Read Iyojwa'ja Chorote San Marcos 3 Bible Online

San Marcos 3 - Iyojwa'ja Chorote bible

San Marcos 3

¹Ti Jesús yikiajlayi'iji ti ijio kiajwe japa 'najla'wet, sekjin yi'ipe siupi i'nio' jikio' t'isie'n yi'liaje.

²Siupapo Fariséojosjimpe jitiejiejwas jla'am ja Jesús isiowalisk'i'ni ti iyojonk'iye kan'wenisieje ka injwajiet paka i'nioye ka ineniji siojopa jloma ti i'nio 'wanjlijyi'n, ti ka pakaye ka intajlatisie wek.

³'Yina Jesús tanayi pak i'nio' ti iyone 'ate: —Kasit, jomet'ne jikiowe'e 'napo.

⁴Sekyi'i ti i'yasa ape'e papo ti iyo'ate: —¿Ten siupa 'esiji jla'am ka tenajaja ka tiwoki siojona jloma ti i'nio 'wanjlijyi'n? ¿Ent'a naka ni siunie ti tiniukieje pa, ni'ne ka nakaye ni siunie ti jiwet'ia tiwenaja'm pa? ¿Ma jajwiejiet, ni'ne ka i'miate ka initiajnat? 'Yina lajk'ipa ka inkiujlie.

⁵Jesús jwesie ti i'yenaja'n papo i'nio' tijwajiape'n, 'yina je ikanit'ni siupa ti je its'iuyisie ti ijwiltaja'm. Sekyi'i iyone'ne 'ate pa i'nio': —'Akajni ni akio'. Kiak iyonayi. 'Yina yaka jla'm iwo ti 'esieyiji ti ijniejieti ti 'yitk'i pa jikio'.

⁶Sekyi'i ti yama'ni papok Fariséojos, jla'yis papok Herodes[1] siupa anechiyas jikawos pet, ti iyoyisijyi'n siupa janwonisi ti iyo kanlanis ja Jesús.

⁷'Loj papo i'nio' Galilea jlele ti nojwisjink'i'nipe ja Jesús jikiusk'i pi i'niat lajlik'i, jla'yis japo t'eyasajnas.

⁸Siuti t'ijieyejayi ti je jwajla'a siupi iyo ti i'winki'n, siupapo Judea jlele ijioyisi ti iyo kan'wenis, siu'neje papo Jerusalén jlele, Idumea jlele, Jordán ti tomi ilia'm ni taj'le ni kilie', Tiro jlele, siu'neje papo Sidón jlele.

⁹It'imina ti ijliuye japo t'eyasajnas ti iyo'ate: —Wakajlanitie'ni ta'a jlaja kasejkanaye, 'nakayi ti ja ke initotisi itipe'e napo i'nio'.

¹⁰'Yaka i'winis ti je pini' papo je isis ti ijwiejiete'n, jak je iyoyiji siupapo je isis ti iyo kanses, 'yina ini'nomajayisiji ti iyo kankiejts'e ja Jesús.

¹¹Jak je iyoyiji siupuwa imose'l ti i'winatajas, yaka jla'm iwo t'opiyeyisijyi'n kiajwe 'yina tajwiyek'iji'nijne ti iyoyits'i 'ate: —¡A'am ti Sinia' jlajts'a'm!

¹²Sekyi'i Jesús isilaja puwa yiji papo i'nio' ka je tijwela ka 'najka ape'e.

¹³Yam'niji kiaka, Jesús yamajampe ape'e japa tikijnaki, sekyi'i ti tanayits'i siupapo i'yen'ni ka kiak iwone. Jak je iyoyiji'ni siuti initaja,

¹⁴pakayi'ne ti i'yejnits'i siupapo isi'mik'i itijwa'm sikioye times tom'niji, siunapo ja jla'yisa'ni siu'neje ti janjlo'ni ti janekiji'n naka inka'niye ti 'es ti janamtiyisi.

¹⁵Yikiajle'ne pa jijweye ka injwajiete'n siunapo je isis jla'yi ka inojwank'i kisie'e puwa imose'l.

