Read Iyojwa'ja Chorote San Marcos 11 Bible Online

San Marcos 11 - Iyojwa'ja Chorote bible

San Marcos 11

¹Ti Jesús siu'neje japo t'eyasajnas ti joye kaneyisi siujlieja Jerusalén, siojowa isi'il Betfagé siu'neje jlaja Betania je tosape'n, yi'i jlaja tikijnaki jle' iyo'ate Olivokiet. Sekyi'i ti Jesús ijliuyejempe japo t'eyasajnas times,

²ti iyone 'ate: —Maye'ni, jlonieyi wat siojose isi' je kastojwape'n yi'i ni jajioki, 'yina ja 'oyeyi wek ka sek a'wenaye'ena'a ni malekiatiok jlas ti mawat toskijli'ijyi, ti tilie'nitie'e seka'a. Sek jane'yi ka lanayejienie'e ti janamayik'i.

³Siuti ja poye pa jawo'ate ti jan'yasajyi'n, “¿Yot'iyi'ni ti jilienajyi?”, sek jane'yi ka kiak awonayeyijinie'e, “Saka'niona isitia'n kane kiu' ape'e, iyo ka inekialmet ka pajata.”

⁴Ijiatjliyi yamajan'nijpe. Jak je iyoyiji ti yiyeyisi pa jika'wu jlaja isi', 'yina sek i'winayits'i pak malekiatiok jlas yi'i pa 'wuk kiwet. Sekyi'i ilienayisi.

⁵'Yina siupapo ti i'winayisi, sekyi'i iyonisi'ne 'ate: —¿Tepi jiwonayi ni malekiatiok jlas ti jilienajyi?

⁶Sekyi'i ti kiak iyonayisi ti isiujlisie: —Saka'niona isitia'n kane kiu' ape'e, je ijiat ka je inekialmet, kiak iyo'ojyi. Ijiatjliyi tiwenajam'ne ka inekisiji.

⁷'Yina ti 'nesayisiji, iyoyeyis jika apekiaye puwa ji'wuye jlamis, sekyi'i ti yamayisi ja Jesús kane'yi ape'e pak malekiatiok jlas.

⁸'Yina siupapo ti je pini' siupuwa ji'wuye jlamis its'ink'i pa 'nayi ajnat'e, ijia papo isima siupuwa a'la'wole ti tajlisi 'lane, ti kiak iyonisi ti yinisk'i siupa iniu'we.

⁹Jak je iyoyiji siupapo iniank'iye, siu'neje papo 'wanjlejap isia'm iyoyejimpe 'ate ti tanisi ape'e: —¡Jiwunitieye tena'a siunie ti Saka'niona ji'lij iwijna'm! ¡'Esiji ka Sinia' jikap'ijliuskiye ti 'es ine'ne!

¹⁰¡Wunitie siupa sitis t'ipi David jika anechijiayas ti ja'nets'e! ¡Wunitie pa Sinia' ti yi' poliyi!

¹¹Yamaja'm jlaja Jerusalén ja Jesús, 'yina yamite jlajak 'najla'wet wuj. Itimeje ti yikiajli'ni ti jla'm iyo ka'we'en. Sekyi'i ti yama ti yapi 'niji yi'i jlaja Betania, ti jla'yis japo t'eyasajnas itijwa'm sikioye times tom'niji, lapakawo ti no'otieyi pakayik'i.

¹²Yit'i'yipe'eje japa jloma, ti tajlayisia'meje jlaja Betania, Jesús inil'lia'n pakayi.

¹³Tojwe pa k'iejliyiji pa yi'i japak higok ti i'wine. Jak je iyo ti yiyeyi, i'yent'itiejpe ka jla' poye wat, 'yina ji'wole 'nejie'e ti yiyeyi ti i'yentaja'm. Kajeyepa ti je yiyi siupa k'ie'ni ti iyoyeta jlaye puwa higok.

¹⁴Sekyi'i iyone'ne 'ate ti tamti'yi japak a'la': —¡Ja pajana'a ka titiuwa puwa aye! Jak je iyoyi siojopo t'eyasajnas ipi'ya pakayi.

¹⁵Siuti yiyeyisi jlajak Jerusalén, sekyi'i Jesús ijioye kiajwe jlaja 'najla'wet wuj, pakayi'ne ti ijiutk'i kisie'e siupapo ti takawejnajne'n siu'neje papo tik'iajwajyi'ni, 'yina yajmank'i isia'am siupuwa tejeyisi ape'e puwa jika wikijniest'ejes papoka i'nio' ti jilis its'iuyetis'ni ji'wet'e, siu'neje puwa ji'wetis puwa ojwos ti iwin'ni.

¹⁶Siu'neje ti je yi'nate papo ka k'iejliyeyi paka intonis'ni ti 'yuyetajasi.

