Read Iyojwa'ja Chorote San Marcos 5 Bible Online

San Marcos 5 - Iyojwa'ja Chorote bible

San Marcos 5

¹Ijiatjliyi, 'nesajan'nipe i'niat ji'wechaja yi'i japa ajnat jle' iyo 'ate Gerasa.

²'Yina tisiojmajyi'n jiwekie'e ja Jesús, siupa i'nio' jitiej je 'es ta'a ti yiyijink'iye, ti tajla'm puwa a'no'l.

³'Yina ti puwaka ti iyo ji'weta'. Je ti'niejenaja paka tiwonaja ka tilie'nitie

⁴'wanjliyi ka wikijnies tilie'nitieje je toj'milia'm 'yina yisitamk'i'ni, ikajlitieje ti titijwajata'a puwa jikioye jisietis 'neje, lajk'ipa ka ne'yi paka inkal siupi jiwet'ia iyo.

⁵Siuti ajnaj siu'neje ti jloma, pa yikialk'i'ni tikijnakiyisia'm, siu'neje puwa a'no'l ti yikiajli'ni. Tan'ni pi iniuk'i'ni sisajas jijwa'al puwa inikiene ti ininatit'ni.

⁶Siuti to'ilia'm ti i'wi'n ilia'm, sek tajla'a ti t'osi ilia'm, yiyi ti t'akosjlete'l itiyeyijin kiajwe.

⁷Iyonayi 'ate ti tajwijyi'n: —¡Ká 'ok'inie'e Jesús, Sinia' ti lajk'ipa ka ijnojliji jlajts'a'm! ¡Anip'elisi'najapeje pa Sinia', ka je k'iejliyijna'a paka awonk'i!

⁸Ji'lij kiak iyone kajeyepa ti Jesús iyone 'ate pak imosik yiji pa i'nio' ti ijliuye kisie'e: —¡Imosik! ¡Tajli 'ni i'nio'!

⁹Jesús iyone 'ate ti i'yase'n pa i'nio': —¿Tepa e'e ijio'we? Isiujlie ti iyo'ate: —Yi'i iyo'ate Tokis 'Loj, kajeyepa je kasjlase'.

¹⁰Sekyi'i inip'elisini'ni ja Jesús ti iyo'ate: —¡'Wanjliyijna'a ka jlo'ni siu'niwa imose'l yi' iwia'm, 'yina ká atajlijninie'e siujlie'e ajnat!

¹¹Yi'i japa tikijnaki, sekyi'i puwa ijnisies jitio' ti its'ipk'ijin'ni.

¹²Siupuwa imose'l inip'elisinisi ja Jesús ti iyonisi 'ate: —Kasjlojwa'm niwa ijnisies jitio' ka ijiokia'm.

¹³'Yina Jesús isiujlie'ne, pakayi ti iniuyek'i kisie'e puwa yiji pak i'nio', sekyi'i 'yuyejamk'i puwak ijnisies jitio'. Puwaka ijnisies jitio' dos mil, t'osiyeyisk'i isia'm pi tikina, sekyi'i ti tisiojmayisia'm japa i'niat, 'yina no'we'ne ti yimk'anaja'n puwaka.

¹⁴Sekyi'i'ne siupapo i'yena puwak ijnisies jitio', ti i'winayis ti kia'iyo, jnots'ijnits'i, sekyi'i ti t'osiyeyi papo i'nio' ti ijwile yi'i japa isi', ijiuti siupapo yi' kisie'e ti je yiji japa isi', ti ijwilk'i siupa jiwet'ia iyoyi. Yama'ni papo i'nio' ti t'ijieyeyisi, i'yenayisi siupi iyo.

¹⁵Jak je iyoyi ti yiyeyisi siupi yiji'nipe ja Jesús, i'winayisi siupa i'nio' siupi jitiej je 'es ti je tijwajli kiu', 'yaka jijwejlikiejimpe ti yiji'n, je pa iyoye 'ate ti pajk'i ti je 'es paka iwo, yaka jla'm iwo ji'wu' poye, siu'neje ti i'nioye, 'yina jnots'ijnits'i'ne papo i'nio'.

¹⁶Siupapo i'nio' i'winaja ja Jesús siupi iyone pak i'niojimpe ti jitiej je 'es, siu'neje pa iyo puwak ijnisies jitio' ti no'we, papoka ti ijwijla'm papo ijia.

¹⁷Sekyi'i papo i'nio' iyonisi'ne 'ate ti ijliuyis: —¡Anip'elisina'a, 'esiji ka tajli siujlie'e saka ajnat!

¹⁸Ti Jesús iyo kanapili japa kasejkana ti janek, siupa i'nio' jlam pa 'esie, iyone'ne 'ate ja Jesús ti inip'elisine: —Awotaja kayik ajak'i ka woyi.

¹⁹'Yina Jesús isiujlie ti iyo'ate: —'Yaka ja jit'inie'e. Maj jiwek ka api, apili papo a'wet jlele, siu'neje papo a'lejwas, jwejla'm wikie'eyi siunie Saka'niona iyo'na ti injwajiet siu'neje ti imp'elisi'n.

²⁰'Yina yam'ne pak i'nio' ti ijwilayi papo i'nio' yiji japa ajnat jle' iyo'ate Itijwa'm Sikioye Isi'il siupa iyo ja Jesús ti ijwiejiet. Jla'am jnots'inijits'i'ni ti 'yijenayisi pi iyonisi.

²¹Ti Jesús yapiliejempe'eje i'niat ji'wechaja, yi'i siupa taj'le ti 'nelanjie'e, ti yiji japa kasejkana, ti yiyeyi siupa ijiojwi, 'yina je pini' papo i'nio' initotisiji ts'e jikiuts'i japa i'niat.

