Read Iyojwa'ja Chorote San Marcos 14 Bible Online

San Marcos 14 - Iyojwa'ja Chorote bible

San Marcos 14

¹Jlomas times puwa tomk'iye ka ineyi siojopa jiliakijnieye papo Judíojos jle' iyo'ate Pascua, japak siojopa jloma ti itiuwis puwa woyejes laj jijlinkitajets'i. Siojopo pa'yijis jika anechiyasas, siu'neje japo taka'neyasane pet pi Moisés jika'neyasajnaye, jakayipe ti iyoyeyisijyi'n paka iwonisi ja Jesús ka k'iejliyeyi paka jlam intajlatisie wek jlam'ne je ijiatk'i, ti iyo ka inkimits'i ti janlanis.

²'Yina siojopo ijia tomisik'i'ni ti iyonisi 'ate: —Je 'esiji ka yinajaje siujlie'e inlakijnieye, 'lojwinie'e ka jlam pak iwots'i'ni napo i'nio'.

³Jesús ijio Betániaja ji'wet yi'i ja Simón, ti tiwonaja'ni 'ate Inkiso'l Jitio' Lianik. Ti yi ts'iji ji'wet'e jaka, ti ti'yekiunieje'n ti tejeyisi ape'e siojopa yinisi ape'e pa jlak, 'nesa jla'a i'nioki ti itiun'ni jikiojyi siu'nie a'la' t'e' ti jini inkajk'i, jle' iyo'ate nardo, siu'nie t'ojni, yiji siujlie'e jiwe jlase' ti sisamak. Sekyi'i ti yolkiotaja'm ti 'yiliniji'ni jlaja Jesús jletik.

⁴'Yina siojopo sek yi'i, ti i'winayis ti kia'iyo, jwesis'ne sekyi'i iyoyis'ne 'ate: —¿'Wenat'e ka inkajyi'n jlam'ne laja po'?

⁵Jlam'ne ka tiwena ka trescientos denarios[8] tenaja ni'neta ka inka'm ape'e, 'yina siojopa lajaye, kawinaja'm pet napo i'nio' p'ijliusis pet kanekisi pa isitianis. 'Yina yiyeyisiji'ni jlajak asejnia.

⁶'Yina Jesús iyo'ne 'ate: —Ena'yate; ¿yot'iyi'ni ti je jlenayi 'ate siunie iyo kawoyi? Kajeyepa ti siunie iyonk'i 'esiji.

⁷Siunapo p'ijliusis je pajna'a ka je ineyi aska kiowe'e, jane'yi pa ja jlomaye ka woyeyi ka wenajia'm paka k'iejliyeyi ti janoyeyeje, 'yina asa'am ti tijna'yase'm. 'Yina jlam pet ti ya'am ja ke jlomasak'i ka yi' aska kiowe'e.

⁸Siujlie'e asejnia iyo siunie ti 'yakajli siunie iyo kawo. 'Yilini ta'a ijyik'i siunie jini inkajk'i, lapakawo ti iyo ta'a ka wakajla siu'nie 'yajwes ka titijikta k'iye ka inetiejenie'e ka kiak iyo.

⁹Ijiatk'i siu'nie jayo, ti ajnat pi jane'yi ti ja tiwoki inka'niyeja' siuniwa Sinia' jlamtis ti isis, sekjane'yi ka tijwelajape pet siujlie'e iyo jla'a asejnia, ja titienkiuniejak'ipe.

¹⁰Siojopo t'eyasajnas jla'am ja Jesús itijwa'm niwa sikioye times tom'niji, 'yina ijwienjliye siojo ti jle' iyo'ate Judas Iscariote, ti ya'am ti ijioyi siojopo pa'yijis jika anechiyasas ti ijwile ti janekial ja Jesús.

¹¹Jak je iyoyiji ti ipi'yayisie, 'yina ipiniyeyisi'i'ni ti kia'iyo. Iyonisi'ne 'ate jak Judas: —'Esiji, je ijiat ka je itisie pet. Judas iyoyeje'n ji'niayija' siupa janwone kan'yaka'n ka inwe'en ja Jesús ka inekiajle.

