Read Iyojwa'ja Chorote San Marcos 15 Bible Online

San Marcos 15 - Iyojwa'ja Chorote bible

San Marcos 15

¹Siukia ti k'iejli mot, initotiek'i wita'm japo pa'yijis jika anechiyasas, siu'neje japo kijilas ti kia'iyo jleyis po', japoka 'neje siojopo taka'neyasane pet ni Moisés jika'neyasajnaye, siu'neje japo ijnosikis jiwos. Siuti yikiajlayisi ja Pilato kan'ye'en siupa jitis iyo. 'Yina jikioyi tilie'nitie ti tikinieje.

²Pilato i'yase'n ti iyone 'ate: —¿Mi a'am ti Judíojos jika anechiyasts'a'm? Jesús isiujlie ti iyo'ate: —Je kajme'n ni siunie jiwoyi.

³'Yina ti je jlase' siukiwa ijiutkinisi ape'e ja Jesús kanwoyi japoka jiwos ni Moisés jika'neyasajnaye,

⁴it'imina ti Pilato kiak iyonayi'ijyi 'ate ti i'yas'ni: —¿Mi lajk'iyi pet pa ka a'lej jlasa' ka kiujlie napo? Jlam'ne je jlase' siunie tiwona'a ti injwela kawoyi.

⁵Ijiatjliyi, Jesús je isiujlie pa ti'yasajtaja'ni. Jak je iyoyi ja Pilato kawojlit'iyipi pa ti i'wi'in ti kia'iyo.

⁶Kiajatak'i'ni ti yiyetaja siojona inlakijnieye Pascua, Pilato jikio' ilie'ne'ni ni ijwienjli inkipinik, yi'i siupa iyo jla'am napo i'nio' ka inojwanis kisie'e. Ijiatjliyi, japo i'nio' yama'nijpe ti ijioyi ja Pilato ka jla'm iwoni'ni 'ate ka woyi siupa iniwoni'ni. Sekyi'i Pilato i'yasa'm peyit ti iyo'ate: —¿Ma 'nak isio' jalie'ne 'ni aska anechiyas ti asa'am ti Judíojosts'ase'm? Lapakawo ti 'yijene pi iyone ti siojopo pa'yijis jika anechiyasas ti nak it'imina ti yikial ja Jesús, ni t'a'ti ti yinits'i ti 'yakawoyisie. 'Yina 'yijijienits'i japo i'nio' ka ijwejla'm ja Pilato ka jak jikio' inla'ne siojo i'nio' jle' iyo'ate Barrabás, ti jiliaye iniuyi wita'm siojopo jla'yis jla'am ti yi' insat jiweje. Kajeyepa ti pak titiajlataja siupa ti inilanajen'ni papo i'nio' siu'neje ti takalankijyi'n.

¹²Siuti Pilato i'wi'in ti jak Barrabás ti iyo ka inkio' tiliena'a, sekyi'i iyo'ne 'ate ti i'yajts'ape'e japo: —Ijiatp'ane. ¿Tepa jawonayi siu'nie ti jiwonayi'ni “Judíojos jika anechiyasa'”?

¹³Sekyi'i iyoyis'ne 'ate ti tanisi ape'e: —¡K'iejwata'yi japa cruz!

¹⁴Pilato iyo'ne 'ate: —'Yina, ¿ten jiat'e siupa iyoyi ti je 'esk'i? Sekyi'i jlam yinjliyisi ape'e ti kiak iyoyisi 'ate: —¡K'iejwata'yi japa cruz!

¹⁵'Yina Pilato ti iyojonk'iye ka 'esieyi wita'm japo i'nio' it'imina'ne ti jikio' ilie'ne ja Barrabás. Jlampa titimajayi ti tak'ajak'ni ja Jesús ti tokis ik'a'ni. Sekyi'i ti yikiajlayipi japo i'nio' ka ink'iejwatits'i japa cruz.

¹⁶Tokis yamayisi ja Jesús ti ijioyisi siojo aj'leje'n yi'i ja anechiyas ji'wet, 'yina siojopo tokis 'loj 'neje ikapajlayisi.

¹⁷'Yujienayisk'i ni lotakinie ti isiat, sekyi'i ti isimayisi niwa k'itienis ti isimisik'i ti iyonisi jletik t'aka.

