Read Iyojwa'ja Chorote San Mateo 5 Bible Online

San Mateo 5 - Iyojwa'ja Chorote bible

San Mateo 5

¹Jesús i'wi'in ti 'loj papo i'nio', i'yujliet'ipi ape'e pa tikina, sekyi'i yiyeje'n. Siojopo t'eyasajnas ijliasat'iyisipi,

²'yina ijyijlitat'iyijpe ti taka'neyasa'n ti iyo'ate:

³—Sinia' wuj ti ip'ilisijne'n siunapo itiant'ieje ti najata Sinia' jikap'ijliuskiye ti 'esi, jla'yi ti 'yijene pi iyone ti isitia'n naka. 'Yina napoka yiji pet nak jika anechijiayas.

⁴“Sinia' wuj ti ip'ilisijne'n siunapo jijliak'ali po'. 'Yina Sinia' je ijiat ka je iwejna'm ni siunie jinikanitieyi.

⁵“Sinia' wuj ti ip'ilisijne'n siunapo i'nio' ti jlosik iyone 'ate iyo siunapo ti lajtak'iyi paka woyi ka initoniti'n. 'Yina je ijiate ka je ine kiojyi siunie ajnat Sinia' ijwijla'm.

⁶“Sinia' wuj ti ip'ilisijne'n siunapo inil'liajne'n jla'yi ti isijme'n, 'yiniye kawo'ate ti its'iye kawoyi niwak siuniwa iyo ka woyi ni Sinia'. Sinia' je ijiat ka je iwejna'm siunie iyo ka woyisi, 'yiniyijna'a ka nep'isi'n jla'yi ti janak'awotisi siunie Sinia' iyo ka woyi.

⁷“Sinia' wuj ti ip'ilisijne'n siunapo ip'ilisijne'n pet napo ijia. 'Yina kia'iyo pit Sinia' jamp'elisijne'n.

⁸“Sinia' ip'ilisijne'n siunapo ti ijwienkit ni jlosik ti 'es ti iyoyi. Tepa jawo ka kiak je iwo ti jan'wenis ni Sinia'.

⁹“Sinia' wuj ti ip'ilisijne'n siunapo ti jlam ti it'imina ti 'yakama papo ijia. 'Yina ti kiak jawone 'ate, “Napok ilis”.

¹⁰“Sinia' wuj ti ip'ilisijne'n siunapo iyo ni Sinia' iyo kawo ti i'nio' teje'yi ilia'm k'iejliyi pa tiwonaja ti tiliakik. 'Yina ti napoka pet ti yiji ni jika anechijiayas.

¹¹“Sinia' wuj ti imp'elisina' ti asa'am siunapo i'nio' iliaki ti jikinieyi siu'nie awo, siu'neje ti teje'yi aselia'm k'iejliyi siunie iyo kawo'nase ti inlakiye.

¹²Nikanitiejyi'n inkaja'yi siunie as'wajieta siunie ti ja tekiajla'ase ts'iji poliyi. Kiakjin iyopi papo Sinia' jijwejlanawos t'ipi ti i'nio' tejeyits'i ilia'm.

¹³“Asa'am ti sijwonie'ase'm, 'yina wikie'eyi napo i'nio' yi' ape'e 'ni ajnat isists'iase. Jlampet ti kia'iyo ni sijwonie ti jitiusi no'we,[3] ¿tepat'e ka tiwonataja ka nekiajle'e ka tosiyeje? Lajk'ipa ka tiwonaja ti ja titietaja, 'yaka je 'es int'asak'i'nina'a na i'nio'.

¹⁴“Asa'am ti jika katets'ase'm siunapo i'nio' yi' ape'e 'ni ajnat. Siojona isi' yi' ape'e jana tikijnaki ti toj pijia'm je istieyi kajeyepa ti toj pijia'm.

¹⁵Siu'neje ti po' ni i'nio' ti jwat yi'ne jana jika kates kamp'o'n ape'e, ti 'wenajliyi siunie jawone ti janen pijia'm, 'nakayijna'a ka jlal ja'naja'n ape'e siupapo ji'wetijwas.

¹⁶'Yina ti asa'am 'esiji ka kiak aniwonayiji, siojona aska kates 'atanajia'm jitieyi'i napo i'nio', 'nakayeyijna'a ti jan'wena ti jiwoyeyi ni 'es. Sekjane'yi ka inwunitieyisna'a ni Asna' ti yi' poliyi.

¹⁷“Ká ajwela ka iniame nak Moisés jika'neyasajnaye ka initiajnat, siu'neje siupapo Sinia' jijwejlanawos jika'neyasajnaye. 'Wenajliyi jla'am ti awo ka intant'ieje napo i'nio'.

