iyone'ne 'ate japoka: —Siuniwa inamtis t'ipi iyo'ate, “Siujlie'e i'yuk jle' jawo'ate 'najla 'wet.” ¡Siuti asa'am jiwonayi kajlajnatas ji'weta'!

¹⁴Ti Jesús je taljli'ijyi ts'e yi'i jlaja 'najla'wet, siojopo i'nio' talojo' siu'neje japo je t'ojni'n tikiniejeje'ni, 'yina je iyo ka je ijwajiete'n.

¹⁵'Yina japo kia'lis ti sekyi'i tanayisi ape'e, ti ijiunitis ja Jesús, ti iyoyits'i 'ate: —¡Tonitie 'ni David jlas! Jlam'ne pet siojopo pa'yijis jika anechiyasas siojopo jlameje, siu'neje japo jiwos pet nak Moisés jika'neyasajnaye, ti ipi'yayis siojowa iyo japo kia'lis ti tanisi ape'e, jwesis'ne kajeyepa ti i'winisieje ja Jesús siojowa iyoyi ti i'winki'n siojowa wask'i'nelaja je ti'wena'ni.

¹⁶'Yina kiak iyonayisi ja Jesús, 'ate: —¿Jipe'ya siunie iyoyisi? Jesús isiujlie ti iyo'ate: —Ji'yu, ape'yayi. 'Yina, ¿jet'i ji'yenajajyi siuniwa inamtis t'ipi ti ijwil naka?, ti iyo'ate: “Sinia' jlejni napo sajmela'aja'n ti je iliyi ti itipisi'n ka ijnonit ti a'am.”

¹⁷Jesús ti tajlayi japoka, yam'ne ti teje 'nijiye yi'i jlaja isi' jle' iyo'ate Betania. Sek ijio'wejen'ne.

¹⁸Siojo k'iejli mot, ti yapilie Jerusalenne, Jesús inil'lia'n.

¹⁹I'winayi jlajak higok yi' jikiuts'i ja 'nayi. Yama ti i'yene ka jla' poye, ji'wole 'nejie'e jiwekie'e jlaja a'la'. Sekyi'i ti Jesús kiak iyonayi: —¡Je pajna'a ka a' poye! Yiyik'i wek ti kia'iyo, iyoyeyi siukia iyo ti 'ya'al jlaja higok jakayi.

²⁰Siojopo t'eyasajnas ti i'winisie kanwojliyisipi pa, sekyi'i iyoyis'ne 'ate, ti i'yasis'ni: —¿Yot'iyi'ni ti 'yal ta'a?

²¹Jesús isiujlie ti iyo'ate: —Ijiate siu'nie jayo'nase, siuti ja lajk'ipa ka askakiujnieyeja', astankiujnieye japoye, ja akajlajyi siunie awone jana higok. Ja ke 'najataja ka 'najanayi paka awonayi, siu'neje ti jawone'ate jana tikijnaki ti ja amtiye'yi, “¡Taj'le ni jle'yi, ma isia'm yi'i ni i'niat!” Ijiatjliyi ka kiak iwoyeyinie'e.

²²Ja k'iejliyeyipe siupi ja 'ajlayi pi Inia', siuti astankiujnieye ja poye, ijiate ja 'wenayepe siupa ja 'ajlayi.

²³Jesús ti itimayi siukia iyo jakayik'i, 'yina ijioyi'ni siujlieja 'najla'wet. Siuti taka'neyasa'n, 'nesa'ni japoka siojopo pa'yijis jika anechiyasas, siu'neje japo kijilas ti kia'iyo anechiyasas, ti ijioyisi ti iyonits'i 'ate ja Jesús: —¿Tent'ipa ajweye ni jikiene niwaka? ¿Ten siupi jitiajleje?