¹⁸Sekyi'i ti ijwilayis ka ijnonitis, ti iyonisi 'ate: —¡Amp'an, Judíojos jika anechiyasts'a'm!

¹⁹'Yina yejayisiam'ni jlaja jletik ti a'la' isienisi, siu'neje ti ijwiets'iunisk'i'ni. Sekyi'i ti t'akosjlete'l itiyeyisijin kiajwe ti ijwilis ka ijnonitis, 'yina jlam'ne ki iyo ti iliakiyis.

²⁰Itimisiji siukia iyonisi, sekyi'i ilienayis ape'e siukia 'yujienisk'i lotakinie ti isiat, yikiajlayis ape'e siukia ji'wu' jla'am, sekyi'i ti yamayisi ti jank'iejwatits'i jakia cruz.

²¹Yit'i'yipe siojo 'nayiji ti isiutieyisi siojo i'nio' jle' iyo'ate Simón, Cirene jlele, Alejandro siu'neje pa Rufo jiniayis, ti k'iejli yapitie tal 'lajna'm, 'yina tokis t'as'ne k'iye ti ijliuye ka ink'iuyeje jlaja jika cruz ja Jesús ka intejlia.

²²Ijioyisiji siojo ajnat jle' iyo'ate Gólgota, ti iyo'ate, Ijnetik Jleli 'Wet.

²³Sekyi'i ti i'yayinisietaje ni at'es ti tijlijnataja ni mirra, 'yina Jesús je isi'm ilia'm.

²⁴Ijiatjliyi yinayits'i pijia'm jlaja cruz. 'Yina siojopo tokis ti iyo ka inik'isajasi kiwa ji'wuye tiliakinis'ne ape'e jak je iyoyi ti siojopo ijyiwiteje japok inijwankitamk'i'ne.

²⁵Kilie' tojk'i'nine jakayi ti ijwienjli sikiot'i itij'wepe ijniujlits'i tom'niji siojokia inetitinki yiyi jla'a kiliekie' ti k'iejli mot jakayi ti tenaja'a pijia'm jlaja cruz.

²⁶'Yina ape'e jla'a jletik ti tena'a pijia'm jlaja jika cruz, sek tik'iejwataja'a pet ni a'la' t'aj 'nak k'iek'i, ti inamtis yi'i, ni siunie it'imina ti tiliana, ti iyo'ate, “JUDÍOJOS JIKA ANECHIYAS.”

²⁷Times napo jiliaye iniuyi wita'm kajlajnatas, tom'niji jijweyeje ni ijwienjli, siojo jikiecha tome ni ji'lieme.[9],

²⁸

²⁹Jlam'ne pet siojopo jikalakijnieye yi'ne, ti iniuyisi'ni siojo yi'i jletik pa i'wiatayisi'i'ni ti iyonisi 'ate: —¡Tek'iayi jijweljie'epe a'am ti janetiajnate'n jlajak 'najla'wet wuj, 'yina jlomas ja najapeja kiwa jlejni ka ekiajlata'aja pijia'm,

³⁰jejlikieje kiu' pet ka nijwajiet, nijnalas ti jle'yi ape'e jana cruz, sojmajyi'n!

³¹'Yina siojopo pa'yijis jika anechiyasas, siu'neje japo taka'neyasane pet ni Moisés jika'neyasajnaye kia'iyojliyisi pit ti iliakiyis 'ate iyo japo ijia, iyonayisi pet 'ate: —Jlam'ne ja iyone pi japo i'nio' ti ijwiejiete'n, 'yina ¿yot'iyi'ni ti kiak je iyo ka inijwajiet ti jla'am?

³²¿Yot'iyi'ni ti je tisiojmajyi'n kanijwajiet, siusie Injwajieti ti inijwe'el Saka Anechiyas sa'am ti Israel jika kia'lits'e'm, 'nakayi ti sekjane'yi ka je 'yakakiukiena'a? Siojopo jiliaye iniuyi wita'm ti tik'iejwata'a jlaja cruz, kia' iyojliyi i'nijmanjliyi ti iliakiyis.

³³'Najlikise ti poye ki ajnatiok ti itij'w ape'e 'ni ajnat, paj ti kilie' tomat'ipi 'nijiye ti kia'iyo.