¹⁶Itijwa'm sikioye times tom'niji ni nojwaja'm siunapo isi'mik'i jleyis iyo'ate: Simón siojo ti jla'am ti iyo jleye ti iyone 'ate Pedro;

¹⁷Santiago siu'neje ja ji'yini Juan, Zebedeo jilis, ti iyojinijpe 'ate Boanerges (ti iyo 'ate: “Isiumtijni jilis”),

¹⁸Andrés, Felipe, Bartolomé, Mateo, Tomás jla'yi ja Santiago, Alfeo jlas, Tadeo, siu'neje ja Simón 'neje ti tajla'm siupapo teje'yi ilia'm papo Roma jlele, ti iyoyi jika kia'lisa' napo Judíojos.

¹⁹'Yina siu'neje ja Judas Iscariote, jaka ja ti janekiaj'l ja Jesús.

²⁰Yam'niji kiaka Jesús yapilie'eje isiyi, pakayi ti ja'no'yiji kiajwe siojopa 'wuk, yi'i siupapo ijioyi. 'Yina jlam papokajle papo i'nio' ti je jlase' ti i'winayisk'i, tiwet'ianaja ka ji'wet poyeyi'ni kan'yekiujni'n ti jla'yis japo t'eyasajnas.

²¹Jak je iyoyiji siupapo ijia ti t'ijieyeyi sekyi'i iyoyistieje'ni ka inekiajlis, kajeyepa ti ijwilis ka jitiej je 'esie.

²²Jak je iyoyiji siupapo taka'neyasane pet pa Moisés jika'neyasajnaye ti tal 'niji yi'i jlaja Jerusalén, ti ijwilis ti iyo'ate: —Beelzebú, siunie imose'l jika anechiyas, nak tajleje ni jijweye siu'nie i'nio', it'imina ti 'yakajli ti iniujwank'i kisie'e siuniwa imose'l.

²³Sekyi'i tanayi papoka, ti iyone 'ate ti yijnape jiwek siu'nie: —¿Yot'iyi'ni ka imosik inojwa'n kisie'e pa imosik ti jlam ti yiji pa?

²⁴Siojona ajnat ti ini'wenakit napo anechiyasas ti yiji, ji'niayi ja ke intoyi'i, 'yaka tejets'i wita'am napo i'yena.

²⁵Kia'iyojliyi siunapo ji'wet jlele siuti tejets'i wita'm, tepa jawo ka je inetiajne'n 'yina ti tejets'i wita'am.

²⁶Kiak janwo siunie imosik siuti janik'isa siuti janta'yi ilia'm niwa imose'l, 'yina janetia'n ni imosik, 'yaka sek ja jlaja'a.

²⁷“Lajk'ipa ka ne'yi kan'yakan kiajwe japa ji'wuk siunie i'nio' ti t'on'ni, ka intajlane puwa jikijmatis siuti kiak ja ke iwone ka inajnat ka inla'nit, ijiatjliyi jla'am siuti kiak jawone jiwekie'ajana'a ka i'yaka'n puwa jikijmatis ka ijnale.

²⁸Ijiatk'i siu'nie jajwi'lase'm ti jayo 'ate, Inia' janetiajnat wikie'eyi siunie jitis iyoyi siunie iyoyi ni jike', siu'neje niwa jlamtis jiniliaja ti iyoyi,

²⁹'yina jlam pet siunie ti iliaki siojona Sinia' jikimet ti je iyo lajaye, nak ja ijiatayiji pet ti ja ke paja pet ka Sinia' inetiajnat ni jitis jawoyi.”

³⁰Jesús kiak iyo ti tamti, kajeyepa ti siupapo ijwi'il ka imosikie' paka inejyi.

³¹Paj ti 'nesajan'nipe japo ji'yijnis ja Jesús siu'neje jlaja jletis María, takasitisin'ni kisie'e ka ti'yasaja k'iye ja jlas.

³²'Yina siupapo yiyisiape'n papok ijwijlam'ne pet ti iyonisi 'ate: —Etjle pa yits'e kisie'e, jla'yis papo a'yijnis a'yijniawot 'neje inwoyisijyin'ni.

³³Jesús isiujlie papo ti iyo'ate: —¿Tempapo, siojopa tete siu'neje papo i'niayi ijwienjliyi?

³⁴Sekyi'i jitiej yikiajlayi ti tipayi siupapo tijwajiape'n ti iyo'ate: —Siu'napo, janak tete jla'yi ti napok i'niayi ijwienjliyik'i.

³⁵Kajeyepa ti siunie iyoyi ni siunie Inia' iyo ka woyi, naka ti 'yini, siu'neje ti janak 'yijnia, 'yina janaka 'neje ti tete.