Read Iyojwa'ja Chorote San Marcos 4 Bible Online

San Marcos 4 - Iyojwa'ja Chorote bible

San Marcos 4

¹Jesús yikiajlayi'iji ti taka'neyasa'n jikiusk'i siojopa tewuk iliyi. 'Yina ti je pini' papo i'nio' nojweje, sekyi'i ti yamayi siojopa kasejkana yits'e jikiusk'i pa i'niat, yamaja'm sekyi'i yiyeje'n, jlam'ne pet papo i'nio' nojwayisi kiusk'i pa i'niat.

²Sekyi'i ti iyoyi ka 'neyasajne'n papo i'nio' siupuwa 'loj ti i'yejnap jiwekie'e. Iyo'ne 'ate ti taka'neyasane:

³—K'iuyeyi siu'nie ti jayamtiyi: Pojompe pa i'nio' kawijnajnata, ya'am ti jankawijna'n.

⁴'Yina siuti yiyeyi siupa jikawijnana'wet, sekyi'i ti ijyijlitayi ti itietik'iji'n puwa jlalisi'. Po' puwa ijniujlia'm pa 'nayi, 'yina tal 'niji puwa ajwejnas sekyi'i puwaka'ne ti itiujwk'i.

⁵Ijia puwa ijniuj'li pet siupa ajnat sisajas yi'i, 'yina ti ajnat yajme'n jiwek ape'e, jak je iyoyi ka tosajats'i jak je iyo ka jwatajayi ta'a ti 'nesk'i pijia'm.

⁶Jak je iyoyiji siuti kilie' yi'i je ijwietanit ta'a ti 'yajlits'i kajeyepa ti je tosits'i puwa jijwetisi'l.

⁷Ijia 'neje puwa ijniuj'li pa ajnat k'itienis yi'i, siupuwa k'itienis ti itioye pet, sekyi'i 'yakama'a ape'e puwa iwomki, 'yina 'la'n ilian'ne, it'iminayi ti je iyo jlaye.

⁸Po 'neje puwa ijyiwit'e pet siupa ajnat ti ijiat ti 'ejts'i, 'yina kia'iyo ta'a 'neje ti 'nesk'i pijia'm, jlomas ti je iliyi ti ijliask'i pijia'm, ta'a 'neje ti iyo jlaye. Siuti iwomki ijwienjli pijia'm iyot'iyipi ti treinta puwa jla' tajla'm, po' japa setenta puwa jla', ijia puwa cien puwa jla' tajla'm.”

⁹'Yina yinayi'iji ape'e 'yina iyo'ate: —¡Siunapo jik'iot tiojwa'l po', k'iuyeyi!

¹⁰Jlampa yama'ni papo i'nio', Jesús siojopo t'eyasajnas jla'am itijwa'm sikioye times tom'niji siu'neje papo sekyi'i i'yasis'ni ti iyonisi 'ate: —¿Tepat'e ijio'weyi siukia jlamtiyi sik'ioye siunie ti jla'am ji'yejnap jiwek pa k'iejliyi?

¹¹Isiujlie papo ti iyo'ate: —Siuti asa'am Sinia' i'winki'nase'm ka intant'iejayi siuniwa yiji ni jika anechijiayas ti je 'yaka ape'e. Jlam pet siunapo 'wenayi, napok ejnape pet k'iye siuniwa ti jla'am a'yejnap jiwek.

¹²'Nakayeyi ti “Ja 'wanjliyeyi ti jan'yenis'ni, 'yina ja ke in'wenis, 'wanjliyi ka impe'yayis, 'yina ja ke intant'iejesi, ja 'nakayeyi 'neje ti ja ke iwo jlosikis ink'iejyisa', siu'neje ti Sinia' ja ke inetiajnat pa jitisa'.”

¹³Jesús iyona 'ate japo t'eyasajnas: —¿Jep'an jitijnisiek'iyi siukia ti a'yejnap jiwekie'e ni i'nio' kawijnajnata? ¿Tepat'e jawo jiat'eje ka 'najanayi siuniwa ijia ti jota ka ijwi'lase'm?

