Read Iyojwa'ja Chorote San Mateo 4 Bible Online

San Mateo 4 - Iyojwa'ja Chorote bible

San Mateo 4

¹Jlampa paja'ni ape'e, Jesús Sinia' jikimet yamayi ti ijioyiji pa ajnat laj i'nioye'e, ti imosik jajnejlit.

²Cuarenta puwa jlomas, cuarenta 'neje puwa ajnajas ti lajk'iyi paka intojw. Sekyi'i ti iliatayi pi jika nel'lia iyo.

³Imosik ijioyi'ni ti iyo ka ijnejlit ti iyone'ate: —Siuti ja ijiatayi ka Ina'a jlasa'a'm, jejlite ka amti'yi siojona sisaj ka iniwojwa'n woyeja'.

⁴'Yina Jesús isiujlie ti iyo'ate: —'Wanjliyi je awo. Kajeyepa ti Inia' jlamtis yi'i ni ji'wet iyo'ate, “Je ijwienjli jana woye ka i'manit ni i'nio', kia'iyo pet wikie'eyi siuniwa jlamtis ni Sinia' ti tal jikiwitk'i, ti i'mienit ni i'nio'.”

⁵Paj ti imosik yamat'iyi'iji ti ijioyiji japa Jerusalén, siojopa isi' ti Sinia' jika isi' ti 'es. Ijioyet'iyijpe ape'e japa 'najla'wet yi'i siupa toj pijia'm,

⁶ijliuye'ne ti iyo'ate: —Siuti ja ijiatayi ka Ina'a jlasa'a'm, sojmakiejen kiu', ká anikiwit. Ina'a jlamtis iyo'ate, “Sinia' janjlo'wa napo jijliujwajnas poli jlele kan 'ye'na'm. Ka ayejyina'a niwa jikioye ja'nakayeyijna'a ka je ijnoj'li ape'e japa sisaja', 'yina ja laja awet'iaye.”

⁷Jesús isiujlie ti iyo'ate: —'Wanjliyi je awo. Kajeyepa ti Inia' jlamtis kiak iyo 'niji ti iyo'ate, “Ke ejejlit ni Aka'niona ti Sinia'.”

⁸Jlampa itimayi'iji, imosik ijioyet'iyijpe ape'e siojopa tikijnaki ti ijiate jla'm ti toj pijia'm. Sekyi'i i'winkinayi wikie'eyi siupuwa ajnatis wus, siu'neje puwa jijweye iyo papo ti iyo anechiyasa'.

⁹Iyone'ne 'ate: —Japijlanit'ia 'niwaka ti jawi'na'm, siuti akosjlete'l jateyiji'n isiajwe, jla'yi ti ja siwunit.

¹⁰'Yina Jesús isiujlie ti iyo'ate: —¡Talk'i'm, sitiejiejwa imosik! Siuniwa Inia' jlamtis ti yi'i ni ji'wet ti iyo'ate, “Wunit ni Aka'niona ti Sinia', jwankit ka k'iuye.”

¹¹Sekyi'i imosik tajla'ne ja Jesús, ti 'nesat'i'nijpe papo injlojwajnas poli jlele ti iniuyeje.

¹²Jesús ti t'ijieyeyi pa Juan ti t'otie a'laja'm, sekyi'i teje'ne 'nijiye yi'i jlaja Galilea.

¹³'Yina je yi' Nazarette, ka sek ne'yiyi. Capernaum jlajaka ti iyo 'weta', ti yi' kiuts'i ja i'niat jlajlik'i, isi'il yiji papo Zabulón siu'neje pa Neftalí jika ajnatis t'ipi.

¹⁴Pak siupa jloma ti yiyeyi siupa iyot'iyipi pa Sinia' jijwejlanik jiwo Isaías ti iyo'ate:

¹⁵“Ajnat siojopa Zabulón, siu'neje pa Neftalí jika ajnatis, ji'wechaja pa Jordán, jikiuts'i pa i'niat jlajlik'i yiji japa Galilea, ji'wet papo i'nio' siupapo je t'ekiyiji ti je isis.

¹⁶Siunapo i'nio' napo yiji ni ajnaj i'winisi jana kates ti wuj. Siunapo i'nio' yiji ni jipe'el jana 'najlati, siojona jla'al jana kates 'yakajanit'i ape'e.”

¹⁷Pak siupa jloma iyoyeyi kawo jika'niyeja', ti iyo'ate: —¡Woye ajosikis ink'iejyisa', je pa tojwa' ilia'm ni jika anechijiayas ni Inia'!

¹⁸Ti Jesús t'iskiunieje'n jikiusk'i ja i'niat jlajlik'i yiji jlaja Galilea, sek i'wi'ne siojopo ji'niayi ijwienjli. Japoka japo Simón, tiwonajat'ijyi'nijpe'eje 'ate Pedro, siu'neje ja jikilia Andrés. Jlam'ne itietisiajam'ni pa i'niat japa jika 'nijiak jit'io, ti iyo'ni.

¹⁹Jesús tane'ni ti iyone 'ate: —Joniemit. Jayojwa wotasa' ti jawoyeyijin'ni napo i'nio'.

²⁰Jlamsek iliyet'iyisi'ijpe wek puwa jika 'nijia tio' ti yamayisk'i ja Jesús.

²¹Jitieyiji ja Jesús, 'yina sek i'winat'iyijpe siojopo kia'iyo ji'niayi ijwienjli, japoka japo Santiago jla'yi ja ji'yini Juan, siojo i'nio' jle' iyo 'ate Zebedeo jilis. Ti je tajlisi puwa jika kasejkanayis, ti jla'yijis pa jinia' ti ilisanisi'ni puwa jika 'nijia tio'. Jesús tanat'iyipi.

²²Je iyo ka jwatajayisi'i'ni ti yamat'iyisk'ipe, jlam sek iliyeyisi'i pa jinia', siu'neje puwa jika 'nijia tio'.

²³Jesús itijw puwa isi'il yiji jlaja Galilea, ti 'yiyasajne'n papo i'nio' yi'i puwa 'najla'wetis ti jikimitis. Ijwi'il siupa inka'niye ti 'es, siupa Sinia' jika anechijiayas, jla'yi ti ijwiejiete'n puwa jiliaye papo i'nio', siu'neje puwa t'ajwes t'a'ti.

²⁴Jesús jle' itijwi'ni siujlieja ajnat Siria, ti t'ijieyeje. Tiniamajaja'ni siupapo ti wuj ti inilayiti puwa iyot'iyipi puwa jikie'el ti je ijwienjli, siu'neje papo imose'l iliaki, siu'neje papo jitiej je isis, siu'neje papo je t'ojni'ni, je iyo ka je injwajiete'n.

²⁵Je pini' papo i'nio' yamk'i ja Jesús siupapo tal Galiléaja, siu'neje papo i'nio' tajle siujlieja ajnat jle' iyo'ate Decápolis, siu'neje papo i'nio' tal Jerusalenne, siu'neje papo tal Judéaja, siu'neje papo tal ji'wechaja ja tewuk Jordán.