Read Iyojwa'ja Chorote San Mateo 25 Bible Online

San Mateo 25 - Iyojwa'ja Chorote bible

San Mateo 25

¹Jesús iyoye'eje 'ate: —Siunie Inia' jika anechijiayas kiak jawo'ate siu'nie: Po' siupapo jlosie times sikio' itij'we, ti yamisk'iye siupi i'nio' ti janjwa'yi, itiunis puwa jika katese'l.

²Ijwienjli 'ni sikio' itij'we papo je inikiwalkit, ijwienjli 'ni sikio' itij'we 'neje papo laja'ni jlosikiejets'i.

³Jlam'ne siupapo jlosik yijits'i'ni ta'a jla'am ti itiunis pa t'e' puwa jika katese'l, ti 'yiniji ti nojwat'ijyits'ipe. 'Yina jlam'ne pet papoka ti laja'ni jlosikiejets'i'ni, lajk'ipa ka t'eye ka injwanisi'i ta'a ti yama'ni.

⁴

⁵'Yina ti je majli k'iye pak siupi yamisk'iye ti janjwa'yi, paj ti jika ajnieti t'i poyepe. Imiayek'iji'n.

⁶“Siuti ajnaj kiowejat'ipi, pesiejat'iyipi siupapo ti tanisi ape'e ti iyo'ate, “¡Nama'ne siunie janjwa'yi! ¡Maye'ni 'yena'yi ilia'm!”

⁷Sekyi'i inits'i'ne pijia'm papok jlosie, wikie'eyi siupa nojwa'm. I'yenayis puwa jika katese'l, ka je inojwits'i ni'ne ka je inses.

⁸Jlam'ne siupapo ijwienjli sikio' itij'we ti lajayiji'ni jlosikiejets'i iyo'ne 'ate siupapo je isiwali jla'am, “Kasp'elisijne'n wata'a ka wents'e'm paka aska kates t'eye, kantitie ka jwamjla'aja pa. Majleyeyi ka 'no'mik'i 'niwa saka katese'l.”

⁹'Yina iyo'ne 'ate siupapo je isiwali, ti isiujlie papo ijia, “'Wanjliyi je awena'ase'm, 'lojwinie'e pet ka je inesajap, jla'yi pet ti asa'am kiak jawo ja ke ine'yi asap. Maj ka joyeyi siunie yi'i ni iwin'ni ni kates t'e', mayeyi siupi k'ie pi jisitiana'.”

¹⁰“Yamat'i'nijpe ti iyoyisijyi'n pi t'e' puwa jika katese'l, jlampa 'nesat'ipi paka siupa its'iuyistajan'ni k'iye, paka pa janjwa'yi. 'Yina siupapo jlosie ijwienjli sikio' itij'we ti je isiwalijyi'n papoka'ne ti 'yuyisk'i kajeyepa ti i'winis k'iye. Sekyi'i ti tip'onajaja'm pa 'wuk kiwet, yiyisi' jla'am japak inlakijnieye.

¹¹“Paj ti jiwekie'ajat'ipi pet ti 'nes'ni papok jlosie kajlojoties, ti iyoyisijyi'n pa jika kates t'e', iyoyet'iyispe 'ate ti i'winis ti tip'onaja'm pa 'wuk kiwet, “¡'Yaka'niona, 'yaka'niona, 'ajlinit sik'ioye!”

¹²Iyo'ne 'ate ti isiujlie, “Je sitiant'ie'ase”.”

¹³Jesús yine'ne ape'e ti tamti ti iyo'ate: —It'imina ti kiak jayo'nase, ká anikiwalinitie, 'yina ti je 'najanayi siojopa jika jlomaye, tiwet'ianaja ka japakataja wek japa inetitinki ka 'najanayi paka wonayi.

¹⁴Siunie Sinia' jika anechijiayas iyoye'ate siu'nie: Ti pojompe pa i'nio' janek ti jajnoyi japa ajnat jikiecha. Siuti yamat'ipi tanayi papo jikawos, ti ijliuye kan'yena siojopa wikiniet'aj iliyijap.

¹⁵Lapakawo ti itiant'iejeje'n, it'imina ti kia'iyo siojopa k'ie japa ijniejiet'e pa. Jak je iyoyi'ni yikiajle'ni siupa inia'an siojopa wuj ijwienjli sikio' itij'we taléntojos,[11] siupi jikiecha timesk'i jla'am puwa taléntojos, siupi jikiecha jla'am ijwienjlik'iyi japa iwijna'm. Sekyi'i ti yamat'ipi pak i'nio' siupi ijiojwi.

¹⁶Jlajmiliet siupi yikiajle japa ijwienjli sikio' itij'we taléntojos je iyo ka ji'wetjliyeyi'i'ni, yamat'ipi ti isijmajne'n, 'yina 'yakajmatayi ape'e japak siojopa tena kiojyi, puwa ijwienjli sikio' itij'we taléntojos.