¹⁴'Yejne'n, ja 'yakajanitk'ijini'ne ask'ioye: Siupa i'nio' 'yut isia'm japa inseliaki, nak a'yejnap ni siunie ijwi'il niwa Sinia' jlamtis.

¹⁵Po' siunapo iyo'ate jana inseliaki siojona ijniujlia'm siupa 'nayi: 'yina ipi'ya ni inamtik napoka, tal 'niji ni imosik ti sitiejiejwa, sekyi'i ijialayi siunie ti yintajets'i niwa jlosikis.

¹⁶Siunapo ijia iyoye pet 'ate jana inseliaki ti ijniuj'li siunie ajnat sisajas yi'i; ipi'ya niwa Sinia' jlamtis, 'yina ipiniyits'i ti siunie ti itiejes,

¹⁷'yina ti siuti 'yiniye ka jijwetisi'l je inekk'isia'm, ji'niayi je itioyi'ik'i, jak je iyoyiji siuti yiyetaja ni inkajejlasaye, ti Sinia' jlamtis ti it'imina ti inilayitisi ki iyo niwa a'tisk'iji'n, sekyi'i ti initiajnata'aja ni jitienkiujnieye ti 'es.

¹⁸Po' napo ijia ti iyo'ate siojona inseliaki ti ijniuj'li siunie ajnat ti k'itienis yi'i, ipi'ya niwa inamtis ti isis napoka,

¹⁹jitiejli'yi niwa wask'i'nelaja i'wi'in ape'e 'ni ajnat, 'yina niwaka'ne niwa 'yakajmank'iji'n, ijliak'alisijijyink'iye jana wikiniet'aj ti iyo kan'wenis, siu'neje niwa ijia wask'i'nelaja. 'Yina niwaka'ne ti ijiojwa'm, sekyi'i ti ip'io'n ape'e siuniwa Sinia' jlamtis ti isis, jla'yi ti niwaka ti je iyo jlaye.

²⁰'Yina jlajmiliet, po 'neje pet siunapo iyo 'ate siojona inseliaki ti ijniuj'li siunie ajnat ti 'ejts'i, 'yina its'iuye niwa Sinia' jlamtis, jla'yi ti 'es ti isimis ilia'm, siu'neje ti iyo jlaye. Po' niwa jla' treinta, ijia niwa setenta niwa jla', ijia niwa cien niwa jla' tajla'm iyo ni siuniwa a'yejnap jiwek, niwa jla' nojwa'm.

²¹Iyoyejempe'eje 'ate ja Jesús: —Tepi iyo ni i'nio' ti name jana jika kates, ¿ma jamp'o'n ape'e? Ya'am ajwel'ni jeyi. ¿Ni'ne ka inen kiajwe pa jlo'wet? Siunie janwone je int'ayiji'n, jantonit pijia'm ti janen pijia'm, 'nakayi ti jlal jatojwak'i.

²²Ijiate, kiak iyoyiyi pet siunie ti po' ni tip'ona ape'e, je ijiate ka je tok'itieje. Jlam pet ti po' siunie ti je 'yaka ape'e ti tistiejenitie kiak iyojliyi je ijiat ka je t'akajanitie ape'e.

²³¡Siunapo jik'iot tiojwa'l po' k'iuyeyi!

²⁴Yine ape'e ti iyo'ate: —'Yena siukia iyo ki jipe'yaye. Ent'a ijiatt'iyiji ti jik'iuyeyi, ni'ne ka je ijiatayi ka k'iuyeyi, nak Inia' jajnojlietiji siunie janwe'na'm naka ni siunie 'najankijnieye, 'yina jlajma iwomjliyijinie'e.

²⁵Siunie ti its'iuye siukia ti amtiyi, Inia' iwomjliyijinie'e pet siunie iyo ni 'yijene. Jlam pet siunie je its'iuye siunie ajwe'el, Inia' kiak ja iwo'ojyi pet jajnale ni siunie jwamjla'a ti 'yijentaja pet.

²⁶Iyoyejempe'eje 'ate ja Jesús: —Siunie Sinia' jika anechijiayas nak a'yejnap siunie i'nio' iyo'om siojona inseliaki.