¹²Jlampa yiye isia'm siojokia Pascua jiliakijnieye napo Judíojos, janaka siojona jloma ti titiuwa niwa woyejes laj jijlinkitajets'i. Janak siojona jloma inia'ne, ti ilianis ni 'wole po 'woma, t'oniye iyo janak inlakijnieye ti yiyetaja. Siojopo t'eyasajnas i'yase'n ti iyo'ate: —Ti awaki siujlie'e Pascua, ¿tempa ji'wet pa inteliaja ka ene'e ti ja'yekiu'ni 'nakayi ti janaj ti jawiakajlanitie ta'a ak'ioye?

¹³Sekyi'i Jesús ijliu'ne japo times t'eyasajnas ti iyone 'ate: —Maye'ni nanayi jana isi'. 'Yina siuti jawayejia'm, sek ja'wena'yi ni i'nio' ti it'iejliu, ti yin jitipe'e jla'a jlate. Sek jane'yi ka kinieyets'ina'a siupa jantajyi.

¹⁴Jak je iyoyiji siojopa 'wuk ja'no kiajwe ja'yasayejyinna'a siupa sek ji'wet'e ti jawonayi 'ate, “Saka'niona iyo'ate ti in'yase'n, ¿Tepa yi'i siojopa jitiowe jla'a a'wuk jayi'i ti jasijwane 'napo 'yiyasajnas ti ja'yekiujni siujlie'e Pascua?”

¹⁵Sekjane'yi ka 'wenkinie'asemna'a siojona jitiowe tomi pijia'm ti isajan kiajwe ti pajk'i ta'a ti tiliejlajan kiajwe. 'Yina sek ja enayeyi'ina'a ti jalesanayi siupa ja saka'.

¹⁶Siojopo t'eyasajnas yama'ni ti ijioyis isiyi, 'yina ka 'wena iwo wata'a siunie Jesús iyone ti ijwijla'm siukia jawoyi. Ijiatjliyi, sek yinayisi'i ti ilisanisi ki jlakis ti tejeye jakiak Pascua.

¹⁷Siuti ajnalis wujwak'i'ni, Jesús yama ti jla'yis japo t'eyasajnas itijwa'm niwa sikioye times tom'niji 'nesayisi jlajak 'wuk.

¹⁸Jlampa ti'yekiunieje'n iyone'ne 'ate japo t'eyasajnas ti ijwijla'm: —Jlam je awo siu'nie jayoyi, ti siuti asa'am ijwienjli ni siu'nie akijwane 'nak ja siwe'en.

¹⁹Sekyi'i je ikanitk'i'ne wita'm ti ipi'yayisie ti kia'iyo, sekyi'i ininekiajlayisi siukia ji'lij ti i'yasista'ni, ti iyonisi 'ate: —¿Jet'i 'yu'we ka je yamana'a?

²⁰Jesús isiujlie ti iyo'ate: —Asa'am siunie inojwajia'm itijwa'm niwa sikioye times tom'niji, 'yina ijwienjli siunie ti akijwane pet, siunie woye 'otiejam'ni ni sak, naka ti ja siwe'en.

²¹Siunie I'nio' Jlas janejia'm ni siunie jawo ti janilayiti, siu'neje ni jiliaye jawo ti ja tiliana, iyo jla'am niwa Sinia' jlamtis ti yiji ji'wet ti ijwi'il. 'Yina ¡ja wujwa wat ti ja p'ijliusieja' siunie i'nio' ni janwe'en, 'yina ti ja jiwet'ia japoye pet! ¡Tent'ipi pa kajwe'el ka lajak'i ta'a pa!

²²Jlajmiliet, ti ti'yekiujni'n, Jesús isimayi jlaja woye ti yi'n jikiojyi, sekyi'i ti jinikanitieyi iwinayi pa Sinia', itime ti its'isajaja'n, sekyi'i ti iwinak'i japo t'eyasajnas, ti iyo'ate: —Siu'u, 'nak 'yajwes.

