Read Iyojwa'ja Chorote San Marcos 1 Bible Online

San Marcos 1 - Iyojwa'ja Chorote bible

San Marcos 1

¹Kiak iyo ti 'nelanjie'e ni inka'niye ti 'es ti ijwi'l ni Sijwajieti Jesús Sinia' jlas.

²Siupa injwejlanik jiwojimpe Isaías 'yitjini'ipe ti iyo'ate: “Ajlo' ni ika'niyewo, ti jana'an ak'ioye, ti jawakajlanit ta'a ak'ioye ni a'nayija'.

³Pesieje ni jla'lap ni i'nio' to'm ape'e ni ajnat mami'yi ti ta'an ti iyo'ate: Wakajlanitie ta'a k'iye pi ji'niayija' ni Saka'niona, lajlats'i k'iye pi ji'niayi ti jajnajyi.”

⁴Pojompe pi i'nio' jle' iyo'ate Juan, yi'i pi ajnat mami'yi ti iniejiejne'n papo i'nio', iyoyi jika'niyejayiji papo ti iyo'ate: —Woye asosikis ink'iejyisa', janiejyinajyi'n, ja 'nakayi ti Sinia' ja ke inwoyi astesayi niwa askeyis.

⁵'Loj papo i'nio' tajle janak ajnat jle' iyo'ate Judea, siu'neje papo tajle janak isi' Jerusalén, ijioyisi pa Juan sekyi'i ti ininekiajlaja'n. 'Yina Juan ijioyiji'ni nak tewuk jle' iyo'ate Jordán ti iniejiejne'n.

⁶Siupuwa jikiayi kosoki'l po' ji'wole, puwak Juan iyojinijpe ji'wuyeye, jlam pet siupa jika'wak a'naj, kio'ol siu'neje ni inkayik ni itiujw pa yi'i.

⁷'Yina iyo'ate siupa jika'niye: —Po' ni i'nio' 'wanjli isia'm ti ja'nejts'eje, 'yina nak jla'm ijiate jla'am ti jijweye po'. 'Yaka'm itipe'e, ti tiwet'ianaja ka 'yakajli ka jisieti t'aka iliejnits'i.

⁸Siuti ya'am anajienajyi ni i'niat, 'yina jlampet ti jla'am kiak ja ke inwo, janajienajyi pet ki iyo janak siojona Sinia' jikimet ti 'es.

⁹Puwak jlomas ti jlampa 'nesajimpe ja Jesús ti tal 'niji yi'i jlajak ajnat Nazaret, yiji jana Galilea, sekyi'i'ne pa Juan ti iniejie'n ja Jesús yiniji jak tewuk jle' iyo'ate Jordán.

¹⁰'Yina siuti iniuyejempe kisie'e, Jesús i'winajanipi ni poli ti 'ajla'm, sekyi'i ti i'wina ilia'm siojopa Sinia' jikimet ti 'es ti na'm isia'm ti ijioyi, 'yiniye ni ojwo'.

¹¹Pesieje'ni pi ina'lap ti tom poliyi ti iyo'ate: —A'm ti yajts'a'm, wuj ti ts'ama'a, 'yina wuj ti ts'ajka'm.

¹²Jlampa yamajampe 'niji kiaka, siojopa Sinia' jikimet ti 'es ti yamajanipe ja Jesús ti ijioyi 'niji yi'i pa ajnat mami'yi.

¹³Paj ti jika jlomas cuaréntaja pa yi'i ti yiji puwak jlele pa ajnat siupuwa jwesis, lapakawo ti imosik ijyijlit. 'Yina Sinia' jijliujwajnas poli jlele yiyeyisi pet ti iniuyisieje.

¹⁴Jlampa t'otiejajampe a'laja'm pak Juan, Jesús ijio 'niji yi'i jlaja Galilea ti iyo jika'niyeja' kiwa Sinia' jlamtis.

¹⁵Ti iyo'ate: “Yiyi jla'a jloma, siunie Sinia' jika anechijiayas je to'ilia'm. ¡Woye asosikis ink'iejyisa'! ¡Apilieyi ni Sinia', kima'yi ilia'm siu'nie jika'niye ti 'es, ká akakiuye!”

¹⁶Ti Jesús yikiajlen'ni jikiusk'i siojopa tewuk iliyi yiji jana Galilea, sek i'winaja'nipe ja Simón jla'yi ja ji'yini Andrés ti iyo'ni, ti k'iejlit'i itietistijaja'm puwa jika 'nijiatio'.

¹⁷Jesús i'yasajanipi ti iyo'ate: —Joniemit, nama ijyik'i, jayojwana pet wotasayi napo i'nio'.

¹⁸Jlajmi'ni iyoyisie'nipe 'ate, jlam sek iliyeyisi'i wek puwa jika 'nijiatio', ti yamajanisk'ipe.

¹⁹Siupa ti yamajampe wat ts'iji, 'yina sek i'wi'ne 'ne pet ja Santiago ti jla'yi ja ji'yini Juan, ti yetijlis'ni puwa jika 'nijiatio'.

²⁰Jlam sek iliyeyisi'i wek pa jiniayis Zebedeo, ti Jesús tanajanipi, iliyisijap papo jikawos yi'i japa jika kasejkanayis. Ti yamisiejenk'ipe ja tane.

²¹Jlampa 'nesajan'nipe ja Jesús ti jla'yis siupapo yamk'i, 'niji yi'i jlaja isi' Capernaum, siojopa jloma i'nio 'wanjlijyi'n, Jesús ijioyi siojopa Judíojos t'ajla'wet ti taka'neyasa'n.