²⁷Pi kilie' yi'i imia'ni, ni'ne ti je imia'a, ajnaj kia'iyojliyi, siojona inseliaki yi' ajnat kiajwe, yamjliyi pi iyo ti jantekil. Jlomas 'nak nojwaja'm 'nesak'i pijia'm, 'yina jlam'ne siupa iyo pak je 'yijene paka iwone.

²⁸Ti tajla'm ni ajnat, iyo jla'm siupi iyo ti 'nesk'i pijia'm. Jak je iyoyiji siuti yiyetak'i pijia'm inianak'i kisie'e niwa jitiajlas, paj ti 'nakaye pet ti 'yaka niwa t'aka jla'a iwomki, ts'ijiye iyo jlaye.

²⁹Sekyi'i ijliena'a ni siunie jikimet ni inwomik, 'yaka wakal.

³⁰Jesús iyo 'neje 'ate: —¿Tent'i paka 'yiniyeyi ni jika anechijiayas ni Sinia'? ¿Tent'i paka i'yejnap jiwekie'e?

³¹Janak a'yejnap jiwek jana mostaza jlo' jlase' ti t'otiejata isia'm. 'Yina ape'e 'ni ajnat, poyeta niwa ijia ti kia'iyo ti sajmela'aja'n, 'yina jla'am ijiatayi ti je wujwe.

³²Pa nojwaja'm puwa jlomas yiyek'i pijia'm, 'yina yamjliyi ti ijliask'i'ni pijia'm, jak je iyoyiji paj ti wujwak'i 'yakama ape'e niwa ijia a'la' ti kia'iyo wusietak'iji'n pet, jak je iyoyiji siupuwa ajwejnas iyoye jlopisieje, kajeyepa ti 'lap'ijia'm.

³³Jesús kiak iyone ti iyoyeta jika'neyasajnayeja', ti ijwi'il niwa Sinia' jlamtis. 'Loj siupuwa wask'i'nelaja i'yejnap jiwekie'e iyoye'ate siu'niwa, 'yina je istiejenitk'iji'n k'iye papo i'nio' 'nakayi ti ja intant'iejesk'i.

³⁴Jak je iyoyiji siuti 'yiyasajne'n papo je ijlie'n pet niwak siuniwa ti jla'm i'yejnap jiwek, jlam pet siuti 'najli japo t'eyasajnas, je kiak iyone, 'nak ijniejietak'i pet k'iye ti ijwijla'm.

³⁵Siupa ti k'iejli ajnalis wujwak'i'ni, japak jloma Jesús iyone 'ate japo t'eyasajnas, ti i'yase: —Naja'ni jatiuma i'niat ji'wechaja.

³⁶Ijiatjliyi, sek iliyeyisi'i papo ti yam'ni, yinayisi ja Jesús siojopa kasejkana jlam yiji'ni ta'a. Jlam puwakajle puwa ijia kasejkanayis ti ijia'an.

³⁷Jlampa iyoye 'ate pak jlajwu ti ijiat ti wujwi, ti pejla ijlinik'i jak je iyoyiji ka je iwakiayi pijia'm pa i'niat, 'yina ti iyo ji'wukijlimpejesa' paj ti i'niat itiyajajam'ni japa kasejkana.

³⁸Jesús imia'a pakayi 'niji jiweje japa kasejkana, jletik yi'n ape'e siupa ji'wet papo jiwos. Sekyi'i ti 'yujwatayis'ni ti iyonisi 'ate: —¡Saka'neyasajnawo! ¿Jet'i kas'we'en ti janajk'isia'm?

³⁹Jesús takasit'ne ti ijliuye pa jlajwutiok, siu'neje pa i'niat ti iyone 'ate: —¡Leyi! ¡Kama! Netianak'i pa jlajwu, yaka jla'm iwo 'yakamaja pa jloma.

⁴⁰Sekyi'i ti iyonayi 'ate japo t'eyasajnas: —¿Yot'iyi'ni ti je injweyeyits'iyi? ¿Lajt'e astankiujnieyeja'?

⁴¹Je jlase' pa iyo ti jnots'ijnits'i, jak je iyo ka je inwoyisi 'ate ti ininekiajlisi: —¿Tent'i 'ni i'nio'? ¡Siuti jlajwu its'iuye, i'niat kia'iyojliyi!