¹⁷Kia'iyojliyi pet pak siupa tekiajlaja puwa times taléntojos, timesiek'iji pet puwa 'yakajmata ape'e.

¹⁸Jlampet siupa ijwienjlik'i japa tena kiojyi, yamat'ipi pet ti ijwiki'n ti 'yut ajnat kiajwe japak jika anechiyas jika wikiniet'aj.

¹⁹“Paj'ni ape'eyi, ti 'nesat'ipi pi anechiyas, sekyi'i i'yen'ne siojopa yikiajle papo jikawos.

²⁰Inia'an ti 'nes siupa anechiyas iwijna'm japa ijwienjli sikio' itij'we taléntojos. Iyone'ate, “'Yaka'niona, ijwienjli sikio' itij'wepe kiwa jlekialk'i pet. Siujlie'e ijwienjli sikio' itij'we 'yina ijwienjli sikio itij'we 'neje kiwa akajmate ape'e.”

²¹“Iyo'ne 'ate pa anechiyas ti isiujlie, “Ijiate wat ti 'es ti kia'iyoyi, am ti 'yakawo'wa'm ti 'es, jla'yi ti ajosik po'. Siuti kia'iyo ti jilisaniji ni jwajla'a ti ekiaj'la, jayikiaj'la'm siunie ti ijiate ti 'etsaka ti ja'yena. Maj 'oyi ni siunie yi'i jana inlakijnieye, ti awo iliakijnieyeja'”.

²²“'Yina 'nes'ne pet siupa times japa tekiajlaja, pak iyo'ne pet 'ate, “'Yaka'niona, timesk'i wek jakia jiwenk'impe pet. Siujlie'e ekiaj'la, timesiek'iji wek jla'a ak'iosinitiaja'm.”

²³“Iyo'ne 'ate pa anechiyas ti isiujlie, “Ijiate wat ti 'es ti kia'iyo, am ti 'yakawo'wa'm ti 'es, jla'yi ti ajosik po'. Siuti kia'iyo ti jilisaniji ni siunie jwajla'a, jayikiaj'la'm ni siunie ti ijiate ti 'etsaka ti ja'yena. Maj 'oyi ni siunie yi'i ni inlakijnieye, ti awo iliakijnieyeja', janikanitiejk'i wita'm”.

²⁴“Je 'esiji jla'am ti 'nesat'ipi pet siupa anechiyas iliyijiap siojopa ijwienjlik'iyi talento, iyo'ne 'ate, “'Ni 'yaka'niona, 'yina ti sitiant'ie'a ti je injlana'ni, jla'yi ti jiwo akimeta ti jilie'ne ni jiwomik napo a'lejwas ti jlajlane, jlotie'eje wita'm siunie ti je a'am ka 'ot isia'm.

²⁵It'imina ti ajweki'n kajeyepa ti je sijwe'ya'm, 'otie ajnat kiajwe siujlieja aka wikiniet'aj jlekialtak'ipi pet. Siujlie'e aka wikiniet'aj ekiaj'la”.

²⁶“Iyo'ne 'ate pa anechiyas ti isiujlie, “¡Ijiate wata'a ti je i'nes! ¡Ti 'yakawojonta'a'm! ¡Je inats'ilkaja paka akijmayeja'! Ti jijwel'ni intant'iek'i, ti yam si'wesi'ni ni jiwomik napo i'nio' ti ajale, jla'yi ti je ya'am ka 'yut isia'm.

²⁷¿Yot'iyi'ni ti je jloyiji jana wikiniet'aj ji'wuk jakiak siojona ekiaj'la, jak je iyoyiji ti a'nes ka ekiajlatak'i ka jwajla'aja wat japa ka inkama ape'e?”

²⁸“'Yina siupa anechiyas yapilieyi siupapo sekyi'i, ijliuyeyi ti iyone 'ate, “Jalayi siojona yiyi talento ijwienjli, sekyi'i ekiajlayi siupi yiyi japa itijwa'm niwa sikioye taléntojos.

²⁹Kajeyepa ti siunie po' ni yiyi, ja tiwomaja ni i'wi'in, jak je iyoyiji ti ja 'etsakaja siunie jan'we'en. Jlampet siunie ti lajk'ipa kan'we'en, ja talaja'aja pet siunie jwajla'a ti yitaja pet.

³⁰Siunie inkawo ti kia'iyo je 'es, tatayi kisie'e yi'i ni ajnatiok, siunie jane'yi siuniwa ja jlajlasa, ti ja wujwa ti ja a'tieja”.”