²³Paj ti isimayi'ijyi siujlieja inat jiwe ti at'es yiji, sekyi'i ti jinikanitieyi iwinayijyi pa Sinia', itimeje ti iwinayi japo t'eyasajnas kan'yayisi, ijiatjliyi no'we ti i'yayisi.

²⁴Sekyi'i ti iyonayi 'ate: —'Nak i'yoyis ti tisa'ni, 'yina ja ke piniye napo i'nio' ti ja 'esieyi, jla'yi ti 'nak 'yakajanit siunie Sinia' ji'lij ti ink'ie' ti iliyi siunie jawoyi'ijyi.

²⁵Siunie jayo jla'am je awo, ti ja'najatajayiji ti a'yaje siu'nie ts'ejnietio' t'e', 'yina ijiatjliyi ka netiejenie'e siojona jika jloma ni Sinia' jika anechijiayas jiwekie'ajana'a ka ijyijlita'm ni at'es ti ink'ie'.

²⁶Siuti itimayisi ti takelisiejne'n ti yinisits'i kiwa sálmojos, sekyi'i ti yama'ni ti tejeyis 'niji yi'i jlaja tikijnaki, jle' iyo'ate Olivokiet.

²⁷Jesús iyone'ne 'ate japo t'eyasajnas ti ijwijla'm: —'Yejne'n, ti asa'am ja ke injwanjli pa ja'wanjliye pijia'm ti jaleyik'i. Iyo jla'am niwaka Sinia' jlamtis ti yiji ni ji'wet, ti iyo'ate, “Jalia'an ni sontas jiwo, siuniwa jiliajwas jlam sek jajnok'i'ni ape'e 'ni ajnat.”

²⁸Jlam'ne pet siuti janiu kisie'e ti jatiajli ni a'no', jania'an ask'ioye ts'iji yi'i jana Galilea.

²⁹Pedro iyo'ate ti ipi'ya ti kia'iyo: —'Wanjliyijna'ape ka wikie'eyeyi ka kia'iwo kanle'a, 'yina ja ke ili'a ya'am.

³⁰Jesús isiujlie ti iyone 'ate: —Ijiatk'i siunie jayo'na, ti siu'nie ajnaj ka majletiejejna'aja ka nekiajle'e ka ajwentas inap siupa ja timesieyiji, janajapejayi ti ja ajwel ka je intant'iek'i.

³¹'Yina jlam yinjliyi ape'e ti iyo'ate ja Pedro: —'Wanjliyi, 'wanjliyijna'ape ka kia'iwo ka inlana, 'yina ti awojonk'iye ka siliaye inok'i wita'am, 'yina ja ke inets'e ka iyo'ate, “Je sitiant'ieje.” Jakayi'ne ti ijia isiujlieyi siukia iyo.

³²Sekyi'i ti yama'ni ti tejeyis ts'iji yi'i ja ajnat ti jle' iyo'ate Getsemaní. Jak je iyo ti 'nesayisi, sekyi'i ti kiak iyonayi ja Jesús japo t'eyasajnas: —Weyets'ijin kiu 'ne, jayo kiu 'yejlayeja'.

³³'Yina japokata'ne japo Pedro, Santiago, Juan, ti tane ti yama jlam pa yiyeyi siupa ti jijliak'ali po', siu'neje ti inik'iuye t'ipi siupa iyo ti je wekie'e ti je ikanit'ni.

³⁴'Yina iyone'ne 'ate japoka ti ijwijla'm: —Alate ti 'yiniye ka isiak'al inek'ni ta'a siupa jawo pa ja iliayeja' ti jats'a'al. 'Nak weye'yi kiu', 'yina jwajla'a paka woyeyi ká amayets'ijinna'a.

