Read Iyojwa'ja Chorote San Mateo 8 Bible Online

San Mateo 8 - Iyojwa'ja Chorote bible

San Mateo 8

¹'Loj papo i'nio' yamk'i ja Jesús, ti 'nesat'ipi ti taj'l ape'e japa tikijnaki.

²'Nesat'ipi pak siupa i'nio' jiwatis jitio' po', yiyi ti t'akosayi kiajwe, ti iyo'ate: —'Yaka'niona, ka woyi, ts'ajane ti 'najane pi jiwone ka netiajnat 'ni iwit'ia.

³Jesús sekyi'i isiesat'i'yijpe, ti iyo'ate: —Awoyi. Janitiajnat ak'ioye. 'Yina ti yiyik'i ti kia'iyo, 'yaka jla'm iwo netiajnat t'ipi siupuwa ijiok'i'ni. Ijiate 'es'ne pi i'nio'.

⁴Jesús kiak iyone'ni 'ate: —'Ye'en, ká ajwelna'a siukia jiwoyi. Janajataja jla'am ti ja ak, ti ja joyi ni pa'yi, ti jani'wenkine. 'Yina toni siupa jawo 'wajieta' pa Sinia' iyot'iyipi ka tiwoki pa Moisés, ja 'nakayeyijna'a ti ja wikie'eyeyi napo i'nio' ti jan'we'en ti netia'n ki iyo ki awet'ia.

⁵Ti Jesús yiyet'ijiampe jlajak isi' Capernaum, siupa tokis jika anechiyas Roma jlele ijioyi ja Jesús ti inip'elisine ti iyo'ate:

⁶—'Yaka'niona, 'yakawo ja je inippijiame, je t'onk'i. Wuj ti yejlat'ni siunie jikie iyoyi.

⁷Jesús isiujlie ti iyo'ate: —Jayikna'a, ti jajwiejiet.

⁸'Yina iyo'ne 'ate pak tokis jika anechiyas: —'Yaka'niona, wuj ti je ani'nojonit'i ka 'o kiajwe jlaja i'yuk. Kantitie wekie pa a'leja paka ajloyi, 'yina siojo 'yakawo ja 'esie.

⁹Siuti ya'am kia'awo pet 'yaka anechiyasas po', ti a pet kiajwe, 'yina kia'iyo 'yakawos po' ti yi' isiajwe. Jak je iyoyiji ti awone 'ate ni ijwienjli, “Maj”, je t'o'ni. Siuti awone 'ate, “Jomet”, kia'iyojliyi. Ni'ne ti awone 'ate ni 'yakawo, “Lesane siu'nie”, ilisanayi.

¹⁰Jesús kawojlijinipi ti ipi'yayejampe, iyone'ne 'ate siupapo i'nio' yamk'i: —Ijiatk'i siunie jayo ti jajwi'lase'm, ti je a'we'en paka Israel jleleye ka kia'iwo 'ate siu'nie, ti ijiate ti jitienkiujnieye po'.

¹¹Jajwi'lase'm 'neje ti ja 'lojwa siunapo i'nio' tal 'niji taj'le ni kilie', siu'neje napo tal 'niji ijio'we ni kilie', janam'ni ti jankijwanisi ni Abraham siu'neje ni Isaac, jla'yi ni Jacob ti jan'yekiujni'n, ts'iji yi'i ni jika anechijiayas ni Sinia'.

¹²Jlampet siunapo i'nio' ti Sinia' iniajnat ti iyotaja ka ine'ne ni jika anechijiayas, napok intatayijinie'e ni ajnatiok ti yi' kisie'e, siunie jane'yi niwa lajlasa ti jawujwa ti ja a'tieja.

¹³Sekyi'i Jesús iyone'ne 'ate pak tokis jika anechiyas: —Maj ka api. Je ijiat ka je 'nakaj. Lapakawo ti nak it'imina ni atankiujnieye ti 'es ti jipejlanit'i awa'm. Pakayi ti Jesús kiak iyo, pak tokis jika anechiyas jikawo 'es'ne.

¹⁴Jesús ijioyet'ipi ji'wete ja Pedro. Pakayi ti i'winaja jlaja jikant'e ja Pedro ti je inippijiame ti inlayetiok yi'i.

¹⁵'Yina jikio' 'nejie'e pa isiets'e, ti 'esiet'ipi, nojwayi ape'e ti kio'yok'i. Iniyet'ipi pijia'm jla'm iyonayi'ni 'ate ti ilisane k'iye pa jantojw ja Jesús.

¹⁶Jlampa k'iejli kilie' yamat'ipi isia'm, tikiniejat'iyiji'nijpe siupapo jitiej je isis. Etiet'ipi ti tamti'yi papo, sekyi'i yamat'i'nijpe puwa imose'l yijits'i papo i'nio' ti iliaki. Ijwiejiete'n wikie'eyi siupapo i'nio' jiwet'ia po'o.

¹⁷Sekyi'i ti jiwekie'aja ti 'yaka siupi iyot'iyipi pa Sinia' jijwejlanik jiwo Isaías ti iyo'ate: “Jla'am ti ijialts'e niwa ts'ajwes t'a'ti, siu'neje niwa siliayejes.”