¹⁸Ijiatk'i siu'nie jayo, siuti je netianjli'ijyi ni poli siu'neje 'ni ajnat, kia'iyo ja ke inetia'n nak Moisés jika'neyasajnaye tiwet'ianaja ka janajata jana inkajwukis, siu'neje niwa sajmelaja'n ka netia'n, paj ka ineyeyinie'e siojona jloma ti ja 'nakaj siuniwa iyo ti ijwi'il.

¹⁹Tempi it'imina ti siuti po' na iliaki niwak inamtis, 'wanjliyi ka niwakaye siuniwa je 'esijiyi, jla'yi ti 'yiyasane napo siunie jla'am ti tajle, kiak ja tiwonayijinie'e pet iyo ni i'nio' siunie je 'esijiyi ti samjlie'e ts'iji Sinia' jika anechijiayas na yi'i. Jlampet siunie ti iyoyi, 'yiyasane napo i'nio', kia'iyojliyi nak ja tiwona'aja pet 'ate, nak i'nio' ti jwajla'a janwo'ni pet ts'iji yi'i ni Sinia' jika anechijiayas.

²⁰Nak ajwe'lase'm ti awo'ate, siunie jiniwonayi ti jiwoyeyi ni 'es, siuti ja ke akama'yi ape'e napok Fariséojos, siu'neje napo jiwos pet nak Moisés jika'neyasajnaye, ajwe'lasem ta'a ti ja laja as'nayija' ka 'oyeyi ni Sinia' jika anechijiayas.

²¹“Jipe'yayek'i'ni napo ti ijwi'il papok aska kijilas mases, ti kiakt'i tiwonajapi 'ate, Ká akalanki. Siunie ti jankalanki, ja tokiji napo jiwos ti ja ti'yena ni jitis iyo ti nak ja titiajlata.

²²Awo'ate ti ajwe'el naka ti jwesieje ni jikiecha, jitis po'. Siunie i'nio' ti jlam jla'am ti iliaki'ni ni jikiecha, nak ja tokiji napo pa'yijis ijnosikis jiwos siunapo jlame ti yiji jana Jerusalén. Siunie iliaki ni jikiecha, ti iyo 'ne'liaja', nak ijiate ti 'yu'we ka tenaja siunie ijio'we'ni pet napoka ti iyoyi naka, siunie inlaye 'wet ti laj jlaja naka na jwat.

²³“Jak je iyoyiji siuti ja akiji jana altar ni jawoyi ji'wajieta' pa Sinia', siuti ataj wujwayi ti ates poyi ilia'm pa akiecha,

²⁴ka sek aleyeyi'i kiu' siupi jitiu'un ti jawo 'wajieta' pa Sinia', ts'e yi'i japa altar, kiajwe japa 'najla'wet. Sek jane'yi ka apilieyi ti jajoyi pi akiecha ti janinekiajli wita'm. Jatemeje ka apilieyinie'eje japa 'najla'wet ka jiwekie'ajana'a ka ekiajle pa Sinia' siupa jiwo 'wajieta'.

²⁵“Siuti po' ni injwe'el ti ates po', sekyi'i ijnoyiji napo jiwos kan'ye'en. Siuti je jlejliyi'ijyi, pa jawaye'yi 'nayiji, ka jla'm awonayi'nina 'ate, ti ja akamtijniene pi akiecha ti janinekiajli wita'm. Alenjlipa ti je inekiajliyi'ijyi ni jiwo ti jan'ye'en, 'yina siuti je jlejliyi'ijyi ka inekiajle pit na jiwo pet jana insat jiwe ka ijnot 'wuk kiajwe.

²⁶Awo'ate, je pajna'a ka ano kisie', paj ka atejwa'ana'a japa aka wikiniet'aj ti jakat'i'n atepe'e.

²⁷“'Najanayi siuniwa inamtis t'ipi ti iyo'ate, Ká akalaja'n.

²⁸Jajwi'lase'm, siunie ti i'yejne'n jana i'nioki ti itiliaja ka 'noyi'ni, ijiate nak pajk'i ta'a ti yiji ni jlosik ti 'yu'ni, ti iliaki niwa inamtis.

²⁹“Siojona atate to'm ajweyeje ti jant'emi'na, ton kisie', tate. Ja 'nakayeyijna'a ka je i'wanjli wita'm ka intatajtaja nak inlaye 'wet laj jlaja'.

³⁰Siunie akio' ti ajweye ka nakaye ka int'emi'na ka awoyi ni ake', esiti, tate. 'Yina je 'es pet ka 'wanjliye wita'm ni 'asie'n ka intatajaja'm nak inlaye 'wet ti laj jlaja'.

³¹“Kiak iyo kiakjin tiwokipi'iji 'ate, I'nio' ti iliyi jana asejnia, 'esiji ka neni kiojyi siunie imp'esinik, jikie' ti ijwi'il ti 'yaka ti inile'.