³¹Jesús je iliyi ti tamti ti iyo'ate: —Siunie I'nio' Jlas ti ja'nes, janejyi siunie iyo ni jijweye, jla'yi ti ja jla'yisa' napo jijliujwajnas poli jlele, jane'yiji'n siojona ji'wet ti 'es ti jlam ti anechiyas.

³²Ja wikie'eyeyi napo i'nio' siunapo yijits'i niwa ajnatis ti janitotisi jitieyi'i, jawo'ate iyo niwa sontas niwa ji'wole po', ti jiwo i'winakit, jlampet siuniwa jitio' 'wena jajnoti.

³³Siuniwa 'wole po' niwak jantojmat jijweyeje, jlampet siuniwa jitio' jantojmat ji'lieme.

³⁴Jantanayinie'e ni anechiyas siunapo jantom jijweyeje, ti janwone'ate, “Joniemit, siunapo Inia' pajk'i ti iwijna'm ni 'es ti ip'ilisi'n. Kima'yi ilia'm ni siunie ti jla'am pajk'i ti iwiakajlanit ask'ioye, tajlap'e ti 'nelanjie'e ilisanayi ni ajnat, naka ni jika anechijiayas.

³⁵'Yina siuti kia'awopi ti sinil'lia, asampe ti sakojniena. Siuti kia'iyo sikimpe, asampe ti i'niat jiwenak'i'm. Siuti i'wit je 'ejts'i kia'iyojliyi, asampe ti i'wit jilisana'yi.

³⁶Ti lajk'ipa ka 'yuts'i, asampe'eje ti jiwoye i'yuye. Siuti je ts'es, asampe'eje ti ji'yenak'i. Ti a' insat jiweje kia'iyojliyi, asampe'eje ti jit'iuyek'i”.

³⁷Jawoyena'a 'ate napoka napo isis, “'Yaka'niona, ¿tepat'i yi'ipe ti kia'iyo, ti jijwel inel'liant'ipi, sekyi'i akojniena? ¿Siu'neje ti inki'im, i'niat awe'na'm?

³⁸¿Siu'neje ti a'wet je 'ejts'i, sekyi'i sa'am ti a'wet alesana'a? ¿Siu'neje ti lajak'ipa ka 'ots'i, 'yina sa'am ti awok a'wuye?

³⁹¿Siu'neje ti je 'nes jla'yi ti jle' insat jiweje, sam'neje ti 'oye'a?”

⁴⁰Jawoyena'a 'ate ni anechiyas ti jankiujlie, “Ijiatk'i siu'nie jayo'nase, ti jayo'ate: jane'yi pa siunapo i'niayi ijwienjli ti lajk'iyi paka iwoyi, pi ja k'iejliyeyi pa jawonayi ka 'esiek'i, ijiate jijwelt'e ka 'wenaye siunie jiwonayi, ya'am.”

⁴¹“Ka kiak iwonayijinie'e ni anechiyas siunapo to'm ji'lieme, “¡Tonitiejyi'n, asa'm ti pajk'i ti jleyejyi ni inlaye! ¡Joyeyi nak jwat ti je paj ka 'no'me, tejeye ni imosik ti ja jikieye siu'neje napo jijliujwajnas pet, ti tiwakajlanitie k'iye!

⁴²Siuti sinil'lianpe tiwet'ianaja ka asamkatajape ka sakojniena. Siuti siki'im kia'iyojliyi.

⁴³Siuti i'wit je 'ejts'ipe, ka jakayeyi ka i'wit alesana'yi. Siuti laj i'yuye je wenak'i'm paka i'yuts'i. Siuti je ts'es siu'neje ti a' insat jiweje, ka kia'iwo ka 'oyek'i wata'a.”

⁴⁴Sek jane'yi ka i'yasayisinna'a ni anechiyas, ti janwo'ate, “'Yaka'niona, ¿tepat'e a'wena'a ti inel'lia, jla'yi ti inki'im, ni'ne ka laja a'weta', ni'ne ka laja a'wuye, ka net'i'yijpe ka je 'nes, ka a' insat jiweje ka je 'yuk'ia ka iniukia'a'm?”

⁴⁵“Janwoyena'a 'ate ni anechiyas ti jankiujlie, “Ijiatk'i siu'nie jayo'nase ti jajwi'lase'm ti ja lajak'iyi paka wonayi ka k'iejliyeyi, siu'napo ti je 'esijiyi, siu'niwa ajwel'ni, ijiate je t'i jijwela' ka 'wenaye, ya'am ti lajk'iyi paka awonak'i ka noyeyek'i'm”.”

⁴⁶Jesús iyo'ate ti yinayi'iji ape'e ti tamti: —Napoka siunapo i'nio' jajnoyi naka inlaye ti laj jlaja, jlampet siunapo isis jajnoyi pet nak in'wasankiye ti kia'iyo laj jlaja.