¹⁸Ti Jesús i'wina ti 'loj papo i'nio' nojweje, sekyi'i iyone'ne 'ate japo t'eyasajnas: —Naja'ni ja tiuma i'niati 'wechaja.

¹⁹Siupapo jiwos pa Moisés jika'neyasajnaye, ijwienjli'ne siupi ijioyi ti iyonat'iyijpe 'ate: —Inka'neyasajnawo, jajojwi pa jajojwi, 'yina akajli ti jayik ajak'i.

²⁰Jesús isiujlie ti iyo'ate: —Siuniwa yosis po' niwa jijwa'al, siuniwa ajwejnas jlopis po' jla'am, jlampet ni I'nio' Jlas laj ji'weta' ka ine'yi ka ininop'it ka ima'a.

²¹Po 'neje siupa jikiecha, ti t'eyasanik jla'am, ti iyone 'ate: —'Yaka'niona, ejlokiu' janiajnat kiu' ka ip'io'ne ki ika kijil masa.

²²Jesús isiujlie ti iyo'ate: —Ejlowek, naj na'm ijyik'i. Ena'ate pet siunapo 'yajle'n ka imp'onits'i kiapo ijia ti 'yajle'n.

²³Jesús tisiojmayet'ijiampe japa kasejkana. T'eyasajnas yamat'ik'ipe ti yama.

²⁴Pa yit'iyipe jikiowe'e pa i'niat jlajlik'i ti yiyet'iyipi siupa jlajwutiok, ti pejla ijlinik'i. Siuti i'niat itiyejaja'm sekyi'i ijliena'ne ka 'no isia'm japa kasejkana. 'Yina Jesús imia'a pakayi.

²⁵Yamat'i'nijpe papo t'eyasajnas ti 'yujwatis'ni. Iyonat'iyisijpe 'ate: —¡'Yaka'niona, kas'manit. Janajk'i isia'm!

²⁶Iyo'ne pet 'ate ti isiujlie: —¿Yot'iyi'ni ti ijnots'inajyits'i? ¡Ijiateje napo yi 'ne 'nakayi jla'am ti laj astankiujnieyeja'! Sekyi'i ti iniyet'ipi pijia'm, tamtiyet'i'yijpe pa jlajwu siu'neje pa i'niat, sekyi'i ti 'yakamaja t'ipi, 'yakama ti 'yakama.

²⁷Kawojlijinit'iyisipi japoka ti i'winis ti kia'iyo. Iyoyet'iyispe 'ate: —¿Tent'i 'ni siu'nie i'nio'? ¡'Yina ti jlajwutiok siu'neje na i'niat jlajlik'i je 'yaka'm ape'e ti ijliuye!

²⁸Ti Jesús yiyet'iyipi siupi ijioyisi, i'niat ji'wechaja, siojopa ajnat jle' iyo'ate Gadara, times papo i'nio' jitiej je isis ijioyi, ti tajlisi puwa a'no'ol. Wuj ti jwesis papoka. Lajk'i papo ka injweyisi ka inoyisi'ni siupi yi'i.

²⁹Ti yiyet'iyisipi ja Jesús, kiak t'ipa iyoyeyisipi ti tank'i wita'm: —Sinia' jlas, ¿yot'iyi'ni ti je kasse'nate? ¿Jiwot'iyimi ka poye ta'a paka wonts'e, ti ji'nis 'yina ti je yijliyi'ijyi siojona jlomaye?

³⁰Sek k'iejliyiji siupa yiji puwa ijnisies jitio', ti its'ipk'ijin'ni.

³¹Siupuwa imose'l yiji papo i'nio' inip'elisinisi'ni ja Jesús, ti iyoyits'i 'ate: —Ka kassottiena'a kisie'e, kasjloyinie'e niwa ijnisies jitio' ka 'yukiamk'i.

³²Jesús iyo'ne 'ate: —¡Maye'ni! Tajlayisia'm papo i'nio', 'yuyejamk'i puwa ijnisies jitio'. Je paja wat ti yamat'i'nijpe ti t'osi'ni ti namayisk'i isia'm ti taj'l ape'e japa tikijnaki, sekyi'i tisiojmayesiaja'm japak i'niat. Sekyi'i 'yajlen'ne lapakawo ti yimk'anaja'n.

³³Siupapo i'nio' i'yena puwak ijnisies jitio', ti i'winayis ti kia'iyo, wuj ti jnots'ijnits'i. Yamat'i'nijpe ti t'osi'ni, ti yiyet'iyispe isiyi, sekyi'i ijwilajamk'i papo i'nio' siupi iyo pa jiwet'ia puwa ijnisies jitio', siu'neje pi iyo papok jitiej je isis.

³⁴Papok i'nio' 'yakapajlat'iyisipi ja Jesús. Yiyisi ti kiak t'ipa iyonayisipi 'ate: —K'iuts'e'm, siunie jayona'aja, ¡'esiji ka atajla'm siujlie'e saka ajnat!