³²Ya'am awo'ate, Siuti janakaye jana je inilesanijiyi jitieyi'i ni ayinie, janak jla'm ijiate kanleyi. 'Yina siuti ja lajak'i pa ka intajlata, jlam ti it'imina ti yija'm naka ijnoski'la. Jlampet siunie yiyi janak asejnia ti tiliki'ni, kia'iyojliyi pet, yija'm naka ijnoski'la.

³³“Kia'iyo 'najanayi siuniwa tiwonat'iyipi papo sitise'l ti iyo'ate, Ká akelitiene wek ni Saka'niona ni a'lej ti jiwejna'm ti k'iejliyi pi jiwo ka ekiajle.

³⁴Jayo'ate ti jajwi'lase'm, Ke etijnape ni k'iejliyi siuti jiwoyeyi niwa amtis. Ke etijnape ni poli, 'yina ti nak Sinia' ji'wet ti anechiyas,

³⁵ni'ne ka nakaye ni ajnat, jisietis ji'wet pet naka, ni'ne ka janakaye jana Jerusalén, siojona isi' ti isie' ti jlam ti anechiyas.

³⁶Ni'ne ka janakaye jana asetik ka ayeyiji ti kia'iyo jiwoyeyi ni as'lej ti ijiatk'i siunie jiwoyeyi, 'yina ti je 'najanayi paka wonayiji, tiwet'ianaja ka injwanjlik'i niwa as'wole ka alemijietk'i, ni'ne ka asojwanitk'i.

³⁷Siupi as'lej jawonayi, ti jawoye'ate, Ji'yu, 'esiji ka je aka'm ape'e. Jlam ti jawo'ate, Je'e, kiak jawo je 'es ka akama'yi ape'e ti jiwoye'ate, Je'e. Siuti jwamjla'a ti jit'iasape ts'ijiye, nak tajle pet ni imosik.

³⁸“Jipe'yaye 'neje siuniwa inamtis t'ipi ti iyo'ate, Siuti akiecha jantaja'm jana atate, kiak wone pit tajanitia'm jana jitiete. Jlampet ti akiecha akinte janla'ne, kia'iyojliyi jikinte alana'ana'a pet ni akiecha, ti ja atayiti.

³⁹'Yina jayo'ate, Siuti akiecha kiak iyo'na ti je 'es ni yi'na'm, ká atayiti. Siuti akiecha impaj ak'iolo'we 'niji ajweyeje, janekiajle'e ka impaj ka atomatayijna'a ilia'm ni ak'iolo' to'm a'lame.

⁴⁰Siuti po' na iyo ka jna'la ni a'wu' sekyi'i ijnoyiji siunie i'ye'en napo jitis wus, ejlowek 'wanjliyi ka injwane'e ni a'wu' ni ji'wujyi'ni.

⁴¹Siunie tokis ti 'yijie'na'm ka atejlia pa k'iejliyi, pi k'iejliyi'i pa iyo ka leyi'i, ni'ne ka injwanjli pa kilómetro, siuti a'am ja akajmatayijna'a wat ape'e, siupa ja e'neje'n.

⁴²Siuti akiecha jant'ajla'm pa k'iejliyeyi ke ejna'm, siuti po' ni akiecha ti in'yaseje'n pi k'iejliyi pi iyo ka nekiaj'la pet kan'wenta ka pajata, wejna'm.

⁴³“Kia'iyo jipe'yaye 'ne'je siuniwa inamtis t'ipi ti iyo'ate, Emi'n ni akiecha, jlampet ni siunie teje'yi ajelia'm nak ja ine'waja'm.

⁴⁴Siuti ti ya'am jajwi'lase'm ti jayo'ate, 'Esiji ka emijne'n napo teje'yi aselia'm, 'ajlanajyi'n pet siupapo ti wuj ti inlakiye siunie iyo'nase ti teje'yi aselia'm.

⁴⁵'Yina siuti jawoyeyi niwaka, siunie Asna' ti yi' poliyi inwoyeyijna'a jilisa'ase'm. Jlam ti i'nisati ni kilie', jlam 'neje ti ijliu' ni pejla ka 'esieyi napo i'nio' 'wanjli ka kia'iwo ka je inses, siu'neje napo isis kia'iyojliyi 'esi.

⁴⁶Siuka ja 'yenijits'i siunapo i'nio 'nama'ase ka emina', ¿tempa ja as'wajieta pet? Jlam'ne jike' kiak iyoyi, siunapo isi'm ilia'm niwa inkat'ijnieyejes pet.

⁴⁷Siu'neje ti napokata jla'am as'nayi ijwienjli ti jitijwilayi'ni ti jini'wenayetaja, ¿ma 'wena t'i jloyejiap napo asa'm ijia? 'Yejne'n, siunapo je t'ekiyiji ni siunie je 'es ti iyoyi tiwet'ianaja ka 'wena joyejiap'e ni siunie iyoyi.

⁴⁸Siunie iyo ni Asna' yi' poliyi ti 'es, kiak niwonayi pet.