³⁴Jakiaka'ne siojokia inetitinki yiyi jla'a kiliekie' ti Jesús tana'ni ti 'yakets'ijiap, ti iyo'ate: —Eloi, Eloi, ¿lama sabaktani? (Ti iyo'ate, Inia', Inia', ¿yot'iyi'ni ti jilik'i?)

³⁵Siojopo sekyi'i, po' japo ti ipi'yayis, sekyi'i iyoyis'ne 'ate: —¿Ma jipe'yayeyi pit? Tantajan'ni k'iye pa Elías siupa injwejlanik jiwo.

³⁶Sekyi'i ijwienjli'ne ja t'osiyi ja inkats'ili, sekyi'i ti 'yutieja'm siojo at'es ti tosijyi 'yina ilie'nit'i 'ni sisej, sekyi'i ti ijieyeyi kants'ojwa'm, 'yina iyo'ne 'ate: —Ka 'yenakiamkiunie'e pa jawoyi, ka'nesta siupa tajnin'ni k'iye Elías ti janla'ne ti yi'i jana cruz.

³⁷Pakatajak'i ti ijiatayi ti 'yakets'ijiap ti tajwijyi'n, sekyi'i Jesús 'yal'ne.

³⁸Siuti kia'iyo, sekyi'i siupa lotakinie ti tip'onajaja'm jik'ioyi jla'a 'najla'wet wuj kia'iyo its'isajank'ipe pet jakayi itiajlat pijia'm paj ti yiye ajnat'e ti its'isk'i.

³⁹Jlam'ne siojo tokis jika anechiyas Roma jlele, ti je tojwape'n siojo yi'i, ti i'wi'in ti kia'iyo ti 'ya'al, sekyi'i iyo'ne 'ate: —¡Ijiatp'aneje ti 'naka Jlas pa Sinia'!

⁴⁰Kia'iyo po 'neje japo asejnia, sek k'iejlijijyi ja takasitits'ijin'ni ti i'yenisi'ni. Japokap'ampe japo María Magdala jleliki, siu'neje jlaja Salomé, siu'neje jlaja María 'neje Santiago, 'wenayi siojo isijli, siu'neje José japo jletis.

⁴¹Japoka siojopo yamjink'ijin'nipe jlam ja Jesús, jla'yi ti iniuyisieje'ni ti yi' Galiléaja. Je japokata, 'yina 'loj 'neje siojopo asejnia ti jla'yis japoka ti yamisjink'ipe ja Jesús ti ijio Jerusalenne.

⁴²Pope ja i'nio' jle' iyo'ate José, ji'wet jlaja isi' jle' iyo'ate Arimatea, jikijmaye siunie ti yiji papo Judíojos jlosikis jiwos, 'yina kia'iyo je iliyi ti inijijwijyink'iye siupa Sinia' jika anechijiayas. Jlampa k'iejli ajnalis wujwak'i'ni siojokia jloma ti siunapo i'nio' iniwakajlanitis k'iye janak jloma ti i'nio 'wanjlijyi'n, José yam'ne ti ijioyi ja Pilato, je iyo ka ijnots'ina ti ti'yasane ki t'ajwes masa ki Jesús, ka intejk'iye.

⁴³

⁴⁴Pilato jla'am jnots'iniji'ni ti 'yijene pi iyone ti Jesús je wata'a ti 'ya'al, sekyi'i tanayijyin'ni siupa tokis jika anechiyas, ti iyone 'ate: —¿Mi ijiate ti 'ya'al?

⁴⁵Tokis jika anechiyas isiujlie ti iyo'ate: —Ji'yu, 'ya'al. Sekyi'i Pilato iyone'ne 'ate ja José: —Ijiatp'ane, mayi.

⁴⁶Jak je iyoyi siuti José yama, itiu'un kia lotakinie siukia ti yame ti jla'am itiejietap. 'Yina kiak ijiuti'ne wita'm ti yinaja'n ti taj'l ape'e jlaja jika cruz. Ijioyiji siojo a'no' pajk'i ta'a ti wakal yi'i jlaja tikijnaki ti titijikia'm, sekyi'i ti ip'ionayija'm jla'a sisaj.

⁴⁷'Yina María Magdala jleliki, jla'yiki jlaja María 'neje Santiago jaka 'neje ja José jletis, yam'ni pet ti i'yenisk'i siojo tena'a kia t'o'.