²²Pakayik'i'ne ti 'nes siupa ti kia'iyo tijna'yi siojopa 'wuk 'najla'wet, jle' iyo'ate Jairo. 'Yina i'win jiwek ja Jesús, sekyi'i t'akosjlete'l itiyeyijin kiajwe

²³ti iyone 'ate ti wuj ti inip'elisine: —Yase' jlaja je pi i'niokiyeyi. Nam kiu' wat ijyik'i. 'Esiji ka akioye e'n ape'e 'nakayeyi ti ja 'esie siu'neje ka 'wasana'.

²⁴Jesús yamk'i'ne, ka kia'iwo ka piniye papo i'nio' yamk'i, 'yina jlam sek totiejayik'i'ni 'najk'i.

²⁵Siupapo i'nio' po' japa i'nioki yiji ti ji'woyis je netiank'i. 'Yina itijwa'm niwa sikioye times tom'niji puwa najkapis yiji ti kia'iyo ti je 'es.

²⁶'Yina itijwits'i papo inkakiewos ti ijiotajats'i, wuj wat ti p'ijliusie, jikijmatis itijwe'e jiwekie'e ti iwin'ni jitipe'e ka pakayeyi ka injwa', 'yina jla'am iniwunitjli pijia'm pa jikie' iyo.

²⁷'Yina ti ipi'yayik'i'ni jikiowe'e papo ti jitiej ijiutie ja Jesús, siuti isiesa'a pa jwamjla'a ja Jesús ji'wu' ti tajlap ji'wechaja.

²⁸Kajeyepa ti yine 'ni jikiowe'e ti iyo'ate, “Yamk'emt'itie ka jwamjla'aja paka itiej pa ji'wu' ka isiejts'e, sekjane'yi ka ts'esiena'a.”

²⁹Ijiatjliyi jlampa itimayi ti isiejts'e, ka kia'iwo ka inejyi puwa ka jlomasa' ti netianak'i pa ji'woyis, inik'iuye ti 'es.

³⁰Jesús iliatk'i pa jijweye ti iniu kisie'e, sekyi'i ti tejeye ilia'm papo i'nio' ti i'yasa'm ti iyone 'ate: —¿Ten siupa isiejts'e 'ni i'yu'?

³¹Sekyi'i t'eyasajnas isiujlie ti iyo'ate: —¿Yot'iyi'ni ti kiak jiwo, jlam'ne ji'we'en napo i'nio' ti je pini' ti inipa'nomajasi?

³²'Yina je iliyi ti i'yentajayin'ni siupi isiejts'e.

³³Sekyi'i siojopa i'nioki kititiyeyi'ni lapakawo ti jnots'ijni kajeyepa ti jitiej wujk'i siupa iyoyi. Sekyi'i ti yamayi ti t'akosjlete'l itiyeyijin kiajwe, ijwijla'm wikie'eyi siupi iyo pa jiwet'ia, siu'neje pa iyo ti yi'its'ilia'm pa ji'woyis.

³⁴Sekyi'i Jesús iyone'ne 'ate: —Jla yase', lapakawo ti atankiujnieye po', it'imina ti i'nes. 'Esiji jijwajyi ni alaye iyo, kama ka ak.

³⁵Je ilitieje'eje ti takamtijniene japaka i'nioki, ti 'nesajan'nipe papok i'nio' ti takajwejlane pa Jairo, ti tal ji'wete, sekyi'i iyonisi'ne 'ate: —Pajk'i ti 'ya'al jakia ase' masa. ¿Yot'iyi'ni ti je jiliyi ti jlalas'ni 'ni Saka'niona?

³⁶Jesús je iyo kank'iuye papo i'nio', 'yina iyone'ne 'ate pa Jairo: —Ke ijnots'ijnina'a, janajataja jla'am ti jawo atankiujnieyeja'.

³⁷'Yina je iyo ka 'lojwa papo ka jla'yisa', japokatajimpe jla'm japo Pedro, Santiago, siu'neje ja ji'yini Juan, ti 'yunink'i lapakawo ti tane.

³⁸Ti 'nesajan'nipe ji'wete pa Jairo, pesiejayi papo i'nio' ti tajwits'iji'n, ijia papo ilisaniji jiwek ti yape'n.

³⁹'Yuyeyi papo i'nio' yi 'wuk kiajwe, sekyi'i iyone'ne 'ate: —¿Yot'iyi'ni ti inwojoyeyija'm, ti jlajwiyets'iji'n? Jlam'ne je 'ya'al jana jlosie, najata wek jla'am imia'a.

⁴⁰Tiliakikiejin'nipe ja Jesús ti tipe'yakie ti kia'iyo, sekyi'i papoka jla'am papo jiniewot japa jlosie, siu'neje papo jla'yis ta'a, jla'am ti tane ti 'yuyisi siupa yi'i japa jlosie masa.

⁴¹Sekyi'i isim'ne jikio'yi ti inijien pijia'm ti iyone 'ate: —Talita, kum. (Ti iyo'ate: “Jlosie, awo'na 'ate, neppijia'm.”).

⁴²Je yiji puwaka jlomasa' ti isiejimpe japak jlosie ta'a ti 'esiji ti t'iskiujni'n. Jika najkapis itijwa'm niwa sikioye times tom'niji japak jlosie, 'yina siupapo i'nio' jnots'ijnits'i siuti kia'iyo.

⁴³'Yina Jesús ijwijla'm papo i'nio' ka je inkamis ape'e pi siupa iyone, ka je tijwela, ti iyone 'ate: —Ke sijwelanie'e. Jlam wonayi'ni 'ate ka wenajia'm paka intojw.