Read Iyojwa'ja Chorote San Mateo 7 Bible Online

San Mateo 7 - Iyojwa'ja Chorote bible

San Mateo 7

¹“Ká alaki ni akiecha pi k'iejliyi ti iyoyi, ja 'nakayeyijna'a ka Sinia' je in'ye'en pet siupi ates iyoyi.

²Siupi jiwonayi napo as'lejwas, Sinia' kiak janwo'nase kan'yenta ni ates iyo.

³¿Yot'iyi'ni ti ataj je ilie'ne ti ji'yen'ni ni akiecha jitiolkiot, 'yina jlam'ne je 'esijiyi? ¿Jlam'ne ka ataj ene pet 'ate ni siunie a'lawa, atolkiot pet, ti jla'm ijiate ti wujwe?

⁴¿Siu'neje ti jiwone 'ate ni akiecha, Kamana'a jation kisie'e ni atolkiot? Jlam'ne pet ka ani'yejne'n, ti po' ni yiji jana atate, ti jla'm ijiate ti wujwe.

⁵¡Jikalakijienat'itie! Ninajnat ka ti'yenaja ak'ioye ni atolkiot, ti jla'm ijiate ti wujwe, ni a'lawa ti yiji jana atate, ja 'nakayeyijna'a ka'wenayijna'a ti jaton kisie'e ni akiecha tiolkiot, ni jop jlosili.

⁶Ká awejna'm niwa alenas siunie ti t'otata k'iye pa Sinia', 'lojwinie'e ka inta'yi ajelia'm sekyi'i ka inokieja'nina'a sekyi'i jank'isate'n ni 'asie'n. Ká atatayiji niwa ijnisies jitio' siunie k'iejliyi ti 'es, 'lojwinie'e ka int'ask'i'ni.

⁷“'Ajlayi pi Sinia' siupa k'iejliyi pi jisitiana, 'yina janwe'nase'm. Woyejyi'n, je ijiat ka je a'wena'. 'Yasayi'ni, 'yina ja'najlinit ask'ioye.

⁸Kajeyepa ni siunie i'nio' ti'yasane, yi' kiojyi. Jlampet ni i'nio' ti iyojyi'n, i'wi'in kajeyepa. Jlampet ni i'nio' ti i'yase'ni pi Sinia', nak Sinia' ja'najlinit k'iye.

⁹“¿Ten jiat'eje pa jikiowe jant'oniti pa jlas, siuti jlas yapijyin'ni jana woye, ka inen jikiojyi jana sisaj,

¹⁰ni'ne ka t'ajlijyin'ni pa si'yus, 'yina ka nena kiojyi ni injla?

¹¹“Ijwil ka woyeyi ti asa'am ti je insisie', as t'ajla'a'm pa k'iejliyi ka kia'iwo ka jiniliakie pa ka ena kiojyi. ¿Tepi iyo pi Asna' pi yi' poliyi? ¡Jla'm ijiatayi jla'm ti 'yu'we ti janwejna'm ni siuniwa wask'i'nelaja isis siunapo t'ajle!

¹²“Siunie inteliaja ka a'lejwas kiak iwo'naja, kiak jawonayi'iji pet napo a'lejwas. 'Yina niwak 'yijie'ne ni i'nio' ni Moisés jika'neyasajnaye, siu'neje ni jika'neyasajnaye iyo papo Sinia' jijwejlanawos t'ipi.

¹³“Noyeyi ni 'wuk kiwet ni je isaja'm. Je istieyi pet ni 'wuk kiwet siu'neje ni 'nayi ijioyi nak inlaye 'wet, isajk'i, 'yina je pini' napo i'nio' iniuk'i naka.

¹⁴'Nak k'ieyi wek ni siunie 'wuk kiwet siu'neje na 'nayi siunie ijioyi janak in'wasankiye, jla'yi ti ti'nita, je 'loj napo i'nio' iniuk'i naka.

¹⁵“Joskiyeyi siunapo je ijiat ka injwejlanawosa' ti ijwil ka intajlisi pa Sinia'. Ti jla'm initewitanisik'i niwa 'wolepo' ti isis, jlam'ne ki iyo niwaka, niwaka k'iwajlas niwa jwesis.

¹⁶Je ijiat ka je intant'iejayi ka 'wenatiena'a ni jikijmaye iyo. 'Yejne'n, siuniwa ts'ejnietio' je janak jlel po' jlaye, ni'ne ka siuniwa higok jla' je janak istiek ka jlaye.

¹⁷'Yina kiak iyo'ni siojona a'la' ti 'es, isis pet niwa jla'. Siojona a'la' ti je 'es, je isis pet niwa jla'.

¹⁸Siojona a'la' ti 'es, je ti'wena ka je inses niwa jla' ti poyeta. Kia'iyojliyi siojona a'la' jana je 'es pet, je ti'wena ka inses niwa jla' ti poyeta.

¹⁹Yi'i japa a'la' ti kia'iyo, ti jla' je isis, tijwajaki sekyi'i ti titietajayi jwata'm.

²⁰'Yina kia'iyo ni siunie ajwe'el, napoka ni jikijmaye ni iyonisi nak jant'emina ti jantant'iejayi.

²¹“Ja ke wikie'eyeyi siunapo iyo'ate, ti sijwelis, 'Yaka'niona, 'Yaka'niona, ka ijnoyisi ni Sinia' jika anechijiayas. Janapokataja jla'am siunapo iyo ni Inia' ti yi' poliyi iyo ka woyi.

²²Siojona jloma ka inetiejenie'e, ka ti'yenajta napo i'nio', ja ke piniye napo i'nio' jawo'ate, 'Yaka'niona, 'Yaka'niona, sampe ti akinieje ni e', ti awokieyi samtikie' siunie Sinia' ijwilts'e'm ka yoki. Etinajpe it'iminape ti anojwatak'i kisie'e jawa imose'l yijits'i japo i'nio'. Nakape'eje ti it'imina ti akajlaje ti alesanaja, niwak siuniwa ti yisi'lietk'i napo i'nio'.

²³“Japakayeyi ti jayo'ate ti jasiujlie, Je sitiant'ie'ase. ¡Tajlak'i'm ti asa'am ti jiwoyeyi ni je 'es!

²⁴“Ka ne'yi pa siunapo ipi'ya niwa yamtis, jla'yi ti iyoyi. Iyo'ate siunie i'nio' ti ji'wuk 'yita ape'e japa sisaj.

²⁵Na'am ni pejla, siu'neje na tewuk ti i'yujlietajk'i pijia'm. Na'am ni jlajwu ti wujwi, 'yina je ya'm isia'm, lapakawo ti t'etaja ape'e janak sisaj.

²⁶Jlampet siunie ti ipi'yayeta niwa yamtis, 'yina ti je its'iuk'i'm siunie awoyi. Nak kia'iyo pet siunie i'nio' ti je 'yijen jlosiki, ti ji'wuk 'yita ape'e ni jolo'.

²⁷Na'm ni pejla, na'm ni i'niat ti i'yujlietajk'i pijia'm, siu'neje na jlajwu ti wujwi. 'Yina siojona 'wuk ya'm isia'm, sekyi'i netiajne'n.”

²⁸Ti Jesús iliyeyi ti tamti, wuj ti yisi'lietk'i japo i'nio', kajeyepa ti 'yaka pi iyo ti iniajmat pi jijweye iyo, je iyoye 'ate siojopo jiwos pet pa Moisés jika'neyasajnaye, ti ijwil ka inka'neyasajne'n.