³⁵Yama wat ts'iji, ti iyoye t'ajlayeja', 'yina paj ti jitiokiots'i 'yitayi ajnat'e ti inip'elisine pa Jinia' ti iyo'ate: “Inia', siuti a'am ti jejlien paka k'iejliye ka kia'iwo, wojyi'n paka i'niayija', ke sena'ate siu'nie iliaye jawoyi. Inia', 'esiji ka jalk'i siu'nie yat ti pajyi. 'Yina awo'ate, 'esiji ka woyi siunie ti a'am ti janteliaja kawoyi, 'yina je ka yama ka intalk'i siupa ja woyi.”

³⁶

³⁷Itime ti yapilieyi japo t'eyasajnas, 'yina imiak'iji'n ti yiyeyi. Sekyi'i iyone'ne 'ate ja Pedro: —Simón, ¿jima'a? ¿Ka jwajla'ajat'e wat paka woyi ka je ama'a?

³⁸Ataj etie kisie', woye asts'ajlayeja', 'nakayi ti siunie inkajejlasaye ja ke injlana'ni pet. Kajeyepa ti a'we'en ti jiwoyeyetaja 'niwa yamtis siu'neje ti astankiujnieye poyeta, 'yina 'nakayeyi jla'am siunie 'assie'n ti je to'm ilia'm.

³⁹Sekyi'i ti yama'aja ti iyo t'ajlayeja', siojo t'ajlaye iyone ti 'nelanjie'e jak yikiajle'ni.

⁴⁰Kiak iyojliyi siukia ti itimayi, yapilieyi'ijyi siojo yi'i japo t'eyasajnas, 'yina ka 'wena iwo wat siukia ti 'nelanjie'e, imiayek'iji'neje siukia ti yiyeyi, lapakawo ti je itieyisi kia jika ijnieti, 'yina poyeta siukia iyone, kiak je isiujlisi'ne.

⁴¹Sekyi'i ti yama'aja, jakayi ti najapejayiji ti yam'ni. Jak je iyoyiji siuti yapilieyi'ijyi japo t'eyasajnas, 'yina kiak iyonjliyi 'ate: —¿Jep'an ji'yenak'i kisie'eyi? ¿Jimayeyep'ank'iji'ne ti askanowe jitijwayits'i? ¡Je pa ink'iejeye'yi! Yiyeyi siujlie'e jloma ti siunie I'nio' Jlas jatekiajla jikiojia'm siunapo i'nio' inke' jiliajnis.

⁴²Neyets'i pijia'm, naja'ni, je tojwa ilia'm ni siunie ja siwe'en.

⁴³Jesús je ilitieje'eje ti takamtijniene japo i'nio', jlampa 'nesape jak Judas, t'eyasanik kiecha tajla'm siunapo itijwa'm niwa sikioye times tom'niji 'neyasajnas, ti jla'yis siojopo pa'yijis jika anechiyasas, siu'neje japo jiwos pet ni Moisés jika'neyasajnaye, 'yina ka kia'iwo ka piniye 'neje japo i'nio' ti jla'yis ti iyo jikio' jleleye, jla'yi ti iyo jik'iulisie'. Japoka 'neje jla'am siojopo i'nio' jwajlat'e iyots'i'ni.

⁴⁴Judas pajk'i ta'a ti inijloyik'ijin'ni siukia iyo ka iniwonisi, ti iyone 'ate: —Siupa jats'iu jik'iolo'we, jakaye. Sekjane'yi 'wena ja ká atejnisiejap'e ka kimaye'yina'a, 'yina 'esiji ka lesanayiji siupa jawoyeyi ti jala'nitie.

⁴⁵Jak je iyoyiji siuti yiyeyisi Judas yamitayi ja Jesús ti iyone 'ate: —¡Ika'niona! Ijiatjliyi, siuti kia'iyo its'iuye jik'iolo'we.

⁴⁶Siojopo jla'yis i'wine wek, 'yina sek tajlayits'i pet ti yamisi, ti isimits'i.

⁴⁷Jlampet siojo jla'yi ja Jesús itiona kisie' ja jitisajnat tiok, ti ijwieje jlaja jik'iote jak pa'yijis jika anechiyas jikawo.

