Read Iyojwa'ja Chorote San Marcos 13 Bible Online

San Marcos 13 - Iyojwa'ja Chorote bible

San Marcos 13

¹Jlampa tajlayisi jlaja 'najla'wet, 'yina ti ijwienjli ja t'eyasanik iyo'ne 'ate: —¡'Yaka'niona, 'yen pet 'niwa 'wukiu'l isis wata'a, siuniwa sisajas tena'ak'i ka jilisa wat!

²Jesús iyo'ne pet 'ate ti yikiajle ilia'm: —'Yina, ¿ji'wena' siu'niwa 'wukiu'l ti je lis? Jijwelat'inie'e ka jla'am kiak iwo siuniwa sisajas ka 'wanjliye ijiak'i ape'e. Jano'we ti janwask'i isia'm.

³Sekyi'i ijliasayis'ni ti tejeyis 'niji, yi'i jlaja tikijnaki Olivokiet, siojopa 'najla'wet wuj teje'yi. Siuti 'nes'ni Jesús yiyeje'n. Pedro, Santiago, Juan, Andrés ti 'najliyisiji'n ja Jesús i'yasayisi'n ti iyo'ate:

⁴—Siojopa jloma inta jane'yi, ¿tepat'e jane'yi japa? ¿Tent'i puwa wask'i'nelaja jana'an ka ti'wena ka je tojwata'ana'a ti kiak jawo?

⁵Jesús isiujlie japo ti iyo'ate: —Asosik enitiejyits'i'ni, 'nakayi ti ja ke ak'emiye'yi ilia'm paka jikiechaye ti ja'nes.

⁶Kajeyepa ja ke piniye napo i'nio' janiteyini ki yi'i iyo ti ja woyis 'ate, “Ya'am ti Injwajietik'i'm siunie Sinia' jijliujwanik.” 'Yina ja ke jlasiye napo i'nio' ti jank'emijietk'i.

⁷“Jlampet ti jajieyeyi ti inwak japoye ajnat pa janejyi, ka je tojwayi, ni'ne ka tojwayi paka inejyi, kamajanie'e 'yina ti jlam kiak jawo ti japoye niwaka, 'yina ja mamjliye'eje ja tojwayi'ni siojona jloma ti jlamayiji, ka kia'iwo.

⁸Siunapo i'nio' yijits'i niwa ajnatis wus janilajne'n, siunapo anechiyasas kiak jawojliyi pit, anechiyasisak'i wita'm ti janilajne'n. 'Yina japoye siuniwa ti ajnat ja'wesi ti ja pansisak'i, nel'lia japoye. Jawo'ate iyo jana asejnia ti k'iejli jlas yokie, iyo ni ji'wok.

⁹“'Yina siunie jiwoyeyi asa'am ti jijnieye pet ijyik'i, kajeyepa ti siunie ja tiwona'ase, ja inekiajlayi napo ijnosikis jiwos, ja inenajayits'i niwa 'najla'wetis ti ja inajakiejyi'n, siu'neje ti jajnoyeyiji napo anechiyasas wus, siu'neje napo t'as jitieyi'i. Siuti sek ja awaye'yi ja nisiamaye'nina'a ti awoye asamtikie' ti ja sijwela', ti ja enayi jitieyi'i.

¹⁰Siuti ja ke inejliyi kiu' janak siojona jloma ti ja jlaja, janak siojona jloma ti jankatate napo i'nio' ti janjwe'el niwa Sinia' jlamtis ape'e 'ni ajnat, ti jantejwi'n ape'e.

¹¹“Siuti kiak jawo jajnokieyiji napo anechiyasas, ja ke k'iejliyeyina'a paka woyeyi ka woyeyi asjlak'aliye siunie ti je 'najanayi paka as'lej awonayi. 'Yina ja 'wenayeyi ti jajwela' siunie ti Sinia' janwe'nase'm ti jajwela'. Kajeyepa ti ja ke asama ti ja amtiye'yi, ja 'wenajliyeyi jla'am siojona Sinia' jikimet ti 'es ti jantamti.