²⁴Jesús isiujlie japok ti iyo'ate: —Kia'awo po' siu'nie jayo, ti ja'yasa aswa'am: ¿Yot'it'iyi'nijpe pa Juan ti 'yakajli ti iniejiejne'n papo i'nio? ¿Mi paka pi Sinia' ti tajle, ni'ne ka napokaye napo i'nio? Siuti jakiujliek'i'm ti a'yasajyi'n, ka ijwila'asemna'a pet siunie i'nio' atajleje ni ijwiye, ti it'imina ti akajli niwa siuniwa alesane. Ti ipi'yayeyis ti kia'iyo, ti kiak iyoyeyisi ti ininekiajlisi: —¿Tepat'e si'lij janiujwata'a? Siuti jayok'iate, “Tajle pa Sinia'”, ka woyena'a 'ate, “¿Yot'iyi'ni jiateje ti jikakiuye?”

²⁵

²⁶Je 'esiji ka yok'iate, “Tajle napo i'nio'”, 'napok je 'es jla'am napo i'nio', kajeyepa ti wikie'eyi ti je 'yakakiuyis pak Juan ti jla'am ti Sinia' jijwejlanik jiwo.

²⁷Ijiatjliyi iyoyis'ne wek 'ate, ti isiujlieyisi ja Jesús: —Je kasts'ajane. Jesús iyo'ne 'ate: —Ijiatp'ane, kia'awo, 'wanjliyi je ajwe'lase'm siunie atajleje ni ijwiye ti it'imina ti akajli siuniwa alesane.

²⁸“¿Tepa astankiujnieye jiwonayi ape'e siu'nie? 'Yejne'n, pojompe pa i'nio' times papo jilis. Ijwienjli siupapo jilis ti iyone'ate, 'Nak jajoyi iwiesoki; maj, kijme'n.

²⁹“Isiujlie pi jinia' ti iyo'ate, Jewa'a, je awo kayik. “Paj ti jitienkiujnieye 'wena iyonayi'ijyi jiwekie'e, sekyi'i ti yamat'ipi, ti ijioyi pi inwasok.

³⁰“Sekyi'i yamat'ijyi ti ijioyi siupa jlas jikiecha 'neje ti iyone 'ate, Majna'a pet kajo iwiesoki, kijmenna'a. “Isiujlie pi jinia' ti iyo'ate, Ijiatp'ane, jayiknie'e. “'Yina jla'm iyo. Je ya'am.

³¹Papok siupapo times, ¿tepa yi'i siupi je ika'm ape'e pi jinia' ji'lij ti ijliutieje siupi jikijmaye?” Isiujlisie'ne ti iyo'ate: —Siupi iniajnat ti ijioyi. Sekyi'i Jesús iyo'ne 'ate: —Ijiatk'i siu'nie jayoyi, siunapo isi'm ilia'm niwa inkat'ijnieyejes ti i'ye'n ilia'm ti ijioyi'ni jana Roma, siu'neje napo asejnia siunapo 'yuyi'ni napo ijia jwa'yis, napok siunapo jana'n ask'ioye ti ja'noyi ni Sinia' jika anechijiayas.

³²Kajeyepa ti Juan inajiejnawo 'nesape ti i'winkinta'ase'm ni siunie 'nayi ti tijnajyi, 'yina je woyejliyi, ti jikakiuye. Iyoye'eje jlam jlosikis ink'iejyisa', napok siunapo ijiajwa'yis jiwos siu'neje napo isi'm ilia'm niwa inkat'ijnieyejes, kajeyepa ti je 'yakakiuyis. Jejwela' ka je a'wenayeta, ji'wenayeta ka jakayeyi ka awoyeyi asosikis ink'iejyisa' pet ka je akakiuye.