⁴⁸Sekyi'i iyone'ne 'ate japok i'nio': —¿Yot'iyi'ni ti jiwoye astesajnatisie', siu'neje ti jiwo ask'iulisie' ti jiniamak'i, 'yinit'iyi pa kalankijieta siu'nie jiwonak'i ti jikimak'i'm?

⁴⁹Jlam'ne jlomas atejwe ti aka'neyasan'ni ts'e kiajwe jana 'najla'wet, ka jakayeyi ka akimayek'i'm ta'a. 'Yina lapakawo ti jla'am je iyo jiwek, kajeyepa ti yiyeyi siunie iyot'iyipi siuniwa Sinia' jlamtis siukia jawo.

⁵⁰Jakayi ti t'eyasajnas iliyek'i ja Jesús, 'yina t'osiye'ni ti i'yiltajne'n.

⁵¹'Yina po' siojo jwemik ti je ilitak'i jla'am ja Jesús ti tikiniejayi, ti ip'ione jitipe'e 'ni lotakinie. Tikima'a'ne jaka,

⁵²ji'wu 'nejie'e jiwekie'e ja titiejek, ti initata ts'iji, sekyi'i tijliena'ne ti jikio' iliena'a it'imina ti tijliena'ne, ejlo'o wek ti 'najleje'n ti kia'iyo ti i'yiltana pet.

⁵³Sekyi'i Jesús tikiniejayiji jak pa'yijis jika anechiyas siojo jlamt'iyijpe, 'yina siojopo pa'yijis jika anechiyasas, siu'neje japo kijilas jwajla'a iyots'i'ni, japoka 'neje japo jiwos ni Moisés jika'neyasajnaye.

⁵⁴Pedro je iyo ka inkienik'i'ni ti ijwil ka nekk'i, 'yina yiyi siojo anechiyas jika aj'leje'n, sekyi'i yamitayi siojopo tokis ti i'yena jlajak 'najla'wet ti tejeyits'i'ni ki jwat, 'yina yiyejapen'ni pet.

⁵⁵Siojopo pa'yijis jika anechiyasas, siu'neje japo ijnosikis jiwos, sekyi'i ijyijlitayisi ti iyoyistiejejyi'n siupa ka 'nakaj ka ijiatayiji siupa ka jitis iwo, 'nakayi ti ja 'esiek'iye ka tiliana, 'yina je i'winis paka jitisa' ka intajlatisie.

⁵⁶Ijiate 'loj japo i'nio' ijwil ka ijiatayi kan'wenisieje siupa ka je 'esie pa ka woyi ja Jesús, 'yina ti siojopo ijia ti kia'iyo ijwil kan'wenisieje pet paka k'iejliyeyi ka je 'esie ka woyi ja Jesús, 'yina jak je iyoyiji ka je inapits'i'ni wita'm ti iniewitis.

⁵⁷Sekyi'i takasitiek'i siojopo ijia ti kia'iyo ijwil ka impe'yayisieje, ti ijwile pijia'm ti iyo'ate:

⁵⁸—Sa'am ti ape'yakpe ti iyo'ate, “Ja initiajnate'n siojona 'najla'wet ti i'nio' jilisanki, 'yina jlomas ja najapeja niwa janejyi ka ijyijlitayijna'aja ka ilisane siojona jikiechaye, 'yina janak i'nio' ja ke jilisankiye'ne.”

⁵⁹'Yina ka jakayeyipe wat ka insesk'i japo i'nio' ka ijwienjli ji'lijayis.

⁶⁰'Yina siojo pa'yijis jika anechiyas ja jlamt'iyijpe takasitie, ti ijio kiowe'e japo ijia, ti iyo'ate ti i'yase'n ja Jesús: —¿Lajt'ik'iyi pet pa a'leja'? ¡'Yejne'n siunie iyo ni intajkinaja!