¹²“Siunapo ji'niayi ijwienjli jankajliujniap pa yi'i siunapo ji'niayi ijwienjliyik'iyi ka tiliana. Jlampet siunie jinia' janekial ni jlas ka kiak tiwonaja, 'yina siunapo jilis janta'yi ilia'm napo jiniewot, 'yina kia'iyojliyi jawojonk'iye ka kiak tiwonaja ka tilianaja'n.

¹³Ja lajak'i ape'e 'ni ajnat ka inlesana', 'yina ja tini'wajak'iase 'yaka ya'am ti jat'imi'nase ti jikinieyi siunie awoyi, 'yina siunie i'nio' jankatate ti janwoyi siunie iyo niwa yamtis, janakayena'a ni janjwa'.

¹⁴“Ja'wena' siunie ti ijiate ti ja jwesiejak'i ni jawo, ti ja'nakaja ti ja ke i'no'we ti ni siunie jane'yi, kajeyepa ti jankama ape'yi siunie jawoyi. (Siuti jlamtijie'n, tejnisk'i). Ka inetiejenie'e janak jloma, siunapo yi'i jana Judea jla'am iwonayis'nina'a 'ate ti janek'ni ti jan'yiltane niwa tikijnakiyis.

¹⁵Siuti jajnewite ti ja ke int'eki ape'e japa ji'wuk tomi pijia'm ni i'nio', je 'es ka jitiejliyeyi'ni puwa ka jikijmatisa' ti yi' kiajwe siojopa ji'wuk tome ajnat'e, sek tajla'ana jiwekie'e ni i'nio' ti janek.

¹⁶Jlampet siunie jane jiwasoki, ejlo'o wek puwa jikijmatis, 'esiji ka je inapili.

¹⁷“¡Janak siojona jloma ti wujwa ti jap'ijliusisa siunapo asejnia ti isiu'ujniejne'n, siu'neje napo asejnia ti je ilie'en jijliukijyi napo jilis!

¹⁸'Ajlayiji pa Sinia' ka je ijnewitajam'ni siunie ti wi'yitiepata ka kia'iwotajanie'e.

¹⁹Kajeyepa ti niwak siuniwa jlomas ti injlak'ali janejyi, injlak'ali siuniwa ti je kia'iyo paka ti'wena taj'lap'e ti 'nelanjie'e Sinia' 'yotatayi 'ni ajnat, 'yina awakieyi 'niji siu'nie jloma, siu'neje ti ja ke ti'wena ka kiak iwoyi ts'iji ji'wechaja 'ni ajwe'el.

²⁰Lapakawo ti siut'itie ka Sinia' jla'am intoyiti'i 'niwa jlomas, 'yina lajtak'i'ne pet paka injwa' 'yina ka lajak'i napoka ti jla'am ti isi'mik'i napoka jla'am ti it'imina ti kiak iyone.

²¹“Siuti ja poye pa jawo'ate, ajwe'el 'niwak jlomas, “¡Jon ka'yenayi siu'nie Injwajieti ti Sinia' jijliujwanik yi'ne!”, ni'ne ti japoye pa' jawo'ate, “¡Jon ka'yenayi siusie Injwajieti Sinia' jijliujwanik yits'e!”, jla'm iyo, ká ak'iuyeyi.

²²Kajeyepa ti jana'am siunapo ti janijwe'el ti janapokaye Injwajieti ti Sinia' jijliujwanik, siu'neje napo ti janijwelis ti janapokaye Sinia' jijwejlanawosa', 'yina jan'wenki'n siuniwa ti janesi'lietk'i napo i'nio', ti janwo ka ink'emijiet napo siunapo Sinia' pajk'i ti isi'mik'i, janwo pa jawo ni'ne ka je inkajlits'i.

²³¡'Esiji ka ajoskiyeyi! Ajwela'yase'm ta'a ti je yijliyi'iji janak jloma.”