³³“K'iuyeyi siu'nie jajwi'lase'meje, ti jayamtiyi'ijyi ask'ioye, ti ja'yejnap jiwek: Pojompe pi i'nio' yikiaj'l isia'm puwa ts'ejnietio' yi'i pi jiwasok. Itijat'ijiampe siojopa sisaj siupa jane'ne pa ts'ejnietio' t'e'. Ilisane 'neje siojopa jane'yi'ni siupa jan'yena ti toj pijia'm, ti jan'yen'ni ape'e. 'Yina ti iyoyeyi ka nek, jlampa wakajlayi yikiajli'ni papok inkijmayewos ka inkijmajne'n kiu' ti sek je yi'i, ti ijioyi japa ajnat jikiecha.

³⁴Yiyi siupi k'ie' ti 'yoyeta'a puwa ts'ejnietio', ijliu'ne papo jikawos ka jitiej inayi ka poye japa ka inlesank'iye.

³⁵Je 'es ti 'nesat'iyipi papok siupapo inkijmayewos, isimat'iyits'ipe, yejes'ni pi ijwienjli, ijwienjli'ne siupa ilianisi, jikiecha siupa sisajas itietisijin'ni.

³⁶Sekyi'i ti ijliuyet'ijyi papo ijia, papok 'loj'ne, 'yaka'm ape'e siupapo iniajnat ti ijliutie'ni. Kiak iyonjliyisi papo ijia siupi iyone.

³⁷“Ts'ijiye p'an ti ijliuyeta pak jlas kajeyepa ti ijwilta ka lajak'ipa ka tiwonaja, ti iyo'ate, 'Wanjliyi ja ke injweyisie'ne kajeyepa ti je 'wenayi yas.

³⁸“I'winat'iyispe ilia'm, 'yina iyoyis'ne 'ate, 'Yaka 'nakayet'e siu'nie ja tekiajla'a siu'nie ajnat. ¡'Yena'yi ilia'm, jaliana, 'nakayeyijna'a ka sikimita 'ni ajnat!

³⁹“Sekyi'i isimat'iyits'ipe ijioyisi 'wechaja pa inwasok, sek yinayisi'i ti ilianis.”

⁴⁰Jesús iyo'ne 'ate: —Siuti ja'nes siupi jika'niona pak inwasok, askatejnisieyi ¿tepa janwonayi ape'e papo inkijmayewos?

⁴¹Isiujlisie'ne ti iyo'ate: —Ja ke inaj'wite kanlajne'n papoka, kajeyepa ti laj jlosikisie'; ka iwoyejyinna'a papo ti jank'iuyet'e, siupapo japoye jla'm japa janlesan'ni k'iye, ti takawijnanata.

⁴²Jesús kiak iyoye'ijyi 'ate: —¿Jet'i ji'yena'ijyi siuniwa inamtis t'ipi ti iyo'ate: “Siojona sisaj siunapo 'wukiul jiwos iwit'iane, jla'aka p'an siu'nie jloma ti jiateje ti laja po' ti 'yaka'm ape'e niwa ijia. Lapakawo ti je 'wena paka kiak iwone naka ni Saka'niona. Siuti a'wena ni jikijmaye iyone, wuj ti kasteliaja”?

⁴³Nak ajwe'el ti jatala'ase nak Sinia' jika anechijiayas, ja tekiajlaja siunapo i'nio' japoye siuniwa jla' ti ja nekiajle ni Sinia'.

⁴⁴Jlajmiliet siojona sisaj, siunie janoyiji'n ape'e jawo jwala'. Ni'ne ka janakaye jla'am jana sisaj ka inojwi'n ape'e jawo makie ni i'nio'.

⁴⁵Siojopo pa'yijis jika anechiyasas, siu'neje japo Fariséojos, ti ipi'yayeyis ja Jesús siukiwa ti jla'm i'yejnap jiwek, itijnisieyisi ti jlamis ti tijwela'ni.

⁴⁶Jakayi ti iyoyetajas ka inkimits'i, lapakawo ti je ijwiyisie japo i'nio', kajeyepa ti 'yijenisi ti Jesús pak Sinia' jijwejlanik jiwo.