²²Siupapo i'nio' ti its'iuyisie pa iyo ti taka'neyasa'n kawojlijiyinisipi pa lapakawo ti 'yakaja'a pa iyo pi jijweye ti tamti, 'yina siupapo taka'neyasane pak Moisés jika'neyasajnaye je ijlien'ni ti ijwi'il ka inka'neyasajne'n pet.

²³Jlampa iyoyejempe 'ate siupa i'nio' jitiej je 'es, ti 'yuyi papo ti yi' kiajwe japa 'najla'wet, tanajan'nipe ti iyo'ate:

²⁴—¿Yot'iyi'ni ti jit'iuts'e, Jesús Nazaret jlele? ¿Jlamt'e jiniamats'e ti ja kasnetiajnat? Kastant'ie'a, ti a'm Sinia' jlasts'a'm ti i'nes.

²⁵Jesús isilaja'ne siupi yiji ti iyonajanipe 'ate: —¡K'iu'wate, tajli siu'nie i'nio'!

²⁶Sekyi'i ti tajwiyeje'n, jiyel netian'ne ti iniuyejempe kisie'e siupa yiji.

²⁷Kawoyisjlijinipi pa jla'm ini'yena wek papo i'nio', 'yina ininekialjliyisi siupa ti iyoyits'i 'ate: —¿Tent'i 'ni siu'nie ti kia'iyo? ¡Ink'iet'e siu'nie inka'neyasajnaye, 'yina ti je jlase' ni jijweye iyo 'ni Jesús, kajeyepa ti siuniwa imose'l its'iuye siuti kia'iyo ijliuye!

²⁸Jesús siuti t'ijieyijayi siupi iyo, ta'a ti itijwi'n ape'e jlajak ajnat Galilea.

²⁹Ti iniuyejenispe kisie'e ti tajlis kiajwe japa 'najla'wet, Jesús jla'yis japo Santiago siu'neje ja Juan ti ijioyis ji'wete japo Simón jla'yi ja Andrés.

³⁰Siojopa Simón jikant'e je 'es'ni, inlayetiok yi'i, sekyi'i ti tijwelaja ja Jesús.

³¹'Yina yam'ne ti ijioyi siupa yi'i, yiyi ti isimajampe jikio'yi ti inijien pijia'm, tiwet'ianaja ka jlomas 'nak nojwaja'm puwa ka inejyi ti netiana siupi iyo'ni ti kio'yok'i. Jla'm iyonayi'ni 'ate ti jlak iwijna'm papo ti ijioyi ti iniye pijia'm japaka.

³²Ti k'iejli ajnalis wujk'i'ni, wikie'eyi siupapo je isis, siu'neje papo jitiej je isis, tikiniejeje ja Jesús,

³³'yina pajlat pijiame papo i'nio ti nojwisi jika 'wuk kiwit'e japa 'wuk.

³⁴Wikie'eyi siupuwa jikie'el iyot'iyipi papo i'nio' ti initiajnat, siu'neje ti je pini' puwa imose'l yijits'i papo i'nio' ijiutk'i kisie'e. 'Yina je iyo ji'lijaye puwa imose'l lapakawo ti itiant'iejesi.

³⁵Ti k'iejli mot, ajnaj 'wanjle ajnat'e, Jesús ti iniye pijia'm, yama ti ijioyi siupa ajnat laj i'nioye'e ti iyo t'ajlayeja'.

³⁶'Yina pajk'i'nine ti yamajan'nipe pet ja Simón siu'neje papo ijia jla'yis, ti ijiutisik'iji'n.

³⁷Siuti ijyijlayisi, sekyi'i iyonisi'ne 'ate: —Wikie'eyi japo ti inwoyistajyin'ni.

³⁸Jesús isiujlie ti iyo'ate: —Naja'ni jajioki siuniwa ajnatis je tose, jayoki samtikie' siuniwa Sinia' jlamtis ti isis. 'Yina ti niwak it'imina ti 'nak ajo'we.

³⁹Jesús itijwits'i puwak 'najla'wetis yiji jlaja Galilea ti iyo jlamtikie' niwak Sinia' jlamtis ti isis, siu'neje ti iniujwank'i kisie'e puwa imose'l.

⁴⁰Tajla 'niji pa i'nio' inwatis jitio' yi'i ti ijioyi ja Jesús, sekyi'i t'akosjlete'l itiyeyijin kiajwe ti inip'elisini ti iyo'ate: —Kawotajanie'e ka netiajnat its'ioye siu'nie iwit'ia ni it'imina ti Sinia' 'nachik'i'm, i'nio' kia'iyojliyi.

⁴¹Jesús ip'ilisi'n sekyi'i iyo'ne 'ate ti isiesa'a: —Awoyi. ¡I'nes!

⁴²Yiyik'i wek siupi iyone, ta'a'ne ti netia'n siupuwa jiwatis, 'yina 'es pak i'nio'.

⁴³Jesús ta'a ti ijliu', sekyi'i iyone'ne 'ate ti ijliuye:

⁴⁴—'Yejne'n, ká ajwelna'a siunie jiwoyi ti i'nes, ja najataja jla'm ti ja ak ti jajoyi siunie pa'yi, 'yina jatonieyinie'e ni ojwo' ti jawo ji'wajietayi pi Sinia', kajeyepa ti i'nes, iyo ka tiwoki ni Moisés jika'neyasajnaye, 'nakayeyi ti jan'we'en napo i'nio' ti i'nes.

⁴⁵Siuti yama pak i'nio', 'yina 'yaka'm ape'e siupi tiwonataja, sekyi'i ijwi'il siupi iyo ti 'es. It'imina ja Jesús ti je yiye'ni isiji, 'yina ijio'ni kisie'e yi'i siupa ajnat laj i'nioye'e, je iyojliyi papo i'nio' ti t'ijieyeyisi. Ijioyisi'ni wikie'eyi siupapo tajlits'i puwa ajnatis.