⁶¹Ejlo'o wek siukia tiwonaja, 'yina je iyo jiwek ka inkiujlie japo i'nio'. Siojo pa'yijis jika anechiyas wuj yikiajlayi'iji ti i'yas'ni ti iyone 'ate: —¿Mi a'am ti Injwajieti'a'm, siunie Sinia' jijliujwanik? ¿Mi a'am 'neje ti Jlasts'a'm siunie Sinia' ti 'es?

⁶²Jesús iyo'ate ti isiujlieyi: —Ji'yu, ya'am. 'Yina siunie I'nio' Jlas je ijiat ka já a'wena' ti janejyi'n 'niji jijweyeje ni Sinia' ti lajk'ipa ka ijnojliji, siu'neje ti ja'nes ti janejyi jana poli.

⁶³Siojo pa'yijis jika anechiyas wuj, ti ipi'ya ti kia'iyo, sekyi'i its'isatak'i ki ji'wu' lapakawo ti jwesie, sekyi'i iyonayi 'ate japo ijia: —¡'Esiji! ¡Ajwel'ni je asetiana ka poye'eje paka injwelik'iji'n siupa ka jitisa'!

⁶⁴'Yina ti jipe'yaye siunie iyo niwa jlamtis ti iliaki pa Sinia'. ¿Tepa jiwoyeyi pit? Sekyi'i ji'lij iyonisi'ne 'ate ti inikiul japoka: —Jitis po'. 'Esiji ka tiliana.

⁶⁵Sek tajlayits'i japo i'nio' ti ijwiets'iunisk'i'ni. Po' japo ip'ionis jitiokio'we, sekyi'i ti ipiajayisi'ni ti iyonisi 'ate: —¿Tempa impa'a? Jlam'ne pet siojopo tokis i'yena jlaja 'najla'wet kia'iyojliyi ipiajayisk'i'ni ja jitiokio' ja Jesús.

⁶⁶Pedro je t'eki'yi siojo yi'i ti tome ajnat'e, yi'i siojo jika aj'leje'n ja anechiyas, ti teje'yi'ni ki jwat.

⁶⁷Jakayi ti 'nesape siujlieja anechiyas jikawoki. Siuti i'wina ja Pedro 'yina je iyo ka jitiej k'asa'a, sekyi'i ti iyone'ne 'ate: —A'm 'neje ti je lik'ijin'ni siunie Jesús Nazaret jlele.

⁶⁸Pedro, siuti inikakiu, iyo'ne 'ate: —Je sitiant'ieje siupa jijwel'ni. Siuti Pedro iniu kisie', jlampa yiyeyi siojo 'wuk kiwet, sekyi'i ti pesiejayi ni ajwenta ti yap.

⁶⁹Siujlieja asejnia, ti i'winaja ja Pedro, sekyi'i ti ipichinayi siojopo ijia ti iyo'ate: —'Nak jla'yi 'neje napoka.

⁷⁰Pedro kia'iyojliyi inikakiuyeje ka intant'ieje ja Jesús. Paj ti japokaye'eje pet siojopo sekyi'i ti iyone 'ate ja Pedro: —Je 'esiji 'yaka ama 'neje ti jitiajla'm napoka. Jla'm ijiattaja ka je atajla'm 'neje jana Galilea.

⁷¹Sekyi'i Pedro ijiatayi ti je 'yotatiji ti inikakiu: —¡'Esiji ka 'nakaye ka intajlatk'i'm pa Sinia' 'ni i'lij awone, ti awo'ate, je sitiant'ieje pak i'nio' jijwela'ni!

⁷²Yiyik'i jiwek ti kia'iyo, sekyi'i ti pesiejayipi ja ajwenta ti yap, jakayi ti timesieyiji. Pedro jitiej wujwak'i ja iyopi ja Jesús ti iyo'ate, “Ka majletiejejna'a ka nekiajle'e ka inap ni ajwenta, janajapejayiji ti jajwel ka je intant'iek'i.” Sekyi'i Pedro yap ti yap, lapakawo ti jitiej yini'ni 'ate kiaka.