²⁴Jesús iyo'ate ti yinayi'iji ape'e: “Ti janek 'niji jiwek pak injlak'ali ti wuj, puwak jlomas 'yina siunie kilie' ja'no'me, jlam pet siunie we'la ja laja jlala',

²⁵siuniwa katese'l janok'iji'n ti jantajla'm ni poli, siuniwa yiji pet ni poli ti jijweye po' jantaj'lik'i niwa ji'wetis.

²⁶Japakayeyi'ne ti ja ti'wena ilia'm ni I'nio' Jlas ti jana'am ti janejyi jana poli ti janejyi ni jijweye ti je jlase' siu'neje ni jiwunitieyi.

²⁷Sek jane'yi ka ijloyena'a siunapo jijliujwajnas poli jlele ka nekk'i'ni siunapo ti pajk'i ti it'iajats'i, 'niji taj'le ni kilie', 'yuyi 'neje ni kilie', jantajlits'i siunie taj'le ni kilie', siu'neje napo tome 'niji iniwuki, siu'neje napo tomi 'niji wikinaja, siu'neje napo ti tal 'niji jlajeyi 'ni ajnat, jlajeyi 'neje 'ni poli.

²⁸“'Esiji ka ni'neyasanayi siunie 'neyasajnaye ti titiajlataja wek janak a'la' jle' iyo'ate higok. Je istie' ti jiwats'oyeyija'm, 'yina kajeyepa ti ji'wole ink'iejyis, sekyi'i 'wena je jitijnisiejiap'e ti janawopa'.

²⁹'Yina kiak jawo ni siunie ajwe'el ti ja'wena' niwaka ti ja'nakaj, 'esiji ka 'najanayi, ti je tojwa'a siojona jloma ti ja'nesi ni I'nio' Jlas.

³⁰Ijiatk'i siu'nie awo, ti siuti 'wanjlijli'yiji siu'napo i'nio' yiji 'nak jloma kiak jawo ni siuniwa ja'wina, ti kia'iyo janejyi pit niwak jlomas.

³¹Siunie poli jla'yi 'ni ajnat janetia'n, ja jlam'neja pet siuniwa yamtis ja ke paja ka inetia'n jla'am.

³²“Jlampet siojona jloma siu'neje jana inetitinki janeyi jana kiliekie' japa ja'nesi janak lajk'ipa ka 'najane paka iwone, tiwet'ianaja ka napokaye wek napo jijliujwajnas poli jlele, ka nakaye 'neje wek jlas ka 'najane paka wone, 'yina ijwienjli jla'am 'ni Sinia' ti 'yijene pi iyone.

³³“Tempi it'imina ti awo'ate, ¡Ká anikiwalinitie! Ká amayets'iji'n, ka je iwopa ti je 'najanayi paka wonayi japak jlomaye ka kia'iwotajanie'e.

³⁴Nakt'e 'yiniye siu'nie, ti po' siunie i'nio' iyo ka nek ti jajnoyi japa ajnat jikiecha ti tojwe, iniajnat ti ijliuye papo jikawos ka ijiatayiji kan'yena pa ji'wet, sekyi'i ti yikiajlayi pi jikijmaye pa iyo ka iwone ti ijwienkitamk'i'ni. 'Yina ijwijla'm 'ne pa 'wuk kiwet jiwo kan'yena pa 'wuk kiwet.

³⁵'Yina nak kia'iyo'ni pet, it'imina ti awo'nase 'ate, Ká anikiwalinitie, kajeyepa je 'najanayi paka wonayi siojopa jloma ti ja'nes ni jika'niona janak 'wuk, ent'a ka ajnalis wujwak'i'ni, ni'ne ka'nes ka ajnaj kioweja', ni'ne ka'nes siunie ti ajwentas yapataja'n, ni'ne ka k'iejli motie.

³⁶Ká anikiwalinitie, 'lojwinie'e kaneyi astepe'e ka mayets'iji'n ti janesi'lieta.

³⁷Je asamkataja ka kiak iyo'nase siunie ajwe'lase'm, 'yina apejlaniti ape'e napo naka ti awo'ate, ¡ká anikiwalinitie!”