¹⁷Sekyi'i ti ijyijlitayi ti janka'neyasa'n, iyo'ne 'ate: —Siuniwa Sinia' jlamtis yiji ni ji'wet iyo'ate: “Siujlie'e i'yuk, jle' ja tiwonaja 'ate, “'Najlaye 'wet jak je iyoyiji wikie'eyi siunapo i'nio' ti yi' ape'e 'ni ajnat jajnoyi ti iyoyeta t'ajlayeja'.” Jlam'ne ni jiwonayi, ti jiwoyeyi kajlajnatas ji'wukie'.

¹⁸Siupapo pa'yijis jika anechiyasas siu'neje papo jiwos pet pak Moisés jika'neyasajnaye, ti t'ijieyeyisi pa iyo ti tamti, 'yina iyoyeyisijyi'n paka ji'niayija' ka inlanis. Lapakawo ti je ijwiyisie, 'yaka ti'niejmaki pa t'eyasajnaye iyo.

¹⁹Siupa ti ajnaja Jesús ti jla'yis japo t'eyasajnas tajlayisia'm jlajak isi'.

²⁰Siupa jloma kiechaye'eje ti k'iejli mot, ti iniuyis ts'e yi'i japa higok siojopa ti Jesús isilaja, 'yina i'yent'itiejespe'ne jla'a 'ya'al ti 'yale tajlape puwa jijwetisi'l japa a'la'.

²¹Sekyi'i ja Pedro jitiej t'ipa wujwayi siupi ti Jesús isilaja japa a'la', sekyi'i iyone'ne 'ate: —'Yaka'niona, 'yejne'n siojokia a'la' jisilaja 'neyejek'i, 'yejne'n, 'ya'al.

²²Jesús isiujlie ti iyo 'ate: —Ká akakiuye pa Sinia'.

²³Ijiatk'i siu'nie jayo, ti siuti japoye pa kanwone 'ate ka jloye siujlieja tikijnaki, “¡Nitajla'n, nitateja'm ni i'niat!”, 'yina ijiate, siuti kiak jawo janjwankitk'i ni jitienkiujnieye ti siupa iyo kawone, je 'es'ne ka je ijiatayi ka intankiu'n.

²⁴It'imina ti awo 'ate, ti ja k'iejliyeyi pa ja 'ajlayi ti jasetiana, ti ja enayiji ni asts'ajlaye, ataj womak'i. Je ijiat ka je ine askiojyi siupa jit'iejlayi.

²⁵Jak je iyoyi siuti jawoyi ni asts'ajlaye, 'yina 'esiji ka inkiwali'yi pa k'iejliyi pi askiecha iyo'na, ti naka ti jitiajlatayi ti jiwoye jitisa', 'nakayi ti siunie Asna' ti yi' poliyi kiak jawo jankiwali'yi siupa astes iyo ti yiyi ilia'm.[7]

²⁷Paj ti yapilijinisiampe'eje jlajak Jerusalén, sekyi'i ti 'yuyejenisipi jlaja 'najla'wet wuj. Jesús yikiajli'ni ti i'yenk'i'ni puwa seka'a, 'nesa'ni papok Fariséojos, siu'neje papo jiwos pet pak Moisés jika'neyasajnaye, papoka 'neje papo kijilas ti jle' po'.

²⁸Iyonisi'ne 'ate ti i'yasis'ni: —¿Tepa jitiajle'e siunie ajweye ti jikajli ti kiak jiniwone? ¿Tempa yikiaj'la naka?

²⁹Jesús isiujlie ti iyo'ate: —Kia'awo po' pet na ja'yasayiji'n: ¿Tempa tajleje kia Juan ti inajiejnawo ki jijweye ti it'imina ti lajk'ipa ka intomik'i'ni ti iniejiejne'n papo i'nio'? ¿Ma pak tajle pa Sinia', ni'ne ka papokaye i'nio'? Jejlikiamaye kiu' ka jwelak'i'm, sek jane'yi ka yamana'a pet ka ijwi'lase'm siunie ijwiye atajleje, ni it'imina ti akajli ti awoyi niwaka wask'i'nelaja.

³¹Sekyi'i ti iniajnatayis kiu' ti inijlok'ijin'ni ape'e kiaka ti ini'yasists'i ape'e, ti iyoyists'i 'ate: —¿Tepat'e jayoki ti jasiujlieje? Siut'itie ka iyok'iate, “Sinia' tajle”, jawoyena'a 'ate ti jankiults'e'm, “Kiak p'an iyoyetaja, jakajliete ¿yot'iyi'ni jiat'eje ti jikakiuye?”

³²'Yina ¿tepat'e jiwo ka inkiults'e'm siuka iyok'iate, “Tajleje napo i'nio'...”? Lapakawo ti je ijwiye papo i'nio', it'imina ti kiak iyo, 'yaka kiaka Juan ti inajiejnawo ijiatjinipe ti kiaka Sinia' jijwejlanik jiwo ti ijiatk'i.

³³Iyoyeyis jiwek 'ate ti isiujlieyisi ja Jesús: —Je kasts'ajane. Jesús iyo'ne 'ate: —Ijiatp'ane kia'awo ja ke ijwi'lase'm pet siunie ijwiye atajleje ni it'imina ti akajli ti alesane niwak wask'i'nelaja.